Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2017

„Tei ati da i du a wooko”

„Tei ati da i du a wooko”

„Tei ati da i du a wooko. Yu á mu feele bika Yehofa . . . de anga i.”​—1 KOLONIKI 28:20.

SINGI: 38, 34

1, 2. (a) Sowtu pelensipali wooko Salomo be mu du? (b) Saide David be e booko en ede anga Salomo?

SALOMO be mu du wan gaan wooko. Yehofa be poti en fu teke fesi fu meke a tempel a Yelusalem. Disi a wan fu den moo pelensipali bow-wooko di du a goontapu ya. A tempel be mu ’gendee. A be mu moin moo ala den osu fu den taa kondee’. Ma a moo pelensipali sani, a be o de ’a osu fu Yehofa a tuu Gadu’.​—1 Koloniki 22:1, 5, 9-11.

2 Kownu David be e biibi taki Gadu be o yeepi Salomo. Ma Salomo be ’yonkuu ete. A á be abi ondoofeni’. A be o abi ati sai fu meke a tempel? A be o feele fu teke a wooko fu di a be yonkuu? Efu Salomo be wani du a wooko ya, a be mu abi deki-ati.

3. San Salomo be sa leli fi en dda?

3 A omen sani Salomo leli fi en dda David di be abi deki-ati. Di David be yonkuu, a be feti anga den meti di  be e kon nyan den sikapu fi en dda (1 Samuweli 17:34, 35). A soi tu taki a abi deki-ati di a feti anga Goliyat, a gaan gadyaa taanga suudati. A di Yehofa yeepi David meke a be poi kii Goliyat anga wan gaata siton.​—1 Samuweli 17:45, 49, 50.

4. Saide Salomo be abi deki-ati fanowdu?

4 David be abi deki-ati, neen meke neen a be a moo bun sama fu gi Salomo taanga-sikin fu meke a tempel. (Leisi 1 Koloniki 28:20.) Efu Salomo á be abi deki-ati, a be o feele fu bigin a wooko. A sani de be o ogii moo enke a bigin a wooko, da a á kaba en.

Efu Yehofa á yeepi u, u ná o abi deki-ati fu du a wooko di a gi u

5. Saide u mu abi deki-ati?

5 Leti enke Salomo, efu Yehofa á yeepi u, u ná o abi deki-ati fu du a wooko di a gi u. Neen meke wi o luku a libi fu wantu sama fu fositen di be abi deki-ati. Baka dati wi o luku fa useefi sa soi deki-ati, da u du a wooko di Yehofa gi u.

WANTU SAMA DI BE ABI DEKI-ATI

6. San i lobi fu a toli fu Yowsefu?

6 Yowsefu soi deki-ati di a uman fu Potifar be wani didon anga en. Yowsefu be musu sabi taki sani be o miti en, di a á be o wani didon anga a uman fu Potifar. Ma winsi fa a be sabi a sani de, toku a á du san a uman fu Potifar akisi en.​—Genesesi 39:10, 12.

7. Fa Rakab soi taki a abi deki-ati? (Luku a fowtow na a bigin.)

7 Rakab be abi deki-ati tu. Di tu man fu Islayeli be kibii go luku Yerikow, á a be feele fu yeepi den di den go neen osu. Ma a be e fitoow Yehofa neen meke a be abi deki-ati fu kibii den tu man ya di sama be wani kii den. Rakab yeepi den man ya fu lowe komoto aini a foto tu (Yowsuwa 2:4, 5, 9, 12-16). Rakab be e biibi taki Yehofa na a tuu Gadu. A be e biibi tu taki Yehofa be o gi den Islayelisama a kondee. A á be e feele a kownu fu Yerikow anga taa sama di be wani tapu en fu a á yeepi den tu man fu Islayeli. Ma a be abi deki-ati. Neen meke en anga den famii fi en tan a libi.​—Yowsuwa 6:22, 23.

