Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  oktober 2017

„Du sani anga wan kiin ati fu soi taki u lobi useefi”

„Du sani anga wan kiin ati fu soi taki u lobi useefi”

„Wi á mu e taki a mofu namo taki u lobi useefi, ma u mu du sani anga wan kiin ati fu soi taki u lobi useefi.”​—1 YOHANISI 3:18.

SINGI: 106, 100

1. San na a moo gaan lobi di de? Fa wan sama e soi a lobi ya? (Luku a fowtow na a bigin.)

A YEHOFA soi u fa u mu lobi taawan (1 Yohanisi 4:7). Den leli fu Beibel e yeepi sama fu soi a moo gaan lobi di de. Beibel e kai a lobi ya agape-lobi aini Giikitongo. Te yu e soi a lobi ya gi wan sama, yu e fii gi en, yu e libi bun anga en. A lobi ya e meke sama du sani gi taawan sondee fu suku wini gi denseefi. Lobi e yeepi u fu du sani gi taawan. Te wi e soi a lobi ya gi taawan wi o fii bun. A libi o moo switi gi u tu.

2, 3. Fa Yehofa soi taki a lobi libisama tuutuu?

2 Fosi Yehofa meke Adan anga Efa, a be soi kaba taki a lobi libisama. Di a meke a goontapu, a poti ala sani neen di den be o abi fanowdu fu tan a libi. Boiti dati, a fasi fa a meke goontapu, be o meke a libi switi gi den. Yehofa á meke den sani ya fu enseefi. A wi a meke den gi. Di a kaba meke den, neen a meke libisama.  Boiti dati a gi libisama a howpu fu libi fu teego aini a paladeisi a goontapu ya.

3 Bakaten Yehofa du wan gaan sani fu soi taki a lobi u tuutuu. Winsi fa Adan anga Efa taangayesi Gadu, toku Gadu be sabi taki son wan fu den bakapikin fu den be o lobi en. Neen meke a sende en manpikin kon dede gi den fu den sa fende teego libi (Genesesi 3:15; 1 Yohanisi 4:10). Fanafu di Yehofa paamisi taki a o yeepi den bakapikin fu Adan, a be de leti enke a meke en manpikin dede gi den kaba. Ma a baka 4000 yali fosi Yehofa sende en wan kodo manpikin kon dede gi libisama (Yohanisi 3:16). Ai bigi gi u taki Yehofa soi u taki a lobi u!

U mu soi taki u lobi taawan winsi a á makiliki

4. Fa u du sabi taki sondu libisama poi lobi taawan anga den hii ati?

4 U poi lobi taawan anga u hii ati winsi fa wi abi sondu? Eeye, u poi. Yehofa meke wi anga den manii fi en. Dati wani taki u man waka neen baka. U poi lobi taawan anga u hii ati, winsi a á makiliki. Abel be soi taki a lobi Gadu, bika a gi Gadu den moo bun sani di a be abi (Genesesi 4:3, 4). Nowa be soi taki a lobi taawan di a paati a bosikopu fu Gadu gi den omen yali, winsi fa den á be wani aliki (2 Peitilisi 2:5). Abalaham be soi taki a Yehofa a moo lobi, di a be de kabakaba fu gi en manpikin Isaki enke ofaandi (Yakowbesi 2:21). U wani soi Yehofa tu taki u lobi en leti enke den man ya.

SAN A TUUTUU LOBI?

5. Fa u sa soi taki u lobi taawan anga u hii ati?

5 Beibel taki „wi á mu e taki a mofu namo taki u lobi useefi, ma u mu du sani anga wan kiin ati fu soi taki u lobi useefi” (1 Yohanisi 3:18). Dati á wani taki wi á poi taigi taawan taki u lobi den (1 Tesalonikasama 4:18). Ma wi á mu taigi taawan namo taki „mi lobi i” da a kaba. U mu du sani fu soi taki u lobi den tuutuu. Te u baala anga sisa ná abi nyanyan efuso koosi, da wi á mu taigi den taki u lobi den da a kaba. U mu yeepi den (Yakowbesi 2:15, 16). Fu di u lobi Yehofa anga taawan, meke u ná o begi namo fu moo sama kon du a peleikiwooko, ma wi o du ala san u man fu paati a bun nyunsu anga taawan.​—Mateyesi 9:38.

