Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2017

Suku gudu di o tyai wini gi i

Suku gudu di o tyai wini gi i

„Koboloiki den gudu di wi abi aini a goontapu ya pe leti-du á de, fu meke mati.”​—LUKASI 16:9.

SINGI: 122, 129

1, 2. Saide pootiman o de ala yuu aini a goontapu ya?

A GOONTAPU ya á paati anga leti. Sama e moo booko den ede anga moni, pe fu den booko den ede anga taawan. Ai taanga gi omen yonkuuwan fu fende wooko. Boiti dati, a omen sama e meke moiti fu go tan a den gudu kondee winsi ogii sa miti den. Ma den gudu kondee seefi abi omen pootiman. Te u luku a hii goontapu, da wi e si taki pootiman e kon moo pooti, ma den guduman e kon moo gudu. Bakabaka ya wantu ondoosukuman taki a moni di wantu guduman abi, ipi moo a moni fu ala taa sama a goontapu. A de gagagaa fu si taki wantu sama abi tyaipi moni fu solugu den pikin anga den bakapikin, ma na a taa se miliyunmiliyun sama e pina. Yesesi be sabi a sani ya a fesi. A be taki: „Den pootiman o de anga u ala yuu” (Malikisi 14:7). Saide a goontapu ya á paati anga leti?

2 Yesesi be sabi taki a Gadu Kownukondee wawan poi meke sani waka a wan leti fasi a goontapu. Beibel taki „sama di e du bisnis”, keliki, anga den politiki palitei a den sani fu a goontapu fu Saatan (Openbaring 18:3). A foluku fu Gadu nai mumui anga politiki anga falisi keliki. Ma gaanse fu a  foluku fu Gadu á poi taki den nai du bisnis aini a goontapu ya.

3. San wi o luku aini a artikel ya?

3 Enke Kelesten u mu ondoosuku useefi fu sabi fa wi e si a meke di sama e meke omen moni aini a goontapu ya. U mu akisi useefi taki: ’Fa mi sa koboloiki den gudu fu mi fu soi taki mi e dini Gadu anga mi hii ati? San mi mu du fu mi á mumui tumisi anga a bisnis fu a goontapu ya? San e soi taki den sama di e dini Gadu aini a ten ya e biibi taki Gadu o yeepi den?

A TOLI FU A FUTUBOI DI Á BE TYAI ENSEEFI BUN

4, 5. (a) San miti a futuboi fu a ageisitoli fu Yesesi? (b) San Yesesi taki den bakaman fi en mu du?

4 Leisi Lukasi 16:1-9. A toli di Yesesi gi fu a futuboi di á be tyai enseefi bun, a wan toli di u mu sidon pakisei. Sama taigi a basi taki a futuboi e poli en moni, neen meke a basi puu en a wooko. * (Luku a maiki a ondoo.) Ma a futuboi wooko anga „koni”. Fosi a lasi en wooko, a meke mati anga sama di be sa yeepi en bakaten. Di Yesesi gi den disipel fi en a toli ya, a ná taanga-sikin a be e gi den fu du sani di á fiti fu suku wini gi denseefi, bika a dati den sama fu a goontapu ya e du. Ma Yesesi gi den a toli ya fu leli den wan sani.

5 Yesesi be sabi taki leti enke fa a libi kon taanga gi a futuboi di be lasi en wooko wanboowanboo, a letiso a libi be o taanga gi den bakaman fi en aini a goontapu ya pe sani nai waka a wan leti fasi. Neen meke a taigi den taki: „Koboloiki den gudu di wi abi aini a goontapu ya pe leti-du á de, fu meke mati.” A sani ya e soi taki u mu koboloiki u goontapu gudu fu meke mati anga Yehofa anga Yesesi. Saide? Bika te den gudu ya kaba, da den mati ya, Yehofa anga Yesesi, o ’gi u wan tanpeesi pe sama man libi fu teego’. San u sa leli fu a sani di Yesesi taki?

6. Fa u du sabi taki Gadu á be meke u fu e wooko moni aini a goontapu ya?

6 Beibel e soi kiin taki Gadu á be meke libisama fu e wooko fu fende moni. A be gi Adan anga Efa moo san den be abi fanowdu aini a dyali fu Eden. A á be de fu den pai gi den sani de (Genesesi 2:15, 16). Boiti dati, di Gadu be gi den salufuwan en santa yeye aini a ten fu den apostel, „nawan sama be e si enke den sani di a abi, a fi en wawan, ma den be e paati ala san den abi anga taawan” (Toli 4:32). A polofeiti Yesaya be taki, aini a ten di e kon sama o man nyan den nyanyan di de na a goontapu sondee fu pai (Yesaya 25:6-9; 65:21, 22). Ma fu di a ten de á doo ete, meke wi enke Kelesten mu soi taki u „koni” enke fa Yesesi taki. Dati wani taki anga ala fa wi o koboloiki den goontapu gudu fu u fu tan a libi, u mu meke moiti tu fu meke Yehofa piisii.

