Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2017

Saide u mu „gafa Yah”?

Saide u mu „gafa Yah”?

„Gafa Yah . . . Wi e piisii te wi e gafa en. A fiti fu gafa en!”​—PSALM 147:1.

SINGI: 59, 3

1-3. (a) On ten den sikiifi Psalm 147? (b) San wi e leli te wi sutudeli Psalm 147?

U LOBI gafa sama te den du wan sani di e bigi gi u efuso te den taki wan sani di u lobi. Ma a sama di u mu moo gafa, a Yehofa. Te u luku den sani di Yehofa meke, da wi e si taki a taanga tuutuu. Neen meke wi e gafa en. Wi e gafa en tu fu di wi e si taki a lobi u, bika a sende a wan kodo manpikin fi en kon dede gi u.

2 Te wi e leisi Psalm 147, wi e si taki a sama di sikiifi a psalm ya be wani gafa Gadu tuutuu. A be e gi taawan taanga-sikin fu gafa Gadu tu.​—Leisi Psalm 147:1, 7, 12.

3 Wi á sabi sama sikiifi Psalm 147. Ma a gei enke a sama di sikiifi a psalm ya be de a libi a ten di den Islayelisama be daai go a Yelusalem, baka di Yehofa be puu den a katibo a Babilon (Psalm 147:2). A psalm sikiifiman gafa Yehofa bika den Islayelisama be man dini en aini den eigi kondee baka. Baka dati a kai moo sani di e soi saide a be e gafa Yehofa. San a wantu sani di  a kai? Saide u mu „Gafa Yah”?​—Psalm 147:1.

YEHOFA E TOOSUTU DEN SAMA DI BOOKO-SAKA

4. Fa den Islayelisama fii di Kownu Sirus fii den? Saide den fii so?

4 Pakisei fa den Islayelisama be e fii di den be de a katibo a Babilon. Den sama di tyai den go a katibo be e soso den. Den be e taigi den taki: „Singi wan fu den singi fu Siyon gi u.” Ma den Dyu á be e fii fu singi, bika Yelusalem, a foto di be e meke den piisii be booko (Psalm 137:1-3, 6). Den be lasi-ati, neen meke den be abi taanga-sikin fanowdu. Yehofa yeepi en foluku enke fa en Wowtu be taki a fesi. Fa a yeepi den? Di Kownu Sirus fu Persiya wini Babilon, a taki: „Yehofa . . . sende mi fu mi meke wan osu gi en a Yelusalem.” Sirus taigi den Islayelisama taki: „Efu wan sama fu a foluku fi en de yaaso, da meke Yehofa en Gadu de anga en” (2 Koloniki 36:23). A sani ya be musu gi den Islayelisama di be de a Babilon taanga-sikin.

5. San a psalm sikiifiman taki fu a taanga-sikin di Yehofa e gi u?

5 Yehofa be toosutu ibiiwan fu den Islayelisama. Yehofa e du a sani ya aini a ten ya tu. A psalm sikiifiman taki Gadu e „deesi den sama di booko-saka. A tei den soo fu den” (Psalm 147:3). Te u siki efuso booko-saka, u sa biibi taki Yehofa e booko en ede anga u. Yehofa de kabakaba fu toosutu u fu u sa fii bun baka (Psalm 34:18; Yesaya 57:15). Ai gi wi a koni anga a kaakiti di wi abi fanowdu fu pasa den tesi di e miti u.​—Yakowbesi 1:5.

Yehofa de kabakaba fu gi u taanga-sikin anga fu yeepi u fu u fii bun

6. Fa u sa fende wini fu den sani di a psalm sikiifiman taki a Psalm 147:4? (Luku a fowtow na a bigin.)

6 Baka dati a psalm sikiifiman luku go a tapu, neen a taki Yehofa e „teli den sitali”. Boiti dati „ai kai ala den a den nen” (Psalm 147:4). A psalm sikiifiman be e si den sitali, ma a á be sabi omen sitali de. Koniman fu a ten ya taki a miliyunmiliyun sitali anga palaneiti de aini wan kulu. Den taki a gei enke a miliyunmiliyun fu den sowtu kulu ya de. Libisama á poi teli ala den sitali, ma a Gadu di meke den poi teli den. A sabi ala den sitali, neen meke a gi den nen (1 Korentesama 15:41). A Gadu di sabi pe ala den sitali de, sabi i tu. A sabi pilisisi pe i de, fa yu e fii anga san yu abi fanowdu.

7, 8. (a) San Yehofa sabi fu u? (b) Gi wan toli di e soi taki Yehofa e fusutan u.

