Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  oktober 2016

Soi taki yu e biibi den sani di Yehofa paamisi u

Soi taki yu e biibi den sani di Yehofa paamisi u

„Biibi a te wan sama abi a fitoow taki den sani di ai howpu, o kon tuu.”HEBREWSAMA 11:1.

SINGI: 54, 125

1. Fa u mu si a biibi di wi e biibi?

A NÁ ala sama e biibi (2 Tesalonika 3:2). Ma Yehofa e yeepi ala den sama di e dini en fu taanga den biibi (Romesama 12:3; Galasiyasama 5:22). Ai bigi gi u taki Yehofa yeepi u fu u biibi taanga.

2, 3. (a) Sowtu wini wi e fende fu di wi e biibi? (b) Sowtu akisi wi o luku?

2 Yehofa meke en Manpikin Yesesi dede gi u. A taki a o gi ala den sama di e biibi Yesesi, paadon fu den sondu. A dede fu Yesesi e gi libisama a okasi fu toon Yehofa mati anga fu libi fu teego (Yohanisi 6:44, 65; Romesama 6:23). Yehofa abi tyali-ati tuutuu. Wi a sondu sama, neen meke a dede u be mu dede, ma toku Yehofa si taki u poi du bun sani (Psalm 103:10). A yeepi u fu sabi san na a bun nyunsu di abi fu du anga Yesesi. A soi u tu san a dede fi en wani taki. Di u bigin biibi Yesesi, u bigin waka neen baka. Fanafu den ten de neen wi e angii  fu libi fu teego!Leisi 1 Yohanisi 4:9, 10.

3 Ma san a wantu taa sani di u mu sabi fu biibi? A te wan sama sabi san Gadu o du gi en aini a ten di e kon, da dati wani taki ai biibi? On ten u sa taki wan sama e biibi tuutuu?

’BIIBI AINI YU ATI’

4. Fa wan sama di e biibi mu tyai enseefi?

4 A ná te u sabi san Yehofa anga Yesesi o du gi u, da dati wani taki wi e biibi, ma u mu meke moiti fu libi enke fa den soi u tu. Apostel Pawlesi taki: „Efu yu e taigi sama anga mofu a publiki taki Yesesi a Masaa, neen yu e biibi aini yu ati taki Gadu weki en puu a dede, da yu o fende a libi. Bika anga a ati wan sama e biibi, fu Gadu sa si en enke bun sama. Ma anga mofu wan sama e soi a publiki taki a abi biibi di o meke a kon fii.”Romesama 10:9, 10; 2 Korentesama 4:13.

5. Saide biibi pelensipali? Gi wan ageisitoli di e soi san u mu du fu u biibi taanga?

5 Efu u wani libi fu teego aini a nyun goontapu fu Gadu, u biibi mu taanga. Biibi de enke wan boomiki. Efu u wani a goo bun, u mu e nati en. Ma efu u nai nati en, a o dede. A so u mu meke moiti fu solugu a biibi fu u bun, da u ’biibi o taanga’.Titesi 2:2; 2 Tesalonikasama 1:3; Lukasi 22:32; Hebrewsama 3:12.

BEIBEL E SOI SAN A BIIBI

6. San a den tu sani di Hebrewsama 11:1 taki fu biibi?

6 Hebrewsama 11:1 e soi san a biibi. (Leisi.) (1) Biibi „a te wan sama abi a fitoow taki den sani di ai howpu, o kon tuu”. Wantu fu den sani di wi e howpu a den sani di Gadu paamisi u. Wan fu den sani ya, na a biibi di wi e biibi taki ogii ná o de moo. Wi e biibi tu taki wan nyun goontapu o kon. (2) Biibi „a te wan sama abi buweisi taki den sani di á nai si, de tuutuu”. U sabi taki Yehofa Gadu, Yesesi Kelestesi, den engel anga a Kownukondee a hemel de tuutuu, winsi u nai si den (Hebrewsama 11:3). Fa u sa soi taki wi e biibi den sani di Gadu paamisi u, winsi fa u nai si den? Na a fasi fa wi e tyai useefi, den sani di wi e taki anga den sani di wi e du.

7. Fa a toli fu Nowa e yeepi u fu fusutan san biibi wani taki? (Luku a fowtow na a bigin.)

7 San wi e leli fu a biibi fu Nowa? Apostel Pawlesi: „A di Nowa be e biibi, meke a soi taki a be e lesipeki Gadu. A meke wan ark fu kibii en osufamii di Gadu wasikoi en gi wan sani di a á be si ete” (Hebrewsama 11:7). A di Nowa be e biibi san Yehofa be taigi en meke a meke wan gaan ark. Kande den sama di be e tan koosube fi en be e akisi en saide a be e meke a ark. Nowa á be e de pii. Beibel taki, Nowa a be wan „peleikiman fu leti-du” (2 Peitilisi 2:5). A wasikoi sama taki Gadu be o kii den ogii sama anga wan fuudu. Kande a taigi den pilisisi san Yehofa be taigi en: „Mi o kii ala sama bika den meke a goontapu kon lai anga soso ogii.” A be taigi en tu taki: „Mi o meke wan gaan fuudu sungu  a hii goontapu, fu kii ala sani di e libi a goontapu. Ala den sani di e libi a goontapu o dede.” Kande Nowa taigi den sama san den mu du tu fu tan a libi. Yehofa taki: „I mu go aini a ark.”Genesesi 6:13, 17, 18.

