Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2017

Dwengi iseefi

Dwengi iseefi

„Den manii di a yeye e meke sama abi a . . . dwengi iseefi.”​—GALASIYASAMA 5:22, 23.

SINGI: 121, 36

1, 2. (a) San sa pasa te sama á poi dwengi denseefi? (b) Saide a bun fu taki fu a sani ya?

YEHOFA GADU poi yeepi u fu u dwengi useefi (Galasiyasama 5:22, 23). Yehofa na a moo bun sama di man dwengi enseefi. Fu di wi a sondu sama, meke wi á poi dwengi useefi enke en. A di libisama á poi dwengi denseefi meke somen ogii e pasa a goontapu. Te sama á poi dwengi denseefi den nai poi du son sani di de fanowdu. Ai tapu den fu wooko bun a sikoo efuso a den wookope. Wan sama di á poi dwengi enseefi e tyai enseefi a wan fa ná fiti fasi. A sa meke ai diingi pasa maiki, du ogii anga taawan, booko toow, go aini paiman di á de fanowdu, sooto, kisi takuu siki efuso de anga bee sondee a wani. Boiti dati a sa taanga gi en fu fika son gwenti tu.​—Psalm 34:11-14.

2 Wan sama di á poi dwengi enseefi, e du sani di sa tyai ogii gi enseefi anga taawan. Aini a ten ya, wi e si taki moo anga moo sama nai man dwengi denseefi. A sani ya á mu foondoo wi, bika Gadu Wowtu taki a dwengi di sama á man dwengi denseefi, a wan fu den sani di be o soi taki  wi e libi a den „lasiti dei”.​—2 Timotiyesi 3:1-3.

3. Saide u mu dwengi useefi?

3 Sowtu wini wi o fende te wi e dwengi useefi? A fosi wan, wan sama di man dwengi enseefi nai lai booko-ede. Te wan sama man dwengi enseefi, a moo makiliki gi en fu abi mati tu. En ati ná o go e boon gaw, a ná o abi son polobelema tu. Du fu tu, efu wi á wani wi anga Gadu poli, wi á mu meke den fii fu u meke u du sani di Yehofa á lobi. Na a sani ya Adan anga Efa du (Genesesi 3:6). Leti enke Adan anga Efa a omen sani e miti sama aini a ten ya fu di den á poi dwengi denseefi.

4. Fa Yehofa e yeepi den sama di ai taanga gi fu dwengi denseefi?

4 Yehofa sabi taki fu di wi a sondu sama meke ai taanga gi u fu dwengi useefi. Ma a wani yeepi u fu dwengi useefi (1 Kownu 8:46-50). Yehofa de enke wan mati di lobi u. Ai gi den sama di ai taanga gi fu dwengi denseefi taanga-sikin. Aini a artikel ya, wi o si fa Yehofa e dwengi enseefi anga fa u sa waka neen baka. Wi o taki tu fu wantu sama di be e dwengi denseefi, anga sama di á be e dwengi denseefi. Boiti dati wi o luku wantu sani di o yeepi u fu dwengi useefi.

YEHOFA SOI U FA U MU DWENGI USEEFI

5, 6. Fa Yehofa soi taki ai dwengi enseefi?

5 Yehofa ná abi nawan fowtu, neen meke ai holi enseefi ala yuu (Deitolonomi 32:4). Ma wi abi sondu. Neen meke u mu poti pakisei na a fasi fa Yehofa e dwengi enseefi, da u meke moiti fu waka neen baka. A sani ya o yeepi u fu tyai useefi bun te wan sani pasa di meke wi ati boon. Sowtu toli e soi taki Yehofa e holi enseefi?

