Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2016

 A TOLI DI SIKIIFI A FESISE | FA A DU KON TAKI A BEIBEL DE ETE?

Wan sani di i mu sabi

Wan sani di i mu sabi

Nawan fu den buku di sama sabi enke santa buku e doo a Beibel. Buku á de di kengi sama libi enke a Beibel. A Beibel na a moo gaandi buku di de. Boiti dati, buku á de di sama ondoosuku enke a buku ya. Sama taki omen sani fu a Beibel tu.

Wantu ondoosukuman e denki taki den sani di sikiifi aini a Beibel, a ná den sani di Gadu be meke sama sikiifi poti aini en Wowtu. Wan ondoosukuman di e ondoosuku den keliki taki: „Wi á poi taki sama poti den sani di be sikiifi aini a Wowtu fu Gadu soifili aini den Beibel di wi abi aini a ten ya. Den Beibel di sama abi nownow lai anga fowtu. Te i luku den sani di be sikiifi aini den fosi bukulolo anga den sani di sikiifi aini den Beibel di sama sikiifi bakaten, da wi e si taki a dunsudunsu sani kengi.”

Fu di son sama abi wan taa biibi, meke den e denki taki a ná Gadu meke sama sikiifi a Beibel. Wan fu den sama ya a Faizal. Den famii fi en á be e go a keliki. Den be taigi en taki a Beibel a wan santa buku, ma a omen sani den kengi aini. Na a sani de meke te sama be e taki anga Faizel fu den sani di sikiifi aini Beibel, a á be e biibi. Faizal taki: „A ná a fosi Beibel den abi. Sani kengi aini den Beibel di den abi nownow.”

Ma u mu booko wi ede taki sama kengi den sani di sikiifi aini Beibel? Meke u taki fu dii akisi: Yu o biibi den sani di Beibel paamisi, efu yu á sabi efu den sani de be sikiifi aini den fosi Beibel? (Romesama 15:4) Son leisi u mu du wan pelensipali sani a wi osufamii, u wookope anga u keliki. Efu den Beibel fu a ten ya lai anga fowtu, yu o wooko anga den leli fi en te i mu du den sani ya?

Winsi fa u ná abi den fosi bukulolo fu Beibel, tokuso u poi ondoosuku dunsudunsu fositen bukulolo fu Beibel. Fa a waka den bukulolo ya á poli, winsi sama be wani poli efuso kengi den sani di sikiifi aini? Fa a poli di den bukulolo ya á poli, sa meke i biibi den sani di sikiifi aini den Beibel fu a ten ya? Meke u luku den piki fu den akisi ya aini den taa artikel di e taki fu a Beibel.