Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yanuari 2016

A wooko di wi e wooko anga Gadu e meke u piisii

A wooko di wi e wooko anga Gadu e meke u piisii

„Wi e wooko makandaa anga Gadu, neen meke wi e begi u fu wi á feegete saide Gadu soi u bun-ati.”2 KORENTESAMA 6:1.

SINGI: 75, 74

1. San Yehofa e du winsi fa en na a Moo Hei Gadu?

YEHOFA na a Moo Hei Gadu. Neen meke ala sani. Ná pikin koni anga makiti a abi. Baka di a yeepi Yopu fu fusutan a sani ya, neen Yopu taigi en taki: „Mi kon si taki sani á de di yu á poi du. Sama á de di poi tapu i fu du san i wani” (Yopu 42:2). Yehofa poi du ala den sani di a abi a pakisei. A ná abi sama fanowdu fu yeepi en. Ma fu di a lobi taa sama, meke ai gi den a okasi fu den yeepi en du den sani di a abi a pakisei.

2. Sowtu gaan faantiwowtu Yehofa gi Yesesi?

2 Yehofa be meke Yesesi fosi a meke den taa sani. Neen Yehofa gi a Manpikin ya a okasi fu yeepi en meke ala den taa sani (Yohanisi 1:1-3, 18). A apostel Pawlesi be sikiifi fu Yesesi taki: „Bika neen na a sama di Gadu teke fu meki ala taa sani a hemel anga goontapu, den sani di u poi si anga den sani di wi á poi si, winsi a kownu, heiheiman, tiiman, efuso taa makiti.  Neen Gadu koboloiki fu meki ala taa sani, a fi en ede den sani ya meke” (Kolosesama 1:15-17). Boiti taki Yehofa gi en Manpikin wan gaan faantiwowtu, a meke sama sabi tu sowtu faantiwowtu a gi en. Ná pikin hei Yehofa hei Yesesi!

3. Sowtu wooko Yehofa be gi Adan? Fu saide a be gi en a wooko ya?

3 Yehofa e meke libisama wooko anga en tu. A be gi Adan a wooko fu gi ala den meti wan nen (Genesesi 2:19, 20). Pakisei fa a be switi gi Adan di a be e du a wooko ya! A be e luku fa den meti tan anga san den be e du. Bakadati a be e gi den wan nen. A Yehofa meke ala den meti ya, neen meke enseefi be sa gi den wan nen. Ma fu di a be lobi Adan, meke a be gi en a wooko ya. Gadu be gi Adan a wooko tu fu meke a hii goontapu toon wan paladeisi (Genesesi 1:27, 28). Ma bakaten Adan á be wani wooko anga Yehofa moo. A sani ya be tyai ogii gi en anga den bakapikin fi en.Genesesi 3:17-19, 23.

4. Fa taa sama be wooko anga Gadu fu du den sani di a be abi a pakisei?

4 Bakaten Gadu be meke taa libisama wooko anga en tu. Nowa be meke wan ark di be kibii en anga en osufamii di a gaan wataa be kon. Mosesi be puu den Islayelisama a katibo a Egepte. Yowsuwa be tyai den Islayelisama go aini a Paamisi Kondee. Salomo be meke a tempel fu Yehofa aini Yelusalem. Maliya be toon a mma fu Yesesi. Ala den sama ya be wooko makandii anga Yehofa fu du den sani di a be abi a pakisei.

5. Sowtu wooko Gadu gi u? Saide a á be de fanowdu fu Yehofa gi wi a wooko ya? (Luku a fowtow na a bigin.)

5 Aini a ten ya, Yehofa wani u du ala san u poi fu holibaka gi a Kownukondee. A omen sani u sa du aini a olikanisâsi te wi e dini Yehofa. Winsi fa ala wi á poi du aseefi sani, tokuso ala u poi peleiki a bun nyunsu fu a Kownukondee. Yehofa be sa du a wooko ya enseefi. A be sa de a hemel anda e bali taki anga wi a goontapu ya. Yesesi taki Yehofa be sa meke den siton seefi taki anga sama fu a Kownu fu a Kownukondee fi en (Lukasi 19:37-40). Ma Yehofa gi wi a okasi fu „wooko makandii” anga en (1 Korentesama 3:9). A apostel Pawlesi be sikiifi taki: „Wi e wooko makandaa anga Gadu, neen meke wi e begi u fu wi á feegete saide Gadu soi u bun-ati” (2 Korentesama 6:1). A wan gaandi taki Yehofa e meke u wooko anga en. Meke u luku fu saide a sani ya e meke u piisii.

