Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  oktober 2017

I be sabi a sani ya?

I be sabi a sani ya?

Saide Yesesi be taki a á bun fu sweli?

A Weiti fu Mosesi á be e tapu sama fu sweli. Den be e taki „mi sweli a Gadu” efuso „mi e sweli aini a nen fu Yehofa”. Ma aini a ten fu Yesesi den Dyu be gwenti sweli fu ala lawlaw sani di den be e taki. Den be e du a sani ya fu meke sama biibi den. Ma a tu leisi Yesesi be taki a sani ya á bun. A be leli sama taki: „Te i taki ’Iya’, a mu tan iya. Te i taki ’nono’, a mu tan nono.”​—Mateyesi 5:33-37; 23:16-22.

Wan buku (Theological Dictionary of the New Testament) taki te i leisi den weiti fu den Dyu, da yu e si taki a be wan gwenti fu den Dyu fu sweli gi ala lawlaw sani di den be e taki. Den weiti ya e soi finifini on yuu wan sama sa booko a sweli di a meke anga on yuu a á be mu booko wan sweli.

A ná Yesesi wawan be taki a gwenti ya á bun. Wan man di den e kai Flavius Josephus e ondoosuku fa den Dyu be e libi fosi. A man ya taki, wan Dyu biibi be de di á be lobi a sweli di sama be e sweli fu ala sani di den taki. Den sama fu a biibi ya be e si enke wan sama di be e sweli te a taki wan sani, be ogii moo wan leiman. Wan Dyu buku di den e kai Wisdom of Sirach taki: „Wan man di lobi sweli ogii te aini en bon.” Yesesi á be lobi a sweli di sama be e sweli fu lawlaw sani. Efu ala yuu wi e taki san tuu, da a á de fanowdu fu sweli fu meke sama biibi u.