Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuni 2017

I lobi den gudu di Yehofa gi u?

I lobi den gudu di Yehofa gi u?

„Pe i gudu de, na ape yu ati o de tu.”LUKASI 12:34.

SINGI: 153, 104

1, 2. (a) Kai dii sani di Yehofa gi u enke gudu. (b) San wi o luku aini a artikel ya?

YEHOFA na a moo gudu Sama fu hemel anga goontapu. Neen abi ala sani fiya (1 Koloniki 29:11, 12). Ma a lobi gi sama sani. Ai bigi gi u taki a gi wi omen sani di de enke gudu. San a wantu fu den gudu ya? Wantu fu den na (1) Gadu Kownukondee, (2) a peleikiwooko anga (3) den sani di ai leli u aini Beibel. Efu wi á luku bun baka wan pisiten u ná o si den sani ya enke gudu moo. A o de enke u towe den. Ma efu wi á wani lasi den gudu ya, u mu e wooko anga den ala yuu. Boiti dati, u mu e meke moiti fu u kon moo lobi den, bika Yesesi taki: „Pe i gudu de, na ape yu ati o de tu.”Lukasi 12:34.

2 Meke u luku san o yeepi u fu moo lobi a Kownukondee, a peleikiwooko anga den leli fu Beibel. Te wi e luku den sani ya, teke ten pakisei fa iseefi sa meke moiti fu moo lobi den sani ya.

 A KOWNUKONDEE FU GADU DE ENKE WAN DII PAREL

3. San a man fu a ageisitoli fu Yesesi du fu bai wan kodo parel? (Luku a fowtow na a bigin.)

3 Leisi Mateyesi 13:45, 46. Yesesi be gi wan ageisitoli fu wan man di be e bai wan sowtu dii kaala den e kai parel, da ai seli den baka. Wan dei neen a man ya go si wan parel di be dii moo ala den parel di a be sabi. A be wani a parel ya, neen meke a seli ala den sani fi en neen a bai a dii parel. A sani ya e soi taki a be lobi a parel tuutuu.

Efu u lobi a Kownukondee enke fa a man be lobi a parel, wi o de kabakaba fu du ala sani fu holibaka gi a Kownukondee

4. San wi o de kabakaba fu du gi a Kownukondee?

4 San a toli fu Yesesi e leli u? Den sani di u leli fu Gadu Kownukondee, de enke a dii parel. Efu u lobi a Kownukondee enke fa a man be lobi a parel, wi o de kabakaba fu du ala sani fu holibaka gi a Kownukondee. (Leisi Malikisi 10:28-30.) Meke u luku fa tu sama du a sani ya.

5. San Sakeyesi be de kabakaba fu du fu a Kownukondee ede?

5 Sakeyesi a be wan man di be e piki lantimoni. A nyan sama moni te neen a kon gudu (Lukasi 19:1-9). Ma wan dei, Sakeyesi yee di Yesesi be e taki fu a Kownukondee. A be lobi den sani di a be yee, neen meke a be wani kengi a fasi fa a be e libi. A taki: „Masaa, mi o gi den pootiman afu fu den sani di mi abi. Efu mi bidiigi wan sama teke en moni, da mi o pai en fo toon fu a moni di mi fufuu.” Sakeyesi gi den sama den moni baka. A á be abi takuudu moo.

6. Fa wan uman kengi a fasi fa a be e libi? Saide a du a sani ya?

6 Wantu yali pasa, wan uman di be e libi anga wan taa uman be yee a Kownukondee bosikopu. A uman ya a be wan fesiman fu wan olikanisâsi di e feti gi a leti fu den man di e libi anga man anga den uman di e libi anga uman. Ma di a sutudeli Beibel, a kon si den wini di a Kownukondee o tyai gi en. A fusutan tu taki a be mu kengi en hii libi (1 Korentesama 6:9, 10). Fu di a lobi Yehofa, meke a komoto aini a olikanisâsi di a be de. A towe a uman di a be e libi anga en. A dopu aini 2009 neen a toon wan pionili aini 2010. A uman ya kengi en libi fu di a lobi Yehofa moo den takuu fii di a be abi.Malikisi 12:29, 30.