8. Fa a deki-ati di Yesesi abi, be yeepi den apostel fi en?

8 Den apostel fu Yesesi be abi deki-ati tu. Den be si fa Yesesi abi deki-ati, neen den meke moiti fu waka neen baka (Mateyesi 8:28-32; Yohanisi 2:13-17; 18:3-5). Di den Saduseiman puubei fu tapu den apostel fu leli sama sani fu Yesesi, den ná aliki den.​—Toli 5:17, 18, 27-29.

9. Fa 2 Timotiyesi 1:7 e yeepi u fu sabi san u mu du fu abi deki-ati?

9 Yowsefu, Rakab, Yesesi anga den apostel be de kabakaba fu du san bun. A ná di den be e biibi denseefi meke den be abi deki-ati, ma den be e fitoow Yehofa. Son leisi useefi mu soi  deki-ati. Ma den ten de a Yehofa u mu fitoow. Wi á mu biibi useefi. (Leisi 2 Timotiyesi 1:7.) Wi o luku fa u mu soi deki-ati aini wi osufamii anga a kemeente.

ON TEN U MU ABI DEKI-ATI?

10. Saide yonkuuwan abi taanga-sikin fanowdu?

10 Yonkuuwan mu abi deki-ati efu den wani dini Yehofa. Den sa leli wan sani fu Salomo bika a be abi deki-ati, neen meke a be man meke a tempel. Winsi fa yonkuuwan mu aliki den mma anga den dda te den e poti den a pasi, toku a denseefi mu luku san den o du anga den libi (Odo 27:11). Den mu abi deki-ati te den e luku anga sama den o paa, sowtu felon den o luku, sowtu poku den o aliki. Den mu abi deki-ati tu te den e meke moiti fu libi wan kiin libi anga te den mu luku on ten den o dopu. Den mu abi deki-ati bika Saatan, a sama di e soso Yehofa, ati e boon te sama e libi enke fa Yehofa wani.

11, 12. (a) Fa Mosesi soi taki a abi deki-ati? (b) Fa yonkuuwan sa waka a Mosesi baka?

11 Wan fu den pelensipali sani di yonkuuwan mu du a fu pakisei san den o du anga den libi. Aini son kondee sama e dwengi yonkuuwan fu go a hei sikoo. Den wani den suku wooko di e pai gaan moni tu. Ma son kondee abi moni polobelema, neen meke son yonkuuwan aini den sowtu kondee ya e si enke a moo pelensipali sani a fu wooko fu yeepi den famii. Winsi fa sani e go aini a kondee di wi e tan, pakisei Mosesi. Na a umanpikin fu Farao kiya en, neen meke a be sa kon gudu efuso abi balinen efu a be wani. Den sama di kiya en anga den sama di be e leli en, be musu e gi en taanga-sikin fu feti a den sani ya baka. A di Mosesi be abi deki-ati meke a be holibaka gi a foluku fu Yehofa. Di a gwe fika den gudu fu Egepte a be e fitoow Yehofa anga en hii ati (Hebrewsama 11:24-26). Neen meke Yehofa belesi en. Boiti dati a o moo belesi en aini a ten di e kon.

12 Efu yonkuuwan e meke moiti fu go a fesi, neen den poti Gadu Kownukondee a fesi, Yehofa o belesi den. Yehofa o yeepi den anga den sani di den abi fanowdu fu solugu den osufamii. Aini a ten fu den apostel, Timotiyesi be e poti ala en pakisei na a dini di a be e dini Gadu di a be yonkuu. I poi du a sani ya tu. * (Luku a maiki a ondoo.)​—Leisi Filipisama 2:19-22.