Yehofa na a moo bun sama di man dwengi enseefi, bika a ná abi sondu

6 Pakisei san Yehofa du di Saatan sitee anga en aini Eden. Den engel di e holibaka gi Yehofa be musu dyombo di den yee san Saatan taki fu Yehofa. Kande a sani ya meke den ati boon a Saatan. Kande a so iseefi e fii te yu e si fa libisama e pina fu di Saatan du a sani de. Ma Yehofa holi enseefi. A du sani anga koni. Yehofa ati á boon gaw. A du sani a wan leti fasi di Saatan sitee anga en (Ekisodesi 34:6; Yopu 2:2-6). Saide Yehofa du a sani ya? A holi enseefi fu di a á wani nawan sama dede, ma a „wani ala sama fende a okasi fu tapu anga den sondu fu den”.​—2 Peitilisi 3:9.

7. San wi e leli te u luku a fasi fa Yehofa e dwengi enseefi?

7 A fasi fa Yehofa dwengi enseefi di Saatan sitee anga en, e leli u taki u mu denki fosi u taki efuso du wan sani. Te i de fu du wan pelensipali sani, teke ten denki bun fosi. Begi Yehofa fu a yeepi i fu taki efuso fu du san a lobi  (Psalm 141:3). Te wi ati boon, a moo makiliki fu taki efuso du sani sondee fu denki. Neen meke di son sama taki efu du sani anga ati boon, a hati den bakaten.​—Odo 14:29; 15:28; 19:2.

SAMA DI DWENGI DENSEEFI ANGA SAMA DI Á DWENGI DENSEEFI

8. (a) Pe u sa fende toli fu sama di be dwengi denseefi? (b) San yeepi Yowsefu fu a á sondu di a uman fu Potifar be e poolo gi en? (Luku a fowtow na a bigin.)

8 Sowtu toli aini Beibel e soi taki a de taanga fanowdu fu dwengi iseefi? Kande yu e pakisei a toli fu Yowsefu, a manpikin fu Yakopu. Tesi miti en di a be e wooko aini a osu fu Potifar, a edeman fu den wakitiman fu Farao. Yowsefu be ’taanga, a be moin tu’ neen meke a uman fu Potifar be lobi en. A wan hii pisiten a be e poolo gi Yowsefu. San yeepi Yowsefu fu pasa a tesi ya? Kande a be e denki a fesi fa sani be o waka efu a be du san a uman ya be wani. A dati yeepi en fu lon gwe di a uman fu Potifar kisi en holi neen koosi. A taki: „Fa mi sa du a gaan ogii ya? Na sondu mi be o sondu a Gadu fesi noh?”​—Genesesi 39:6, 9; leisi Odo 1:10.

Begi Yehofa fu a gi i koni anga kaakiti fu pasa tesi

9. San o yeepi i fu yu á gi abaa te tesi miti i?

9 San wi e leli fu Yowsefu? Te tesi e miti u, u mu holi useefi. Wi á mu pasa den weiti fu Gadu. Fosi son wan fu u toon Yehofa Kotoigi, wi á be poi holi useefi. U be e diingi pasa maiki, u be e somoko, u be e hulu efuso du taa sani di Yehofa á lobi. Baka di u dopu seefi kande u be e fii fu du den sani ya. Te a sani ya e miti i, teke ten pakisei fa yu anga Yehofa o poli efi i tyai iseefi a wan fasi di á fiti. Puubei fu sabi san e meke yu e fii fu du den sani ya, da i luku fa i sa koti pasi gi den (Psalm 26:4, 5; Odo 22:3). Solanga yu e fii fu du wan sani di Yehofa á lobi, begi en fu a gi i koni anga kaakiti fu man dwengi iseefi.

10, 11. (a) San e miti yonkuuwan a sikoo? (b) San o yeepi yonkuuwan fu dwengi denseefi te tesi miti den?

10 A sani di miti Yowsefu e miti omen yonkuu Kelesten. Wan fu den sama di a sani ya miti, a wan sisa den e kai Kim. Den pikin fi en kalasi be lobi gafa fa den be e didon anga taawan den dei di sikoo á de. Kim á be e du den sani de, neen meke a á be abi toli fu gi den. A sisa ya taki fu di a be de taa fasi meke son leisi a be e fii enke a „ná abi mati”. Den taa pikin be e soso en fu di a á be de anga boi. Ma a koni Kim be koni. A be sabi taki te i yonkuu den fii fu didon anga sama e taanga (2 Timotiyesi 2:22). Son pikin be e akisi en efu a á didon anga man ete. A so a be e fende a okasi fu soi den saide a á wani didon anga man ete. Wi e gafa den yonkuu Kelesten di nai luku a den baya fu den  di e libi wan hululibi. Den yonkuu Kelesten ya e meke Yehofa piisii.

