Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yanuari 2017

A mu bigi gi i taki Gadu nai dwengi i fu libi enke fa a wani

A mu bigi gi i taki Gadu nai dwengi i fu libi enke fa a wani

„A pe a yeye fu Yehofa de, sama e fii.”2 KORENTESAMA 3:17.

SINGI: 62, 65

1, 2. (a) Fa son sama e si a gaandi di Gadu gi u? (b) San Beibel e taki fu a gaandi di wi abi fu du san u wani anga u libi? Sowtu akisi wi o luku?

DI WAN uman be de fu du wan sani, neen a taigi en mati taki: „Mi á wani denki. Taigi mi san mi mu du, dati moo makiliki.” A uman ya be wani taawan taigi en san a mu du. A á be wani wooko anga a kado di Gadu gi en fu luku san enseefi wani. Fa a de anga yu? I lobi te iseefi e sidon denki san i mu du, efuso a taawan mu e taigi i san i mu du? Fa yu e si a gaandi di Gadu gi i fu du sani enke fa iseefi wani.

2 Son sama nai biibi taki Gadu gi libisama a gaandi fu du sani enke fa denseefi wani, bika den e biibi taki Gadu be taki a fesi kaba fa u libi o waka. Taawan taki efu libisama mu du sani enke fa denseefi wani, da weiti á mu de. Ma efu u wani fusutan a toli ya bun, da u mu luku  san Beibel e taki. Saide? Bika Beibel e soi u taki Yehofa gi u a gaandi fu luku san u wani du anga u libi. A nai dwengi u. (Leisi Yowsuwa 24:15.) Beibel e piki den akisi ya: Libisama sa du ala san den wani? Fa u mu wooko anga a gaandi di Gadu gi u fu du san u wani anga u libi? Fa den sani di wi e du e soi taki u lobi Yehofa? Fa u sa soi taki wi e lesipeki a gaandi di taawan abi fu du san den wani anga den libi?

SAN WI E LELI FU YEHOFA ANGA YESESI?

3. San wi e leli te u luku fa Yehofa e du sani?

3 Yehofa abi a makiti fu du ala sani. Nawan sama poi tapu en fu du san a wani. A omen sani u sa leli te u luku fa ai koboloiki a makiti di a abi fu du san a wani. Pakisei fa Yehofa be e si den Islayelisama. A be e si den enke en foluku, wan „apaiti gudu” (Deitolonomi 7:6-8). A ná sosokaali Yehofa be e si den so. A di a be wani du san a be paamisi en mati Abalaham (Genesesi 22:15-18). Winsi fa Yehofa e du san a wani, tokuso ai du sani a wan leti fasi. Den sani di ai du e soi taki a lobi u. Wi e si a sani de kiin te u luku a fasi fa a be e kaasi den Islayelisama te den á be wani aliki en. Tyali be e kisi Yehofa gi den Islayelisama, te a be si taki a ogii di den be du be hati den. A be e soi den taki a lobi den. Yehofa be taki: „Mi o meke a foluku ya betee, da den o aliki mi baka. A fu di mi wani meke mi o lobi den” (Hoseya 14:4). Yehofa soi u fa u mu wooko anga a gaandi di wi abi fu du san u wani anga u libi. A wani u du sani di e tyai wini gi taawan.

Fosi Yesesi kon a goontapu a soi taki a á wani gwe fika Yehofa. Di Saatan sitee anga Gadu Yesesi á holibaka gi en

4, 5. (a) Sama na a fosi sama di Gadu gi a gaandi fu du san a wani anga en libi? Fa a wooko anga a gaandi de? (b) San u mu akisi useefi?

4 Di Yehofa meke engel anga libisama, a gi den a gaandi fu du san den wani anga den libi. A fosi engel di Yehofa meke a Yesesi. Yehofa meke Yesesi anga denseefi manii fi en. A gi en a gaandi fu du san a wani anga en libi (Kolosesama 1:15). Fa Yesesi koboloiki a gaandi de? Fosi Yesesi kon a goontapu, a soi taki a á wani gwe fika Yehofa. Di Saatan sitee anga Gadu, Yesesi á holibaka gi en. Di Yesesi kon a goontapu, a á meke Saatan koli en tu (Mateyesi 4:10). A neti fosi a dede, a taigi en Dda taki a wani libi enke fa a wani. A be taki: „Nda, efi i wani, da puu a kan ya a mi fesi fu mi á diingi en. A ná san mi wani mu pasa. Ma meke sani waka enke fa yu wani” (Lukasi  22:42). U poi koboloiki a gaandi di Gadu gi u fu du san u wani anga u libi, fu meke Yehofa piisii enke Yesesi?

