Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2017

I mu e fii gi taawan enke Yehofa

I mu e fii gi taawan enke Yehofa

„Tyali be e kisi [Yehofa] gi en foluku.”​—2 KOLONIKI 36:15.

SINGI: 57, 147

1. Fa Yehofa meke Mosesi sabi en? Saide a sani ya be de fanowdu?

WAN leisi Gadu meke Mosesi kon sabi en nen anga sowtu manii a abi. Yehofa be sa taigi Mosesi fa a koni kisi efuso fa a taanga, ma a á du a sani de. A taigi Mosesi fosi taki a abi tyali-ati. Ai fii gi taawan. (Leisi Ekisodesi 34:5-7.) Yehofa be wani soi Mosesi taki a o yeepi en. Neen meke a kai den manii fi en di be o meke Mosesi biibi taki a wani yeepi den sama di e dini en (Ekisodesi 33:13). Fa yu e fii di i sabi taki Yehofa e booko en ede anga u? Aini a artikel ya wi o taki fu a fii di u mu fii gi taawan. Wi o si tu fa u sa yeepi taawan te sani miti den.

2, 3. (a) Saide wi enke libisama poi fii gi taawan? (b) Saide a de fanowdu fu sabi san Beibel e taki fu a fii di u mu fii gi taawan?

2 Yehofa e fii gi taawan. A meke libisama anga denseefi manii fi en. Neen meke winsi wan sama nai dini Yehofa, a poi fii gi taawan. A poi soi taki ai booko en ede anga taawan tu (Genesesi 1:27). Beibel e taki fu omen sama di be e fii gi taawan. Aini a ten fu Salomo, tu uman be e sitee fu wan pikin. Di Salomo be wani sabi sowtu wan fu  den be abi a pikin, a sende sama fu koti a pikin paati a tu. A tuutuu mma be abi fii gi en pikin, neen meke a begi Salomo fu a gi a taa uman a pikin (1 Kownu 3:23-27). Wan taa sama di be soi taki a abi fii gi taawan, na a umanpikin fu Farao. Di a fende Mosesi enke wan beibi, a be sabi taki a be wan fu den Dyu pikin di be mu dede. Ma ’tyali kisi en gi a pikin’. Neen meke a teke en kiya enke en pikin.​—Ekisodesi 2:5, 6.

3 Saide u mu meke moiti fu soi taki wi e fii gi taawan? A fu di Yehofa wani u waka neen baka (Efeisesama 5:1). Yehofa meke u fu u man fii gi taawan, ma fu di wi a sondu sama, meke wi e moo booko wi ede anga useefi. San o yeepi u fu poti pakisei a taawan? Meke u luku fa Yehofa be soi taki ai fii gi taawan. Wi o luku tu fa son sama be soi taki den e fii gi taawan. Boiti dati wi o luku fa u sa waka a Yehofa baka, anga den wini di wi o fende te u du a sani de.

SAMA Á DE DI E FII GI TAAWAN ENKE YEHOFA

4. (a) Saide Yehofa sende engel go a Sodom? (b) San a toli fu a osufamii fu Lot e leli u?

4 Beibel lai toli di e soi taki Yehofa e fii gi taawan. Pakisei san Yehofa be du gi Lot. Lot a wan man di be e tyai enseefi a wan leti-fasi. A be e „kusumi” te a be si den ogii di den sama fu Sodom anga Gomora be e du. Den sama ya á be e lesipeki Gadu, neen meke Yehofa be taki a o kii den (2 Peitilisi 2:7, 8). Yehofa be sende engel fu go taigi Lot taki a mu komoto aini a foto bika a be o poli Sodom anga Gomora. Beibel taki: „Di Lot be e daaidaai, neen den man kisi Lot, en uman anga den tu umanpikin fu den holi a den ana, bika tyali fi en be e kisi Yehofa. Neen den tyai den go a doose fu a foto” (Genesesi 19:16). Yehofa be soi taki ai fusutan Lot, neen meke winsi sowtu sani e miti wi aini a ten ya, u sa biibi taki Yehofa e fusutan u tu.​—Yesaya 63:7-9; Yakowbesi 5:11; 2 Peitilisi 2:9.