11 Beibel e taki tu fu sama di á dwengi denseefi di tesi miti den fu didon anga wan sama di ná den toowpaa. Beibel e soi san miti den tu di den á dwengi denseefi. Efu a sani di miti Kim miti i, pakisei a toli fu a don yonkuman di sikiifi a Odo kapitel 7. Pakisei Amnon tu, anga san miti en di a á tyai enseefi bun (2 Samuweli 13:1, 2, 10-15, 28-32). Mma anga dda sa taki fu den toli ya na a osufamii anbegi, fu yeepi den pikin fu den fu dwengi denseefi anga fu du sani anga koni.

12. (a) Fa Yowsefu holi enseefi di a be e taki anga den baala fi en? (b) On ten u mu dwengi useefi?

12 Di den baala fu Yowsefu go bai nyanyan a Egepte, Yowsefu soi tu taki a man dwengi enseefi. Fu di a be wani sabi fa den baala fi en be e denki tuutuu, meke a á taigi den sama neen. Te kee be e kisi en, a be e go a wan taa peesi go kee (Genesesi 43:30, 31; 45:1). Efu wan baala efuso sisa du wan sani di meke yu ati boon, holi iseefi enke Yowsefu. A sani ya o yeepi i fu yu á du, efuso taki sani di o hati i bakaten (Odo 16:32; 17:27). Efu yu abi famii di den puu na a kemeente, i mu dwengi iseefi fu yu á taki anga en efu a á de fanowdu. A sani ya á makiliki. Ma holi a pakisei taki a Yehofa baka yu e waka, neen weiti yu e holi. Efi i holi a sani ya a pakisei, a ná o taanga gi i tumisi.

Nawan sama mu denki taki noiti a o meke fowtu te tesi miti en

13. San wi e leli te u luku a libi fu Kownu David?

13 U sa leli wantu sani fu Kownu David tu. Di Saul anga Simei suku toobi anga David, a holi enseefi. A á du ogii anga den (1 Samuweli 26:9-11; 2 Samuweli 16:5-10). Ma a ná ala yuu David be e holi enseefi. Te u leisi a toli fi en anga Batseiba anga san a be wani du anga Nabal, da wi e si taki David á be dwengi enseefi a den okasi ya (1 Samuweli 25:10-13; 2 Samuweli 11:2-4). Den toli ya e leli u tu sani. A fosi sani, den sama di Gadu poti fu teke fesi mu e dwengi denseefi. A sani ya o yeepi den fu den á koboloiki den faantiwowtu a wan fasi di á fiti. Du fu tu, nawan sama mu denki taki te tesi miti en, noiti a o meke fowtu.​—1 Korentesama 10:12.

WANTU SANI DI O YEEPI U FU DWENGI USEEFI

14. San miti wan baala? Saide a de fanowdu fu luku bun fa wi e tyai useefi te den sowtu sani ya miti u?

14 San i sa du fu go a fesi anga a fasi fa yu e dwengi iseefi? Kon u luku san be miti Luigi. Wan man naki a wagi fu Luigi a baka. Winsi fa na a man be fowtu, toku a bigin ligei anga Luigi. A de  fu feti anga en tu. Luigi begi Yehofa fu a yeepi en fu a á ligei anga a man. A meke moiti tu fu taki bun anga a man fi en ati koo, ma toku a man be e ligei ete. Neen meke a sikiifi a nombuu fu a wagi fu a man neen a gwe. Baka wan wiki, neen Luigi go luku wan folow di a be taki anga en a peleikiwooko. Na a uman fu a man di be ligei anga en. Sen kisi a man te. A akisi Luigi paadon fu a fasi fa a be taki anga en. A taigi Luigi taki a o taki anga a kantoo di mu seeka a wagi fu den yeepi Luigi moo gaw. A man sidon aliki tu di Luigi be e taki anga a uman fi en. A be lobi den sani di a yee. A so Luigi si den wini di á fende di a á ligei anga a man. A fusutan tu san be o de a bakapisi efu en ati be boon di a man ligei anga en.​—Leisi 2 Korentesama 6:3, 4.

