Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yanuari 2017

Meke den man di e aliki Gadu tyai moo faantiwowtu

Meke den man di e aliki Gadu tyai moo faantiwowtu

„Taigi den man di e aliki Gadu ala yuu den sani di mi taigi i di omen sama e taki fi en. Da den man ya seefi o koni sai fu leli taawan.”2 TIMOTIYESI 2:2.

SINGI: 123, 53

1, 2. Fa omen sama e si a wooko di den e du?

TE SON sama luku a wooko di den e du, da den e si enke den pelensipali. Taawan e si enke den á pelensipali. Aini son kondee, te wan sama miti wan taawan a fosi leisi, da ai akisi en taki: „Sowtu wooko yu e du?”

2 Te Beibel e taki fu son sama, da son leisi ai kai a wooko di a sama be e du. Beibel e kai „Mateyesi a man di e piki lantimoni”, ’Simon di e meke sani anga meti buba’, anga „Lukasi a daata di sama lobi” (Mateyesi 10:3; Toli 10:6; Kolosesama 4:14). Son leisi Beibel e kai a wooko di son sama be e du gi Yehofa. Pakisei Kownu David, polofeiti Eliya anga apostel Pawlesi. Den man ya be lobi a wooko di Yehofa be gi den. Useefi mu teke en fu bigi te Yehofa gi u wan wooko.

3. Saide den gaandi baala mu leli yonkuuwan tyai faantiwowtu? (Luku a fowtow na a bigin.)

 3 U lobi a gaandi di wi abi fu dini Yehofa. U lobi den faantiwowtu di Yehofa e gi u tu. A omen fu wi e angii fu tyai den faantiwowtu di Yehofa gi wi u hii libi. Ma a tyali taki son leisi sani nai waka so. Fu di wi e kon gaandi, meke u nai poi du den sani di u be gwenti du (Peleikiman 1:4). A sani ya a wan fu den booko-ede fu a foluku fu Gadu. Aini a ten ya, a peleikiwooko e go a fesi. Boiti dati a olikanisâsi fu Yehofa e meke omen nyun sani fu paati a bun nyunsu gi omen sama. Son leisi ai taanga gi den gaandiwan fu leli wooko anga den nyun sani ya (Lukasi 5:39). Boiti dati, te sama e gaandi, a gusontu anga a kaakiti fu den e go a baka (Odo 20:29). Neen meke a bun te den gaandiwan e leli yonkuuwan fu tyai faantiwowtu aini a olikanisâsi fu Yehofa. A sani de e soi taki den lobi a kemeente.—Leisi Psalm 71:18.

4. Saide ai taanga gi son baala fu gi taawan faantiwowtu? (Luku a faki „ Wantu sani di sa meke a taanga fu gi taawan faantiwowtu”.)

4 A ná ala yuu ai makiliki gi den baala di e teke fesi fu gi yonkuuwan faantiwowtu. Ai hati den taki den mu gi taawan wan wooko di den lobi. Son leisi den e si enke efu den á teke fesi, da a wooko ná o du na a fasi. Boiti dati, den e si enke den ná abi ten fu leli taawan. Ma den yonkuu baala mu abi pasensi tu efu den baala nai gi den moo faantiwowtu.

5. Sowtu akisi wi o luku aini a artikel ya?

5 Ma saide meke a de taanga fanowdu fu leli yonkuuwan tyai faantiwowtu? Fa den baala di moo gaandi sa du a sani ya? (2 Timotiyesi 2:2) Saide yonkuu baala mu abi sakafasi te den gaandi baala e leli den? Meke u luku fa Kownu David be seeka en manpikin fu du wan gaan wooko.

DAVID SEEKA SALOMO

6. San Kownu David be wani du? San Yehofa taigi en?

6 A omen yali David be mu lowe fu sama á fende en kii. Ma baka di a toon kownu, a be e tan aini wan moin osu. Neen meke a taigi Natan taki: „Mi e tan aini wan osu di meke anga sedee, ma a ark fu a kuudei fu Yehofa de aini tenti. David be e angii fu meke wan moin tempel gi Yehofa. Neen Natan taigi en taki: „Du san de a yu ati, bika a tuu Gadu de anga i.” Ma a ná dati Yehofa be wani. A taigi Natan fu taigi David taki: „A ná yu o meke osu gi mi fu mi tan.” Winsi fa Yehofa be paamisi David taki noiti a o gwe fika en, toku a taigi en taki a wan fu den boi fi en be o meke a tempel. San David du di a yee a sani de?1 Koloniki 17:1-4, 8, 11, 12; 29:1.

7. San David du di a yee san Yehofa be abi a pakisei?

7 David be musu fii booko-saka, bika a be wani meke a tempel gi Yehofa tuutuu. Ma tokuso a du ala  san a man fu holibaka gi Salomo. David be yeepi Salomo sete a wooko. A poti ayee, kopoo, solufu, gowtu anga udu a wan se fu meke a tempel. A á be e booko en ede anga a balinen di a sama di be o meke a tempel be o fende. Bakaten den be e kai a tempel ya, a tempel fu Salomo. David be gi Salomo taanga-sikin. A taigi en taki: „Mi manpikin, Yehofa mu de anga i. A mu meke sani waka bun gi i. Meke a osu gi Yehofa i Gadu, leti enke fa a taigi i.”1 Koloniki 22:11, 14-16.

