Skip to content

Skip to table of contents

 SUTUDI-ARTIKEL 4

San a fasi fa a Membeefesa e holi, e leli u fu wan Kownu di e tii a hemel?

San a fasi fa a Membeefesa e holi, e leli u fu wan Kownu di e tii a hemel?

„A sani ya wani taki mi sikin. . . . A sani ya wani taki a ’buulu fu mi di de fanowdu fu meke a kuudei.’”​—MAT. 26:26-28.

SINGI 16 Gi Gadu daa fi en Manpikin di e tii enke Kownu

SAN WI O LELI *

1-2. (a) Saide u nai foondoo te u luku a fasi fa Yesesi soi u fu membee a dede fi en? (b) Sowtu manii fu Yesesi wi o luku?

I POI taigi wan sama fa sani e waka na a Membeefesa? A ná abi misi, gaanse fu u sabi fa sani e waka te wi e membee a dede fu Yesesi. Saide? A fu di u nai du tyaipi sani na a Membeefesa. Ma toku a komakandaa ya pelensipali. Kande wi e akisi useefi taki: ’Efu a Membeefesa pelensipali so, da saide u nai du kofaliki sani na a komakandaa ya?’

2 Di Yesesi be de a goontapu ya, sama be sabi en enke wan man di e gi leli a wan makiliki fasi. Den be e fusutan den sani di a be e leli den tu (Mat. 7:28, 29). Na aseefi sani Yesesi du di a soi u fa u mu membee a dede fi en. Meke u luku a toli ya moo fini. Wi o luku wantu fu den sani di a be taki anga wantu fu den sani di a be du na a komakandaa ya. Wi o si fa Yesesi soi sakafasi, deki-ati anga lobi. Wi o si tu fa u sa meke moiti fu abi den manii ya.

YESESI ABI SAKAFASI

A win anga a beele e membee u taki Yesesi dede gi u, den e membee u tu taki nownow Yesesi e tii a hemel enke Kownu (Luku paragraaf 3-5)

3. Enke fa Mateyesi 26:26-28 e soi, fa Yesesi holi a Membeefesa? San a beele anga a win wani taki?

3 Yesesi soi den 11 apostel fi en di be holidoo fa den mu membee a dede fi en. A teke san be fika fu a Paskafesa di den be holi, neen a soi den a wan makiliki fasi fa  den be mu membee a dede fi en. (Leisi Mateyesi 26:26-28.) Na a beele di á be abi sowda anga a win di be fika a koboloiki. Yesesi taigi den apostel fi en taki den tu sani ya wani taki en sikin anga en buulu di a be o gi enke ofaandi. A gei den apostel fi en á foondoo di a komakandaa ya á be abi tyaipi sani. Saide?

4. Fa a sani di Yesesi be taigi Maata, e yeepi u fu fusutan saide Yesesi á be koboloiki omen sani fu holi a Membeefesa?

4 Pakisei san be pasa wantu mun a fesi, aini du fu dii yali di Yesesi be e du a peleikiwooko. A be go luku Lasalesi, Maata anga Maliya. Den sama ya a be en bun mati. Di den be de makandii, Yesesi bigin leli den. Maata be de ape, ma a á be e poti pakisei bika a be e seeka omen nyanyan gi Yesesi. Di Yesesi si so a wasikoi Maata a wan lesipeki fasi. A soi en taki a ná ala yuu a de fanowdu fu seeka tyaipi nyanyan (Luk. 10:40-42). Bakaten di a be fika wantu yuu fu Yesesi dede, a du a sani di a be leli Maata. A á be koboloiki omen sani fu holi a Membeefesa. San a sani ya e leli u fu Yesesi?

