Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2017

„Meke a yeepi i fu ala san yu abi a pakisei fu du, waka bun”

„Meke a yeepi i fu ala san yu abi a pakisei fu du, waka bun”

„Piisii pasa maiki fu Yehofa ede, da a o gi i san yu ati wani.”​—PSALM 37:4.

SINGI: 135, 81

1. San yonkuuwan mu du te den e kon bigi? San o yeepi den fu den á booko den ede tumisi te den e pakisei a sani ya?

YONKUUWAN sabi taki fosi wan sama bigin waka wan pasi, a mu sabi pe ai go. A libi de enke wan pasi di wi e waka. A moo bun yuu fu luku pe i wani go, a te i yonkuu. Ma a á makiliki fu du a sani ya. Wan meisyo den e kai Heather taki: „Wan sani di e gi i booko-ede, a te yu e pakisei san yu o du te i bigi.” Efu a so yu e denki tu, da ná feegete san Yehofa taki. A taki: „Ná feele, bika mi de anga i. Ná booko yu ede, bika a mi a yu Gadu. Mi o meke yu abi deki-ati, mi o yeepi i.”​—Yesaya 41:10.

2. Fa i du sabi taki Yehofa wani i sabi san yu o du te i bigi?

2 Yehofa e gi i taanga-sikin fu du sani anga koni te yu e luku san yu o du te i bigi (Peleikiman 12:1; Mateyesi 6:20). Den sani di wi e si, den sani di wi e yee anga den switi sani di wi e nyan, e soi taki Yehofa wani u piisii fu a libi. Boiti den sani ya, ai solugu u a wan taa fasi tu. A soi u san na a moo bun fasi fu libi. Neen meke te sama  nai aliki en, a nai piisii. A taigi den sama di nai libi enke fa a wani taki: „A den sani di mi á lobi, a dati wi e du. . . . Wi aliki, mi futuboi o piisii, ma sen o kisi u. Wi aliki, den futuboi fu mi o bali piisii fu di den ati bun” (Yesaya 65:12-14). Te wi e du sani anga koni, wi e meke Yehofa piisii.​—Odo 27:11.

DU SANI DI O MEKE I PIISII

3. San Yehofa wani i du?

3 San Yehofa wani i du anga i libi? Efi i wani de koloku, i mu meke moiti fu sabi Yehofa da i dini en. Na a sani ya Yehofa be abi a pakisei di a meke libisama (Psalm 128:1; Mateyesi 5:3). Meti á man du taa sani moo enke nyan, diingi anga meke pikin. Ma Yehofa wani i sete i libi a wan fasi di o meke i piisii. A wani i fende wini fu den sani di yu e du. A Sama di meke i, na „a Gadu fu lobi”, „a koloku Gadu” di „meke libisama enke fa enseefi de” (2 Korentesama 13:11; 1 Timotiyesi 1:11; Genesesi 1:27). Efi i waka a Gadu baka, yu o de koloku. Beibel taki: „Wan sama di e gi taawan sani o fii moo koloku moo enke te taawan e gi en sani” (Toli 20:35). A ná so yu e fii te i gi sama sani noh? A sani ya a wan tuu toli. A sani ya e soi taki Yehofa wani u soi anga a fasi fa wi e libi taki u lobi en anga taa sama.​—Leisi Mateyesi 22:36-39.

Te yu e soi lobi gi taawan yu o de koloku

4, 5. San be e gi Yesesi piisii?

4 Yonkuuwan sa waka a Yesesi baka. Di a be yonkuu, a be musu e pee enke den taa pikin. Bika Gadu Wowtu taki ’wan ten de fu lafu’ anga „wan ten fu dansi” (Peleikiman 3:4). Yesesi be e kon koosube a Yehofa fu di a be e sutudeli en Wowtu. Di a be abi 12 yali, den leliman di be de aini a tempel be e foondoo „di den be si fa a be koni anga a fasi fa a be e piki den”.​—Lukasi 2:42, 46, 47.

