Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2017

„Kee anga den sama di e kee”

„Kee anga den sama di e kee”

„U mu e gi makandaa taanga-sikin, u mu e yeepi makandaa.”​—1 TESALONIKASAMA 5:11.

SINGI: 90, 111

1, 2. Saide wi o luku fa u sa toosutu den sama di e kusumi? (Luku a fowtow na a bigin.)

SUSI taki: „Beina a wan hii yali u kusumi di a boi fu u dede. A du wi ogii te.” Wan baala di uman dede wanboowanboo taki: „Mi á poi taigi i fa mi e fii.” A tyali taki a omen sama den nowtu ya e miti. A omen Kelesten aini a ten ya á be denki taki wan sama fu den be o dede fosi Alimakedon. Kande wan sama fi i dede efuso kande i sabi wan sama di e kusumi. Efu a sani ya pasa, da kande yu e akisi iseefi taki: ’Pe wan sama di e tyali sa fende toosutu?’

2 Son sama taki te wan sani miti wan sama, baka wan pisiten a nai kusumi moo. Ma a so sani e waka  ala yuu? Wan sisa di man dede taki: „Mi e si enke a den sani di wan sama e du ala dei, e yeepi en fu a á kusumi moo.” Te wan sama e kusumi, a abi ten anga taanga-sikin fanowdu fu kisi enseefi. Ma san sa yeepi den sama di e kusumi fu fii moo bun?

YEHOFA NA „A GADU DI E TOOSUTU SAMA”

3, 4. Saide u sa biibi taki Yehofa e fusutan fa wi e fii te wan sama fu u dede?

3 U Dda Yehofa abi tyali-ati. Neen na a moo pelensipali sama di e toosutu u. (Leisi 2 Korentesama 1:3, 4.) Sama á de di abi tyali ati enke Yehofa. A paamisi en foluku taki: „A miseefi e toosutu u.”​—Yesaya 51:12; Psalm 119:50, 52, 76.

Yehofa e angii fu a dei di a o weki den sama di be e dini en

4 Yehofa sabi fa wi e fii te wan sama fu u dede, bika sama di a lobi dede tu. Wantu fu den sama ya a Abalaham, Isaki, Yakopu, Mosesi, anga Kownu David (Numeri 12:6-8; Mateyesi 22:31, 32; Toli 13:22). Beibel e soi taki Yehofa e angii fu weki den baka (Yopu 14:14, 15). A ten de, den o piisii tuutuu. Den o gusontu. Holi a pakisei taki Yehofa luku duun fa den kii en fosi Manpikin. Beibel taki Yesesi be e ’meke Gadu piisii’ (Odo 8:22, 30). Wi á poi sabi fa Yehofa fii di a si fa sama kii en Manpikin a wan ogii-ati fasi.​—Yohanisi 5:20; 10:17.

5, 6. Fa Yehofa e toosutu u?

5 U sa biibi taki Yehofa o yeepi u. Neen meke wi á mu feele fu taigi en fa wi e fii. Ai gi u taanga-sikin fu sabi taki Yehofa sabi fa wi e fii. Ai gi u taanga-sikin tu fu sabi taki ai toosutu u! Ma fa ai du a sani ya?

6 A santa yeye di Yehofa e gi u a wan fu den fasi fa ai toosutu u (Toli 9:31). Yesesi be taki efu u begi Yehofa a santa yeye a o gi wi en. A santa yeye na a moo taanga kaakiti di de (Lukasi 11:13). Susi di u be taki fi en na a bigin taki: „A omen leisi u saka kini begi Yehofa fu a toosutu u. Ala yuu te u begi en ai yeepi u fu fii moo bun.”​—Leisi Filipisama 4:6, 7.

YESESI SEEFI SABI FA WI E FII

7, 8. Saide u sa biibi taki Yesesi o toosutu u?

7 Den sani di Yesesi be e taki anga den sani di a be e du di a be de a goontapu, be e soi taki a abi den manii fi en Dda (Yohanisi 5:19). Yehofa be sende Yesesi kon a  goontapu fu toosutu „den sama di booko-saka” anga „ala den sama di e tyali” (Yesaya 61:1, 2; Lukasi 4:17-21). Den sama be sabi taki Yesesi be e fusutan fa den e fii. Den be sabi tu taki a be wani yeepi den.​—Hebrewsama 2:17.

8 Kande son mati anga famii fu Yesesi dede di a be yonkuu. A gei a yonkuuyonkuu Yesesi be de di en kweki dda Yowsefu dede. * (Luku a maiki a ondoo.) Yesesi a be wan yonkuuwan di be e booko en ede anga taawan. Pakisei fa a be e fii di a si fa en mma anga den baala anga sisa fi en be e kee di a sani ya be miti den.

9. Fa Yesesi soi tyali-ati di Lasalesi dede?

9 Di Yesesi be de a goontapu, a be soi taki a be sabi san e miti libisama. A be e fii gi den tu. Di en bun mati Lasalesi be dede, tyali kisi en di a si fa Maliya anga Maata be e kee. Tyali kisi en te neen enseefi kee, winsi fa a be sabi taki a be o weki Lasalesi baka.​—Yohanisi 11:33-36.

