Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  oktober 2017

 ONDOOFENITOLI

Yehofa o belesi u te u du san a wani

Yehofa o belesi u te u du san a wani

Mi anga mi man, anga mi baala anga en uman be fende wan moin gaandi. Di u fende en, wi á daaidaai, u taki wanten taki „wi o go”. Ma saide u be teke a gaandi ya? Fa Yehofa belesi u? Meke mi taigi u fosi sama a mi.

MI MEKE aini a yali 1923 a Hemsworth, wan foto a Yorkshire a Ingiisikondee. Mi abi wan gaan baala den e kai Bob. Di mi be abi neigin yali, nda be e tyai buku kon a osu di e soi fa falisi keliki e koli sama. Nda be lobi den toli di a be e leisi, bika en ati be e boon te a be e si taki den fesiman fu den keliki á be e du san den be e leli sama. Baka wantu yali, baala Bob Atkinson kon a wi osu, neen a daai wan fu den lezing fu Baala Rutherford gi u. U be fusutan wanten taki na a kulu fu Baala Rutherford be e sikiifi den buku di nda be e leisi. Mi mma anga nda be lobi kai Baala Atkinson fu kon nyan a wi osu ala neti. A be e piki den somen akisi fu Beibel di u be e poti gi en. Baala Atkinson be kai u fu go a komakandaa a wan baala osu di be de wantu kilomeiti moo faawe. Di u be bigin go a den komakandaa, wi á be e puu dei. Baka wan pisiten wan pikin kemeente be opo a Hemsworth. Te a zone dinali (nownow wi e kai en kelen owluman) be kon na a kemeente, a wi osu a be e tan. Boiti dati a wi osu den pionili fu den kemeente di be de koosube be e kon nyan. Den baala anga sisa ya leli mi omen sani.

A osufamii fu u be bigin wan bisnis a ten de. Ma nda taigi mi baala taki: „U sa fika a wooko ya efi i wani pionili”. Bob be lobi san nda taki. A bigin pionili di a be abi 21 yali. Tu yali baka dati, di mi tapu 16 yali, miseefi bigin pionili. Sataa anga sonde mi anga taa Kotoigi be e wooko, ma gaanse leisi a mi wawan be e wooko a mindii wiki. Mi be e koboloiki a gaanmanfon anga a Kotoigi kaita te mi be e peleiki. Wan satu Beibel bosikopu be de na a kaita. Yehofa belesi mi anga wan sutudi di be e go a fesi. A omen famii fu a Beibelsutudi ya kon a waaleiti. A taa yali, neen mi anga Mary Henshall toon spesuutu pionili. Den baala be sende u go a wan peesi den e kai Cheshire. Sama á be peleiki na a pisi de ete.

A ten fu a Tu Goontapu Feti, umansama be mu du son wooko fu holibaka gi a feti. Lanti á be e dwengi den sama fu den taa keliki di be e du soso keliki wooko fu holibaka gi a feti. Neen meke u be  denki den á be o dwengi u tu. Ma kuutubakaa leisi sitaafu gi mi. Den sooto mi 31 dei. A taa yali, di mi tapu 19 yali, mi be abi fu go ete tu leisi a kuutu bika mi á be wani holibaka gi a feti. Ma nawan fu den leisi den sooto mi. Mi be sabi taki na a santa yeye be yeepi mi ala den tu leisi ya. Boiti dati Yehofa be yeepi mi fu holidoo. A yeepi mi fu taampu gingin.​—Yesaya 41:10, 13.

MI FENDE WAN NYUN PAA

Mi anga Arthur Matthews miti aini 1946. Den sooto Arthur dii mun di a á be wani go a feti. Di den losi en, a á teke langa, a go holibaka gi en baala Dennis di be e du a spesuutu pioniliwooko a Hemsworth. Den dda be leli den sama a Yehofa fanafu di den be nyoni. Boiti dati a yonkuuyonkuu den dopu. Di den tu man bigin pionili, neen den baala sende Dennis go a Ierland. A so Arthur á be abi pionili paa moo. Mi mma anga nda be lobi a fasi fa a yonkuu pionili ya be e wooko taanga. Den be lobi a fasi fa a be e tyai enseefi tu. Neen meke den akisi Arthur fu a kon tan anga den. Te mi be e go luku mi mma anga nda, mi anga Arthur be e wasi tyobo sani te ala sama be kaba nyan. Bakaten u bigin sikiifi biifi gi useefi. Aini 1948, den be sooto Arthur dii mun baka. U toow aini yanuari 1949. Di u toow, u taki fiti taki wi o du ala san u man fu tan aini a pioniliwooko. Wi á be e poli moni. Boiti dati te u be abi fakansi u be e go yeepi sama piki den sii fu den a den goon. A so u be e fende wan pikin moni tu. Yehofa yeepi u fu tan aini a pioniliwooko.