5 Di Yesesi kon bigi, anga piisii a be e du san Yehofa be wani a du. Gadu be wani a „paati bun nyunsu gi den pootiman”. A be sende en tu fu a „meke den beendi sama si” (Lukasi 4:18). Psalm 40:8 e soi fa Yesesi be e fii. Ape sikiifi taki: „Mi Gadu, mi e piisii fu du san i wani.” Yesesi be lobi a wooko di a be e du fu leli sama fu Yehofa. (Leisi Lukasi 10:21.) Baka di Yesesi taki anga wan uman fu a tuu biibi, a taigi den disipel taki: „Mi nyanyan na a du di mi e du san a sama di sende mi kon wani, anga a du di mi e du a wooko fi en” (Yohanisi 4:31-34). Yesesi be e piisii fu di a be lobi Gadu anga taa sama. Efi i du aseefi sani, yu o de koloku tu.

6. Saide a bun fu taigi taawan san i wani du te i bigi?

6 Son Kelesten bigin pionili yonkuuyonkuu. A sani ya be e meke den e piisii. Kande i sa taigi den san i wani du di yu o bigi. Beibel taki: „Te sama  nai taki kiin anga denseefi, ala sani e buuya, ma te omen sama e taki fu seeka wan toli, sani e waka bun” (Odo 15:22). Den baala anga sisa ya o taigi i taki a pioniliwooko a wan sani di o yeepi i, i hii libi. Yesesi leli omen sani fi en Dda di a be de a hemel. Di a kon a goontapu ya seefi, a leli omen sani. A be e piisii di a be e paati a bun nyunsu anga taawan. A holidoo tu di sani miti en. (Leisi Yesaya 50:4; Hebrewsama 5:8; 12:2). Meke u luku saide a fuuten diniwooko o meke i piisii.

SAIDE A PELEIKIWOOKO NA A MOO BUN WOOKO?

7. Saide omen yonkuuwan lobi a peleikiwooko?

7 Yesesi taki u mu ’meke sama toon en bakaman’. A taki u mu leli sama (Mateyesi 28:19, 20). Efi i teke a sani ya enke i wooko, yu o piisii. Boiti dati yu o gi Gadu gaandi. Wan baala den e kai Timothy bigin pionili yonkuuyonkuu. A baala ya taki: „Mi lobi a fuuten diniwooko. Mi e du a wooko ya fu soi Yehofa taki mi lobi en. Fosi, mi á be abi Beibelsutudi. Ma bakaten, mi foloisi go a wan taa peesi. Aini wan mun a omen sutudi mi be abi. Wan fu den e kon a komakandaa. Baka di mi go tu mun na a sikoo gi baala di á toow, den baala sende mi go a wan taa peesi. Di mi go ape mi kon abi fo sutudi. Mi lobi leli sama, bika mi e si fa a santa yeye e yeepi den fu kengi.” * (Luku a maiki a ondoo.)​—1 Tesalonikasama 2:19.

8. San son yonkuuwan du fu peleiki gi moo sama?

8 Son yonkuuwan leli wan taa tongo. Jacob di e tan na Ameekankondee sikiifi taki: „Di mi be abi seibin yali, gaanse fu den pikin fu mi sikoo be e taki Vietnameisitongo. Mi be wani yeepi den fu sabi Yehofa, neen meke baka wan pisiten mi bigin leli a tongo fu den. Mi be e leisi a Ingiisitongo Wakititolen anga a Vietnameisitongo Wakititolen. Mi meke mati anga wantu baala anga sisa fu a Vietnameisitongo kemeente di be de koosube tu. Di mi be abi 18 yali, neen mi bigin pionili. Bakaten mi go na a sikoo gi baala di á toow. A sikoo ya yeepi mi anga a pioniliwooko di mi e du nownow. Nownow a mi wawan de enke owluman a wan kulu di e taki Vietnameisitongo. A omen sama di e taki a tongo ya foondoo di den si taki mi leli a tongo ya. Son leisi den e kai mi kon aini osu, da mi e abi a okasi fu sutudeli anga den. Son wan fu den go a fesi te enke den dopu.”​—Luku Toli 2:7, 8 tu.

