Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuli 2017

Sani di leisiman akisi

Sani di leisiman akisi

Kelesten mu abi goni fu yeepi denseefi te taa sama wani du ogii anga den?

Kelesten e holi den weiti fu Beibel a pakisei te den e du sani fu kibii denseefi. Den weiti ya e soi taki a á be o bun fu wan Kelesten koboloiki sani enke pisitoo, onti goni anga taa goni fu kibii denseefi fu taawan á du ogii anga den. Pakisei den sani ya:

Yehofa e si a libi fu wan libisama enke wan sani di santa. A psalm sikiifiman David be taki fu Yehofa taki: „A yu na a sama di e gi libi” (Psalm 36:9). Neen meke efu wan Kelesten wani kibii enseefi efuso den gudu fi en, da a mu luku bun fu a á kii sama.​—Deitolonomi 22:8; Psalm 51:14.

A tuu taki ala sani di wan sama teke fu feti anga wan taawan di wani du ogii anga en, sa tyai dede gi a taawan. Ma a moo makiliki fu kii sama anga goni, winsi a ná fu seefi. * (Luku a maiki a ondoo.) Boiti dati, kande a sama di kon fu du ogii anga i e buuya pikinso. Da efu a si a goni, sani sa kon moo ogii. A sani ya sa tyai dede gi wan fu u.

A ná wani Yesesi be wani den bakaman fi en feti di a taigi den a neti di a be o dede, taki den mu tyai feti-how (Lukasi 22:36, 38). Ma a wani a be wani leli den taki den á mu du ogii anga taawan, winsi wan gaan kulu sama kon a den anga fetisani fu du ogii anga den (Lukasi 22:52). Neen meke di Peitilisi doo a futuboi fu a hei pilisite yesi, Yesesi taigi en taki: „Poti i feti-how neen peesi baka.” Baka dati Yesesi taigi Peitilisi wan sani di ala Kelesten mu holi a pakisei. A taki: „A sama di e teke feti-how fu feti, na aseefi feti-how o kii en.”​—Mateyesi 26:51, 52.

Leti enke fa a sikiifi a Mika 4:3, a foluku fu Gadu „o meke den feti-how fu den toon wookosani fu tuubu doti”. Sama sabi tuu Kelesten enke sama di e libi bun anga taawan. Den e du a sani di Gadu be meke apostel Pawlesi sikiifi. A be sikiifi taki: „Wi á mu pai ogii fu ogii.” A taki Kelesten mu „libi bun anga ala sama” (Romesama 12:17, 18). Sama be du ogii anga Pawlesi omen leisi. Fufuuman be sa du ogii anga en tu. Ma noiti Pawlesi pasa den weiti fu Yehofa (2 Korentesama 11:26). A be e fitoow Gadu ala yuu. A be sabi taki den weiti fu Gadu di de aini Beibel bun moo „fetisani”.​—Peleikiman 9:18.

A libi pelensipali gi Kelesten moo goontapu gudu. U sabi taki ’den sani di wi abi á poi gi u libi’ (Lukasi 12:15). Neen meke efu u taki a wan lesipeki fasi anga wan fufuuman di holi goni gi u, neen a ná aliki u, u mu du san Yesesi taki. A taki: „Wi á mu feti anga wan ogii sama.” Son leisi a sani ya wani taki u mu fika en fu a teke san a wani (Mateyesi 5:39, 40; Lukasi 6:29) * (Luku a maiki a ondoo.) Ma a moo bun fu  wi á du sani di o kai fufuuman. Enke fa Beibel taki wi á mu e „poolo anga den gudu” fu u, da kande fufuuman ná o sabi taki wi abi son sani (1 Yohanisi 2:16). Efu sama sabi u enke Yehofa Kotoigi di e libi bun anga taawan, da a sani ya sa kibii u tu.​—Odo 18:10.

Wi enke Kelesten e lesipeki a kosensi fu taawan (Romesama 14:21). Son baala anga sisa be o dyombo efu den yee taki wan baala efuso sisa abi wan goni fu kibii enseefi gi fufuuman. Son wan be sa komoto a waaleiti seefi. Winsi lanti e gi u pasi fu abi wan goni, u wani holi u baala anga sisa a pakisei, bika u lobi den. Noiti u wani du wan sani di o meke den komoto a waaleiti.​—1 Korentesama 10:32, 33; 13:4, 5.

Tuu Kelesten wani taawan waka a den baka. (2 Korentesama 4:2; 1 Peitilisi 5:2, 3). Efu wan Kelesten abi wan goni fu kibii enseefi gi fufuuman, den owluman mu taki anga en fu soi en san Beibel e taki. Efu a á wani fika a goni, den baala anga sisa ná o poi waka neen baka. Neen meke a ná o poi abi faantiwowtu aini a kemeente. Na aseefi sani e teli gi wan Kotoigi di e tyai goni neen wookope. A be o bun fu a suku wan taa wooko. *​—Luku a maiki a ondoo.

A wan Kelesten seefi mu luku san a o du fu sama á du ogii anga en efuso en famii. Neen seefi mu luku efu a o tyai goni efuso sowtu wooko a o du. Ma te ai du den sani ya, a mu holi san Beibel taki a pakisei. U Gadu di abi ala koni poi yeepi u fu sabi san u mu du. Neen meke den Kelesten di biibi taanga nai tyai goni fu kibii denseefi fu taa libisama á du sani anga den. Den sabi taki efu den fitoow Gadu neen den du san en Wowtu taki, a o kibii den fu teego.​—Psalm 97:10; Odo 1:33; 2:6, 7.

Na a ten fu a gaan banowtu, Kelesten o fitoow Yehofa. Den ná o meke moiti fu feti te sama wani du ogii anga den

^ paragraaf 3 A á fowtu fu Kelesten abi goni fu kii meti fu nyan efuso fu kii meti di sa du ogii anga den. Ma te den nai wooko anga en, den mu puu a lai aini. A be o bun fu a booko a goni, da a kibii en a wan peesi fu sama á fende en. Aini den kondee di lanti á wani sama abi goni anga kondee pe lanti wani sama meke pampila fu goni, Kelesten mu holi den weiti di lanti poti.​—Romesama 13:1.

^ paragraaf 6 Efi i wani sabi san i sa du te sama e suku fu suwa anga i, da luku a artikel „Hoe verkrachting te voorkomen” (San i mu du te wan sama wani suwa anga i) aini a Ontwaakt! fu 8 maart 1993.

^ paragraaf 2 Efi i wani sabi moo san i sa du te yu abi wan wooko pe den gi i goni fu tyai, luku a Saanantongo Wakititolen fu 1 november 2005 bladzijde 31 anga du fu 15 yuli 1983 bladzijde 25-26.