U de a Hemsworth baka di u toow aini 1949

Baka wan sani fu wan yali so, den sende u go a Armagh, wan taa pisi fu Ierland. Bakaten den sende u go a Newry. Beina a soso Lomusu sama be e tan a den foto ya. Den sama de á be lobi u seefiseefi, neen meke u be abi fu luku bun sama wi e peleiki gi. U be e holi komakandaa a wan baala anga sisa osu di be de 16 kilomeiti moo faawe. A aitin sama be e kon a den komakandaa. Son leisi u be e siibi ape. U be e siibi a doti, da mamanten u be e nyan te u bee fuu. Ná pikin piisii mi e piisii fu si fa omen Kotoigi de na a pisi de nownow.

„WI O GO!”

Mi baala anga en uman Lottie, be de enke spesuutu pionili a Noord Ierland. Aini 1952 u fo man go a wan konkelesi a Belfast. Wan baala be meke ala u siibi neen osu. A be meke baala Pryce Hughes, a baala di be e teke fesi na a beikantoo fu Ingiisikondee, siibi ape tu. Wan fu den neti u be e taki fu wan nyun buku di den e kai God’s Way Is Love (A pasi fu Gadu a lobi). A buku ya be meke moomoo gi den sama di e tan aini Ierland. Baala Hughes be taigi u taki a á makiliki fu peleiki gi den Lomusu sama na a pisi fu Ierland de. A omen baala be abi fu foloisi bika den pilisite be e sende sama fu fon den. Baala Pryce taigi u taki: „Wi abi toowpaa fanowdu di abi wagi fu paati a buku ya na a hii kondee.”  * (Luku a maiki a ondoo.) Na a sani ya meke u taki: „Wi o go!”

Wi anga wantu taa pionili de a wan bolomu di abi wan sowtu pikin wagi neen se

 Wan fu den peesi pe den pionili be sa tan te den be de aini Dublin, na a osu fu Ma Rutland. A sisa ya dini Yehofa omen yali anga en hii ati. Useefi go tan de wan pisiten, neen u seli wantu fu den sani fu u. A ten de Bob be abi wan bolomu fi en. A bolomu be abi wan sowtu pikin wagi neen se. A bolomu ya tyai u fo man di u be e lei suku wan wagi fu bai. U be fende wan gaandiwan di be de bunbun ete. Di u bai en, wi akisi a sama di be e seli en fu tyai en kon gi u, bika nawan fu u be sabi lei wagi. A hii neti de, Arthur sidon neen bedimofu e du enke ai lei a wagi. A taa mamanten di a be e meke moiti fu lei a wagi puu na a daki ondoo, neen wan zendeling den e kai Mildred Willett (Mildred Willett toow anga John Barr bakaten) be kon de. Mildred be sabi lei wagi. A leli u lei, a so u kon sabi lei wagi.

A pikin osu fu u di u be e hali anga a wagi

A polobelema di u be abi now, a wan peesi u be mu fende fu tan. Den baala be taigi u taki wi á mu siibi aini den osu di den e hali anga wagi, bika den feyanti fu u be sa boon en. Neen meke u suku osu, ma wi á be poi fende. A neti de u fo man siibi aini a wagi fu u. A taa dei u fende wan osu di den e hali anga wagi. A osu ya be abi wan ondoo anga tapu bedi aini. Aini u be e tan. Nawan sama be e du sani anga a wagi te u be fika en a den dyali fu den sama di e paandi goon. Den sama be abi bun manii. Te u be e peleiki, u be e waka wan sani fu 24 kilomeiti gwe fika a osu fu u. Fosi u gwe, u be e peleiki gi den sama pe u be poti a wagi.

U peleiki na ala den osu fu a zuid-oost pisi fu Ierland. Gaan sani á miti u di u peleiki a den pisi ya. U paati moo enke 20.000 buku. U sende ala den nen fu den sama di be wani sabi moo gi a beikantoo fu Ingiisikondee. A bigi gi u taki ondoo-ondoo Kotoigi de na a pisi de nownow.

U GO A INGIISIKONDEE BAKA, BAKATEN U GO A SCHOTLAND

Baka wantu yali den baala sende u go a zuid London. Baka wantu wiki den baala fu a Ingiisi beikantoo telefon Arthur, neen den akisi en fu bigin anga a kelen wooko a taa dei. Den leli u a wooko wan wiki, baka dati u go a den kemeente fu a kelen a Schotland. Ma Arthur á be fende ten fu seeka den lezing di a be o holi. Ma a be de wan sama di be de kabakaba fu du ala san a olikanisâsi fu Yehofa akisi en, winsi a á be makiliki. Te mi be luku a fasi fa a be de, ná pikin taanga-sikin a be e gi mi. U be lobi a kelen wooko. A omen yali u peleiki a peesi pe peleikiman á be de, neen meke a be e bigi gi u fu de makandaa anga omen baala anga sisa.

