Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yanuari 2017

I be sabi a sani ya?

I be sabi a sani ya?

Fa den sama fu fositen be e meke faya te den be de a pasi e go a wan peesi?

Aini Genesesi 22:2, wi e leisi taki Gadu be taigi Abalaham fu go boon wan ofaandi gi en a wan faawe peesi. A tekisi taki „neen Abalaham teke a udu fu a boon-ofaandi poti neen manpikin Isaki sikoo. Neen a teke faya anga wan nefi. Neen den tu man waka go doo”.Genesesi 22:6.

Beibel nai taki finifini fa sama be e leti faya a fositen. A leti Abalaham anga Isaki leti wan faya, neen den tyai en? Wan sabiman taki, a á si enke wan faya be „o poi tan letileti na a langa pasi de”. A ná faya Abalaham anga en manpikin be tyai. Kande a den sani fu leti a faya, a tekisi be e taki.

Ma son sama taki a á be makiliki fu leti faya aini a ten fu Abalaham. Sama be lobi suku letileti koofaya a den sama di be e tan koosube, fu leti wan faya. A omen sabiman e denki taki Abalaham be tyai letileti koofaya di a be e gwe. Kande a be e tyai den aini wan patu di a be e holi a wan keti (Yesaya 30:14). Te sama be tyai letileti koofaya aini wan sani te den be e go a wan peesi, den be sa poti pikin udu na a koofaya te den be wani meke faya.