10. San o yeepi u fu biibi taki Yesesi sabi fa wi e fii?

10 Fa den sani di Yesesi taki sa toosutu wi aini a ten ya? Beibel e soi kiin taki Yesesi á kengi. A taki: „Yesesi Kelestesi na aseefi eside anga tide. A so a o de fu teego” (Hebrewsama 13:8). Beibel e kai en „a Moo Pelensipali Fesiman di e gi libi”, bika neen meke wi abi a okasi fu libi fu teego. Yesesi sabi fa wi e fii te u de anga buduufu na ati. Boiti dati a „poi yeepi den sama di tesi e miti” (Toli 3:15; Hebrewsama 2:10, 18). Neen meke u sa biibi taki ai hati Yesesi te a si sama e pina. A sabi san e miti den. A poi toosutu den „na a moo bun yuu”.​—Leisi Hebrewsama 4:15, 16.

WI E „FENDE TOOSUTU AINI A WOWTU FU GADU”

11. Sowtu tekisi e toosutu i?

11 A Beibel toli di e soi fa tyali be kisi Yesesi di Lasalesi be dede, a wan fu den toli di e gi u taanga-sikin. A sani ya nai foondoo wi „bika ala sani di sama be sikiifi fositen, be sikiifi fu leli u wan sani. Den sani ya e yeepi u fu holidoo, den e meke u fende toosutu aini a Wowtu fu Gadu tu. Na a sani de o meke wi abi howpu” (Romesama 15:4). Efu yu e kusumi, den tekisi ya sa toosutu i tu:

  • „Yehofa de koosube fu den sama di booko-saka. Ai yeepi den sama di lasi-ati.”​—Psalm 34:18, 19.

  • „Te sani be e moo mi, a [Yehofa] be e toosutu mi fu mi sa piisii baka.”​—Psalm 94:19.

  •   „Masaa Yesesi Kelestesi anga Gadu, u Dda, lobi u. Den gi u taanga-sikin fu teego. Den gi u wan moin howpu tu fu di den soi bun-ati gi u. Neen meke den toosutu u.”​—2 Tesalonikasama 2:16, 17. *​—Luku a maiki a ondoo.

A KEMEENTE E TOOSUTU U

12. Fa u sa gi taawan taanga-sikin?

12 Sama di de anga buduufu na ati sa fende toosutu aini a kemeente tu. (Leisi 1 Tesalonikasama 5:11.) Fa i sa toosutu den sama di e kusumi? (Odo 17:22) Holi a pakisei taki „wan ten de fu taki anga wan ten fu de pii” (Peleikiman 3:7). Wan sisa den kai Dalene man dede. A taki den sama di de anga buduufu na ati mu taki puu koko a den ati. Neen meke, a moo bun sani di i sa du, a fu aliki den te den e taki. Yu á mu koti den mofu. Wan baala fu Junia kii enseefi. Junia taki: „Winsi fa i nai kaba fusutan fa wan sama e fii, tokuso a moo pelensipali sani a taki den sama di e kusumi mu si taki yu e meke moiti fu fusutan fa den e fii.”

13. San u mu holi a pakisei te wan sama de anga buduufu na ati?

13 U mu holi a pakisei taki a ná ala sama e tyali na aseefi fasi. Son leisi a taanga fu taigi taawan fa wi e fii tuutuu. Gadu Wowtu taki: „Na a ati wawan sabi fa wan sama e tyali, a leti so taa sama á sabi fa ai piisii tu” (Odo 14:10). Son leisi winsi wan sama taigi u fa ai fii seefi, a ná ala yuu a makiliki fu fusutan en.

Son leisi a moo bun sani fu du a fu „kee anga den sama di e kee”

14. San u sa taki fu toosutu den sama di de anga buduufu na ati?

14 Son leisi a taanga fu sabi san i mu taki fu gi wan sama di de anga buduufu na ati taanga-sikin. Ma Beibel taki „a mofu taki fu wan koniman de enke deesi” (Odo 12:18). A omen sama kon sabi san den sa taigi sama di de anga buduufu na ati baka di den leisi a bolosilo di den e kai Wanneer iemand die u dierbaar is, sterft (Te wan sama di i lobi dede). * (Luku a maiki a ondoo.) Son leisi a moo bun sani fu du a fu „kee anga den sama di e kee”  (Romesama 12:15). Wan sisa den e kai Gaby, man dede. A sisa ya taki a kee ai kee puu koko neen ati. A taki: „Mi e fende taanga-sikin te den mati fu mi e kee anga mi. Te den e kee anga mi, mi e fii taki a ná mi wawan de.”

15. San u sa du fu gi taawan taanga-sikin efu a taanga gi u fu taki fesi a fesi anga den? (Luku a faki „ Taki switi anga taawan fu gi den taanga-sikin.”)