7 Yehofa sabi san e miti i. A poi yeepi i anga den polobelema fi i. (Leisi Psalm 147:5.) Kande yu e si enke i ná o poi losi den polobelema fi i. Ma Gadu sabi san u poi du anga san wi á poi du. „Ai holi a pakisei taki anga doti u meke” (Psalm 103:14). Wi a sondu sama, neen meke a omen leisi  wi e meke aseefi fowtu. A sani ya e meke wi e fii booko-saka. Ai hati u te u taki wan sani di wi á be mu taki. Ai hati u tu te u pakisei fu du wan sani di á fiti efuso te u dyalusu anga wan sama. Yehofa nai meke fowtu, ma a sabi fa wi e fii.​—Yesaya 40:28.

8 I si wan leisi kaba fa Yehofa yeepi i fu pasa wan tesi? (Yesaya 41:10, 13). Wan pionili den e kai Kyoko be si a sani ya. Di a sisa ya go yeepi a wan taa kemeente, a be e fii booko-saka. Ma fa a be du sabi taki Yehofa e fusutan en? A omen baala anga sisa fu a nyun kemeente di a foloisi go be e fusutan fa a be e fii. A sisa taki a be e fii enke a Yehofa be e taigi en taki: „A ná di yu e pionili wawan meke mi lobi i, ma yu a mi umanpikin. Yu e dini mi anga i hii ati. Mi wani i de koloku enke wan Kotoigi fu mi.” Fa Yehofa soi i taki ai fusutan i?

YEHOFA E GI U SAN WI ABI FANOWDU

9, 10. San na a moo pelensipali fasi fa Yehofa e yeepi u? Gi wan ondoofenitoli.

9 Ala wi abi nyanyan, koosi anga tanpeesi fanowdu. Kande yu e booko yu ede taki i ná abi nyanyan sai. Ma Yehofa meke a goontapu fu meke nyanyan gi libisama anga meti. „Ai gi den yonkuu baaka foo nyanyan te den e bali fu di angii e kii den.” (Leisi Psalm 147:8, 9.) Efu Yehofa e gi foo nyanyan, u sa biibi taki a o yeepi u fu fende den sani di wi abi fanowdu.​—Psalm 37:25.

10 A moo pelensipali sani di Yehofa e du gi u, na a yeepi di ai yeepi u fu u biibi taanga. Ai gi wi a „freide fu Gadu di libisama á poi fusutan” (Filipisama 4:6, 7). Wan baala den e kai Mutsuo anga en uman si fa Yehofa yeepi den di a wataa fu a se wasi kon aini Yapan aini 2011. Efu den á be go a den tapu osu, kande den be dede. Beina na ala san den be abi den lasi a dei de. A neti de, a dunguu den siibi aini wan koo kambaa na a sodoo fu den. Di den weki a mamanten, neen den suku wan sani di be sa toosutu den. Na a Jaarboek fu 2006 namo den fende. Di Mutsuo opo a buku, a si wan artikel di den e kai „De dodelijkste tsoenami’s in de opgetekende geschiedenis” (Den moo gaan tsunami di be pasa). A artikel be e taki fu wan seke-doti di be kon a Sumatra aini 2004 di be meke wan gaan wataa wasi go aini a kondee. Mutsuo anga en uman kee di den leisi san be miti den baala anga sisa. Den fii enke Yehofa be gi den a taanga-sikin di den be abi fanowdu. Yehofa yeepi den taa fasi tu. Den baala anga sisa a Yapan gi den nyanyan anga koosi. Ma a sani di moo gi den taanga-sikin, a di den miti den baala di a olikanisâsi be sende fu gi den taanga-sikin. Mutsuo taki: „Mi be e fii enke Yehofa be de anga ibiiwan fu wi. A be e gi u taanga-sikin. A sani ya toosutu u tuutuu.” A fosi sani di Gadu e gi u, a den sani di wi abi fanowdu fu taanga u biibi. Baka dati ai yeepi u fu fende den taa sani di wi abi fanowdu.

 FA I SA FENDE WINI FU A YEEPI DI GADU E YEEPI U?

11. San u mu du fu fende wini fu a yeepi di Gadu e yeepi u?

11 Yehofa e „yeepi den safu-ati sama”. A lobi u, ala yuu a de kabakaba fu yeepi u (Psalm 147:6a). Fa u sa fende wini fu a sani ya? U mu meke moiti fu wi anga en de bun mati. Efu u wani toon en mati, u mu abi sakafasi (Sefanya 2:3). Den sama di abi sakafasi e biibi taki Yehofa o sitaafu den sama di nai libi bun anga den. Den e biibi taki Yehofa o puu den a nowtu. Yehofa e si den fu bun sama tu.

12, 13. (a) Anga san u mu luku bun efu u wani Yehofa yeepi u? (b) Sama Yehofa lobi?