A WOOKO DI WI E WOOKO ANGA GADU E MEKE U PIISII

6. Fa a fosi Manpikin fu Gadu be e fii di a be e wooko anga en Dda?

6 Den sama di e wooko anga Gadu e piisii. Fosi a fosi Manpikin fu Gadu be kon a goontapu a be taki: „A mi na a fosi sani di Yehofa meke . . . Mi be e wooko anga en enke wan sama di koni fu du en wooko. Mi be e meke ai piisii ala dei. Ala yuu mi be e piisii fu di mi be de anga en” (Odo 8:22, 30). Yesesi be e piisii di a be e wooko anga en Dda. Den sani di a be e meke, be e meke ai fii bun. A be sabi tu taki en Dda lobi en. Ma fa a de anga wi?

I si enke wan wooko de di switi moo a leli di wi e leli sama den tuu toli fu Beibel? (Luku paragraaf 7)

7. Saide meke wi e piisii te wi e peleiki?

7 Yesesi taki wi e piisii te wi e gi taawan sani anga te taawan e gi u sani (Toli 20:35). U be piisii di sama be leli wi a waaleiti. Ma saide meke useefi e piisii te wi e leli taa sama a waaleiti? Bika wi e si fa den e piisii te den fusutan san Beibel e taki anga te den e toon Yehofa mati. Wi e piisii tu te wi e si fa den e kengi a fasi fa den e denki anga a fasi fa den e libi. A  peleikiwooko bun moo iniiwan taa wooko di u be sa du. Wooko á de di e meke u piisii enke a peleikiwooko. Ai yeepi den sama di toon Gadu mati fu fende teego libi.2 Korentesama 5:20.

8. San son sama taki fu a piisii di den e piisii fu di den e wooko anga Gadu?

8 Te wi e yeepi taawan kon sabi Yehofa, da Yehofa e piisii. Boiti dati, u sabi taki a wooko di wi e du e bigi gi en. A sani ya e meke wi e piisii. (Leisi 1 Korentesama 15:58.) Marco di e tan a Italiyakondee taki: „Ná pikin piisii mi e piisii, bika mi sabi taki na ala san mi poi mi e du gi Yehofa. A ná wan sama mi e wooko gi di o feegete bakaten san mi du gi en.” Franco di e tan a Italiyakondee tu, taki: „A Wowtu fu Yehofa anga den taa sani di ai koboloiki ala dei fu gi u leli, e soi u taki a lobi u. Yehofa e soi u taki ala den sani di wi e du gi en e bigi gi en, winsi wi e si den sani de enke lawlaw sani. Na a sani ya meke a wooko di mi e wooko anga Gadu e gi mi piisii aini mi libi.”

TE WI E WOOKO ANGA GADU, WI ANGA EN ANGA TAA SAMA E TOON MOO BUN MATI

9. Fa sani waka di Yesesi be e wooko anga Yehofa?

9 Te wi e wooko anga wan sama di u lobi, da wi anga en e toon moo bun mati. Wi e kon sabi fa a de anga san a man du. Wi e sabi san a wani du aini a libi anga fa ai meke moiti fu du den sani de. Kande a omen miliyun yali Yesesi wooko anga en Dda. A wooko di den wooko makandii a ten de, meke den kon moo lobi denseefi. Neen meke sani á de di o poli den. Yesesi yeepi u fu fusutan a pisi toli ya di a taki: „Mi anga Nda na a wan” (Yohanisi 10:30). Yesesi anga Yehofa be e libi na a wan. Ala den tu man be e wooko switi anga makandaa.

