Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2017

„A Wowtu fu Gadu . . . abi kaakiti”

„A Wowtu fu Gadu . . . abi kaakiti”

„A wowtu fu Gadu de a libi. A abi kaakiti.”​—HEBREWSAMA 4:12.

SINGI: 96, 94

1. Saide yu e biibi taki a Wowtu fu Gadu abi kaakiti? (Luku a fowtow na a bigin.)

A FOLUKU fu Yehofa e biibi taki a Wowtu fu Gadu efuso a bosikopu fi en „de a libi”. Den e biibi tu taki a „abi kaakiti” (Hebrewsama 4:12). U si fa Beibel yeepi wi anga taa sama fu kengi u libi. Fosi u toon Kotoigi, son wan fu u be e fufuu, somoko takuu tabaka efuso libi wan hululibi. Taawan be abi balinen efuso gudu, ma tokuso den á be de koloku (Peleikiman 2:3-11). A wan piisii sani taki omen sama di á be abi howpu fosi, kon abi howpu. U lobi a artikel di den e kai „Bijbel e kenki sma libi” di e kon aini a Saanantongo Wakititolen. A omen ondoofenitoli fu sama di kengi den libi sikiifi aini den artikel ya den yali di pasa. Ma winsi den sama ya toon Kelesten Beibel e yeepi den ete fu kengi den libi.

2. Fa a Wowtu fu Gadu yeepi sama aini a ten fu den apostel?

2 A nai foondoo wi taki sama e kengi omen sani aini den libi te den kon sabi a waaleiti. Aini a ten fu den apostel,  den baala anga sisa fu u di be abi a howpu fu go a hemel seefi be kengi a fasi fa den be e libi. (Leisi 1 Korentesama 6:9-11.) Di Pawlesi be e taki fu den sama di ná o fende a Kownukondee fu Gadu, a be taki tu taki: „Son wan fu u be e du den sani ya.” A santa yeye anga a Wowtu fu Gadu yeepi den sama ya fu kengi a fasi fa den be e libi. Ma toku baka di den sama ya toon Kelesten, son wan fu den du sani di meke den anga Yehofa poli. Beibel e soi taki den be abi fu puu wan salufu baala na a kemeente. Ma bakaten a be kengi, neen den teke en aini a kemeente baka (1 Korentesama 5:1-5; 2 Korentesama 2:5-8). A sabi di u sabi taki a Wowtu fu Gadu yeepi den baala anga sisa fu u fu kengi a fasi fa den be e libi, e gi u taanga-sikin.

3. San wi o luku aini a artikel ya?

3 A Wowtu fu Gadu abi kaakiti tuutuu. A Yehofa gi wi a Beibel, neen meke u mu meke moiti fu koboloiki en bun (2 Timotiyesi 2:15). Aini a artikel ya, wi o luku fa a Wowtu fu Gadu sa yeepi u (1) aini u libi, (2) te wi e peleiki, anga (3) te wi e holi lezing. Den sani di wi o leli aini a artikel ya, o yeepi u fu teke en fu bigi taki u Dda di de a hemel e gi u leli di e tyai wini gi u.​—Yesaya 48:17.

AINI U LIBI

4. (a) San u mu du efu u wani a Wowtu fu Gadu yeepi u? (b) San yu e du fu fende ten fu leisi a Beibel?

4 Efu u wani a Wowtu fu Gadu yeepi u, u mu e leisi en ala yuu. U mu meke moiti fu leisi en ala dei tu (Yowsuwa 1:8). Gaanse fu u abi omen sani fu du ala dei. Ma wi á mu meke den sani ya tapu u fu leisi Beibel. Wi á mu meke den faantiwowtu di wi abi tapu u tu. (Leisi Efeisesama 5:15, 16.) Kande u sa leisi en fuuku mamanten, mindii dei efuso neti. A psalm sikiifiman be abi leti di a sikiifi taki: „Ná pikin lobi mi lobi a weiti fi i. Hii dei mi e pakisei en.”​—Psalm 119:97.

Wi á mu meke sani tapu u fu leisi Beibel. Wi á mu meke den faantiwowtu di wi abi tapu u tu

5, 6. (a) Saide u mu teke ten pakisei san u leisi? (b) San u mu teke ten pakisei te u leisi wan pisi fu Beibel? (c) Fa a teke di yu e teke ten pakisei den sani di i leisi aini Beibel yeepi i?