Yu o abi deki-ati ala yuu? (Luku paragraaf 13-17)

13. Fa deki-ati yeepi wan sisa fu wooko gi Yehofa?

13 Wan sisa di e tan a Alabama, wan peesi na Ameekankondee, be abi deki-ati fanowdu fu go a fesi. A sikiifi taki: „Di mi be yonkuu, sen be e kisi mi. Te mi be go a komakandaa, beina mi á be e poi taki anga sama. Ma a be moo taanga gi mi fu naki a wan sama doo te mi be de aini a peleikiwooko.” A sisa ya mma anga en dda anga taawan aini kemeente yeepi en, neen meke a  be man toon wan kowownu pionili. A taki: „A goontapu fu Saatan e gi i taanga-sikin fu go a hei sikoo, fu abi balinen, fu meke tyaipi moni anga fu abi omen gudu. Den e si den sani ya enke gaan sani.” Ma a kon si taki noiti son sama e fende san de wani aini a goontapu. A sani ya e gi omen sama booko-ede. A taki: „Ma a dini di mi e dini Yehofa, e meke mi piisii. Mi nai si enke den sani di mi e du gi en a fu soso.”

14. On ten Kelesten mma anga dda mu abi deki-ati?

14 Mma anga dda seefi mu abi deki-ati. Kande a omen leisi i basi e akisi i fu wooko moo langa na a dei di i mu holi a osufamii anbegi, a dei di i mu go a peleikiwooko efuso a dei di yu abi komakandaa. I mu abi deki-ati fu taigi i basi taki i ná o poi wooko den dei de. A so den pikin fi i o man waka a yu baka. I mu abi deki-ati tu te son mma anga dda e meke den pikin fu den du sani di yu á wani i pikin du. Te den mma anga dda ya akisi i saide yu á wani i pikin du son sani, yu o abi ati sai fu taigi den saide, a wan lesipeki fasi?

15. Fa Psalm 37:25 anga Hebrewsama 13:5 sa yeepi mma anga dda?

15 Efu u wani yeepi u pikin fu go a fesi u mu abi deki-ati tu. Son mma anga dda e feele fu gi den pikin taanga-sikin fu pionili, fu go yeepi a  pe peleikiman de fanowdu, fu go a Betel, efuso fu yeepi meke Kownukondee zaal. Kande den e si enke efu den pikin fu den du den wooko ya, den ná o poi solugu den te den gaandi. Ma mma anga dda di koni abi deki-ati. Den e biibi taki Yehofa o du san a paamisi. (Leisi Psalm 37:25; Hebrewsama 13:5.) Mma anga dda di abi deki-ati anga di e fitoow Yehofa, e yeepi den pikin fu waka a den baka.​—1 Samuweli 1:27, 28; 2 Timotiyesi 3:14, 15.

16. Fa son mma anga dda yeepi den pikin fu du moo gi Yehofa? Fa den pikin fende wini fu a sani ya?

16 Wan mma anga wan dda fu Ameekankondee yeepi den pikin fu poti a dini di den e dini Yehofa a fesi. A dda taki: „Fosi den pikin fu u bigin waka efuso taki, u be e taigi den taki a pioniliwooko anga den wooko di wi e du aini kemeente e meke sama piisii. Nownow a den sani ya den wani du.” A taki fu di den pikin poti a dini fu Yehofa a fesi, meke den pasa den tesi di e miti den aini a goontapu fu Saatan. A so den e man poti den pakisei na a dini di den e dini Yehofa. Wan baala di abi tu pikin sikiifi taki: „A omen mma anga dda e yeepi den pikin fu sabi du son sport, anga fu fende wan sikoo pampila. Ma a moo abi wini te yu e meke moiti fu yeepi i pikin fu du sani di o yeepi den fu den anga Yehofa toon mati. A ná den pikin wawan e fende wini fu a sani ya, ma iseefi e piisii te den e poti a dini di den e dini Yehofa a fesi.” A ná abi misi, Yehofa o belesi mma anga dda di e yeepi den pikin fu du moo gi Yehofa.

U MU ABI DEKI-ATI AINI A KEMEENTE

17. Fa baala anga sisa sa soi deki-ati aini a kemeente?

17 U mu abi deki-ati aini a kemeente tu. Owluman mu abi deki-ati te den e kuutu wan toli fu wan sama di du wan gaan sondu efuso te den e yeepi wan sama di siki wan gaan siki. Son owluman e sutudeli anga sama efuso holi komakandaa aini sitaafu-osu. Ma fa a de anga den sisa di á toow? Den abi omen okasi fu soi taki den abi deki-ati te den e dini Yehofa. Den sa pionili, den sa go yeepi a peesi pe peleikiman de fanowdu. Den sa yeepi meke komakandaa peesi efuso poti den nen fu go na a Kownukondee Peleikiman Sikoo. Son wan fu den e go a Gileyad sikoo tu.