5. San wi e leli te u luku a fasi fa Yesesi holi a Membeefesa? Fa Filipisama 2:5-8 e holibaka gi a sani ya?

5 Den sani di Yesesi be e taki anga den sani di a be e du be e soi taki a abi sakafasi. Neen meke a nai foondoo wi taki a be soi sakafasi a neti fosi a dede (Mat. 11:29). A be sabi taki a dede di a be o dede pelensipali gi libisama. A be sabi tu taki di a be o weki baka, a be o toon Kownu a hemel. Winsi fa a be sabi den sani ya toku a á be holi wan gaan fesa fu sama poti pakisei neen. A taigi den bakaman fi en taki te den e membee a dede fi en wan leisi wan yali, na a win anga a beele namo den mu koboloiki (Yoh. 13:15; 1 Kor. 11:23-25). Yesesi soi anga a fasi fa a be holi a Membeefesa taki a á be e fii enseefi. Wi e piisii fu di u sabi taki a Kownu fu u di de a hemel abi sakafasi.​—Leisi Filipisama 2:5-8.

6. Fa u sa soi taki wi abi sakafasi enke Yesesi te tesi e miti u?

6 Fa u sa soi taki wi abi sakafasi enke Yesesi? A te wi e booko wi ede anga taawan moo useefi (Filip. 2:3, 4). Pakisei a lasiti neti di Yesesi be de a goontapu ya. Yesesi be sabi taki dyonson a be o dede wan hati dede, tokuso a be e booko en ede anga den bakaman fi en, bika a be sabi  taki den be o de anga buduufu na a ati di a be o dede. Neen meke a leli den a hii neti. A gi den taanga-sikin. A yeepi den tu fu den á booko den ede tumisi (Yoh. 14:25-31). Yesesi be e booko en ede anga taawan moo enseefi. A be abi sakafasi tu. Useefi sa meke moiti fu abi den manii ya!

YESESI ABI DEKI-ATI

7. Fa Yesesi soi taki a abi tuutuu deki-ati baka di a holi a Membeefesa?

7 Den sani di Yesesi du baka di a soi den bakaman fi en fa den mu holi a Membeefesa, e soi taki a abi deki-ati. Fa a soi a sani ya? Yesesi du san Gadu wani, winsi fa a be sabi taki a sani ya be o meke sama kii en, fu di den be o taki a kosi Gadu (Mat. 26:65, 66; Luk. 22:41, 42.) Yesesi á gwe fika Yehofa. A gi a nen fu Yehofa gaandi. A soi tu taki a Yehofa na a Moo Gaan Gadu fu hemel anga goontapu. A so den sama di daai den libi abi a okasi fu fende teego libi. Na aseefi yuu, Yesesi seeka den bakaman fi en gi den sani di be o miti den.

8. (a) San Yesesi taigi den apostel fi en di be holidoo? (b) Fa den bakaman fu Yesesi soi taki den abi deki-ati enke en den yali baka di a dede?

8 Yesesi soi taki a be abi deki-ati tuutuu, bika a á poti pakisei a den booko-ede fi en, ma a be e luku fa a be sa yeepi den apostel fi en. A Membeefesa di a holi baka di a sende Yudasi gwe, be o yeepi den salufu Kelesten fu fusutan sowtu wini den o fende fu a dede fi en anga sowtu wini den be o fende fu a nyun kuudei (1 Kor. 10:16, 17). Yesesi taigi den apostel fa en anga en Dda wani den tyai denseefi. A sani ya be o yeepi den fu aliki Yehofa anga fu fende a gaandi fu tii  makandaa anga Yesesi a hemel (Yoh. 15:12-15). Yesesi be taigi den san be o miti den tu. A gi den taanga-sikin fu „abi deki-ati” enke fa a abi deki-ati! (Yoh. 16:1-4a, 33) Baka omen yali di Yesesi dede, den bakaman fi en soi taki den e waka neen baka fu di den be e booko den ede anga taawan anga fu di den abi deki-ati. Winsi den be mu pina seefi, toku den be e holibaka gi denseefi.​—Heb. 10:33, 34.

9. Fa u sa soi taki wi abi deki-ati enke Yesesi?

9 Aini a ten ya, wi e waka a Yesesi baka te wi e soi deki-ati. Wi abi deki-ati fanowdu fu holibaka gi u baala anga sisa te sama e du ogii anga den fu den biibi ede. Son leisi den e poti den baala anga sisa fu wi a sitaafu-osu sosokaali. Te den sowtu sani ya pasa, u mu du ala san u poi fu yeepi den. Son leisi wi abi fu go taki gi den (Filip. 1:14; Heb. 13:19). Wan taa fasi fa wi e soi taki wi abi deki-ati, a te u ’nai feele fu peleiki’ (Toli 14:3). U de kabakaba fu paati a bun nyunsu fu a Kownukondee enke Yesesi, winsi sama wani du ogii anga wi. Ma son leisi kande wi e si taki u ná abi deki-ati sai. San u mu du te u si so?