10. Saide wi anga Gadu anga taawan e toon moo bun mati te wi e peleiki?

10 Yesesi be akisi Yehofa fu kibii den disipel fi en. Saide? A be taki: „A so den sa de wan tu leti enke fa mi anga i na a wan” (Yohanisi 17:11). Te wi e libi enke fa Gadu wani, efuso e du a peleikiwooko, da wi e moo fusutan den bun manii di a abi. Wi e fusutan saide u mu fitoow en. Wi e fusutan tu saide u mu du sani enke fa a wani. Te wi e kon koosube a Gadu, da enseefi e kon koosube a wi. (Leisi Yakowbesi 4:8.) Wi anga den baala anga sisa fu wi e toon moo bun mati tu, bika a den polobelema di e miti u e miti den. A den seefi sani e meke wi e piisii. A den seefi sani u wani du aini a libi. Wi e holidoo makandaa tu. Octavia di e tan a Ingiisikondee taki: „A wooko di mi anga Yehofa e wooko e yeepi mi fu toon mati anga den baala anga sisa.” A sisa ya taki a fu di en anga den taa baala anga sisa e meke moiti fu du aseefi sani meke den e toon mati. A so wi e fii tu. Te wi e si den moiti di den baala anga sisa fu wi e du fu meke Yehofa piisii, da a sani de e meke wi anga den toon moo bun mati.

11. Saide meke wi anga Yehofa anga den baala anga sisa fu wi o toon moo bun mati aini a nyun goontapu?

 11 U lobi Yehofa anga den baala anga sisa fu u. Ma aini a nyun goontapu wi o moo lobi den. Pakisei fa a o switi te wi o wooko makandaa aini a ten di e kon! Wi o bali wadaa gi ala den sama di o kon a libi baka na a ten de, da wi o yeepi den fu kon sabi Yehofa. Wi o meke a goontapu toon wan paladeisi. A o switi te wi o wooko makandii a ten de. Saafisaafi den sondu fu wi o gwe te Yesesi o tii enke Kownu. Libisama anga Yehofa o toon moo bun mati. A ten de Yehofa o „gi ala sani di de a libi san den wani”.Psalm 145:16.

A WOOKO DI WI E WOOKO ANGA GADU E KIBII WI

12. Fa a peleiki di wi e peleiki e kibii wi?

12 Wi abi fu e meke moiti fu wi anga Yehofa á poli. Fu di wi e libi aini Saatan goontapu anga fu di wi abi sondu, meke efu wi á luku bun, u sa bigin denki efuso du sani enke den sama fu a goontapu ya. Kon u taki yu e suwen a wan liba di e lon, ma a ná a se pe i wani go a wataa e lon go. Yu abi fu meke moiti fu suwen go na a se pe i wani go,efuso a wataa o tyai i go a pe a wani. A leti so u mu feti anga a goontapu fu Saatan efu wi á wani du san a wani. Fa a peleiki di wi e peleiki e kibii wi? Te wi e yeepi sama fu kon sabi Yehofa anga den sani di sikiifi aini Beibel, da a sani de o yeepi u fu wi á poti pakisei a sani di sa swaki u biibi. Ma a o yeepi u fu poti pakisei a den moo pelensipali sani fu a libi (Filipisama 4:8). A peleiki di wi e peleiki e taanga a biibi fu u, bika ai membee wi a den sani di Yehofa paamisi u. Ai membee wi fu libi enke fa Yehofa wani. Ai yeepi u tu fu abi den manii di de fanowdu fu a goontapu fu Saatan á fende u koli.Leisi Efeisesama 6:14-17.

13. San wan Kotoigi fu Australiyakondee taki fu a peleikiwooko?

13 Te wi e peleiki, e sutudeli efuso du sani gi taawan aini a kemeente, da den sani ya o kibii wi, bika u ná o poti pakisei tumisi a den polobelema fu u. Joel di e tan a Australiyakondee taki: „A peleikiwooko e yeepi mi fu holi a pakisei aini sowtu ten wi e libi. Ai yeepi mi fu mi á feegete den polobelema di e miti sama. Ai yeepi mi tu fu poti pakisei a den wini di mi fende fu di mi wooko anga den sani di sikiifi aini Beibel. A peleikiwooko e yeepi mi fu mi á fii miseefi. Ai yeepi mi tu fu fitoow Yehofa anga den baala anga sisa fu mi.”