6, 7. (a) San a wani taki fu lobi taawan anga wan kiin ati? (b) Sama a wantu sama di be du enke den lobi taawan?

6 Apostel Yohanisi taki u mu „du sani anga wan kiin ati fu soi taki u  lobi” taawan. Dati wani taki, a ná du u mu du enke u lobi taawan (Romesama 12:9; 2 Korentesama 6:6). Son leisi sama e du enke den lobi taawan, ma den á lobi den tuutuu. A ná abi nawan wini te wi e du enke u lobi taawan.

7 Wi o taki now fu son sama di be du enke den lobi taawan. Di Saatan be taki anga Efa aini a dyali Eden, a be gei enke den sani di a taki be o tyai wini gi Efa. Ma den sani di a du soi taki a á be lobi Efa (Genesesi 3:4, 5). Di David be de kownu, a be abi wan mati den e kai Akitofel. Ma Akitofel bidiigi David fu di a be e suku wini gi enseefi. En du be e soi taki a á be de wan bun mati (2 Samuweli 15:31). Aini a ten ya, den sama di daai baka gi a biibi, e du sani fu tyai paati fasi kon aini a kemeente. Den e meke moiti fu koli a kemeente „anga switi taki. Den e gafa den fu koli den” tu (Romesama 16:17, 18). Den e du enke den e booko den ede anga taawan, ma den nai booko den ede anga den tuutuu.

8. San u sa akisi useefi?

8 A sama di e bidiigi taawan e du enke den lobi taawan. Neen meke wi á mu e du enke u lobi taawan. U sa koli libisama, ma wi á poi koli Yehofa. Yesesi taki den sama di e bidiigi taawan o kisi „bunbun sitaafu” (Mateyesi 24:51). A Yehofa wi e dini, neen meke noiti u mu bidiigi taawan. U mu akisi useefi taki: ’Mi lobi taawan tuutuu? A wini mi e suku gi miseefi meke mi e du enke mi lobi den?’ Wi o taki fu neigin fasi fa u sa soi taki u lobi taawan anga u hii ati.

„DU SANI ANGA WAN KIIN ATI” FU SOI TAKI U LOBI TAAWAN

9. San wi o wani du efu u lobi taawan anga u hii ati?

9 Du sani gi taawan anga piisii winsi sama nai si san yu e du. U mu de kabakaba fu yeepi taawan winsi taa sama nai si san wi e du. (Leisi Mateyesi 6:1-4.) Ananiyas anga Safira á be e denki so. Di den poti moni fu yeepi den baala anga sisa, den be wani taawan sabi san den du. Den lei tu taki na ala a moni den gi. Ma sani á waka bun gi den di den bidiigi taawan (Toli 5:1-10). Efu u lobi u baala tuutuu, wi o wani du sani gi den sondee fu taawan sabi. U mu meke moiti fu de enke den baala di e yeepi den baala di e tii a wooko a hii goontapu. Den nai suku nen. Den nai meke taawan sabi san den e du gi a olikanisâsi.

Du sani gi taawan anga piisii winsi sama nai si san yu e du

10. Fa u sa gi taawan gaandi?

 10 Gi taawan gaandi. (Leisi Romesama 12:10.) Yesesi be gi den apostel fi en gaandi di a wasi den futu (Yohanisi 13:3-5, 12-15). U mu meke moiti fu abi sakafasi enke Yesesi, da u du sani gi taawan. Den apostel á be e fusutan a sani ya. A di Yehofa gi den a santa yeye fosi den fusutan saide Yesesi du a sani ya (Yohanisi 13:7). Efu u wani gi taawan gaandi, wi á mu denki taki u bun moo den fu di u go a hei sikoo, fu di u gudu efuso fu di wi abi son faantiwowtu (Romesama 12:3). U nai dyalusu te den e gafa taawan, ma wi e piisii anga den, winsi wi e si enke taawan be mu gafa u tu.