A fasi fa wi e tyai useefi sa meke sama aliki u te u go peleiki gi den (Luku paragraaf 14)

15, 16. Fa Beibel sa yeepi i anga yu osufamii fu dwengi useefi?

15 A sani di o yeepi u fu man dwengi useefi enke Kelesten, na a sutudeli di wi o sutudeli Beibel ala yuu. Pakisei  san Gadu be taigi Yowsuwa: „I mu e taki fu den Weiti di sikiifi aini a buku ya ala yuu. I mu e leisi en saafi dei anga neti, da yu o man du ala san sikiifi aini. Te i du a sani ya, da sani o waka bun anga i. Yu o sabi fa fu du sani” (Yowsuwa 1:8). Ma fa a sutudeli di wi e sutudeli Beibel e yeepi u fu dwengi useefi?

Efu wi e sutudeli ala yuu a o yeepi u fu dwengi useefi

16 Den toli di u luku e soi taki Beibel e taki fu sama di be e dwengi denseefi anga sama di á be dwengi denseefi. U si den wini di wi o fende te wi e dwengi useefi anga den polobelema di sa miti u te u nai dwengi useefi. A wi Yehofa meke sama sikiifi den toli ya gi (Romesama 15:4). Neen meke u mu leisi den, sutudeli den bun, da u teke ten pakisei san u leli. Meke moiti fu si fa yu anga yu osufamii sa wooko anga den sani di u leli. Begi Yehofa fu a yeepi i fu du san i leli. Yu á mu si en enke wan lawlaw sani te i si taki yu á poi holi iseefi son leisi. Ma begi Yehofa fu a yeepi i fi i kengi (Yakowbesi 1:5). Suku sani aini den buku fu u di o yeepi i fu man dwengi iseefi.

17. Fa mma anga dda sa yeepi den pikin fu dwengi denseefi?

17 Fa i sa yeepi i pikin fu dwengi enseefi? Mma anga dda sabi taki den pikin fu den nai meke anga a fii fu dwengi denseefi. Efu den wani den pikin dwengi denseefi, da denseefi mu e dwengi denseefi (Efeisesama 6:4). Te i si taki i pikin á poi holi enseefi, da i mu akisi iseefi efu yu e dwengi iseefi fu den sa waka a yu baka. Efu yu e du a pioniliwooko, efu yu e go a komakandaa ala yuu, den pikin fi i o man waka a yu baka. Den o man waka a yu baka tu efu yu e holi a osufamii anbegi. Son leisi a bun fu puu nono gi a pikin. Yehofa be poti weiti gi Adan anga Efa. Den weiti di Yehofa be poti gi den, a be fu leli den taki den mu abi lesipeki gi en. Mma anga dda o man yeepi den pikin fu den fu dwengi denseefi te den e tyai denseefi bun, anga te den e poti weiti gi den pikin fu den. Den moo pelensipali sani di i mu yeepi i pikin fu du, a fu lobi Yehofa anga fu lesipeki den weiti fi en.​—Leisi Odo 1:5, 7, 8.

18. Saide u mu luku bun sama wi e teke fu mati?

18 Winsi u ná abi pikin, tokuso u mu luku sama wi e teke fu mati. Efu den mati fi i lobi Yehofa, den o gi i taanga-sikin fu du sani di o tyai wini gi i (Odo 13:20). Efu den man dwengi denseefi, den o gi i taanga-sikin fu iseefi meke moiti fu dwengi iseefi. Den bun manii fi i o gi den taanga-sikin tu. Efu u man dwengi useefi, Gadu o piisii anga u. Wi o de koloku. Boiti dati wi o man libi bun anga den sama di u lobi tu.