10. San u mu du aini den wiki fosi a Membeefesa? Saide u mu du a sani ya?

10 U sa fende moo deki-ati te wi e pakisei a howpu di wi abi fu di Yesesi kon dede gi u (Yoh. 3:16; Efe. 1:7). Den wiki fosi a Membeefesa wi abi a okasi fu du sani di o yeepi u fu moo teke a dede fu Yesesi fu bigi. A pisiten de u sa leisi den pisi fu Beibel di u mu leisi gi a Membeefesa. U mu begi, da u sidon pakisei den sani di pasa a pisiten di Yesesi dede. Efu wi e du den sani ya wi o moo fusutan san a beele anga a win wani taki. Wi o  fusutan tu taki a wan gaan bun Yesesi du gi u. Te wi e teke a sani di Yehofa anga Yesesi du gi u fu bigi, te wi e fusutan sowtu wini wi anga den sama fu wi o fende fu a sani ya, da wi o moo biibi den sani di Gadu paamisi u. A sani ya o yeepi u fu abi deki-ati. A o yeepi u fu holidoo te na a kaba.​—Heb. 12:3.

11-12. San u leli te anga now?

11 Te anga now u leli taki boiti taki a Membeefesa e membee wi na a dede di Yesesi dede gi u, ai leli u tu taki Yesesi abi sakafasi anga deki-ati. Wi e teke en fu bigi taki te anga now Yesesi, a Gaan Pilisite fu u di e taki anga Gadu gi wi abi den bun manii ya! (Heb. 7:24, 25) Efu u wani soi taki a sani di a du e bigi gi u, wi á mu abaa yali da wi á membee a dede fi en. U mu du en leti enke fa a taigi u (Luk. 22:19, 20). Wi e du a sani ya a 14 Nisan, a moo pelensipali dei fu a yali.

12 Te u luku a fasi fa Yesesi holi a Membeefesa, da wi e si ete wan fu den moin manii fi en di meke a be de kabakaba fu dede gi u. Di a be de a goontapu ya, sama be sabi en anga a manii ya. Sowtu manii?

YESESI LOBI LIBISAMA

13. Fa Yohanisi 15:9 anga 1 Yohanisi 4:8-10 e soi taki Yehofa anga Yesesi lobi u? Sama e fende wini fu a lobi di den soi u?

13 Den sani di Yesesi be e du e soi fa Yehofa lobi u. (Leisi Yohanisi 15:9; 1 Yohanisi 4:8-10.) A moo pelensipali sani di meke Yesesi kon dede gi wi a di a lobi u. Winsi wi a salufu Kelesten efuso „taa sikapu”, wi e fende wini fu a lobi di Yesesi anga Yehofa soi u (Yoh. 10:16; 1 Yoh. 2:2). Pakisei den sani di Yesesi be koboloiki fu holi a Membeefesa. Den sani ya e soi taki Yesesi lobi den bakaman fi en. Ai booko en ede anga den tu. Saide u taki so?

A di Yesesi lobi u meke a á meke u membee a dede fi en anga omen kofaliki sani, neen meke u man membee a dede fi en ala yali winsi tesi e miti u (Luku paragraaf 14-16) *

14. Fa Yesesi soi den bakaman fi en taki a lobi den?

14 Yesesi soi anga a fasi fa a holi a Membeefesa taki a lobi den salufu Kelesten. A á du omen kofaliki sani di be o taanga gi den fu du. Den salufu Kelesten be o abi fu du a sani ya ala yali winsi san be e miti den. Den be mu holi en winsi den be de a sitaafu-osu (Openb. 2:10). Den be man du san Yesesi taki? Eeye den be man!

15-16. Fa son sama holi a Membeefesa winsi fa a á be makiliki gi den?