8. Saide David be sa denki taki Salomo á be o poi meke a tempel? Ma san David du?

8 Leisi 1 Koloniki 22:5. Kande David be e denki taki Salomo á doo peesi fu du a gaan wooko ya, bika a tempel be mu „moin moo ala den taa osu”. Salomo be ’yonkuu, a á be abi ondoofeni’. Ma tokuso David be sabi taki Yehofa o yeepi Salomo fu du a wooko ya. Neen meke David be du ala san a man fu seeka Salomo gi a gaan wooko ya.

YU O MOO PIISII TE YU E LELI TAAWAN

Wi e piisii te wi e si fa yonkuu baala e tyai faantiwowtu (Luku paragraaf 9)

9. Fa gaandi baala sa fii te den leli yonkuuwan fu tyai faantiwowtu? Gi wan ageisitoli.

9 Den gaandi baala á mu fii wan fasi te den mu gi yonkuu baala son faantiwowtu. Ala u sabi taki a moo pelensipali sani aini a ten ya, na a wooko fu Yehofa. Te wi e leli yonkuu baala fu tyai faantiwowtu, da a wooko fu Yehofa e go a fesi. Pakisei a sani ya. Di i be nyoni da kande i be e si fa i dda be e lei wagi. Di i be kon moo bigi, a taigi i san a be e du. Bakaten,  iseefi meke moiti fu fende pampila fu lei wagi. A so i bigin lei wagi. Ma winsi fa i be fende a pampila fu lei wagi, tokuso i dda be e soi i fa i mu lei ete. Son leisi yu anga i dda be e lei kengi. Ma di i dda kon gaandi, a yu be e moo lei a wagi. I dda ati be e boon? Nono, a be e piisii taki i be man tyai en go a peesi. A leti so den gaandi baala e piisii te den si fa den yonkuu baala di den be yeepi, e tyai faantiwowtu aini a olikanisâsi fu Yehofa.

10. Fa Mosesi be e fii te taawan be e fende gaandi efuso faantiwowtu?

10 U mu luku bun taki wi á dyalusu anga taawan fu di den fende faantiwowtu. Luku san Mosesi du di a yee taki wantu Islayelisama e tyai denseefi enke polofeiti. (Leisi Numeri 11:24-29.) Yowsuwa be wani go tapu den, ma Mosesi taigi en taki: „Saide yu e dyalusu gi mi? A á de fi i dyalusu gi mi. Efu a hii foluku fu Yehofa a be polofeiti, a be o bun gi mi, bika Yehofa be o gi den a yeye fi en.” Mosesi be sabi taki a Yehofa e tii a wooko. A á be e suku balinen efuso gaandi, ma a be wani ala den sama di e dini Yehofa fende faantiwowtu. Fa a de anga wi? Wi e piisii te u si taki taawan fende faantiwowtu aini a olikanisâsi fu Yehofa?

11. San wan baala taki fu a leli di u mu leli taawan tyai faantiwowtu?

11 A omen baala tyai faantiwowtu aini a olikanisâsi fu Yehofa omen yali. Den baala ya leli yonkuuwan fu tyai faantiwowtu tu. Meke u taki now fu wan baala den e kai Peter. Aini den 74 yali di a de aini a fuuten diniwooko, a 34 yali a wooko a wan fu den beikantoo fu Europa. A be e teke fesi omen yali na a Dienst afdeling. Bakaten wan moo yonkuu baala bigin teke fesi. Peter ati be boon di a sani ya pasa? Nono. A taki: „Mi e piisii fu si taki den e leli taa baala fu tyai faantiwowtu a wan bun fasi.”

NÁ WISIWASI DEN GAANDIWAN

12. San a toli fu Rehabeyam e leli u?

12 Di Rehabeyam a manpikin fu Salomo, toon kownu, a akisi den  gaanwan fu kondee fa a be mu du a wooko fi en. Ma a á teke a taki fu den. Pe fu a du san den gaansama taigi en, a wooko anga san den yonkuuwan enke enseefi taigi en. Sani á be waka bun seefiseefi (2 Koloniki 10:6-11, 19). San a toli ya e leli u? Ai leli u taki, u mu teke leli a den gaansama di abi ondoofeni moo wi. Yonkuuwan á mu si enke den mu du sani namonamo enke den gaandi baala, ma toku den mu lesipeki den baala ya. Den á mu de gaw fu denki taki a fasi fa den gaandi baala be e du sani fosi, á be bun.