7. San o yeepi u fu a lobi di u lobi Gadu Kownukondee á koo?

7 A omen fu u be abi fu kengi u libi fu holibaka gi Gadu Kownukondee (Romesama 12:2). Ma a feti di wi e  feti á kaba ete. Wi á mu meke sani enke gudu anga hululibi tapu u fu lobi a Kownukondee anga u hii ati (Odo 4:23; Mateyesi 5:27-29). Yehofa gi u wan taa sani di e yeepi u fu a lobi di u lobi Gadu Kownukondee á koo.

A PELEIKIWOOKO E YEEPI SAMA FU TAN A LIBI

8. (a) Saide Pawlesi taki a peleikiwooko di wi e du de enke wan ’gudu di de aini doti patu’? (b) Fa Pawlesi soi taki a be lobi a peleikiwooko?

8 Yesesi sende u fu paati a bun nyunsu fu Gadu Kownukondee (Mateyesi 28:19, 20). Apostel Pawlesi taki a peleikiwooko di wi e du, de enke wan gudu di de aini doti patu (2 Korentesama 4:7; 1 Timotiyesi 1:12). Fu di wi a sondu sama meke u de enke doti patu. Ma a bosikopu di wi e paati de enke wan gudu, bika den sama di e aliki a bosikopu ya abi a okasi fu libi fu teego. Neen meke Pawlesi taki: „Mi e du ala sani fu a bun nyunsu ede, fu mi sa paati en anga taawan” (1 Korentesama 9:23). Pawlesi du ala san a be man fu paati a bun nyunsu fu Gadu Kownukondee. (Leisi Romesama 1:14, 15; 2 Timotiyesi 4:2.) Fu di Pawlesi be lobi a bun nyunsu meke a á tapu fu peleiki winsi fa sama be e du ogii anga en (1 Tesalonikasama 2:2). San o yeepi u fu lobi a peleikiwooko enke fa Pawlesi be lobi en?

A bosikopu di wi e paati de enke wan gudu, bika den sama di e aliki a bosikopu ya abi a okasi fu libi fu teego

9. San a wantu fasi fa u sa soi taki u lobi a peleikiwooko?

9 Pawlesi be e peleiki na ala okasi di a be fende, dati a wan fasi fa a soi taki a lobi a peleikiwooko. Leti enke Pawlesi anga den fositen Kelesten, wi e paati a bun nyunsu gi sama a den osu, a peesi pe tyaipi sama de anga taa peesi (Toli 5:42; 20:20). Wi e du ala san u man fu peleiki gi omen sama. Efu wi abi a okasi, u sa du a yeepi pioniliwooko efuso a kowownu pioniliwooko. U sa leli wan taa tongo, u sa foloisi go a wan peesi pe peleikiman de fanowdu aini u kondee efuso wan taa kondee.Toli 16:9, 10.

10. Sowtu wini Irene fende di a du san a poi fu paati a bun nyunsu?

10 Irene, wan sisa fu Ameekankondee be wani paati a bun nyunsu gi sama di e taki Rosiyatongo. A sisa ya á toow. Aini 1993, a foloisi go a New York, a wan kulu di e taki Rosiyatongo. A 20 peleikiman namo be de ape. Baka 20 yali Irene taki: „Te anga now mi nai taki Rosiyatongo gaata.” Ma Yehofa yeepi en anga taa peleikiman fu peleiki gi sama aini a tongo ya. Nownow a sigisi kemeente de a New York di e taki Rosiyatongo. Irene sutudeli anga omen sama, 15 fu den  sama ya dopu. Son wan fu den e wooko a Betel, son wan e pionili, taawan a owluman. Irene taki: „Te mi e denki den taa sani di mi be abi a okasi fu du, mi á denki sani be o de di be o meke mi piisii so.” Irene e si a peleikiwooko enke wan gudu tuutuu.

