Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yanuari 2016

 A TOLI DI SIKIIFI A FESISE | A DE FANOWDU FU ABI WAN KIIN ATI?

San na a bakapisi te sama e bidiigi taawan?

San na a bakapisi te sama e bidiigi taawan?

„Son leisi te i fasi, i sa lei fu puu iseefi.”—Samantha, Zuid Afiikan.

Fa i si a sani di Samantha taki? Leti enke Samantha, son leisi wi e kisi a fii fu lei te polobelema miti u. Ma na a sani di wi o du o soi san de aini wi ati tuutuu. Son leisi a fu di wi á wani sen kisi u, meke wi e lei gi taawan. Ma te taawan kon fusutan taki a lei u be lei, da sani ná o waka bun gi u. Luku san a den bakapisi.

EFU YU E BIDIIGI TAAWAN, DEN NÁ O FITOOW I MOO

Na a fitoow di tu sama e fitoow denseefi meke den e toon mati. Den nai booko den ede, fu di den sabi taki den mati o du sani anga wan kiin ati. Ma a ná wanboowanboo so wan sama e bigin fitoow wan taawan. Tu sama e bigin fitoow denseefi te den e paa, anga te den e taki kiin anga denseefi. Boiti dati, den e booko den ede anga denseefi. Ma te wan fu den bidiigi a taawan, winsi a wan kodo leisi namo, da a taawan nai fitoow en moo. Te a sani ya pasa, ai taanga fu den fitoow denseefi baka.

Wan sama di i be e si enke wan bun mati koli i wan leisi kaba? Fa i be fii di a koli i? A be musu hati i. A omen sama be o fii so tu. A sani ya e soi taki a koli di sama e koli taawan e meke den poli.

TE YU E PAA ANGA BIDIIGIMAN, YU O BIDIIGI TAAWAN TU

Wan sabiman di den e kai Robert Innes taki efu yu e mumui anga sama di e bidiigi taawan, yu o bidiigi taawan tu. A bidiigi di sama e bidiigi taawan de enke wan siki di sa kisi i makiliki. Neen meke o moo yu e waka anga sama di e bidiigi taawan, o moo yu o bidiigi taawan.

San o yeepi i fu yu á bidiigi taawan? A Beibel poi yeepi i.