Skip to content

Skip to table of contents

Saide wi á mu mombii a Sama di abi ala sani?

Saide wi á mu mombii a Sama di abi ala sani?

„Neen meke wi e gi i daa, u Gadu, wi e gafa a gendee nen fi i.”​—1 KOLONIKI 29:13.

SINGI: 80, 50

1, 2. Fa Yehofa soi taki a lobi gi sama sani?

YEHOFA a wan Gadu di lobi gi sama sani. Neen gi u ala den sani di wi abi. Ala den bun sani di de a goontapu a fu Yehofa. Anga den sani ya ai holi wi a libi (Psalm 104:13-15; Hakai 2:8). Beibel e soi taki son leisi Yehofa e du wonduu fu solugu a foluku fi en anga den sani di a meke poti a goontapu ya.

2 Di a foluku fu Yehofa be de aini a sabana, Yehofa be gi den mana anga wataa 40 yali langa (Ekisodesi 16:35). A be gi den ala san den be abi fanowdu (Nehemiya 9:20, 21). Bakaten Yehofa be meke Elisa du wan wonduu. A be meke a pikinso oli di wan uman be abi, kon ipi. A uman ya man be dede kaba. A sani ya be yeepi a uman fu pai den paiman fi en. A moni di be fika be yeepi en anga a boi fi en fu tan a libi (2 Kownu 4:1-7). Boiti dati Yehofa be meke Yesesi gi omen sama nyanyan. A be meke Yesesi du wan wonduu fu fende moni tu.​—Mateyesi 15:35-38; 17:27.

3. San wi o luku aini a artikel ya?

 3 Yehofa poi du ala san a wani fu solugu den sani di a meke. Ma toku a gi a foluku fi en a okasi fu du san den man fu holibaka gi a olikanisâsi fi en (Ekisodesi 36:3-7; leisi Odo 3:9.) Saide Yehofa wani u holibaka gi en anga den gudu fu u? Fa den sama di be e dini Yehofa a fositen be e holibaka gi en anga den gudu fu den? San a olikanisâsi e du anga a moni di sama e gi aini a ten ya? A artikel ya o piki den akisi ya.

SAIDE WI E HOLIBAKA GI YEHOFA ANGA DEN GUDU FU U?

4. San wi e soi te wi e gi san wi abi fu holibaka gi Yehofa?

A di u lobi Yehofa meke wi e gi en sani

4 A di u lobi Yehofa meke wi e gi san wi abi fu holibaka gi en. Te u pakisei den sani di Yehofa du gi u, da a sani de e bigi u. A so David be e fii tu di a be taki san be de fanowdu fu meke a tempel. A be taki, a Yehofa gi u ala den sani di wi abi. A Yehofa gi wi ala den sani di wi e gi en.​—Leisi 1 Koloniki 29:11-14.

5. San a wan fu den sani di u mu du te wi e dini Yehofa?

5 Te wi e gi sani fu holibaka gi a olikanisâsi, a wan fasi fu fa wi e dini Yehofa. Apostel Yohanisi be yee fa den engel di e dini Yehofa e taki aini wan fisyun taki: „Yehofa wi Gadu, a yu fiti fu kisi ala gaandi, anga gafa anga makiti bika a yu meke ala sani. A di i be wani, neen ede meke den de. A yu meke den” (Openbaring 4:11). A sani ya e soi kiin taki Yehofa mu fende ala gaandi anga gafa, neen meke u wani du ala san u man gi en. Yehofa be sende Mosesi fu taigi den Islayelisama taki den mu holi dii fesa ala yali. Ma te den be e go a den fesa ya den be mu e tyai sani gi Yehofa. A be taigi den taki „den á mu go neen fesi anga soso ana” (Deitolonomi 16:16). Aini a ten ya, u mu gi Yehofa sani anga u hii ati tu. Te wi e du a sani ya wi e soi taki den sani di a olikanisâsi fu Yehofa e du, e bigi gi u. Wi e soi tu taki wi e holibaka gi en.