Yu e si a peleikiwooko enke gudu? Yu e meke ten fu du en ala wiki? (Luku paragraaf 11, 12)

11. Sowtu wini wi e fende te wi e peleiki winsi fa tesi e miti u?

11 Efu wi e si a peleikiwooko enke gudu, da leti enke apostel Pawlesi wi o tan peleiki winsi tesi e miti u (Toli 14:19-22). Na a pisiten fu 1930 te anga 1944, den be e du omen ogii anga den baala fu u aini Ameekankondee. Ma den á tapu anga a peleikiwooko. Di lanti puubei fu tapu den, den baala tyai a toli go a kuutu neen den wini. Aini 1943 Baala Knorr be taki fu wan fu den toli di u be wini na a Gaan kuutu osu fu Ameekankondee. A taki efu den baala be tapu anga a peleikiwooko, da den á be o poi tyai a toli ya go a kuutu. A taki a peleiki di den Kotoigi be e peleiki a hii goontapu, e soi taki tesi á poi tapu den fu du a wooko ya. Baala anga sisa a taa kondee wini den sowtu kuutu ya tu. A lobi di u lobi a peleikiwooko, e yeepi u fu peleiki winsi tesi e miti u.

12. San i de kabakaba fu du?

12 Efu wi e si a peleikiwooko enke gudu, a ná anga den yuu di wi e sikiifi na a peleikiwooko lapotu namo wi o booko wi ede. Ma wi o du san u poi fu „paati a bun nyunsu finifini” (Toli 20:24; 2 Timotiyesi 4:5). Ma san u mu leli taawan? Meke u luku wan taa sani di Gadu gi u enke gudu.

 DEN LELI FU BEIBEL DE ENKE GUDU

13, 14. San na a „magisin” di Yesesi be kai a Mateyesi 13: 52? Fa u sa fuu a magisin ya?

13 Du fu dii sani di Yehofa gi u enke gudu, a den sani di ai leli u. Yehofa na a Gadu di e taki a tuu (2 Samuweli 7:28; Psalm 31:5). Yehofa de enke wan Dda di á giili, neen meke a wani yeepi u fu useefi sabi a tuu. Te anga now, u leli omen sani fu di wi e leisi en Wowtu anga den buku fu a olikanisâsi. Wi e leli omen sani a den komakandaa di wi e go ala wiki anga den gaan komakandaa. Te u poti ala den sani di u leli kon a wan, da a de enke wi abi wan „magisin” enke fa Yesesi taki. „Nyun sani anga gaandi” sani de aini. (Leisi Mateyesi 13:52.) Yehofa o yeepi u fuu a „magisin” fu u, efu wi e meke moiti fu sabi den tuu leli fu Beibel enke fa sama e suku gowtu. (Leisi Odo 2:4-7.) Fa u sa du a sani ya?

14 U mu e sutudeli Beibel anga den buku fu u ala yuu. U mu e ondoosuku sani tu. A sani ya o yeepi u fu kon si nyun sani fu a waaleiti di wi á be sabi ete (Yowsuwa 1:8, 9; Psalm 1:2, 3). A fosi Wakititolen be meke aini yuli 1879 aini Ingiisitongo. A Wakititolen ya be taki, den leli fu Beibel de enke wan boomiki di de a busi. Efu wan sama wani fende a boomiki ya, a mu teke en ten suku en. Te a fende en, a á mu tifeedi anga wan kodo, ma a mu suku moo fu a boomiki ya. A so u mu si den tuu leli fu Beibel. U mu meke moiti ala yuu fu sabi moo fu Beibel.

15. Saide u sa si son sani di u leli enke „gaandi” sani? Sowtu wan fu den leli fu Beibel yu e si enke gudu?

15 Di u bigin sutudeli Beibel, a omen sani u leli. Kande wi e si den enke „gaandi” sani bika a den fosi u leli. San a wantu fu den sani ya? U be leli taki a Yehofa meke ala sani. U leli san a abi a pakisei gi libisama. U leli taki Gadu sende en Manpikin kon dede gi u fu pai fu sondu anga dede. U leli tu taki Gadu Kownukondee o puu pina, da wi o abi a okasi fu libi fu teego a goontapu pe freide anga piisii o de.Yohanisi 3:16; Openbaring 4:11; 21:3, 4.