5 Ma wi á mu leisi Beibel namo da a kaba. U mu teke ten pakisei san u leisi tu (Psalm 1:1-3). Na a sani ya o yeepi u fu wooko anga den sani di u leisi. Neen meke winsi a u telefon efuso tablet u leisi a Beibel, u mu meke moiti fu a doo wi ati.

6 Ma fa wi o fende wini fu den sani di u leisi? Tu u leisi wan pisi fu Beibel u mu akisi useefi taki: ’San a sani di mi leisi ya e leli mi fu Yehofa? Mi e du a sani di sikiifi ya kaba? San mi mu kengi ete?’ Te u teke ten pakisei san u leisi, neen u begi Yehofa fu a yeepi u, wi o fende taanga-sikin fu du san u leisi. A so wi o si taki a Wowtu fu  Gadu abi kaakiti tuutuu.​—2 Korentesama 10:4, 5.

TE WI E PELEIKI

7. Fa u sa wooko anga a Wowtu fu Gadu te wi e peleiki?

7 A de taanga fanowdu fu wooko anga a Wowtu fu Gadu te wi e sutudeli anga sama anga te wi e peleiki. Wan baala taki: „Meke u taki yu anga Yehofa be e wooko osu fu osu, a yu wawan be o go e taki na ala den osu efuso i be o gi en okasi fu taki?” Te wi e leisi wan tekisi gi wan sama, a gi wi e gi Yehofa a okasi fu taki anga en. Efu u leisi wan bun tekisi gi a sama, a o moo doo en ati moo enke den sani di wi e taki (1 Tesalonikasama 2:13). Te i de aini a peleikiwooko, yu e meke moiti fu leisi a Beibel gi sama solanga i fende a okasi?

Te wi e leisi wan tekisi gi wan sama, a gi wi e gi Yehofa okasi fu taki anga en

8. Saide te wi e peleiki wi á mu leisi tekisi gi sama namo da a kaba?

8 Ma wi á mu leisi wan tekisi gi a sama namo da a kaba. A omen sama nai fusutan san sikiifi aini Beibel. Leti enke fa den sama fu a ten fu den Kelesten á be e fusutan san sikiifi aini a Wowtu fu Gadu, a so den sama fu a ten ya nai fusutan ala san sikiifi aini Beibel tu (Romesama 10:2). Te u leisi wan tekisi gi wan sama aini a peleikiwooko, wi á mu denki taki a fusutan san u leisi gi en. Wan fasi fa u sa yeepi en fu fusutan a tekisi, a fu leisi a pisi di u wani a poti pakisei gi en baka. U sa taki satu fu a tekisi tu, baka dati da u booko en gi a sama. A so a sama o fusutan a Wowtu fu Gadu, da a o doo en ati.​—Leisi Lukasi 24:32.

9. San u sa du fu yeepi wan sama fu abi lesipeki gi a Beibel fosi u leisi wan tekisi gi en?

9 Den sani di wi e taki fosi u leisi wan tekisi gi wan sama, o yeepi en fu abi lesipeki gi a Beibel. U sa taigi a sama taki: „Meke u luku san a Gadu di meke u taki fu a sani ya.” Efu a sama nai go a wan Kelesten keliki u sa taigi en taki: „Meke u luku san den Santa Buku e taki.” Te u miti wan sama di nai booko en ede anga keliki, u sa taigi en taki: „I yee a fositen nongo ya kaba?” Efu wi e holi a pakisei taki ala sama kiya a den fasi anga taki den abi den eigi biibi, wi o meke moiti fu taki sani di o meke den poti pakisei na a tekisi di u wani leisi gi den.​—1 Korentesama 9:22, 23.

10. (a) San wan baala be ondoofeni? (b) Fa i si taki a Wowtu fu Gadu abi kaakiti di i wooko anga en aini a peleikiwooko?