11. Saide wi á mu koli taawan te wi e gafa den?

11 Gafa taawan anga i hii ati. Suku okasi fu gafa taawan. Ala u sabi taki te wi e gafa taawan „wi e gi den taanga-sikin” (Efeisesama 4:29). Ma den sani di wi e taki mu komoto a wi ati. Wi á mu e koli taawan. Te a de fu poti wan sama a pasi, wi á mu daaidaai tu (Odo 29:5). U be o de enke bidiigiman efu wi e gafa sama te u de a den fesi, da wi e kuutu den a baka. Apostel Pawlesi be lobi taawan anga en hii ati. Di a sikiifi biifi gi den Kelesten fu Korente, a gafa den fu den bun sani di den be e du (1 Korentesama 11:2). Ma te a be mu poti den a pasi, a be e soi den kiin saide a de fanowdu. Ma a á be e taki goofu anga den.​—1 Korentesama 11:20-22.

Wi e soi lobi anga switifasi gi u baala anga sisa te wi e yeepi den (Luku paragraaf 12)

12. Fa wi o soi taki u lobi taawan anga u hii ati te wi e kai den kon a wi osu?

12 Kai taawan kon a yu osu. Yehofa taki u mu lobi gi sama sani. (Leisi 1 Yohanisi 3:17.) Ma u mu du den sani ya anga wan kiin ati. U mu akisi useefi taki: ’A den mati fu mi wawan mi e kai kon a mi osu? A den sama di mi e si enke pelensipali sama aini a kemeente mi e kai kon a mi osu? A den sama di mi e si enke sa gi mi wan sani mi e kai kon a mi osu? Mi e kai baala anga sisa di mi á sabi anga den wan di ná o poi gi mi sani?’ (Lukasi 14:12-14). Pakisei den sani ya: Kon u taki wan baala abi yeepi fanowdu fu di a du wan don sani, san yu o du? Efi i kai wan sama kon a yu osu neen a á gi i daa, san yu o du? Yehofa taki: „Yu á mu e kuutu te yu e kai taawan kon a yu osu”  (1 Peitilisi 4:9). Wi o piisii te wi e du sani gi taawan fu di u lobi den.​—Toli 20:35.

13. (a) On ten wi abi moo pasensi fanowdu?(b) Fa u sa yeepi den sama di biibi swaki?

13 Yeepi den sama di swaki. Beibel taki u mu „yeepi den wan di swaki. U mu abi pasensi anga ala sama”. Te wi e du a sani ya, wi e soi taki u lobi den anga u hii ati (1 Tesalonikasama 5:14). A omen baala anga sisa di be swaki kon taanga a waaleiti. Ma taawan abi moo pasensi anga yeepi fanowdu. Fa u sa yeepi den? U sa koboloiki a Beibel fu gi den taanga-sikin. U sa meke mofu fu wooko anga den aini a peleikiwooko efuso aliki den te den e taki. Wi á mu e luku namo taki taawan biibi taanga efuso swaki, bika useefi abi sani di u man du bun anga sani di wi á poi du bun. Apostel Pawlesi seefi be taki a abi swaki fasi (2 Korentesama 12:9, 10). Ala wi abi yeepi anga taanga-sikin fanowdu.