15 Efu a taanga gi i fu taki sani di e gi wan sama di e kusumi taanga-sikin, da kande a moo bun fu sikiifi wan biifi gi en efuso wan sms. I sa sikiifi wan tekisi, kai wan manii di i be lobi fu a sama di dede efuso wan toli fu a sama, di o gi taawan taanga-sikin. Junia taki: „Te wan sama sikiifi wan satu biifi gi mi efuso te den kai mi fu mi de makandaa anga den, mi e fii bun. A so mi e si taki den lobi mi, den e booko den ede anga mi tuutuu.”

16. San a wan fasi fa u sa gi taawan taanga-sikin?

16 Den begi fu u sa yeepi den baala anga sisa fu u di e tyali. U sa begi gi den efuso begi anga den. Winsi yu e si enke a taanga fu di yu e si enke yu o kee, tokuso begi sa gi den taanga-sikin. Dalene taki: „Son leisi te sisa kon gi mi taanga-sikin, mi e akisi den efu den wani begi gi mi. Te den bigin begi son leisi kee e kisi den, ma baka dati den e begi anga den hii ati.  A biibi fu den, a lobi di den lobi mi anga a booko di den e booko den ede anga mi e taanga mi biibi tuutuu.”

NÁ WELI FU GI TAAWAN TAANGA-SIKIN

17-19. Saide wi á mu tapu fu gi taawan taanga-sikin?

17 Son sama e kusumi langa moo taawan. Te wan sama dede, a omen mati anga famii e kon gi en taanga-sikin. Ma winsi den sama ya nai go kee pina anga den moo, toku den abi taanga-sikin fanowdu ete. Neen meke u mu de kabakaba fu yeepi den. „Wan tuutuu mati o lobi i ala yuu. A de enke wan baala di meke fu yeepi i te i fuka” (Odo 17:17). Solanga wan sama de anga buduufu na ati, u mu toosutu en.​—Leisi 1 Tesalonikasama 3:7.

18 Holi a pakisei taki a wanboowanboo wan sama di de anga buduufu na ati sa pakisei wan sani di sa meke a kee. A sani ya sa pasa te a yuu doo di en anga a sama be toow. Son leisi a sani enke poku, fowtow, sani di a be gwenti du, wan sani di a sumee, wan sani di a yee efuso wan pisiten fu a yali e meke a pakisei a sama fi en di dede. Te wan sama toowpaa dede, da kande a o pakisei a sama fi en tu te en wawan o go a wan gaan komakandaa efuso na a Membeefesa. Wan baala taki: „Mi be sabi taki di a dei be o doo di mi anga mi uman be toow, a be o hati mi. A á be makiliki seefiseefi gi mi. Ma wantu baala anga sisa kai wantu mati fu mi neen den kon sidon anga mi, fu mi wawan á sidon kusumi.”

19 I mu holi a pakisei taki a ná wan leisi namo den sama di e tyali abi toosutu fanowdu. Junia taki: „A switi te taawan e yeepi i a wan yuu di yu á be denki. A switi tu te den nai wakiti wan pelensipali dei fu kon a yu.” Wi á poi puu ala den pen di sama e fii te wan sama fu den dede, ma te wi e du sani gi den, da wi e toosutu den (1 Yohanisi 3:18). Gaby taki: „Te mi luku a fasi fa den owluman yeepi mi di mi be e kusumi, mi e gi Yehofa daa. Den meke mi si taki Yehofa lobi mi.”

20. Saide den sani di Yehofa paamisi u e toosutu u?

20 Ai gi u taanga-sikin fu sabi taki di Yehofa, a Gadu di e toosutu sama o weki den sama fu u di dede, nawan sani o meke u de anga buduufu na ati moo (Yohanisi 5:28, 29). Gadu paamisi taki a o „puu dede fu alaten. A moo hei Masaa Yehofa o sibi a wataa-ain fu ala sama puu a den fesi” (Yesaya 25:8). A ten de a ná „kee wi o kee anga den sama di e kee”, ma a poolo wi o „poolo anga den sama di e poolo”.​—Romesama 12:15.

^ paragraaf 8 Beibel e soi taki Yowsefu be de a libi ete di Yesesi be abi 12 yali. Ma Beibel á taki fu Yowsefu moo di Yesesi du a fosi wonduu, di a be meke wataa toon win. Bakaten di Yesesi be de na a pina udu, a be akisi Yohanisi fu a solugu en mma gi en. Efu Yowsefu be de a libi ete, Yesesi á be o akisi Yohanisi a sani de.​—Yohanisi 19:26, 27.

^ paragraaf 11 Taa tekisi di toosutu sama a Psalm 20:1, 2; 31:7; 38:8, 9, 15; 55:22; 121:1, 2; Yesaya 57:15; 66:13; Filipisama 4:13; anga 1 Peitilisi 5:7.

^ paragraaf 14 Luku a artikel tu di den e kai „Volg Jezus’ voorbeeld en troost nabestaanden” (Toosutu taawan enke fa Yesesi be e toosutu sama) aini a Bakaatongo Wakititolen fu 1 november 2010.