6. Saide wi o fende wini te wi e gi sani? (Luku a fowtow na a bigin.)

6 Wi á mu e wani sama e gi u sani namo, u mu e gi tu. (Leisi Odo 29:21.) Meke u taki wan pikin bai wan kado gi en mma anga en dda anga a moni di den gi en. Fa i denki a mma anga a dda o fii? Efuso meke u taki wan yonkuu pionili gi en mma anga en dda moni fu pai yuu efuso fu bai nyanyan gi a famii. Winsi a mma anga a dda á be akisi a pikin fu du a sani ya, tokuso den o poolo. Saide? A fu di den wani soi a pikin taki a sani di a du e bigi gi den. A so Yehofa sabi tu taki wi o fende wini te wi e gi san wi abi fu holibaka gi a olikanisâsi fi en.

FA A FOLUKU FU YEHOFA A FOSITEN BE E HOLIBAKA GI EN ANGA DEN GUDU FU DEN?

7, 8. Fa u sa waka a den sama fu a ten fu Beibel baka te u mu gi moni (a) fu holibaka gi son sani di u mu du? (b) fu holibaka gi a wooko a hii goontapu?

7 Beibel e soi taki a foluku fu Yehofa a fositen be e gi moni anga taa sani fu  holibaka gi a wooko fi en. Mosesi be gi den Islayelisama taanga-sikin fu gi moni fu meke a tabernakel. Bakaten Kownu David be du aseefi sani di den be mu meke a tempel fu Yehofa (Ekisodesi 35:5; 1 Koloniki 29:5-9). A ten di Kownu Yowas be e tii, anga a moni di a foluku be e gi, den pilisite be e seeka a tempel (2 Kownu 12:4, 5). Aini a ten fu den apostel, den Kelesten be yee taki den baala anga sisa fu Yudeya be abi yeepi fanowdu, bika wan gaan angiiten be de anda. Ala Kelesten be e luku san den be abi fu sende gi den baala anga sisa fu Yudeya.​—Toli 11:27-30.

8 A foluku fu Yehofa be e holibaka gi den sama di be e teke fesi tu. Enke fa a Weiti fu Mosesi e soi, da den Leifisama á be abi wan pisi doti enke den taa lo. Neen meke den taa lo be mu gi den Leifisama du fu tin pisi fu san den be abi. A sani ya be e yeepi den Leifisama fu poti ala den pakisei na a wooko di den be mu du na a tabernakel (Numeri 18:21). Wantu uman be e yeepi Yesesi anga den apostel fi en anga den sani di den be abi.​—Lukasi 8:1-3.

Ala sama be man holibaka gi a wooko, guduman anga pootiman

9. Pe den Islayelisama anga den Kelesten fu fositen be e fende den sani di den be e gi fu holibaka gi a wooko?

9 A ná wan peesi namo a foluku fu Yehofa be e fende den sani di den be e gi fu holibaka gi en. Kande a Egepte den Islayelisama be fende den sani di den be gi fu meke a tabernakel (Ekisodesi 3:21, 22; 35:22-24). Aini a ten fu den apostel son Kelesten be seli den goon, den osu anga taa sani, neen den gi den apostel a moni. Anga a moni de den apostel be e yeepi den baala anga sisa di be de a nowtu (Toli 4:34, 35). Taawan be e poti moni a wan se fu holibaka gi a wooko (1 Korentesama 16:2). Ala sama be man holibaka gi a wooko, guduman anga pootiman.​—Lukasi 21:1-4.

A FASI FA WI E HOLIBAKA GI A WOOKO AINI A TEN YA

10, 11. (a) Fa u sa waka a den sama fu fositen baka di be e holibaka gi a wooko fu Yehofa? (b) Fa yu e si a gaandi di yu abi fu holibaka gi a Kownukondee wooko?

10 Aini a ten ya, den baala sa akisi u fu gi moni fu du son sani. Kande a kemeente pe i de wani seeka a Kownukondee zaal. Kande den mu meke wan nyun zaal. Kande a beikantoo di de aini a kondee pe i de mu seeka. Wi abi a okasi tu fu yeepi pai den paiman fu den konkelesi di e holi. Son leisi den baala anga sisa di de a kondee pe wan gaan ogii pasa, abi yeepi fanowdu. Den moni di wi e gi e holibaka gi a wooko fu den zendeling, den spesuutu pionili, den kelen-owluman, den sama di e wooko na a edekantoo anga den beikantoo di de a hii goontapu. Kande a kemeente pe i de e gi moni fu meke Kownukondee  zaal anga peesi fu holi gaan komakandaa a hii goontapu.