KOBOLOIKI DEN GOONTAPU GUDU FI I BUN

7. Sowtu taanga-sikin Yesesi gi u aini Lukasi 16:10-13?

7 Leisi Lukasi 16:10-13. A futuboi aini a ageisitoli fu Yesesi be meke moiti  fu toon mati anga sama di be o yeepi en bakaten. Ma ná fu di Yehofa anga Yesesi o yeepi u meke u mu toon mati anga den. Yesesi be wani u fusutan taki a fasi fa wi e koboloiki den goontapu gudu fu u, e soi efu wi e dini Yehofa anga u hii ati. Fa u sa soi taki wi e dini Yehofa anga u hii ati?

8, 9. Fa son Kotoigi soi anga a fasi fa den e koboloiki den gudu taki den e dini Yehofa anga den hii ati?

8 Wan fasi fa wi e soi taki wi e dini Yehofa anga u hii ati, a te wi e gi moni fu holibaka gi a peleikiwooko di Yesesi be taki be o du a hii goontapu (Mateyesi 24:14). Wan pikin meisyo aini Indiya be abi wan pikin kedee pe a be e kibii moni. Pee sani seefi a á be e bai. Di a kedee fuu, neen a gi a olikanisâsi a moni di be de aini fu holibaka gi a peleikiwooko. Wan baala a Indiya abi wan kokoonoto goon. A be tyai kokoonoto go gi den baala di e wooko na a kantoo a Malayalam pe den e puu den buku poti aini taa tongo. Den baala anga sisa fu a kantoo ya gwenti bai kokoonoto, neen meke a baala be si enke efu a gi den kokoonoto, den o fende wini moo a moni di a be o gi den. A sani ya a tuutuu „koni”. Wantu baala fu Giikikondee gwenti gi a Betel famii oleifi-oli, kasi anga taa nyanyan sani tu.

9 Wan baala aini Sili Lanka gi a olikanisâsi pasi fu holi komakandaa anga konkelesi na a peesi fi en. A meke wantu Kotoigi di e du a fuuten diniwooko tan ape tu. A baala ya be sa meke moni anga a peesi fi en. Neen meke den Kotoigi fu a pisi de di ná abi ipi moni e teke en fu bigi taki a baala ya e yeepi den. Aini den kondee pe lanti tapu a wooko fu u, baala e koboloiki den osu enke Kownukondee zaal. A sani ya e yeepi pionili anga taa Kotoigi di ná abi moni fu holi komakandaa a wan peesi sondee fu pai yuu.

Den mati fu Gadu e koboloiki den gudu fu yeepi taawan

10. San a wantu fu den wini di wi o fende te wi e gi sama sani?

10 Den ondoofenitoli ya e soi taki sama sa „fitoow” a foluku fu Gadu anga „pikinpikin sani” (Lukasi 16:10). Den e koboloiki den gudu fu yeepi taawan. Fa den mati fu Yehofa e fii te den e koboloiki den gudu fu yeepi taawan? Den e piisii, bika den sabi taki te den e paati san den abi anga taawan, den e kibii gudu a hemel (Lukasi 16:11). Wan sisa di e gi moni ala yuu fu holibaka gi a peleikiwooko di e du a hii goontapu taki a si fa en libi kengi den yali di pasa. A taki: „Mi si enke o moo mi e gi sama  sani, o moo mi e libi bun anga den. Mi e moo gi den paadon, mi e moo pasensi anga den. Boiti dati a moo makiliki gi mi fu aliki taawan anga fu holidoo winsi sani á waka enke fa mi wani.” A omen taa sama fende wini tu fu di den e paati san den abi anga taawan.​—Psalm 112:5; Odo 22:9.

11. Fa wi e soi taki u koni te wi e gi moni fu holibaka gi a peleikiwooko? (b) Fa sani e waka gi a foluku fu Gadu aini a ten ya? (Luku a fowtow na a bigin.)

