Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  oktober 2016

Meke moiti fi i biibi á swaki, te i de aini wan kemeente di e taki wan taa tongo

Meke moiti fi i biibi á swaki, te i de aini wan kemeente di e taki wan taa tongo

„Mi e kibii den sani di i taigi mi enke gudu aini mi ati.”PSALM. 119:11.

SINGI: 142, 92

1-3. San na a moo pelensipali sani gi u? (b) San e miti den baala anga sisa di e leli wan taa tongo? Sowtu akisi wi o luku? (Luku a fowtow na a bigin.)

AINI a ten ya, a omen Yehofa Kotoigi e meke moiti fu leli „sama fu ala nasi, lo anga tongo” enke fa Beibel be taki a fesi (Openbaring 14:6). Yu a wan fu den sama di e leli wan taa tongo? Son zendeling e go yeepi a wan kondee di abi peleikiman fanowdu. Taa baala anga sisa e tan aini den kondee, ma den e yeepi a wan kemeente di e taki wan taa tongo.

2 A moo pelensipali sani di wan sama di e dini Gadu mu du, a moiti a mu meke fi en anga en osufamii biibi taanga (Mateyesi 5:3). Ma son yuu, wi e du omen sani te, da u nai abi ten fu sutudeli. Ma den sama di e yeepi a wan kemeente di e taki wan taa tongo abi taa booko-ede.

 3 Den baala anga sisa di e yeepi a wan kemeente di e taki wan taa tongo, abi fu leli a tongo di a kemeente e taki. Boiti dati, den mu meke ten fu sutudeli (1 Korentesama 2:10). Fa den o poi du a sani ya, efu den nai fusutan ala den sani di den e yee a komakandaa? Saide mma anga dda di e yeepi a wan kemeente di e taki wan taa tongo, mu meke moiti fu a waaleiti doo den pikin ati?

WAN SANI DI SA SWAKI U BIIBI

4. Gi wan toli di e soi san sa swaki u biibi.

4 Te u nai kaba fusutan den sani di wi e yee a komakandaa, da a sani de sa swaki u biibi. Di Nehemiya be go a Yelusalem baka, a be si taki son wan fu den pikin, á be poi taki Hebrewtongo (Leisi Nehemiya 13:23, 24.) Fu di den pikin ya á be poi fusutan a Wowtu fu Gadu, meke den á be poi du sani enke fa Yehofa wani.Nehemiya 8:2, 8.

5, 6. San wantu baala anga sisa di e yeepi a wan kemeente di e taki wan taa tongo kon fusutan? Saide a sani de pasa?

5 Son mma anga dda di e yeepi aini wan kemeente di e taki wan taa tongo, kon si taki den pikin fu den biibi kon swaki. Fu di den pikin nai fusutan ala den sani di den e yee a komakandaa, meke den nai fende taanga-sikin fu du san den leli. Wan baala den e kai Pedro anga en osufamii foloisi komoto a Zuid-Ameekan, go tan a Australiya. A baala ya taki: „Te wi e taki fu Beibel u mu e fusutan en bun. Den sani di wi e taki mu e doo wi ati.” [1] (Luku a pisi: Ete wan pelensipali sani.)Lukasi 24:32.

6 Te wi e leisi aini wan taa tongo, a nai doo wi ati enke te wi e leisi aini u mamabee tongo. Boiti dati, a taanga fu peleiki aini wan taa tongo. A sani ya sa meke u biibi kon swaki. Neen meke te wi e meke moiti fu holibaka gi wan kemeente di e taki wan taa tongo, u mu meke moiti fu wi anga Yehofa á poli.Mateyesi 4:4.

DEN MEKE MOITI FU DEN ANGA YEHOFA Á POLI

7. Fa den Babilonsama puubei fu dwengi Daniyeli fu libi enke fa den wani? Fa den puubei fu dwengi en fu dini den gadu fu den?

7 Di den tyai Daniyeli anga den mati fi en go a Babilon, den Babilonsama be e dwengi den fu libi enke fa den wani. Den be e dwengi den tu fu dini den gadu fu den. Fa den du a sani ya? Den leli den „a tongo fu den Kaldeyasama”. Boiti dati den gi den Babilon nen (Daniyeli 1:3-7). A nen di den gi Daniyeli e gei a nen fu Bel, a moo pelensipali gadu fu Babilon. Kande Kownu Nebukadnesar be wani soi Daniyeli taki den gadu fu Babilon taanga moo Yehofa, a Gadu fu Daniyeli.Daniyeli 4:8.