5 Eeye u poi, bika useefi abi den manii fu Gadu, leti enke Yesesi (Genesesi 1:26). Ma Beibel e soi taki Yehofa poti wantu weiti gi u. A wani u wooko anga den weiti de. Aini wan osufamii, wan uman mu saka enseefi neen man ondoo. Den pikin mu aliki den mma anga dda (Efeisesama 5:22; 6:1). San den weiti ya e leli u fu a gaandi di Gadu gi u fu du san u wani anga u libi? Efu u sabi a piki fu a akisi ya, a sa yeepi u fu fende teego libi.

FA SAMA WOOKO ANGA A GAANDI DI GADU BE GI DEN?

6. Gi wan ageisitoli di e soi saide weiti de fanowdu.

6 U poi du san u wani anga u libi efu Gadu poti weiti gi u? Eeye u poi. Saide? Bika den weiti di Gadu gi u e kibii wi. Meke u taki yu e lei go a wan foto di de faawe, ma nawan sani de na a pasi di e soi on taanga i mu lei efuso sowtu se fu a pasi i mu lei. I be o wani lei na a pasi de? Nono, i be o feele. Efu u wani sani waka bun anga ala sama, da weiti de fanowdu. Meke u luku wantu toli fu Beibel di e yeepi u fu fusutan fa wi e fende wini fu den weiti fu Yehofa.

7. (a) Saide Adan anga den meti á be de aseefi? (b) Kai wan fasi fa Adan koboloiki a gaandi di Gadu gi en.

7 Di Yehofa meke Adan, a gi en aseefi gaandi di a gi den engel. A gi Adan a okasi fu du san a wani anga en libi. Ma Yehofa á meke meti fu du san den wani. Fa Adan koboloiki a gaandi ya a wan bun fasi? Adan be du wan wooko di be e gi en piisii. A be mu gi ala den meti nen. Gadu be „tyai den meti go na a man fu si fa a be o kai den”. Di Adan luku ala den meti, neen a gi den wan nen di fiti den. Yehofa á kengi nawan fu den nen di Adan gi den meti. Beibel taki: „Na a nen di a man gi den meti, na a nen de den fende.”Genesesi 2:19.

8. Fa Adan soi taki a á koboloiki a gaandi di Gadu be gi en, a wan bun fasi?

8 Yehofa be gi Adan a wooko fu meke goontapu toon wan paladeisi. A taigi en taki: „Meke pikin fuu a goontapu da u de basi fi en, u basi den fisi fu a se, den meti di e fee a tapu, anga ala den meti di e waka a doti” (Genesesi 1:28). Ma Adan nyan a sii di Gadu be taigi en taki a á mu nyan. Di a du a sani de, a soi taki a á wani wooko anga a weiti fu Gadu. Adan á koboloiki a gaandi di Gadu gi en a wan bun fasi, neen meke libisama e pina omen  dunsu yali kaba (Romesama 5:12). Wi á mu feegete san miti Adan di a ná aliki Gadu. A sani de o yeepi u fu koboloiki a gaandi di Gadu gi u a wan bun fasi. A o yeepi u tu fu lesipeki den weiti fu Yehofa.

Den Islayelisama piki taki den wani toon Yehofa foluku. Den be taki den o wooko anga den weiti fi en

9. Sowtu gaandi Yehofa be gi den Islayelisama? San den be paamisi Yehofa?

9 Adan anga Efa tyai sondu anga dede gi libisama di den ná aliki Yehofa. Ma toku wi abi a gaandi ete fu luku san u wani du. Wi e si a sani de kiin te u luku a fasi fa Yehofa be e libi anga den Islayelisama. Yehofa be gi den a okasi fu toon a apaiti gudu fi en (Ekisodesi 19:3-6). A foluku seefi be piki taki den wani toon Yehofa foluku. Den be taki den o wooko anga den weiti fi en. Den be taki: „Wi o du ala san Yehofa taki” (Ekisodesi 19:8). A tyali, bika baka wan pisiten a foluku á be wani du san den be paamisi Yehofa. Wi e leli wan pelensipali sani te u luku a fasi fa den tyai denseefi. A mu e bigi gi u taki wi abi a gaandi fu du san u wani anga u libi. Ma u mu e meke moiti ala yuu fu wooko anga den weiti fu Yehofa.1 Korentesama 10:11.

