Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yanuari 2016

 A TOLI DI SIKIIFI A FESISE | A DE FANOWDU FU ABI WAN KIIN ATI?

Sowtu wini wi o fende te wi e du sani anga wan kiin ati?

Sowtu wini wi o fende te wi e du sani anga wan kiin ati?

„Wi abi wan kiin kosensi, fu di u wani du ala sani anga wan kiin ati.”Hebrewsama 13:18.

Kelesten e meke moiti fu du san apostel Pawlesi be taki. A taki: „U wani du ala sani anga wan kiin ati.” San a sani ya wani taki?

A MOITI DI WI E MEKE FU DU SANI ANGA WAN KIIN ATI

A omen sama e luku denseefi aini sipikii fosi den go a ganda. Saide? Bika den wani ala sani de taa. Ma wan sani de di pelensipali moo wi ede uwii efuso den moin koosi di wi e wei. A sani di moo pelensipali a wi manii, bika den sa meke sama lobi u, efuso buuse u.

Gadu Wowtu e taigi u kiin taki u meke anga a fii fu du ogii. Genesesi 8:21 taki: „Yonkuuyonkuu kaba, a soso ogii de aini [libisama] ati.” Neen meke u mu e feti anga a sondu fii di de aini wi efu wi á wani bidiigi taawan. A apostel Pawlesi seefi be e feti anga den sondu fii fi en. A be taki: „Mi lobi a weiti fu Gadu. Ma wan taa weiti de aini mi tu. A wan ya e feti anga a weiti fu mi fusutan. A weiti ya na a sondu di de aini mi sikin. Ai basi mi.”Romesama 7:22, 23.

Kon u taki wi e fii fu du wan ogii, dati á wani taki u musu du a ogii de. Useefi sa luku san u wani du winsi fa a fii ya taanga. Te wi e meke moiti fu wi á pakisei sani di á bun, da u ná o bidiigi taawan, winsi fa taa sama e si en enke wan kowownu sani.

FA U SA WINI A FETI

A bunbun moiti u mu meke efu u wani du sani anga wan kiin ati. A wan tyali sani taki omen sama e booko den ede anga modo, moo a fasi fa den e tyai denseefi. Neen meke den e si enke a á fowtu fu bidiigi taawan te a de fanowdu. Wan buku (The (Honest) Truth About Dishonesty) taki: „Son leisi wi e bidiigi taawan anga pikinpikin sani anga ala fa wi e si useefi enke sama di e du sani anga wan kiin ati.” Ma i si enke wan sani de di sa yeepi u fu si efu a bun fu bidiigi taawan? Eeye.

Miliyunmiliyun sama a hii goontapu kon si taki Beibel e yeepi den na a pisi de. Beibel na a moo bun sani di e soi fa u mu tyai useefi (Psalm 19:7). Ai yeepi u fu sabi fa u mu si wooko, san u mu du fu wi osulibi waka bun, anga fa Gadu wani u tyai useefi. Noiti den sani di sikiifi aini a Beibel e gaandi. Sama fu ala sowtu kondee efuso lo sa wooko anga den sani di sikiifi aini. Efu wi e leisi Beibel, e teke ten fu sidon pakisei den sani di u leisi, e wooko anga den sani di wi e leli, da den sani ya o yeepi u fu wi á bidiigi taawan.

 Ma efu u wani du sani anga wan kiin ati, da ná sabi namo u mu sabi san sikiifi aini Beibel. Bika wi e libi aini wan ogii goontapu di e dwengi u fu bidiigi taawan. Neen meke u mu e begi Gadu tu fu a yeepi u (Filipisama 4:6, 7, 13). A sani de o gi wi taanga-sikin fu tyai useefi bun, efuso fu du sani anga wan kiin ati.

SOWTU WINI WI O FENDE TE WI E DU SANI ANGA WAN KIIN ATI?

Hitoshi di u be taki fi en na a bigin be fende wini fu di a be tan meke moiti fu du sani anga wan kiin ati. A basi di ai wooko gi nownow lobi sama di nai bidiigi taawan. Hitoshi taki: „Ai bigi gi mi taki mi fende wan wooko di mi sa du anga wan kiin kosensi.”

A omen sama ondoofeni a sani ya tu. Luku fa sani waka gi son sama di be meke moiti fu „du ala sani anga wan kiin ati”.

  • Wan kiin kosensi

    „Mi be komoto a sikoo di mi be abi 13 yali, neen mi go wooko anga wantu fufuuman. Neen meke gaanse fu a moni di mi be abi a be fufuu wan. Bakaten mi toow, neen mi anga mi man bigin sutudeli Beibel anga den Yehofa Kotoigi. U be leli taki Yehofa * Gadu e buuse sama di e bidiigi taawan, neen meke u be kengi a fasi fa u be e libi. Aini a yali 1990 mi anga mi man paamisi Yehofa taki wi o dini en, neen u dopu.”Odo 6:16-19.

    „Fosi, mi osu be lai anga fufuu sani. Ma nownow mi ná abi den sani de aini mi osu moo. Nownow mi abi wan kiin kosensi. Te mi e denki fa mi be e libi, da ai bigi gi mi taki Yehofa gi mi paadon. Nownow mi e fii bun te mi e go siibi a neti, bika mi sabi taki mi e libi enke fa Yehofa wani.”—Cheryl, Ierland.

    „Wan sama di e du bisnis anga a bodeleifi pe mi e wooko be wani pai mi fu du wan sani di á bun. Di mi basi yee taki mi á teke a moni, a taki: ’Na a Gadu di yu e dini meke yu e du sani anga wan kiin ati! Ná pikin bigi ai bigi gi mi taki yu e wooko gi mi.’ A meke di mi e meke moiti fu du sani anga wan kiin ati e yeepi mi fu abi wan kiin kosensi. A sani de meke mi man yeepi mi famii anga taawan tu fu du sani anga wan kiin ati.”—Sonny, Hong Kong.

  • Yu o fii bun

    „Mi e wooko enke ondoo basi a wan gaan banku. Sama di e wooko a den peesi ya lobi bidiigi taawan fu di den wani kon gudu. Den e taki: ’Efu yu o kon gudu, efu a kondee o go a fesi, da i sa bidiigi taawan.’ Ma te mi e du sani anga wan kiin ati mi e fii bun. Mi o tan du sani anga wan kiin ati, winsi san o pasa. Den basi fu mi sabi taki mi ná o lei gi den. Den sabi tu taki efu den akisi mi fu du sani di á bun, mi ná o du en.”—Tom, Ameekankondee.

  • Yu o lesipeki iseefi

    „A ondoo basi fu mi be wani mi lei di wantu pampila be lasi a wooko, ma mi á du en. Di den kisi den sama di be teke den, neen a gaan basi seefi gi mi daa taki mi á be lei. A á makiliki fu du sani anga wan kiin ati aini a goontapu ya. I mu abi deki-ati. Ma te yu e tan meke a moiti de, sama o fitoow i. Den o lesipeki i tu.”—Kaori, Yapan.

A abi wini te wi e du sani anga wan kiin ati, bika yu o abi wan kiin kosensi, yu o fii bun, yu o lesipeki iseefi. Iseefi nai si en so tu noh?

^ paragraaf 17 Enke fa Beibel e soi, a Yehofa na a nen fu Gadu.

Moo toli

GADU ABI BUN NYUNSU GI U!

Sowtu wini wi e fende fu den mama leli fu Beibel?

Yesesi be taigi wi fu saide wi abi tii fanowdu, anga san a den tu moo gaan mama leli fu Beibel.