Daniyeli be e ’ondoosuku den santa buku’ di be de aini Hebrewtongo, neen meke a á gwe fika Yehofa

8. San Daniyeli be e du fi en biibi á swaki?

 8 Di Daniyeli be de a Babilon, den be e gi en den switi nyanyan fu a kownu. Ma Daniyeli „be poti neen ede” taki a á be o pasa den weiti fu Gadu (Daniyeli 1:8). A be e „ondoosuku den santa buku” di be de aini Hebrewtongo, neen meke a á gwe fika Yehofa di a be de aini wan taa kondee (Daniyeli 9:2). Baka 70 yali di a tan a Babilon, sama be sabi en enke Daniyeli ete, a Hebrew nen fi en.Daniyeli 5:13.

9. Fa a sama di sikiifi Psalm 119 be e si Gadu Wowtu?

9 A sama di sikiifi Psalm 119 be abi fu holidoo, di son wan fu den bigiman fu a kownu be e soso en. Ma a fende taanga-sikin aini Gadu Wowtu. A sani ya yeepi en fu a á libi enke den sama fu a ten fi en (Psalm 119:23, 61). A meke a Wowtu fu Gadu saka go aini en ati.Leisi Psalm 119:11, 46.

MEKE MOITI FI I BIIBI Á SWAKI

10, 11. (a) San u mu holi a pakisei te wi e sutudeli Gadu Wowtu? (b) Gi wan toli di e soi san u mu du fu man du a sani ya.

10 Winsi fa u mu du omen sani aini a kemeente, efuso a wookope, tokuso u mu teke ten fu sutudeli. U mu holi a Osufamii Anbegi tu (Efeisesama 5:15, 16). A ná leisi namo u mu e leisi. A ná seeka namo u mu e seeka fu gi piki a komakandaa, ma u mu meke moiti fu a Wowtu fu Gadu doo wi ati tu. Den sani di wi e leli, mu taanga u biibi.

11 Fu man du a sani ya, u mu wooko anga koni. Te wi e sutudeli, wi á mu e pakisei san taawan abi fanowdu namo, ma u mu luku san wi abi fanowdu tu (Filipisama 1:9, 10). U mu holi a pakisei taki te wi e seeka gi a peleikiwooko, komakandaa anga lezing, a ná ala yuu wi e poti pakisei a useefi. U mu si a sani ya enke te wan sama e boli nyanyan seli. Te ai boli ai tesi a nyanyan, ma a sani de á poi holi en a libi. Na ala dei a mu boli gusontu nyanyan gi enseefi. Na aseefi sani u mu du tu. Efu u wani u biibi taanga, u mu e sutudeli Beibel ala yuu. A sani ya, o yeepi u fu wi anga Yehofa toon bun mati.

12, 13. Saide somen baala anga sisa e sutudeli Beibel aini den mamabee tongo?

12 A omen baala anga sisa di go yeepi a wan kemeente pe den e  taki wan taa tongo, si taki a moo bun fu sutudeli aini den „mamabee tongo” (Toli 2:8). Den zendeling di go yeepi a taa kondee seefi sabi taki den sani di den e yee a komakandaa, á sai fu taanga den biibi.

13 Alain e leli Persiyatongo wan sani fu 8 yali kaba. A taki: „Te mi e seeka gi komakandaa aini Persiyatongo, na a tongo seefi mi e poti pakisei. Mi e meke moiti fu sabi a tongo bun, den sani di mi e leisi nai doo mi ati. Neen meke, mi e meke ten fu sutudeli Beibel anga den buku fu u, aini mi mamabee tongo.”

MEKE MOITI FU YEEPI I PIKIN

14. San mma anga dda mu du? Saide den mu du a sani ya?

14 Mma anga dda mu meke moiti fu a waaleiti doo den pikin ati. Wan baala den e kai Serge anga en uman Muriel, yeepi moo enke dii yali a wan kemeente di e taki wan taa tongo. Den be kon si taki a boi fu den di abi 17 yali, á be e piisii te a be e go a peleikiwooko anga komakandaa. Muriel taki: „A boi fu u be lobi peleiki aini Faansi, en mamabee tongo. Ma fu di a á be poi taki a taa tongo, meke a be e buuse a peleikiwooko.” Serge taki: „Di u si taki a  sani ya be e tapu a boi fu u fu go a fesi, neen u foloisi go a u kemeente baka.”

Meke moiti fu a waaleiti doo i pikin ati (Luku paragraaf 14 anga 15)

15. (a) San o yeepi mma anga dda fu sabi efu den mu foloisi go a wan taa kemeente? (b) Sowtu taanga-sikin Deitolonomi 6:5-7 e gi mma anga dda?