Winsi san e miti wi aini a ten ya, u sa biibi taki Yehofa e fusutan wi

5. Fa a Wowtu fu Gadu e yeepi u fu abi tyali-ati anga taawan?

5 Yehofa e leli a foluku fi en fu booko den ede anga taawan tu. Pakisei wan fu den weiti di a be gi den Islayelisama. Te wan sama be leni wan taawan wan moni, a be sa teke a dyakiti fu a sama enke wan panti. (Leisi Ekisodesi 22:26, 27.) Ma fosi san dongo, a be mu tyai a dyakiti gi a sama baka, fu koo á kii en a neti. Wan sama di á be e fii gi taawan, á be o wani tyai a dyakiti fu a sama gi en baka. Ma Yehofa be e leli a foluku fi en taki den mu e fii gi taawan. San a weiti ya e leli u? Noiti u mu du enke u nai si taki u baala efuso u sisa de a nowtu. Efu u poi yeepi wan baala efuso  wan sisa, u mu yeepi en.​—Kolosesama 3:12; Yakowbesi 2:15, 16; leisi 1 Yohanisi 3:17.

6. San wi e leli fu a fii di Yehofa be e fii gi den Islayelisama winsi den be e pasa den weiti fi en?

6 Yehofa be e fii gi den Islayelisama winsi den be e pasa den weiti fi en. Beibel taki: „Ala yuu Yehofa, a Gadu fu den afo fu den Islayelisama be e sende den bosikopuman fi en fu wasikoi en foluku. A be e sende sama go a den, bika tyali be e kisi en gi en foluku. A á be wani poli a osu fi en tu” (2 Koloniki 36:15). Useefi mu soi taki wi e fii gi den sama di nai dini Yehofa ete. Kande bakaten den sama ya o toon Yehofa mati. Yehofa á wani nawan sama dede te a o kai den a kuutu dyonson (2 Peitilisi 3:9). Solanga ten de ete, u wani paati a bosikopu fu a Kownukondee gi ala sama di u poi. U wani yeepi den fu denseefi fende wini fu a tyali-ati fu Yehofa.

7, 8. Saide wan osufamii e biibi taki Yehofa soi taki ai fii gi den?

7 Aini a ten ya, a omen Kelesten si fa Yehofa soi taki ai fii gi den. Pakisei san pasa a Bosniya na a pisiten fu 1990. A omen lo be e kii denseefi aini Bosniya. Wan osufamii di be abi wan boi fu 12 yali be de ape a ten de. Wi o kai a boi ya Milan. Milan, en baala, en mma anga en dda anga wantu taa Kotoigi be de aini wan besi e go a wan konkelesi a Serbiya. Milan mma anga en dda be o dopu na a konkelesi de. Di den de fu abaa go a Serbiya, wantu suudati be si taki a famii ya a be fu wan taa lo, neen meke den taigi den fu saka komoto aini a wagi. Ma den meke den taa baala anga sisa go a pe den be e go. Den suudati holi a osufamii ya tu dei langa. Den á be wani losi den. Ma te fu kaba a suudati di be e teke fesi, telefon a edeman fi en, neen a akisi en san a mu du anga den. A famii be taampu leti ape e yee di a edeman taigi a suudati di e teke fesi taki: „Tyai den go a doo, da i sutu den kii.”

8 Di den suudati be e taki anga denseefi, tu sama waka go na a famii. Den taigi den saafi taki denseefi a Kotoigi. Den taki a den Kotoigi di be de aini a besi taigi den san pasa. Den tu Kotoigi sende Milan anga en baala fu go aini a wagi fu den, da den o abaa go na a taa kondee, bika den suudati nai luku den pampila fu den pikinnengee. Baka dati den baala taigi a mma anga a dda fu den waka lontu a suudati kampu da den o miti anga den na a taa se. Milan be e feele te ná sipowtu. A á be sabi efu a be mu lafu efuso kee. En mma anga en dda akisi den baala taki: „I si enke den o fika u fu u waka gwe?” Ma di den be e waka gwe, a gei enke den suudati á si den. Milan mma anga en dda miti den na a taa se, neen den go na a konkelesi. Den e biibi taki a Yehofa yee a begi fu den! Beibel e soi u taki a ná ala yuu Yehofa e yeepi en foluku a den sowtu fasi ya (Toli 7:58-60). Ma aini a toli ya Milan taki: „A gei enke den engel be beendi den suudati. Mi e si enke a Yehofa yeepi u.”​—Psalm 97:10.