10. Fa Hebrewsama kapitel 11 e soi taki u poi meke Yehofa piisii, winsi fa wi abi a gaandi fu du san u wani anga u libi? (Luku a fowtow na a bigin.)

10 Aini Hebrewsama kapitel 11, wi e leisi fu 16 man anga uman di be e wooko anga den weiti fu Yehofa. A omen wini den fende di den du a sani ya. Den o fende moo wini aini a ten di e kon. Nowa biibi be taanga. A di a aliki Yehofa, meke a meke wan ark fu kibii en osufamii. Neen meke libisama de a goontapu ete (Hebrewsama 11:7). Abalaham anga Sala be e du san Yehofa taki anga den hii ati, neen meke den go na a kondee di Gadu be taki a o gi den. Winsi fa den be abi a okasi „fu daai go baka” na a foto Ur, tokuso den tan poti pakisei na a sani di Gadu be paamisi den. Beibel taki den be e „meke moiti fu go a wan moo bun peesi” (Hebrewsama 11:8, 13, 15, 16). Mosesi á be wani den gudu fu Egepte, ma „a be de kabakaba fu nyan pina makandii anga a foluku fu Gadu, a peesi fu piisii wan pisiten namo fu sondu” (Hebrewsama 11:24-26). Meke u meke moiti fu u biibi taanga enke den man anga uman ya. Meke u koboloiki a gaandi di Gadu gi u fu soi en taki u lobi en.

11. (a) Enke fa Deitolonomi 30:19, 20 e soi, sowtu belesi sama sa fende fu di den abi a okasi fu du san den wani anga den libi? (b) San e yeepi i fu koboloiki a gaandi di yu abi fu du san i wani anga i libi, a wan bun fasi?

11 Kande wi e si enke a moo makiliki te wan sama e taigi u san u mu du. Ma a sani de sa meke wi á fende wan fu den moo gaan belesi. A belesi ya sikiifi a Deitolonomi 30:19, 20. (Leisi.) Wi e leisi a vers 19 taki Gadu be gi den Islayelisama a okasi fu denseefi luku san den wani. Vers 20 e soi taki Yehofa gi den a okasi fu den soi en taki den lobi en. Aini a ten ya, useefi sa luku efu u wani dini Yehofa. Wi abi a okasi tu fu gafa Yehofa anga fu soi en taki u lobi en.

 NÁ KOBOLOIKI A GAANDI DI GADU GI I A WAN FASI DI Á FITI

12. San wi á mu du anga a kado di Yehofa gi u?

12 Meke u taki, i gi wan mati fi i wan gaan dii kado. Fa i be o fii efu a fiingi a kado di i gi en a dyiko? Fa i be o fii efu a teke en du wan ogii anga taawan? A be o hati i. A so Yehofa e fii te ai si fa sama e teke a gaandi di a gi den, fu du sani di á fiti. Ai hati en tu te a si fa sama e du ogii anga taawan. Beibel taki aini „den kiiboi dei” sama „ná o sabi kiyoo” (2 Timotiyesi 3:1, 2). Fa u sa soi Yehofa taki u sabi kiyoo? San o yeepi u fu wi á koboloiki a kado di Yehofa gi u a wan fasi di á fiti?

13. Anga san u mu luku bun, winsi wi abi a okasi fu du san u wani?

13 Ala u sa luku sama u wani fu mati, sowtu koosi u wani wei, fa u wani moin useefi anga san wi o du te wi e meke piisii. Ma efu wi á luku bun u sa koboloiki a gaandi di Gadu gi u, fu du sani di ai buuse efuso fu du sani enke den sama fu a goontapu. (Leisi 1 Peitilisi 2:16.) Wi á mu koboloiki a gaandi di Gadu gi u, fu e du sani di Gadu á lobi. Ma u mu du sani di e gi „Gadu gaandi”.1 Korentesama 10:31; Galasiyasama 5:13.