14. San u mu de kabakaba fu du efu u wani libi na a wan anga u baala anga sisa?

14 Meke en bun anga taawan. A de taanga fanowdu fu libi na a wan anga u baala anga sisa. Winsi ai gei enke den nai fusutan wi efuso ai gei enke den nai kaba libi bun anga wi, tokuso u mu du ala san u man fu libi na a wan anga den. (Leisi Romesama 12:17, 18.) Efu u du wan sani di ati wan taawan, u mu begi en fu a wai ede gi u. Ma te wi e du a sani de a mu doo wi ati. Wi á mu taigi en taki: „Wai ede gi mi, efu a so i si en.” A be o moo bun fu si u fowtu, da u taigi en taki: „Wai ede gi mi baa, mi á taki bun.” A de taanga fanowdu fu sama libi na a wan, moomoo man anga uman.  A á be o bun efu man anga uman e du enke den lobi denseefi te den de aini sama, da te den de a osu de e puu taki, kosi denseefi efuso feti.

15. Fa u sa soi taki wi e gi taawan paadon anga u hii ati?

15 Gi makandaa paadon anga u hii ati. Te wan sama du wan sani di hati u, wi e gi en paadon. U nai sidon pakisei a ogii di a du anga u tu. „U mu abi lobi, da wi o man abi boo anga taawan. U mu libi bun anga useefi. U mu du ala san u poi fu libi na a wan, enke fa a santa yeye e yeepi u.” A so wi o man gi taawan paadon anga u hii ati (Efeisesama 4:2, 3). Efu u wani gi taawan paadon anga u hii ati, wi á mu e sidon pakisei san a sama du anga u. Beibel taki lobi „nai holi taawan na ati” (1 Korentesama 13:4, 5). Efu u holi u baala anga sisa na ati, wi anga den o poli. Boiti dati wi anga Yehofa o poli tu (Mateyesi 6:14, 15). Wi e soi taki wi e gi den paadon anga u hii ati efu wi e begi gi den te den du wan hati sani anga u.​—Lukasi 6:27, 28.

16. Fa u mu si den faantiwowtu di wi abi aini a olikanisâsi?

16 Te u nai suku wini fu u wawan. Te u fende wan faantiwowtu aini a olikanisâsi fu Yehofa, wi abi a okasi fu soi taki u nai ’suku wini fu u wawan, ma wi e du sani di taawan o fende wini fi en’ (1 Korentesama 10:24). Den baala di e yeepi a den konkelesi anga den gaan komakandaa e doo fuuku. Den sa teke den moo bun peesi gi den famii. Ma den nai wooko so. Gaanse fu den e sidon a pe den baala gi den. Te den du a sani ya, den e soi taki den nai suku wini fu den wawan. Fa i sa waka a den baala ya baka?

17. Efu wan Kelesten du wan gaan sondu, san a lobi di a abi gi taawan o meke a du?

17 Taigi sama a sondu di i du. Ná kibii du sondu moo. Son Kelesten di du wan gaan sondu e kibii a sondu di den du. Kande sen e kisi den efuso kande den á wani taawan fii booko-saka (Odo 28:13). Ma efu wi e kibii a sondu di u du, wi e soi taki wi á lobi taawan. Bika a sondu di u du sa tyai ogii gi wi anga taawan. Saide? Kande Yehofa ná o belesi a kemeente moo anga en santa yeye. A sani de sa meke a kemeente á libi na a wan moo (Efeisesama 4:30). Neen meke efu wan Kelesten du wan gaan sondu, a lobi di a lobi taawan anga en hii ati o yeepi en fu taki anga den owluman fu den yeepi en.​—Yakowbesi 5:14, 15.

18. Saide lobi de taanga fanowdu?

18 Lobi na a moo bun manii di wan sama sa abi (1 Korentesama 13:13). Ai yeepi sama fu sabi sama a den bakaman fu Yesesi anga Yehofa, a Gadu fu lobi (Efeisesama 5:1, 2). Pawlesi be taki efu a á lobi taawan, da a ná abi nawan wini (1 Korentesama 13:2). Neen meke u mu du ala san u man fu u nai „taki a mofu namo taki u lobi useefi, ma u mu du sani anga wan kiin ati fu soi taki u lobi useefi”.