 12 Ma na a taa se Gadu o „saka den ogii sama te a doti” (Psalm 147:6b). Wi á wani a sani ya miti u. Efu u wani Yehofa lobi u, u mu buuse san ai buuse (Psalm 97:10). Wan fu den sani di u mu buuse a hululibi. Neen meke wi á mu du nawan sani di o meke u didon anga wan sama di ná o toowpaa. U mu tan faawe fu sani enke felon anga fowtow di e soi fa sama e didon anga denseefi (Psalm 119:37; Mateyesi 5:28). Kande a á makiliki fu wai pasi gi a sani ya, ma efu u du ala san u man, Yehofa o belesi u.

13 U wawan á poi wini a feti ya. Wi abi Yehofa fanowdu. Fa Yehofa o fii efu wi e fitoow den sani di sama e denki taki o yeepi den? Yehofa „nai si a kaakiti fu asi enke gaan sani”. U mu fitoow useefi efuso taa sama? Beibel taki Yehofa „nai foondoo gi a gaw di wan sama futu gaw” (Psalm 147:10). Neen meke u mu e begi Yehofa fu a yeepi u anga den swakifasi fu u. Yehofa ná o weli fu aliki den begi fu u. A „lobi den sama di e lesipeki en” (Psalm 147:11). U sabi taki a o yeepi u fu wini den swakifasi fu u bika a lobi u. A ná o gwe fika u tu.

14. San a psalm sikiifiman be e biibi?

14 Yehofa taki a o yeepi u te wi abi polobelema. Di den Islayelisama daai go a Yelusalem baka, a psalm sikiifiman be e pakisei fa Yehofa be yeepi en foluku. A singi taki: „Ai meke den kaampu fu den gaan doo fu a foto fi i kon taanga. A belesi den manpikin fi i. Ai solugu taki sani e go bun na a pisi kondee fi i” (Psalm 147:13, 14). Fu di Yehofa be o meke den gaan doo fu a foto kon taanga, meke a psalm sikiifiman be e fii bun. A sani ya be e meke a biibi taki Yehofa be o kibii en foluku.

Fa Gadu Wowtu sa yeepi u te wi e fii booko-saka te tesi e miti u? (Luku paragraaf 15-17)

15-17. (a) Fa wi e fii son leisi te polobelema e miti wi? Fa Yehofa e yeepi u anga en Wowtu? (b) Gi wan ondoofenitoli di e soi fa Gadu e yeepi u anga en Wowtu.

 15 Kande yu e booko yu ede anga den polobelema fi i, ma holi a pakisei taki Yehofa poi yeepi i. A psalm sikiifiman taki Gadu e „komandei goontapu. A bosikopu fi en gaw”. A psalm sikiifiman taki fu eisi di e kai komoto a tapu, neen a akisi taki: „Sama poi anga a koo fi en? Te a taki wan sani, eisi e sumutu” (Psalm 147:15-18). U Gadu sabi ala sani. A man du ala sani tu. Efu a man meke eisi kai komoto a tapu, da a poi yeepi i anga den polobelema fi i.

I si fa Yehofa yeepi i gawgaw kaba?

16 Anga a Beibel Yehofa e tii wi aini a ten ya. A psalm sikiifiman taki a Wowtu fu Yehofa e yeepi u „gaw”. Gadu e tii wi a wan bun fasi. Pakisei den leli di yu e fende aini Beibel, den buku fu „a koni saafu di u sa fitoow”, JW Broadcasting, jw.org, den owluman anga den baala anga sisa. Ai gi u leli na a yuu di wi abi en fanowdu (Mateyesi 24:45). I si fa Yehofa yeepi i gawgaw kaba?

17 Wan sisa den e kai Simone si fa a Wowtu fu Gadu yeepi en. A be e fii enke a ná abi nawan fa. A be e si enke Yehofa á be e piisii anga en. Te a be e fii booko-saka, a be e begi Yehofa fu a yeepi en. A be e sutudeli Beibel tu. A taki: „Noiti wan sani miti mi te da mi á si fa Yehofa gi mi kaakiti. Mi e si tu fa ai poti mi a pasi.” A sani ya yeepi en fu a á fii booko-saka tumisi.

18. Saide yu e si enke Yehofa de koosube fi i? Saide yu e „gafa Yah”?

18 A psalm sikiifiman be sabi taki fu ala den foluku di be de a goontapu, a den Islayelisama Yehofa be teke enke en foluku. A den wawan Gadu be gi en „Wowtu” anga „den weiti fi en”. (Leisi Psalm 147:19, 20.) Aini a ten ya, wi abi a gaandi fu tyai a nen fu Gadu. Ai bigi gi u taki u sabi en. Ai bigi gi u taki wi abi en Wowtu di e tii wi. Ai bigi gi u tu taki wi anga Yehofa a mati. Gadu du omen sani gi u tu, neen meke u mu ’gafa en’ leti enke fa a sama di sikiifi Psalm 147 be e gafa en. U mu gi taawan taanga-sikin fu gafa Gadu tu.