Skip to content

Skip to table of contents

 A TOLI DI SIKIIFI A FESISE | A DE FANOWDU FU ABI WAN KIIN ATI?

A de fanowdu fu du sani anga wan kiin ati aini a ten ya?

A de fanowdu fu du sani anga wan kiin ati aini a ten ya?

Hitoshi be e wooko na a moni kantoo fu wan bodeleifi di e yeepi sama fu suku wooko aini Yapan. Di en anga en basi be e luku a moni toli fu a bodeleifi, neen a basi taigi en taki a mu meke wan falisi pampila. Ma Hitoshi taigi en basi taki a ná o poi du a sani de. A basi taigi en taki a o lasi en wooko efu a á meke a pampila. Fu di Hitoshi á be wani meke a pampila, meke a basi puu en a wooko.

Den mun baka di Hitoshi lasi en wooko, a be e fii booko-saka, bika a be taanga gi en fu fende wooko. Di a be go suku wooko wan leisi, neen a taigi a sama di be e taki anga en taki a nai bidiigi taawan te ai wooko. A sama taigi en taki: „Mi nai fusutan fa yu e denki so!” Hitoshi famii anga mati be e tan gi en taanga-sikin fu du sani anga wan kiin ati. Ma baka wan pisi ten Hitoshi bigin booko en ede pikinso. A be e akisi enseefi efu a de fanowdu tuutuu fu du sani anga wan kiin ati.

A sani di miti Hitoshi e soi taki a ná ala sama lobi te wi e du sani anga wan kiin ati. Son sama e si enke a de fanowdu son leisi fu bidiigi taawan, moomoo te yu anga den e du bisnis. Wan uman di e wooko a Zuid Afiikan taki: „Den sama di mi e wooko anga den gwenti bidiigi taawan. Neen meke son leisi yu e wani du aseefi sani tu.”

Wan fasi fa sama e bidiigi taawan aini a ten ya, a te den e lei. Wan sabiman fu wan hei sikoo aini Ameekankondee di den e kai Robert S. Feldman, be ondoosuku a toli ya. A kon si taki te i teli 10 gaansama, da sigisi fu den e lei winsi wan leisi aini tin miniti te den e taki anga taawan. A taki: „Mi foondoo di mi si a sani ya. Wi á be denki taki a so sama be e si lei enke wan lawlaw sani.” Winsi fa sama á lobi te taawan e lei gi den, tokuso na a sani de denseefi e du ala dei.

Saide meke sama e si lei, fufuu efuso taa sani di sama e du fu bidiigi taawan enke wan kowownu sani? San na a bakapisi te sama e bidiigi taawan? Boiti dati, san o yeepi u fu wi á bidiigi taawan?