Yu e paati den leli fu Yehofa anga taawan enke Yesesi fu di tyali e kisi i gi den?

9. Fa Yesesi be e si a gaan kulu sama di be e waka neen baka? (Luku a fowtow na a bigin.)

 9 U sa waka a Yesesi baka te u luku a fasi fa a soi taki ai fii gi taawan. Tyali fu taawan be e kisi en, bika a be si taki den be de enke „sikapu di ná abi sikapuman”. San a du di a si a sani de? „A bigin leli den tyaipi sani” (Mateyesi 9:36; leisi Malikisi 6:34.) Ma den Faliseiman á be wani yeepi a foluku. Den á be e booko den ede anga taawan (Mateyesi 12:9-14; 23:4; Yohanisi 7:49). Yu e paati den leli fu Yehofa anga taawan enke Yesesi fu di tyali e kisi i gi den?

10, 11. Na ala yuu tyali mu kisi u gi taawan?

10 Ma a sani ya á wani taki na ala yuu tyali mu kisi u gi taawan. Pakisei Kownu Saul. A be denki taki a be e soi tyali-ati gi Agak, a kownu fu Amalek di a á kii en. Ma a kownu ya a be wan feyanti fu a foluku fu Gadu. Boiti dati Saul á kii ala den meti fu den Amaleksama enke fa Yehofa be taigi en. Fu di Saul á be du san Yehofa taki, meke Yehofa á be wani en enke kownu moo (1 Samuweli 15:3, 9, 15). Yehofa e kuutu sani a wan leti fasi. Fu di a poi si sama ati meke a sabi on ten wi á mu soi tyali gi wan sama (Tyali singi 2:17; Eseikiyeli 5:11). Dyonson a o kuutu ala den sama di á wani du san a taki (2 Tesalonikasama 1:6-10). A ten de Yehofa ná o soi tyali-ati gi den sama di e du ogii. Ma a o soi taki ai fii gi den sama di e libi a wan leti fasi te a o kibii den anga te a o kii den ogii sama.

11 A ná wi abi a faantiwowtu fu luku sama mu dede efuso sama mu fende a libi. Ma u mu meke moiti fu yeepi ala sama aini a ten ya. Meke u poti pakisei a wantu fasi fa u sa soi taki wi e fii gi taawan.

FA U SA SOI TAKI WI E FII GI TAAWAN?

12. San u sa du fu soi taki wi e fii gi taawan?

12 Yeepi taawan. Yehofa wani wi enke Kelesten soi tyali-ati gi u baala anga sisa anga taa sama (Yohanisi 13:34, 35; 1 Peitilisi 3:8). Wan taa sani di tyali-ati wani taki a „nyan pina makandii”. Wan sama di abi tyali-ati e meke moiti fu yeepi den sama di e pina. Sowan sama e suku okasi fu yeepi taawan. Kande ai taigi den taki a wani yeepi den anga son wooko efuso go a wenkii gi den.​—Mateyesi 7:12.

Du sani fu yeepi taawan fu soi taki yu e fii gi den (Luku paragraaf 12)

13. San a foluku fu Gadu du di wan gaan ogii pasa a Yapan?

13 Yeepi te wan gaan ogii pasa a wan peesi. Te wan gaan ogii pasa a wan peesi, u wani soi taki wi e fii gi den sama di e tan na a pisi de. Sama sabi Yehofa Kotoigi enke sama di e yeepi taawan te wan gaan ogii pasa a wan peesi (1 Peitilisi 2:17). Wan sisa fu Yapan be e tan a wan peesi pe a doti be seke aini 2011. Baka dati wan gaan  wataa sungu a kondee. A taki a fii bun di a si fa omen baala anga sisa fu Yapan anga taa kondee kon yeepi seeka den Kownukondee zaal anga den osu fu den Kotoigi. A taki a sani de gi en taanga-sikin. A taki tu: „A sani ya leli mi taki Yehofa Gadu e booko en ede anga u. Den baala anga sisa e booko den ede anga denseefi. A omen baala anga sisa a hii goontapu e begi gi u.”