13. Fa yonkuuwan sa soi taki den e wooko makandaa anga den moo gaandi baala?

13 Son leisi te yonkuu baala anga gaandi baala e wooko makandaa, a den yonkuuwan e teke fesi. A be o bun fu den yonkuu baala meke moiti fu teke leli a den gaandi baala. Aini wan fu den paragraaf a fesi u be si taki Paul be bigin du a wooko di Peter be e du na a beikantoo. Paul taki: „Mi e poti ten a wan se fu go a Peter, fu leli wantu sani. Mi e gi taawan na a beikantoo taanga-sikin fu du aseefi sani tu.”

Pawlesi be e leli Timotiyesi. Timotiyesi be e wooko anga den sani di Pawlesi be e leli en

14. San wi e leli fu a fasi fa Pawlesi anga Timotiyesi be e wooko makandaa?

14 Apostel Pawlesi be gaandi moo Timotiyesi, ma tokuso den wooko makandaa omen yali. (Leisi Filipisama 2:20-22.) Pawlesi be taigi den Kelesten fu Korente taki: „Mi e sende Timotiyesi kon a wi, bika mi lobi en enke mi pikin. Ai wooko anga en hii ati gi Masaa. A o membee wi fa mi e du sani aini a wooko fu Kelestesi Yesesi. A o soi u tu fa mi e leli sama na ala den kemeente pe mi e go” (1 Korentesama 4:17). A sani ya e soi u kiin taki Pawlesi anga Timotiyesi be e wooko makandaa. Den be e holibaka gi denseefi tu. Pawlesi be e soi Timotiyesi fa ai „du sani aini a wooko fu Kelestesi”. Timotiyesi be e wooko anga den sani di Pawlesi be e leli en tu. Boiti dati Pawlesi be lobi Timotiyesi, a be e biibi taki a o poi yeepi den baala anga sisa fu Korente. Owluman sa waka a Pawlesi baka te den e leli taa baala fu tyai faantiwowtu aini a kemeente.

ALA WI ABI WAN FAANTIWOWTU

15. Fa Romesama 12:3-5 sa yeepi u te sani e kengi?

15 Wi e libi aini wan simpan ten. A pisi fu a olikanisâsi fu Yehofa di de a goontapu ya e go a fesi. A sani ya e  soi taki sani o go e kengi. Son wan fu den sani ya ná o makiliki gi u. Ma efu wi abi sakafasi, efu wi e booko wi ede anga den sani di e tyai wini gi a Kownukondee, da u ná o poti pakisei a san useefi wani. Efu u du a sani ya, sani o waka bun aini a olikanisâsi. Pawlesi be sikiifi gi den Kelesten aini Rome taki: „Wi á mu fii useefi.” Baka dati a taki, leti enke fa ala den pisi fu a sikin e wooko taa fasi, a so ala den sama aini a kemeente abi wan taa faantiwowtu.Romesama 12:3-5.

Ala den sama di e dini Yehofa wani holibaka gi a Kownukondee. Den de kabakaba fu du ala sani gi a Kownukondee

16. San ala Kelesten mu du efu den wani sani waka bun aini a olikanisâsi fu Yehofa?

16 Ala den sama di e dini Yehofa wani holibaka gi a Kownukondee. Den de kabakaba fu du ala sani gi a Kownukondee. Den gaandi baala sa yeepi den yonkuu baala fu tyai faantiwowtu. Yonkuu baala di wani tyai faantiwowtu mu abi sakafasi. Den mu lesipeki den moo gaandi baala tu. Ala den baala di toow e teke en fu bigi te den uman e holibaka gi den, winsi a á makiliki. Den uman ya sa waka a Priskela baka, bika a be e holibaka ala yuu gi en man Akwila.Toli 18:2.

17. San Yesesi be leli den disipel fi en?

17 Di Yesesi be de a goontapu, a be e leli taawan fu tyai faantiwowtu. Ala u sa waka neen baka. A be sabi taki taa sama be mu du a wooko go doo. Winsi den bakaman fi en a sondu sama, tokuso a be sabi taki den be o paati a bun nyunsu moo enke fa a be e paati en di a be de a goontapu (Yohanisi 14:12). A be leli den a wooko ya bun, neen meke den be poi peleiki na ala den kondee pe den be e go.Kolosesama 1:23.

18. Sowtu wooko wi o du aini a ten di e kon? Sowtu wooko wi abi nownow?

18 Baka di Yesesi dede, Yehofa weki en, neen a gi en moo faantiwowtu. A hei en „moo ala den tiimakiti, den makiti, den kaakiti anga ala den bigiman fu kondee” (Efeisesama 1:19-21). Efu u holidoo neen u dede fosi Alimakedon, wi o weki baka. Wi o du omen wooko di o gi u piisii aini a nyun goontapu. Nownow, ala wi abi a faantiwowtu fu paati a bun nyunsu fu a Kownukondee, anga fu yeepi sama fu toon bakaman fu Yesesi. Winsi u gaandi, winsi u yonkuu, „ala u abi somen sani fu du aini a wooko fu Masaa”.1 Korentesama 15:58.