9. Fa a peleikiwooko e yeepi u?

9 A peleikiwooko di wi e du, de enke wan sikoo. Ai yeepi u fu abi bun manii, ai yeepi u fu taki bun anga sama. Ai taanga u biibi tu (Odo 21:5; 2 Timotiyesi 2:24). A wooko ya e meke u piisii tu fu di wi e fende a okasi fu soi sama aini Beibel san wi e biibi. Yu e leli tu fa i mu wooko makandaa anga Yehofa.​—1 Korentesama 3:9.

10. Fa i sa du a peleikiwooko anga piisii winsi a á makiliki?

 10 Winsi a wantu sama namo wani sutudeli na a pisi pe yu e peleiki, tokuso i poi du a peleikiwooko anga piisii. Na a hii kemeente e yeepi sama fu toon bakaman fu Yesesi. Winsi a wan baala efuso wan sisa fende wan sama di toon Kotoigi, tokuso ala wi e piisii bika useefi e suku sama di wani dini Yehofa. Brandon pionili neigin yali a wan peesi pe wantu sama namo e sutudeli. A taki: „Mi lobi paati a bun nyunsu bika a dati Yehofa wani u du. Di mi kaba sikoo, a á teke langa fosi mi bigin pionili. Mi lobi gi yonkuu baala aini a kemeente taanga-sikin. Mi e piisii te mi si fa den e go a fesi. Di mi komoto na a sikoo gi baala di á toow, neen den sende mi go a wan taa peesi enke pionili. A tuu taki mi á fende sama di sutudeli te enke a dopu a pe mi de ya, ma taa baala anga sisa fende. Mi e piisii taki mi e du ala san mi man fu paati a bun nyunsu.”​—Peleikiman 11:6.

WANTU SANI DI I SA DU

11. Sowtu taa wooko yonkuuwan e du gi Yehofa anga piisii?

11 A omen fasi de fa u sa dini Yehofa. A omen yonkuuwan e yeepi meke Kownukondee zaal. Nownow a omen ondoo Kownukondee zaal de fanowdu. Den zaal ya e gi Yehofa gaandi, neen meke te yu e yeepi meke den yu o piisii. Yu o piisii tu fu di yu o wooko makandaa anga baala anga sisa. Yu o leli omen sani di o yeepi i fu yu á kisi mankei te yu e wooko. Yu o leli tu fa i sa wooko anga den sama di e teke fesi. Yu o leli omen taa sani ete.

Den sama di e du a fuuten diniwooko e fende omen belesi (Luku paragraaf 11-13)

12. Fa a pioniliwooko sa yeepi u fu fende taa faantiwowtu?

12 Wan baala den e kai Kevin taki: „Yonkuuyonkuu mi be wani du a fuuten diniwooko. Di mi abi 19 yali neen mi bigin pionili. Mi be e wooko gi wan baala di e du bow wooko, a so mi be man solugu miseefi. Mi leli poti daki, fensee anga doo. Bakaten mi wooko tu yali anga a bow kulu di e meke Kownukondee zaal anga osu fu Kotoigi di gaan winta booko. Di mi yee taki den be e suku sama fu go na Zuid-Afiikan, mi poti mi nen, neen den baala gi mi a okasi fu go yeepi anda. Na Afiikan mi de nownow. Wi e meke wan Kownukondee zaal wantu wiki, te u kaba, da wi e go a wan taawan. A bow kulu di mi de aini de enke wan osufamii. Wi e tan na a wan peesi, wi e sutudeli Beibel makandaa. Boiti dati wi e wooko makandaa. Ai switi gi mi fu peleiki makandaa anga den baala anga sisa  ala wiki. Den sani di mi be poti a mi ede fu du di mi be yonkuu, yeepi mi a wan fasi di mi á be denki.”