10 A omen baala anga sisa kon si taki te den wooko anga a Wowtu fu Gadu te den e peleiki gi wan sama, ai moo doo a sama ati. Wan baala be e tyai Wakititolen gi wan dda di be gwenti leisi den Wakititolen omen yali kaba. Wan dei di a baala tyai a nyun Wakititolen gi a dda, a á langa en gi en namo, ma a leisi wan tekisi gi a dda tu. A leisi 2 Korentesama 1: 3, 4 gi en, pe sikiifi taki: „A Gadu di  e toosutu sama . . . e toosutu u te u de aini banowtu.” A tekisi ya doo a dda ati, neen meke a begi a baala fu a leisi a tekisi gi en baka. Baka dati a taigi a baala taki en anga en uman be abi toosutu fanowdu. A di a baala leisi a tekisi ya gi a dda, meke a be wani sabi moo fu Beibel. A abi wini tuutuu te wi e wooko anga a Wowtu fu Gadu aini a peleikiwooko.​—Toli 19:20.

TE WI E HOLI LEZING

11. Sowtu faantiwowtu den baala di e holi lezing abi?

11 U lobi go a komakandaa, kelen-komakandaa anga konkelesi. A Yehofa wi e go dini te u go a den komakandaa ya, ma wi e leli omen sani tu. Neen meke a wan gaandi den baala abi fu holi lezing a den komakandaa ya. A wan faantiwowtu tu (Yakowbesi 3:1). Neen meke a san sikiifi aini Beibel den mu leli a kemeente. Fa u sa soi taki den sani di wi e leli sama sikiifi aini Beibel te wi abi a gaandi fu holi lezing a den komakandaa?

12. San wan baala mu du efu a wani leli sama den sani di sikiifi aini Beibel te ai holi wan lezing?

12 Na a Beibel mu de a moo pelensipali pisi fu wan lezing (Yohanisi 7:16). Neen meke te wi e holi wan lezing, u mu luku bun taki sama nai moo poti  pakisei na a fasi fa wi e holi lezing, den ondoofenitoli, anga den ageisitoli di wi e gi moo den Beibel tekisi di wi e leisi. U mu holi a pakisei tu taki te wi e leisi omen tekisi, dati á wani taki wi e gi leli anga Beibel. Efu yu e leisi tekisi ipi tumisi te yu e holi wan lezing, a omen sama o feegete den tekisi di i leisi. Neen meke i mu luku sowtu tekisi i wani taki fi en aini i lezing. Leisi a tekisi, yeepi den sama fu fusutan a tekisi, baka dati soi den fa den sa wooko anga den sani di sikiifi aini a tekisi (Nehemiya 8:8). Efu a lezing di i mu holi sikiifi a wan pampila, i mu sutudeli a pampila anga den tekisi di sikiifi aini bun. Baka dati teke wantu fu den tekisi, da i yeepi den sama fu fusutan den sani di sikiifi na a lezing pampila. (I sa wooko anga san sikiifi a les 21, 22 anga 23 fu a buku di den e kai Kisi wini fu a Theokrasia Diniwroko-skoro.) A moo pelensipali sani, a begi i mu begi Yehofa fu a yeepi i fu paati den leli fu Beibel anga taawan.​—Leisi Esra 7:10; Odo 3:13, 14.

13. (a) Fa wan sisa fende wini fu wan tekisi di a yee a komakandaa? (b) Sowtu wini i fende fu den tekisi di den e leisi a den komakandaa?

13 A omen sani miti wan sisa fu Australiya di a be yonkuu. Baka di a kon sabi Yehofa seefi, a be e si enke Yehofa á lobi en. Wan leisi a yee wan  tekisi a komakandaa di doo en ati. A teke ten pakisei san sikiifi aini a tekisi. A go luku san den baala sikiifi fu a tekisi ya tu. A sani ya meke a kon si taa tekisi di doo en ati. A so a kon si taki Yehofa lobi en. * (Luku a maiki a ondoo.) I yee wan tekisi a komakandaa, kelenkomakandaa efuso a konkelesi kaba di doo yu ati?​—Nehemiya 8:12.

14. Fa u sa soi taki u lobi a Wowtu fu Gadu?

14 A nai bigi gi u taki Yehofa gi wi en Wowtu Beibel noh? A paamisi u tu taki en Wowtu o tan fu alaten (1 Peitilisi 1:24, 25). Neen meke u mu e leisi Beibel ala yuu, da u meke moiti fu du san u leisi. U mu yeepi taawan tu fu fende wini fu a Beibel. Efu wi e du den sani ya, wi e soi taki u lobi a kado ya. Wi e soi tu taki ai bigi gi u taki Yehofa Gadu gi wi a Beibel.

^ paragraaf 13 Luku a faki di den e kai „ Mi bigin si sani taa fasi”.