11 Te wi e gi moni fu meke a peleikiwooko go a fesi, a wan taa fasi fa wi e soi taki u koni. Winsi wi á poi du a fuuten diniwooko efuso winsi wi á poi go a pe yeepi de fanowdu, tokuso a moni di wi e gi e tyai wini gi taawan (Odo 19:17). Na a moni di wi e gi meke a olikanisâsi man meke buku. Na a moni de e meke a peleikiwooko go a fesi aini den pooti kondee pe omen sama e kon a waaleiti. Ná pikin dii Beibel dii aini den kondee enke Kongo, Madagaskali anga Rowanda. Son leisi na a moni di wan sama e wooko wan hii wiki efuso wan hii mun den abi fanowdu fu bai wan Beibel. A omen yali osufamii edeman be mu e wegi luku efu a wan Beibel den o bai efuso nyanyan gi a osufamii. Ma fu di taa sama e gi moni, meke a olikanisâsi man poti a Beibel aini a tongo di den sama aini den pooti kondee ya e taki. Neen meke nownow baala anga sisa anga den sutudi fu den sa fende Beibel sondee fu pai. (Leisi 2 Korentesama 8:13-15.) A sani ya e soi taki den sama di e gi moni fu holibaka gi a wooko anga den sama di e fende yeepi e toon Yehofa mati.

YU Á MU LIBI BIGI

12. Fa Abalaham soi taki a be e biibi Gadu?

12 Wan taa fasi fa wi e soi taki wi a Yehofa mati, a te u nai libi bigi. Boiti dati u mu meke moiti fu fende gudu di ná o poli. Na a sani de Abalaham be du. Di Yehofa taigi en fu a gwe fika a gudu foto Ur, a aliki neen a go tan aini tenti. A du den sani ya fu di a be wani toon Yehofa mati (Hebrewsama 11:8-10). Winsi fa a be gudu tokuso en biibi be taanga. A be e si Yehofa enke a Gadu di be o puu en a nowtu (Genesesi 14:22, 23). Yesesi be gi den sama aini a ten fi en taanga-sikin fu waka a Abalaham baka. Wan leisi a taigi wan yonkuu guduman taki: „Efi i wani dini Gadu sondee fowtu, da go seli den sani di yu abi, da i paati a moni gi den pootiman, da yu o fende wan gudu a hemel. Te i kaba, da i kon toon mi bakaman” (Mateyesi 19:21). A yonkuman ya biibi á be taanga enke du fu Abalaham. Ma taa sama be de di be e biibi Gadu anga den hii ati.

13. (a) Sowtu taanga-sikin Pawlesi gi Timotiyesi? (b) Fa u sa wooko anga san Pawlesi taki aini a ten ya?

13 Timotiyesi a be wan man di biibi be taanga. Baka di Pawlesi kai Timotiyesi „wan bun suudati fu Kelestesi”, Pawlesi taigi en taki: „U mu de kabakaba fu  nyan pina. Nawan suudati e booko en ede anga bisnis. Neen meke a sama di teke en enke suudati e piisii anga en” (2 Timotiyesi 2:3, 4). A moo enke wan miliyun bakaman fu Yesesi e du a fuuten diniwooko. Ala den Kotoigi ya e du ala san den man fu du san Pawlesi taki. Den nai meke den lekalaama fu a giili goontapu ya koli den. Den e holi san Beibel taki a pakisei: „A sama di lobi leni moni na a saafu fu a sama di leni en a moni” (Odo 22:7). Saatan wani u koboloiki ala u ten anga u kaakiti fu wooko moni aini a goontapu ya. Son sama e leni omen moni fu bai wan osu, wan wagi, pai gi sikoo efuso fu toow. Efu wi á luku bun, wi e de a paiman omen yali. Ma wi e soi taki u koni te u nai libi bigi, te u nai meke paiman anga te u nai poli moni. A so wi o abi a okasi fu dini Gadu enke fa u wani. U ná o de saafu fu moni efuso a bisnis fu a goontapu ya.​—1 Timotiyesi 6:10.

14. San u mu de kabakaba fu du? Gi wantu ondoofenitoli.

14 Efu wi á wani libi bigi, u mu poti Gadu Kownukondee a fesi. Wan baala anga en uman be abi wan gaan bodeleifi di be e daai bun. Ma fu di den be wani du a fuuten diniwooko baka, meke den seli a bodeleifi. Den seli a boto fu den anga son sani di den be abi. Baka dati den go yeepi meke a edekantoo a Warwick, aini New York. A sani ya be bigi gi a baala anga en uman, bika den be abi a okasi fu wooko wantu wiki anga a mma anga dda fu a baala. Boiti dati den be abi a okasi tu fu wooko anga a umanpikin fu den anga a man fi en. Wan sisa di e du a pioniliwooko a Colorado, wan peesi aini Ameekankondee, be fende wooko a wan banku. A be e du a wooko ya wantu dei aini a wiki namo. Ma den basi fi en be lobi a fasi fa a be e du en wooko, neen meke den akisi en efu a wani wooko a hii wiki. Den taigi en taki den o pai en dii toon moo ipi. Fu di a sisa be sabi taki a ná o poi pionili efu a wooko hii wiki, meke a á teke a wooko. Den sani ya, a wantu fu den sani di son Kelesten e du fu di den wani du ala san den man gi Yehofa. Efu u de kabakaba fu poti a Kownukondee a fesi, wi e soi taki wi e teke en fu bigi taki wi anga Gadu a mati. Wi e soi tu taki a de di wi anga Yehofa de mati bigi gi u moo goontapu gudu.