18. Fa gaandi sisa sa soi deki-ati?

18 U lobi den gaandi sisa fu u. Den de enke wan belesi gi a kemeente. Winsi fa den á poi du ala san den be gwenti du gi Gadu moo, tokuso efu den abi deki-ati den o poi du son sani. (Leisi Titesi 2:3-5.) Efu den owluman akisi wan gaandi sisa fu taki anga wan yonkuu sisa fu a fasi fa ai wei koosi, a mu abi deki-ati fu taki anga en. A ná o gi a yonkuu sisa sen efu a koosi di a wei á fiti, ma a o taki switi anga en. A o yeepi en fu a pakisei san sama o denki efu den si taki ai wei den koosi de (1 Timotiyesi 2:9, 10). Te gaandi  sisa e soi lobi na a fasi ya, den e taanga a kemeente.

19. (a) Fa dopu baala sa soi deki-ati? (b) Fa Filipisama 2:13 anga 4:13 e yeepi baala fu abi deki-ati?

19 Dopu baala mu abi deki-ati fu du wooko tu. A kemeente e fende wini te dopu baala de kabakaba fu toon dinali efuso owluman (1 Timotiyesi 3:1). Ma kande son baala e daaidaai fu toon dinali efuso owluman. Bika aini a ten di pasa den be meke wan fowtu, neen meke den e si enke den á fiti fu toon dinali efuso owluman. Kande wan baala e si enke a ná o poi tyai den faantiwowtu ya tu. Efu a so yu e fii, Yehofa poi yeepi i fu abi deki-ati. (Leisi Filipisama 2:13; 4:13.) Pakisei a toli fu Mosesi. Enseefi be e si enke a á be o poi du san Yehofa be akisi en (Ekisodesi 3:11). Ma Yehofa yeepi en fu abi deki-ati. A yeepi en tu fu du a wooko di a be gi en. San o yeepi wan dopu baala fu abi deki-ati? A sa begi Yehofa fu a yeepi en. A mu e leisi Beibel ala dei tu. A mu e teke ten pakisei sama aini Beibel di be abi deki-ati. A sa akisi den owluman tu fu den yeepi en. Boiti dati a sa akisi den owluman sowtu wooko a sa du aini a kemeente. Wi e gi ala den dopu baala taanga-sikin fu abi deki-ati da den wooko enke fa den poi gi a kemeente.

„YEHOFA . . . DE ANGA I”

20, 21. (a) San David be membee Salomo? (b) Sowtu wini wi o fende te wi abi deki-ati?

20 Kownu David be taigi Salomo taki Yehofa be o de anga en te enke a kaba meke a tempel (1 Koloniki 28:20). Salomo be musu fu e pakisei den sani di en dda taigi en. A be yonkuu neen meke a á be abi ondoofeni. Ma tokuso a á meke a sani de tapu en fu du a wooko di a be mu du. A soi taki a be abi deki-ati. Yehofa yeepi en fu meke a gendee tempel aini seibin yali anga afu.

21 Leti enke fa Yehofa yeepi Salomo, a so a poi yeepi u fu abi deki-ati fu du a wooko di u mu du gi wi osufamii anga a kemeente (Yesaya 41:10, 13). Efi i soi deki-ati te yu e wooko gi Yehofa, a o belesi i nownow, anga a ten di e kon. Neen meke „tei ati, da i du a wooko” di a gi i.

^ paragraaf 12 Yonkuuwan sa luku sowtu wooko den sa du aini a olikanisâsi efu den leisi a artikel di den e kai „Poti yeye marki fu man gi glori na yu Mekiman” di de aini a Saanantongo Wakititolen fu 15 yuli 2004.