14. Fa i sa yeepi den sama di siki anga den gaandiwan?

14 Yeepi den sama di siki anga den gaandiwan. Te wi e si fa sama e pina fu di den siki efuso fu di den gaandi, tyali e kisi u. Wi e angii fu si a ten di den polobelema ya ná o de moo. Neen meke wi e begi fu Gadu Kownukondee kon. Ma fu di a ten de á doo ete meke wi e du ala san u man fu yeepi den siki sama anga den gaandiwan. Wan man di e sikiifi buku mma be abi a siki di den e kai Alzheimer (a sama e lasi enseefi). A mma ya be gaandi kaba. A man taki wan dei en mma á be poi doo gaw na a weisei neen meke a be tyobo ala en koosi. Di a be e meke moiti fu kiin en sikin, neen sama koko neen doo. Tu Kotoigi di be gwenti kon luku en kon neen. Den sisa akisi en efu den sa yeepi en. A uman taki: „Sen e kisi mi, ma u yeepi mi baa.” Den sisa yeepi en te a kaba. Baka dati den meke te gi a mma,  neen den sidon gi toli anga en. A boi fi en be teke en fu bigi. A taki den Kotoigi e „du san den e leli sama”. A fasi fa yu e fii gi den sama di siki anga den gaandiwan e meke i du ala san i man fu yeepi den?​—Filipisama 2:3, 4.

15. Fa a peleikiwooko di wi e du e yeepi taawan?

15 Yeepi sama fu kon sabi Yehofa. A moo bun fasi fu yeepi taawan, a te wi e leli den sama a Gadu anga san na a Kownukondee fi en. Wan taa fasi, a te wi e soi den saide den o fende wini te den e wooko anga den sani di Yehofa taki (Yesaya 48:17, 18). A peleikiwooko a wan fasi fa wi e gafa Yehofa, anga fa wi e soi taki wi e fii gi taawan. I si enke i sa du moo aini a peleikiwooko?​—1 Timotiyesi 2:3, 4.

YU E FENDE WINI TE YU E FII GI TAAWAN

16. Sowtu wini wi o fende te wi e soi tyali-ati gi taawan?

16 Den koniman di e ondoosuku a fusutan fu libisama, kon si taki wi o abi wan moo bun gusontu te wi e soi tyali-ati gi taawan. Wi o moo libi bun anga taawan tu. Te yu e yeepi sama di e pina, yu o fii bun. I ná o fii booko-saka. I ná o fii enke a yu wawan de tu. Boiti dati yu e de anga piisii. Den sani ya e soi taki iseefi e fende wini te yu e soi tyali-ati gi taawan (Efeisesama 4:31, 32). Efu wi e yeepi taawan fu di u lobi den, wi o abi wan bun kosensi bika u sabi taki wi e du wan sani di Yehofa lobi. Te wi e soi tyali-ati gi taawan wi e toon wan moo bun dda, toowpaa efuso mati. Boiti dati te wan sama gwenti soi tyali-ati gi taawan, taawan e soi tyali-ati gi en baka te a de a nowtu.​—Leisi Mateyesi 5:7; Lukasi 6:38.

17. Saide i wani soi tyali-ati gi taawan?

17 Winsi fa wi e fende wini te wi e soi tyali-ati gi taawan, tokuso a di u wani waka a Yehofa baka anga di u wani gafa en, meke wi e du a sani ya. Yehofa a lobi. Sama á de di e soi tyali-ati gi taawan enke en (Odo 14:31). A soi u fa u mu soi tyali-ati gi taawan. Meke u du ala san u man fu soi taki wi e fii gi taawan leti enke Yehofa. A sani de o yeepi u fu wi anga u baala anga sisa toon mati. Boiti dati wi o moo libi bun anga taawan winsi pe fu goontapu den de.​—Galasiyasama 6:10; 1 Yohanisi 4:16.