15 San sa yeepi mma anga dda fu sabi efu den mu foloisi go na a kemeente di e taki a tongo di den pikin fu den e moo fusutan? Den mu luku efu den poi efuso efu den abi ten fu yeepi den pikin fu lobi Yehofa, anga fu leli den taki wan taa tongo na aseefi yuu. Dati na a fosi sani di den mu du. Du fu tu, den mu luku efu den pikin wani peleiki aini a taa tongo efuso go a komakandaa na a nyun kemeente di den go. Den mu luku efu den pikin wani tan na a kemeente tu. A den sani ya mma anga dda mu luku efu den wani sabi efu den mu foloisi go a wan kemeente di e taki a tongo di den pikin e fusutan bun. Baka te den pikin biibi moo taanga, da mma anga dda sa luku efu den sa go yeepi a wan kemeente di e taki wan taa tongo.Leisi Deitolonomi 6:5-7.

16, 17. San e yeepi wantu osufamii fu leli den pikin fu sabi Yehofa?

16 Son mma anga dda di de aini wan kemeente di e taki wan taa  tongo, fende wan fasi fu leli den pikin fu den fu Yehofa, aini den mamabee tongo. Wan baala den e kai Charles abi dii umanpikin di abi 9 te anga 13 yali. Den de aini wan kemeente di e taki Lingalatongo. A taki: „Wi e sutudeli aini u mamabee tongo. Aini u mamabee tongo wi e holi a Osufamii Anbegi tu. Ma wi e meke ten fu leli a Lingalatongo tu. Son leisi wi e pee aini a tongo ya. A so wi e leli a tongo ya anga piisii.”

Meke moiti fu sabi a tongo di a kemeente fi i e taki anga fu gi piki (Luku paragraaf 16 anga 17)

17 Wan baala den e kai Kevin, abi tu umanpikin. Wan fu den abi feifi yali, a taawan abi aitin yali. Ai meke moiti fu leli den umanpikin fi en, bika den nai kaba fusutan a tongo di den e taki aini a kemeente. A baala ya taki: „Mi anga mi uman e sutudeli anga den tu umanpikin fu u aini Faansi, den mamabee tongo. Wi e meke moiti fu go a wan kemeente di e taki Faansi wan leisi aini wan mun. Te u go a fakansi, wi e go a kemeente di e taki Faansi tu.”

18. (a) Fa Romesama 15:1, 2 sa yeepi mma anga dda fu sabi san den mu du? (b) San wantu mma anga dda taki? (Luku a pisi: Ete wan pelensipali sani.)

18 Ala osufamii mu luku san o yeepi den pikin fu dini Yehofa. [2] (Luku a pisi: Ete wan pelensipali sani.) (Galasiyasama 6:5) Muriel taki, winsi fa en anga en man be wani yeepi na a kemeente di e taki wan taa tongo, tokuso den foloisi fu di den be wani yeepi a boi fu den fu lobi Yehofa. (Leisi Romesama 15:1, 2.) Nownow Serge e fusutan taki a wan bun sani den du. A taki: „Di u foloisi go na a Faansi kemeente baka, a boi fu u go a fesi te a dopu. A toon wan kowownu pionili. Nownow a wani go yeepi a wan kemeente di e taki wan taa tongo!”

MEKE A WOWTU FU GADU DOO YU ATI

19, 20. Fa u sa soi taki u lobi Gadu Wowtu?

19 Yehofa lobi ala sama. A meke a Beibel aini omen tongo fu di a wani „ala sowtu sama” sabi a waaleiti (1 Timotiyesi 2:4). A sabi taki wi anga en o toon mati efu wi e leisi a Beibel aini a tongo di wi e moo fusutan.

20 Ala u mu meke moiti fu wi anga Yehofa á poli. Wi o man du a sani ya, te wi e sutudeli Beibel aini a tongo di wi e fusutan bun. Wi o poi yeepi wi osufamii fu taanga den biibi tu. Wi e soi tu taki u lobi a Wowtu fu Gadu.Psalm 119:11.

^ [1] (paragraaf 5) Son wan fu den nen aini a artikel ya kengi.

^ [2] (paragraaf 18) Efi i wani sabi fa i sa yeepi i pikin, luku a artikel di den e kai „Fa fu kweki pikin na ini wan tra kondre—Den problema nanga den blesi” di de aini A Waktitoren fu 15 oktober 2002.