14. Saide u mu aliki Yehofa winsi u poi du san u wani anga u libi?

14 Yehofa taki: „Mi a Yehofa, a mi ai Gadu. A mi na a sama di e leli i san i mu du fu sani waka i bun. A mi na a sama di e soi yu a pasi di i mu waka” (Yesaya 48:17). U mu fitoow Yehofa, da u wooko anga san a taigi u. A sani  de o yeepi u fu du sani di o tyai wini gi u. Wi e fusutan taki „libisama á sabi sowtu pasi den mu waka. A ná denseefi mu taki pe den mu poti den futu” (Yelemiya 10:23). Adan anga den Islayelisama á be wani wooko anga den weiti fu Yehofa. Den be e si enke den sabi moo Yehofa. Wi á mu meke a sani de miti u. Noiti u mu si enke u koni moo Yehofa, ma u mu ’fitoow en anga u hii ati’.Odo 3:5.

LESIPEKI A GAANDI DI TAAWAN ABI FU DU SAN DEN WANI ANGA DEN LIBI

15. San Galasiyasama 6:5 e leli u?

15 U mu lesipeki a fasi fa taawan e denki efuso a fasi fa den e du sani. Saide? Ala u abi a gaandi fu du san u wani anga u libi, neen meke ala Kelesten nai du sani aseefi fasi. Son leisi a fasi fa wi e du sani a waaleiti efuso fa wi e tyai useefi e kengi. Pakisei san sikiifi a Galasiyasama 6:5. (Leisi.) Efu wi e fusutan taki ala sama mu tyai en faantiwowtu, wi o lesipeki a gaandi di taawan abi fu du san den wani anga den libi.

U sa du san u wani, ma wi á mu dwengi taawan fu du sani enke fa u wani (Luku paragraaf 15)

16, 17. (a) Fa a gaandi di taawan abi fu du san den wani anga den libi, be toon gaan sani a Korente? (b) Fa Pawlesi yeepi den Kelesten de? San a toli ya e leli u?

16 Meke u go luku wan toli fu Beibel di e soi saide u mu lesipeki a gaandi di taawan abi fu du san den wani anga den libi. Son Kelesten fu Korente be fende taki a á fiti fu bai meti di sama be gi falisi gadu enke ofaandi. Taawan á be e si a sani de enke wan fowtu sani, bika den be e si falisi gadu enke soso sani. Ma den Kelesten di be e dini falisi gadu fosi, be e si enke te wan sama nyan den meti de, da a leti enke a dini ai dini falisi gadu (1 Korentesama 8:4, 7). A sani ya, a be wan gaan sani. A be sa meke den baala anga sisa á libi na a wan moo. Fa Pawlesi yeepi den Kelesten fu losi a polobelema ya?

17 A fosi sani di Pawlesi du, a soi a soi den taki nyanyan á poi yeepi wan sama fu toon Gadu mati (1 Korentesama 8:8). Baka dati a wasikoi den taki winsi den „abi pasi fu du wan sani”, tokuso den á mu du sani di sa meke taawan dyakata (1 Korentesama 8:9). Baka dati a taki, den Kelesten di kosensi swaki, á mu kuutu den Kelesten di taki den o nyan a meti (1 Korentesama 10:25, 29, 30) A sani ya e soi taki te wan sani abi fu du anga a dini di wi e dini Yehofa, da ibii Kelesten mu luku san a o du. Da yu á si enke u mu lesipeki u baala te den e du son pikinpikin sani enke fa den wani noh?1 Korentesama 10:32, 33.

18. Fa yu o soi taki ai bigi gi i taki Gadu gi yu a gaandi fu du san i wani anga i libi?

18 Yehofa gi wi a gaandi fu du san u wani anga u libi. A sani ya e soi taki Yehofa nai dwengi u (2 Korentesama 3:17). Wi e teke a sani ya fu bigi, bika ai gi wi a okasi fu du sani fu soi taki u lobi Yehofa. Neen meke u mu e du sani di e gi Yehofa gaandi. U mu lesipeki a gaandi di taawan abi fu du san den wani anga den libi tu.