11 Ala u poi gi moni fu holibaka gi a wooko di Yehofa olikanisâsi e du aini den lasiti dei ya. Te wi e poti moni aini a Kownukondee zaal efuso te wi e du en a jw.org, u nai taigi sama omen moni u poti. Ma fa a waka efu yu si enke a moni di yu e poti ná abi yeepi? Gaanse moni di a olikanisâsi e fende a ná gaan moni. Winsi son Kotoigi ná abi moni, tokuso den e meke moiti fu waka a den Kelesten fu Masedoniya baka. Den be „pooti”, ma tokuso den be e begi den baala fu gi den pasi fu poti moni. Den du a sani ya anga den hii ati.​—2 Korentesama 8:1-4.

12. Fa a olikanisâsi soi taki den e koboloiki a moni di sama e gi fu holibaka gi a wooko, anga koni?

12 Den baala di e tii a wooko e koboloiki a moni di wi e gi anga koni. U sa fitoow den (Mateyesi 24:45). Den baala ya e begi fu Yehofa yeepi den fu du sani di o tyai wini gi a olikanisâsi. Den e luku bun fa den e koboloiki a moni di den baala anga sisa e gi (Lukasi 14:28). Aini Beibel ten, a wantu man di taawan be sa fitoow be abi a faantiwowtu fu luku a moni di a foluku fu Gadu be e gi. Den be e koboloiki a moni fu holibaka gi a tuu biibi. Wan leisi a kownu fu Persiya be gi Esra gowtu, solufu anga taa dii sani, neen Esra tyai den sani ya go a Yelusalem. Aini a ten ya, den sani di a kownu ya gi be o pasa wan sani fu 100 miliyun Ameekan dala. Esra be e si enke a Yehofa a kownu fu Persiya be gi den gudu ya. Neen meke a taigi sama finifini fa den be mu kibii den gudu te den be e tyai den pasa den ogii kondee (Esra 8:24-34). Bakaten Pawlesi piki moni fu yeepi den baala anga sisa fu Yudeya di be abi yeepi fanowdu. A sama di be e „du sani anga wan kiin ati” a be poti fu tyai a moni go a Yudeya. (Leisi 2 Korentesama 8:18-21.) Aini a ten ya, a olikanisâsi e waka a Esra anga Pawlesi baka anga a fasi fa den e wooko anga a moni di sama e gi fu holibaka gi a wooko.

13. Saide a olikanisâsi kengi a fasi fa den be e koboloiki a moni di wi e gi fu holibaka gi a wooko?

13 Te wan osufamii si taki a moni di den e wooko nai sai, den e meke moiti fu koboloiki a moni fu den moo bun. Den e meke moiti fu den á libi bigi fu den sa du moo gi Yehofa. Na aseefi sani a olikanisâsi fu Yehofa e du. Bakabaka ya a omen nyun sani a olikanisâsi du. Den kon si taki a moni di den be e koboloiki be ipi moo a moni di den be e fende. Neen meke leti enke wan osufamii, a olikanisâsi suku fasi fu den á koboloiki moni so ipi moo. Den wani koboloiki a moni di wi e gi anga u hii ati, anga koni.

DEN WINI DI A OLIKANISASI E FENDE TE YU E GI MONI

A moni di wi e gi, e meke a wooko di wi e du a hii goontapu go a fesi (Luku paragraaf 14-16)

14-16. (a) Fa den baala e koboloiki den moni di wi e gi fu holibaka gi a wooko? (b) Sowtu wini i fende fu den sani di a olikanisâsi e du?

14 A omen baala anga sisa di de langa a waaleiti taki ná pikin sani a olikanisâsi e seeka gi u nownow. Wi abi jw.org anga JW Broadcasting. Wi abi a Nyun-Grontapuvertaling aini omen tongo.  Aini a yali 2014 anga 2015, a konkelesi di den e kai „Tan poti a Kownukondee fu Gadu a fesi!” be holi aini 14 fu den moo gaan sitadiyon di de a hii goontapu. Ala den sama di go na a konkelesi ya be e piisii.