TE DEN GOONTAPU GUDU FU U NÁ O DE MOO

15. Sowtu gudu e meke sama moo piisii?

15 Winsi wan sama gudu, dati á wani taki Gadu lobi a fasi fa ai libi. Yehofa e belesi den sama di e „du omen bun sani”. (Leisi 1 Timotiyesi 6:17-19.) Wan sisa den e kai Lucia be yee taki den be abi peleikiman fanowdu a Albaniya. * (Luku a maiki a ondoo.) Neen meke a foloisi komoto a Italiyakondee aini 1993, neen a go a Albaniya. A á be abi wooko di a go de, ma toku a be e biibi taki Yehofa be o solugu en. Di a leli Albaniyatongo a yeepi moo enke 60 sama fu dopu. Kande u ná abi bun bakapisi aini a peleikiwooko enke a sisa ya. Ma ala den sani di wi e du fu yeepi  sama fu fende a pasi fu libi, a wan sani di u ná o feegete noiti.​—Mateyesi 6:20.

Den sani di wi e du gi Yehofa anga a Kownukondee e meke u piisii

16. (a) San o pasa anga a bisnis fu a goontapu ya? (b) Fa u mu si goontapu gudu te u pakisei san o pasa dyonson?

16 Yesesi taki: „Te i ná abi den gudu ya moo.” A á taki kande den ná o de moo (Lukasi 16:9). Aini a ten ya a omen banku abi moni polobelema. A omen kondee abi moni polobelema tu. Ma dyonson a libi o moo taanga. Sani ná o waka bun anga bisnis, keliki anga politiki palitei fu a goontapu fu Saatan. A polofeiti Eseikiyeli anga Sefanya taki gowtu anga solufu o toon soso sani. A den sani ya a goontapu fu Saatan e si enke den moo pelensipali sani (Eseikiyeli 7:19; Sefanya 1:18). Fa wi o fii te u kon gaandi da u fusutan taki wi á be poti Gadu Kownukondee a fesi aini u libi? U be o fii enke wan man di tyotyo en hii libi fu wooko omen moni, neen a kon fusutan bakaten taki a soso falisi moni den be gi en (Odo 18:11). Den gudu fu a goontapu ya o kaba a soso. Neen meke u mu koboloiki den gudu di wi abi fu toon Yehofa anga Yesesi mati. Den sani di wi e du gi Yehofa anga a Kownukondee o meke u piisii tuutuu.

17, 18. San den mati fu Yehofa e angii fu du aini a ten di e kon?

17 Te Gadu Kownukondee o tii, nawan sama o pai yuu efuso leni moni moo. Tyaipi nyanyan o de. A ná o de fu u bai den. Dataa anga deesi seefi ná o de fanowdu moo. Den mati fu Yehofa o go e fende den moo bun sani fu a goontapu. Den ná o koboloiki gowtu, solufu anga taa dii sani fu kon gudu, ma den o koboloiki den fu moin denseefi. Wi o man fende den moo bun udu, siton, anga ayee fu meke moin osu. Den mati fu u o yeepi u wooko. A ná o de fu u pai den. Wi o go e paati den sani di o de a goontapu anga makandaa.

18 Disi a wantu fu den belesi di den mati fu Yehofa o fende. Den sama di e dini Yehofa o piisii di den o yee Yesesi taki: „Den sama di Nda belesi, u kon, da u go aini a Kownukondee di a seeka gi u senten di goontapu sete.”​—Mateyesi 25:34.

^ paragraaf 4 Yesesi á taki efu a lei den lei gi a futuboi. Lukasi 16:1 e soi taki a „yee” a basi „yee” taki a futuboi e poli den gudu fi en. Kande a lei wan sama lei gi a futuboi. Ma winsi fa sani waka, Yesesi wani u poti pakisei a san a futuboi du di a basi puu en a wooko.

^ paragraaf 15 A ondoofenitoli fu Lucia Moussanett de aini a Ontwaakt! fu 22 yuni 2003, bladzijde 18-22.