Di Arthur be mu go na a Gileyad sikoo aini a yali 1962, a á be makiliki, bika neen wawan den be kai fu go na a sikoo ya di be o holi tin mun langa. U taki fiti, neen Arthur go na a sikoo. Fu di mi á be abi wan taa pionili fu wooko makandii, meke a beikantoo sende mi go Hemsworth baka enke spesuutu pionili. Di Arthur kon baka wan yali, a toon distrikt-owluman. A be e du a wooko ya a Schotland, a noord pisi fu Ingiisikondee, anga Noord Ierland.

 DEN GI U WAN NYUN FAANTIWOWTU A IERLAND

Aini 1964 den baala poti Arthur fu teke fesi na a beikantoo fu Ierland. Biginbigin mi be e booko mi ede bika mi be lobi a kelen wooko. Ma nownow mi e teke en fu bigi taki mi be abi a gaandi fu wooko a Betel. Mi kon si taki efu a olikanisâsi gi i wan wooko di yu á lobi, neen i du en, Yehofa o belesi i. Mi wooko a kantoo, mi poti buku aini dosu, mi boli, mi kiin osu a Betel. Arthur be e du a distrikt wooko son leisi. A so u be e miti den baala anga sisa fu a kondee. A si di u be e si fa den Beibelsutudi fu u e go a fesi tu, be yeepi u fu lobi den baala anga sisa fu Ierland. A sani ya e begi gi mi.

WANTU PELENSIPALI SANI DI PASA A IERLAND

A fosi internationaal konkelesi di holi aini Ierland, be de aini a yali 1965. * (Luku a maiki a ondoo.) Winsi fa sama be wani tapu u fu holi a konkelesi ya, toku ala sani be waka bun. A 3.948 sama be de na a konkelesi ya. Boiti dati 65 sama dopu. Wantu sama di be e tan a Ierland be meke 3.500 Kotoigi di be kon na a konkelesi tan a den osu. A beikantoo be sende biifi gi ala den sama di be meke den Kotoigi tan a den osu fu gi den daa. Den sama seefi gafa a fasi fa den baala anga sisa tyai denseefi. A sani ya be soi taki Ierland be go a fesi.

Arthur e gi Baala Nathan Knorr odi di a kon na a konkelesi fu 1965

A Arthur be holi a lezing di a Mi buku nanga Bijbel tori kon a doo aini Keltis-tongo aini a yali 1983

Aini 1966 na a beikantoo fu Dublin be e luku a wooko fu Yehofa Kotoigi a noord Ierland anga zuid Ierland. A sani ya a be wan foondoo sani, bika den sama fu den tabiki ya á be e libi na a wan. Den politiki palitei anga den keliki be e paati den. A wan piisii sani fu si fa omen sama fu Lomusu keliki kon a waaleiti. Nownow den e dini Yehofa makandaa anga baala anga sisa di be de na Anitii keliki fosi.

WAN NYUN FAANTIWOWTU

U hii libi kengi aini 2011. Den tapu a beikantoo fu Ierland, neen den sende u go a London. A ten de mi be e booko mi ede anga Arthur. Dataa be taki a abi a siki di den e kai Parkinson. A hati mi di a dede a 20 mei 2015. A 66 yali mi anga en libi.

Den yali di pasa mi kusumi te ye. Ala sani fu mi a be Arthur. Ná pikin fii mi fii a dede fi en. Mi e angii fi en te! Ma te den sowtu sani ya miti i, yu e kon moo koosube a Yehofa. Mi e piisii te mi e pakisei fa den baala anga sisa be lobi Arthur. Baala anga sisa fu Ierland, Ingiisikondee anga Ameekankondee sende biifi gi mi. Den biifi ya anga a taanga-sikin di Arthur baala Dennis anga en uman Mavis, anga den tu umanpikin fu den di den e kai Ruth anga Judy gi mi yeepi mi tuutuu.

A tekisi di gi mi taanga-sikin a Yesaya 30:18. A taki: „Yehofa e wakiti anga pasensi fu du bun sani gi u. A o opo taampu fu soi u tyali-ati. Bika Yehofa a wan Gadu di e kuutu sani a wan leti fasi. Ala den sama di e wakiti en anga pasensi o de koloku.” A wan toosutu gi mi fu sabi taki Yehofa e wakiti anga pasensi fu losi ala den polobelema fu u. Ai wakiti tu fu gi u wooko di o gi u piisii aini a nyun goontapu.

Te mi e pakisei a ten di pasa, mi si fa Yehofa yeepi u, anga fa a meke sani waka bun gi u di u be e du a peleikiwooko a Ierland. Ai bigi gi mi taki mi a wan fu den sama di bigin anga a wooko a Ierland. Mi si taki Yehofa e belesi u te wi e du sani enke fa a wani.

^ paragraaf 12 Luku a Bakaatongo Jaarboek van Jehovah’s Getuigen 1988, blz. 101, 102.

^ paragraaf 22 Luku a Bakaatongo Jaarboek fu 1988, blz. 109-112.