„Den sani di mi be poti a mi ede fu du di mi be yonkuu, yeepi mi a wan fasi di mi á be denki”

13. Saide omen yonkuuwan lobi a wooko di den e du a Betel?

13 Son sama di be e pionili, e wooko a Betel nownow. Betel wooko a wan sani di e gi piisii, bika ala san yu e du ape, a Yehofa yu e du en gi. A Betel famii e yeepi meke Beibel anga taa buku di e yeepi sama fu kon a waaleiti. Dustin di e wooko a Betel taki: „Di mi be abi neigin yali, mi be wani du a fuuten diniwooko, neen meke di mi kaba sikoo mi bigin pionili. Baka wan yali anga afu, neen den kai mi go a Betel. Den leli mi wooko anga den masini di e doloki buku, anga fu seeka computer. A sani fu Betel di mi lobi, a te mi e yee fa a peleikiwooko e go a fesi a hii goontapu. Mi lobi a wooko di wi e du a Betel, bika ai yeepi sama fu den anga Yehofa toon mati.”

SAN YU O DU TE I BIGI?

14. Fa i sa seeka nownow fu du a fuuten diniwooko?

14 Fa i sa seeka fu du a fuuten diniwooko? Efi i wani du ala san i man gi Yehofa, a de fanowdu fu du den sani di  wan Kelesten mu du. Sutudeli Gadu Wowtu ala yuu, teke ten pakisei san i leisi, da i meke moiti fu paati san i leli anga taawan te i de a komakandaa. Den ten di i de a sikoo ete, i sa meke moiti fu peleiki moo bun. Meke moiti fu sabi fa taawan e denki. Poti akisi gi den da i wakiti anga pasensi fu den piki i. I sa akisi den baala tu efi i sa du son sani aini a kemeente. Kande i sa akisi fu kiin a Kownukondee zaal efuso fu yeepi meke wan sani di booko. Yehofa e piisii fu wooko anga den sama di abi sakafasi anga den sama di de kabakaba fu wooko gi en. (Leisi Psalm 110:3; Toli 6:1-3). „Den baala fu Listra anga Ikoniyum be e taki soso bun sani fu Timotiyesi”, neen meke Pawlesi be teke en fu du a zendeling wooko.​—Toli 16:1-5.

Den ten di i de a sikoo ete, i sa meke moiti fu peleiki moo bun

15. San i sa du fu man fende wan wooko di o yeepi i fu du a pioniliwooko?

15 Gaanse sama di e du a fuuten diniwooko, abi wan wooko fanowdu fu solugu denseefi (Toli 18:2, 3). Kande i sa teke wan sikoo leli di ná o teke langa, di o yeepi i fu du wan wooko di ná o teke ala i ten. Taigi a kelen-owluman anga taa pionili san i wani du, da den o poti yu a pasi. Baka dati du san Beibel taki: „Taigi Yehofa den sani di i wani du, da den sani di i abi a pakisei o waka bun.”​—Odo 16:3; 20:18.

16. Fa a fuuten diniwooko sa yeepi i aini a ten di e kon?

16 I sa biibi taki Yehofa wani i „kisi a tuutuu libi holi taanga”, bika a sani ya o meke i piisii. (Leisi 1 Timotiyesi 6:18, 19.) A fuuten diniwooko e yeepi i fu de wan Kelesten di abi ondoofeni, bika yu o wooko makandaa anga taawan di e du a fuuten diniwooko. A omen sama taki di den du a fuuten diniwooko yonkuuyonkuu, a tyai wini gi den di den toow bakaten. Gaanse leisi den sama di pionili fosi den toow e du a pioniliwooko makandaa anga den toowpaa.​—Romesama 16:3, 4.

17, 18. Fa den sani di de aini yu ati o yeepi i fu du san i man gi Yehofa?

17 Psalm 20:4 e taki fu Yehofa: „Meke a gi yu ala san yu ati wani. Meke a yeepi i fu ala san yu abi a pakisei fu du, waka bun.” A sani ya e soi taki i mu sidon denki san i wani du anga i libi. Denki san Yehofa e du aini a ten ya, da i luku sowtu wooko i sa du gi en. Meke moiti fu du sani di e meke a piisii.

18 Yu o piisii te yu e du ala san i man gi Yehofa anga i hii ati. Bika a sani ya e gi en gaandi. I mu „piisii pasa maiki fu Yehofa ede, da a o gi i san yu ati wani”.​—Psalm 37:4.

^ paragraaf 7 Nownow a sikoo ya toon Kownukondee Peleikiman Sikoo