15 Fanafu a ten fu den fosi Kelesten te anga now, den tuutuu Kelesten e du ala san den poi fu membee a dede fu Yesesi. Winsi san e miti den, winsi den de a sitaafu-osu toku den e meke moiti fu holi a Membeefesa leti enke fa Yesesi soi den bakaman fi en. Di Baala Harold King wawan be de aini wan sitaafu-osu a China, a be mu suku wan fasi fu holi a Membeefesa. Sondee sama sabi, a sete sani fu holi a Membeefesa anga den sani di a be abi. A du ala san a poi tu fu sabi on dei a be mu holi a Membeefesa. Di a dei doo fu holi a Membeefesa, a singi, a begi neen a holi wan lezing winsi fa neen wawan be de.

16 Meke u luku wan taa toli. Di den be sooto wantu sisa aini wan sitaafuman kampu na a ten fu Du fu Tu Goontapu feti, den holi a Membeefesa winsi fa den be sa lasi den libi. Fu di tyaipi sani á be de fanowdu, meke den be man holi en sondee sama kisi den. Den taki: ’U poti a beele anga a win a wan bangi di u be  tapu anga wan weti koosi, neen u taampu lontu en. U be leti wan kandaa, bika sama be o si san wi e du efu u be leti a peili. A dei de u paamisi u Dda a hemel taki wi o du ala san u poi fu santa a nen fi en’. Den sisa ya biibi be taanga tuutuu! Te u luku a fasi fa Yesesi sete a Membeefesa wi e si taki a lobi u tuutuu, bika u sa holi en winsi tesi e miti u!

17. San u mu akisi useefi?

17 Dyonson wi o membee a dede fu Yesesi, neen meke a be o bun fu akisi useefi den sani ya: ’San mi sa du fu lobi taawan enke fa Yesesi lobi den? Mi e booko mi ede anga den baala anga sisa aini a kemeente, moo enke fa mi e booko mi ede anga miseefi? Mi e wani den baala anga sisa du moo san den poi efuso mi e holi a pakisei taki den á man du ala sani?’ U mu soi ala yuu taki „wi e fii gi taawan” enke Yesesi.​—1 Peit. 3:8.

NÁ FEEGETE DEN SANI YA

18-19. (a) San u sabi taki o pasa? (b) San i de kabakaba fu du?

18 Dyonson u ná o holi a Membeefesa moo. Di Yesesi o „kon” na a ten fu a gaan banowtu, a o tyai den salufu Kelesten di o de a goontapu a ten de go a hemel, da u ná o holi a Membeefesa moo.​—1 Kor. 11:26; Mat. 24:31.

19 Winsi a Membeefesa ná o holi moo, toku u sabi taki a foluku fu Yehofa ná o feegete fa Yesesi soi u fu membee a dede fi en. Den ná o feegete a fasi fa a soi taki a abi sakafasi anga deki-ati. Den ná o feegete a fasi fa a soi taki a lobi libisama tu. Na a ten de den sama di be e go na a Membeefesa o taigi den taawan fu a fesa ya fu denseefi sa fende wini fi en. Ma efu u wani fende wini nownow fu a Membeefesa, u mu meke moiti fu abi sakafasi, deki-ati anga lobi enke Yesesi. Efu wi e meke moiti fu abi den manii ya, u sa biibi taki Yehofa o pai u.​—2 Peit. 1:10, 11.

SINGI 13 U wani de enke Kelestesi

^ paragraaf 5 Dyonson wi o membee a dede fu Yesesi. A komakandaa ya o leli u moo fu a fasi fa Yesesi be abi sakafasi, deki-ati anga lobi. A artikel ya o soi u san u mu du fu abi den manii ya tu.

^ paragraaf 55 SAN WI E SI A DEN FOWTOW: Den fowtow ya e soi fa den Kelesten be e holi a Membeefesa aini a ten fu den apostel, a pisiten fu 1880 anga fa den be e holi en aini wan sitaafuman kampu fu Nazi. Wi e si fa den e holi a Membeefesa aini a ten ya tu, a Zuid-Ameekan aini wan Kownukondee zaal di á tapu lontu.