15 A omen sama taki ai bigi gi den taki a olikanisâsi e seeka den sani ya gi den. Wan toowpaa fu Asiya sikiifi taki: „Wi e peleiki a wan pikin foto. Neen meke son leisi wi e fii enke u de faawe fu u baala anga sisa. A sani ya e meke u feegete taki a hii goontapu a wooko fu Yehofa e du. Ma solanga wi e luku JW Broadcasting, ai membee wi taki wi abi baala anga sisa a hii goontapu. Den baala anga sisa yaaso seefi lobi JW Broadcasting. Wi e yee fa den baala anga sisa ya e taki den e fii enke den kon moo sabi den baala di e tii a wooko a hii goontapu te den luku a JW Broadcasting. Nownow den e moo piisii taki den de aini a olikanisâsi fu Gadu.”

16 Nownow a wan sani fu 2500 Kownukondee zaal a olikanisâsi e meke efuso e seeka a hii goontapu. Den baala anga sisa fu wan fu den kemeente fu Honduras taki, aini a ten di pasa den be e winsi taki den abi den eigi Kownukondee zaal. Nownow den fende wan. Den sikiifi taki: „Ná pikin piisii wi e piisii taki u de aini a olikanisâsi fu Yehofa. Wi e piisii tu taki wi abi baala anga sisa a hii goontapu.” A omen sama e fii so tu te den fende Beibel anga den buku fu u aini den mamabee tongo. Den baala anga sisa di e tan a kondee pe wan gaan ogii pasa, e piisii te taa baala anga sisa yeepi den. Den e piisii tu te den si fa sani e waka bun te den peleiki a den peesi pe tyaipi sama e pasa.

17. Fa u du sabi taki Yehofa e holibaka gi a olikanisâsi fi en aini a ten ya?

17 A omen sama á poi fusutan fa Yehofa Kotoigi e du ala den sani di den  e du anga a moni di sama e gi fu holibaka gi a olikanisâsi. Wan bigiman fu wan gaan bodeleifi be go luku wan fu den beikantoo fu u di e doloki buku. A foondoo di a yee taki den sama di e wooko ape nai wooko fu moni. A foondoo tu di a yee taki a den moni di sama e gi anga den hii ati e daai a olikanisâsi. A á be poi biibi taki u nai piki moni a den komakandaa efuso du taa sani fu meke moni. A taki te i luku en bun, da wi á be mu poi du den sani di wi e du anga a moni di sama e gi. A man ya abi leti, bika efu Yehofa á be e holibaka gi u, wi á be o poi du den sani ya.​—Yopu 42:2.

DEN WINI DI WI E FENDE TE WI E GI SANI FU HOLIBAKA GI A KOWNUKONDEE

18. (a) Sowtu wini wi o fende te wi e gi sani fu holibaka gi a Kownukondee? (b) Fa u sa leli u pikin anga u Beibelsutudi fu du a sani ya?

18 Yehofa gi wi a gaandi anga a okasi fu holibaka gi a Kownukondee. Na a wooko ya na a moo bun wooko. Yehofa paamisi u taki a o belesi u efu u holibaka gi a wooko fi en (Maleyaki 3:10). A paamisi u tu taki efu wi e gi anga u hii ati sani o waka bun gi u. (Leisi Odo 11:24, 25.) A taki wi o de koloku te u lobi gi sani, bika „wan sama di e gi taawan sani o de koloku moo enke te taawan e gi en sani” (Toli 20:35). Anga den sani di wi e taki anga den sani di wi e du, u sa leli u pikin anga u Beibelsutudi fu denseefi holibaka gi a wooko fu Yehofa. Da Yehofa o belesi den.

19. Sowtu taanga-sikin a artikel ya gi i?

19 A Yehofa gi u ala den sani di wi abi. Te u nai giili Yehofa, wi e soi taki u lobi en. Wi e soi en tu taki wi e teke den sani di ai du gi u fu bigi (1 Koloniki 29:17). Di den Islayelisama be gi den gudu fu meke a tempel, den be e „piisii di den tyai den sani ya gi Yehofa, bika anga den hii ati den be gi den sani ya” (1 Koloniki 29:9). Meke useefi meke moiti fu gi Yehofa den sani di a gi u anga piisii.