14. Saide meke u sa taki a yeye fu Gadu e yeepi wi te wi e peleiki?

14 A peleikiwooko e yeepi u tu fu si taki a yeye fu Gadu de anga u. Kon u taki a yu be abi a wooko fu gi den sama na a pisi pe yu e tan beele. Sama nai pai i fu du a wooko ya. Anga i moni yu e bai den sani di yu abi fanowdu fu du a wooko ya. Boiti dati, gaanse sama á wani a beele. Son wan fu den e buuse i fu di yu e tyai en kon gi den. On langa i be o du a wooko ya? Kande a á be o teke langa fosi i fika a wooko, bika i be o fii booko-saka. Tokuso a omen yali gaanse fu wi e peleiki, winsi fa wi e koboloiki u moni anga u ten fu du a peleikiwooko. Winsi sama e lafu u efuso den ati e boon a wi, u nai gi abaa. A sani ya e soi taki na a yeye fu Gadu e yeepi u.

A WOOKO DI WI E WOOKO ANGA GADU E SOI TAKI U LOBI EN ANGA TAA SAMA

15. Fa a peleiki di wi e peleiki e soi taki wi e holibaka gi den sani di Gadu abi a pakisei?

15 Fa a peleiki di wi e peleiki e soi taki wi e holibaka gi den sani di Gadu abi a  pakisei? Di Gadu be meke libisama, a be meke den fu libi fu teego. A pakisei fi en á kengi di Adan sondu (Yesaya 55:11). Gadu seeka sani fu yeepi libisama fu den kon fii fu sondu anga dede. Fa a du a sani ya? A meke Yesesi kon a goontapu kon dede gi u. Efu libisama wani fende wini fu a sani ya, da den mu aliki Gadu. Neen meke Yesesi be soi libisama san Gadu wani den du. A be taigi den disipel fi en fu du aseefi sani ya tu. Te wi e peleiki gi sama, da a wooko wi e wooko anga Yehofa, bika wi e yeepi sama fu kon fii fu sondu anga dede.

16. Fa a peleiki di wi e peleiki e soi taki wi e wooko anga den tu moo gaan weiti fu Gadu?

16 Te wi e soi sama san den mu du fu fende teego libi, da wi e soi den taki u lobi den. Wi e soi Yehofa taki u lobi en tu. „A wani ala sowtu sama kon fii, den mu sabi a waaleiti soifili tu” (1 Timotiyesi 2:4). Di wan Faliseiman be akisi Yesesi san na a moo gaan weiti fu Gadu, neen Yesesi piki en taki: „’I mu lobi i Gadu Yehofa anga i hii ati, i hii libi anga ala i fusutan.’ A disi na a fosi anga a moo gaan weiti. Du fu tu weiti de enke a fosi wan, dati na: ’I mu lobi taa sama enke fa i lobi iseefi’” (Mateyesi 22:37-39). Te wi e peleiki a bun nyunsu, wi e holi useefi a den weiti ya.Leisi Toli 10:42.

17. Fa yu e si a gaandi di yu abi fu paati a bun nyunsu?

17 Moo so gaan sani á de! Yehofa gi u wan wooko di e meke u piisii. A wooko ya e yeepi u fu kon moo koosube neen anga taa baala anga sisa. Ai yeepi u tu fu wi anga en á poli. A peleikiwooko e yeepi wi fu soi Gadu anga taa sama taki u lobi den. Den sama di e dini Yehofa a goontapu ya a ná aseefi. Ma winsi u gaandi efuso yonkuu, winsi u gudu efuso e pina, winsi u taanga efuso swaki, ala wi e meke moiti fu taigi taa sama san wi e biibi. Wi e denki enke Chantel fu Faansi di be taki: „A Moo Hei Gadu fu hii goontapu, a Gadu di meke ala sani, a Gadu di e piisii e taigi mi taki: ’Go! Taki! Go taki gi mi. Taki anga i hii ati. Mi o gi i kaakiti, mi Wowtu, den engel, mati a goontapu. Mi e leli i. Mi e taigi i pilisisi on ten i mu du wan sani tu.’ U mu teke en fu bigi taki u poi du a sani di Yehofa akisi u. u mu teke en fu bigi tu taki wi anga en e wooko!”