16. San u mu du efu a olikanisâsi fusutan wan Beibel tekisi moo kiin?

16 Son leisi wi e kon fusutan wan Beibel polofeititoli efuso wan tekisi moo kiin. Te a sani ya pasa, a de taanga fanowdu fu go ondoosuku a fasi fa wi e fusutan a toli now. U mu teke ten sidon pakisei fi en tu (Toli 17:11; 1 Timotiyesi 4:15). A ná sabi namo u mu sabi den pelensipali sani di kengi, ma u mu meke moiti tu fu fusutan a toli finifini. A sani ya o meke a nyun sani di u leli toon wan fu den sani di de aini u magisin. Saide u mu meke a moiti ya?

17, 18. Fa santa yeye sa yeepi u?

17 Yesesi taki a santa yeye fu Gadu man yeepi u fu membee den sani di u be leli kaba (Yohanisi 14:25, 26). Fa ai yeepi u te wi e paati a bun nyunsu? Luku a toli fu wan baala den e kai Peter. A bigin wooko na a beikantoo fu Ingiisikondee aini 1970. A pisiten  de a be abi 19 yali. Wan leisi di ai peleiki osu fu osu neen a miti wan man di be e kweki baiba. A man be pasa 40 yali kaba. Peter akisi a man efu a wani fusutan den sani di sikiifi aini Beibel. A man ya a be wan edeman fu a Dyu biibi. Den e kai den edeman ya rabi. A man dyombo, a á be poi biibi taki wan yonkuman be abi ati fu akisi en a sani de. Neen meke a be wani sabi efu Peter sabi sani fu Beibel. A akisi Peter taki: „Mi boi, aini sowtu tongo a Beibel buku Daniyeli be sikiifi?” Peter piki en taki: „Wan pisi fi en be sikiifi aini Alameisitongo.” Peter taki: „A rabi foondoo, ma mi be moo foondoo taki mi be sabi a piki. Fa mi be du sabi a piki? Di mi go a osu mi go luku den Wakititolen anga den Ontwaakt fu den mun di pasa, neen mi si wan artikel di e soi taki a buku Daniyeli be sikiifi aini Alameisitongo” (Daniyeli 2:4). A sani ya e soi taki santa yeye sa yeepi u fu membee den sani di de aini a magisin fu u.Lukasi 12:11, 12; 21:13-15.

18 Efu u lobi den sani di Yehofa e leli u, neen den e bigi gi u tuutuu, wi o wani poti moo sani aini a magisin fu u. Efu wi e du a sani ya, wi o de seekaseeka fu leli taawan.

KIBII DEN GUDU FI I

19. Saide u mu teke den gudu di Yehofa gi u fu bigi?

19 Aini a artikel ya, u si taki u mu teke den gudu di Yehofa gi u fu bigi. Ma u mu luku bun tu fu Saatan anga a goontapu ya á meke a lobi di u lobi den gudu ya kon koo. Efu wi á luku bun, a wani di u wani wan bun wooko anga goontapu gudu sa meke wi á poti pakisei a den sani ya moo. Apostel Yohanisi be wasikoi u taki a goontapu ya anga ala den sani fi en ná o de moo (1 Yohanisi 2:15-17). Neen meke u mu meke moiti fu a lobi di wi abi gi den gudu di Yehofa gi u, á koo.

20. San yu o du fu kibii den gudu di Yehofa gi i?

20 U mu de kabakaba fu fika ala sani di sa meke a lobi di u lobi a Kownukondee fu Gadu koo. Meke moiti fu peleiki fayafaya. Meke moiti fu yu á lasi a lobi di i lobi a peleikiwooko. I mu e sutudeli Beibel tu. Efu yu e du den sani ya, da a leti enke yu e kibii gudu „a hemel di ná o kaba noiti. Fufuuman á poi doo anda, woon ná o man nyan en tu. Bika a pe i gudu de, na ape yu ati o de tu”.Lukasi 12:33, 34.