8. San Yakowbesi taki fu biibi?

8 Yakowbesi taki fu biibi tu. A gei a baka di Pawlesi sikiifi a Beibel buku Hebrewsama, neen Yakowbesi sikiifi taki: „Soi mi taki yu e biibi sondee fu du wan sani, da mi o du sani soi i taki mi e biibi” (Yakowbesi 2:18). Yakowbesi taki a ná te wan sama sabi sani namo, da ai biibi. Bika den ogii yeye sabi taki Gadu de, ma den nai biibi Yehofa. A moiti den e meke fu sani á waka enke fa Yehofa wani (Yakowbesi 2:19, 20). Wan sama di e biibi, e du sani di e meke Gadu piisii. Na a sani ya Abalaham be e du. Yakowbesi taki: „U dda Abalaham be gi en manpikin Isaki enke ofaandi a wan altari. Di a du a sani ya, neen Gadu kai en wan leti-ati sama, ná so noh? Yu e si taki a ná biibi namo a be e biibi, ma a be e du sani tu fu soi taki ai biibi.” Baka dati Yakowbesi taki a ná abi nawan wini te wan sama nai du sani fu soi taki ai biibi. A taki: „Leti enke fa a sikin fu wan sama dede te a nai boo moo, a leti so a biibi fu wan sama dede tu te a nai du san ai biibi.”Yakowbesi 2:21-23, 26.

9, 10. San a wani taki fu soi taki yu e biibi a Manpikin?

9 Baka 30 yali, neen Yohanisi sikiifi den Beibel buku: Yohanisi, 1 Yohanisi, 2 Yohanisi anga 3 Yohanisi. Leti enke den taa man di sikiifi Beibel, a so Yohanisi be sabi san biibi wani taki. A omen leisi a sikiifi wan Giiki wowtu di e soi saide biibi de taanga fanowdu.

Wi e biibi a Manpikin te wi e aliki Yesesi

10 Yohanisi be sikiifi taki: „A sama di e biibi a manpikin fu Gadu, o libi fu teego. A sama di nai aliki a manpikin ná o fende a libi, ma Gadu o puu boon ati neen” (Yohanisi 3:36). Efu wi e biibi Yesesi, da u mu du san a taki. Den tekisi di Yohanisi sikiifi e soi taki a omen leisi Yesesi taki, efu wan sama wani libi fu teego, a mu soi taki ai biibi en anga en Dda.Yohanisi 3:16; 6:29, 40; 11:25, 26; 14:1, 12.

11. Fa u sa soi taki ai bigi gi u taki Yehofa yeepi u fu sabi a waaleiti?

11 Yehofa e yeepi u anga en santa yeye fu sabi en anga en Manpikin. Ai yeepi u fu biibi en anga en manpikin tu (Leisi Lukasi 10:21.) Fa u sa soi taki den sani di Yehofa du gi u, e bigi gi u? U mu e gi en daa naamo fu di a gi wi a okasi fu wi anga en toon mati. A Yesesi, „a Moo Pelensipali Fesiman fu a biibi fu wi” a koboloiki fu du a sani ya (Hebrewsama 12:2). U mu e meke moiti fu taanga u biibi. U mu begi Yehofa fu a yeepi u. Boiti dati u  mu e sutudeli en Wowtu tu.Efeisesama 6:18; 1 Peitilisi 2:2.

Paati a bun nyunsu na ala peesi fu soi taki yu e biibi (Luku paragraaf 12)

12. Fa u sa soi taki wi e biibi?

12 U mu e du sani fu soi taki wi e biibi Yehofa anga u hii ati. Wi e peleiki a bun nyunsu, fu yeepi sama fu waka a Yesesi baka. Boiti dati wi e „du bun gi taawan, moomoo den sama di wi anga den de na aseefi biibi” (Galasiyasama 6:10). U mu meke moiti fu „kengi a fasi fa u be de fosi. U mu tapu anga den sani di u be e du” tu. A sani ya o yeepi u fu wi anga Yehofa á poli.Kolosesama 3:5, 8-10.

A PELENSIPALI FU BIIBI GADU

13. Saide u mu „biibi Gadu”? San Beibel e taki fu biibi?

13 Beibel taki: „Sondee biibi wan sama á poi meke Gadu piisii. Bika wan sama di e dini Gadu mu biibi taki a de tuutuu. A mu biibi tu taki ai pai den sama di e suku en anga den hii ati” (Hebrewsama 11:6). Beibel e soi taki wan tuutuu Kelesten mu e ’biibi Gadu’. Wan sama á poi kai enseefi Kelesten efu a nai biibi (Hebrewsama 6:1). Ma boiti biibi, u mu meke moiti fu abi taa fasi di o yeepi u fu toon Yehofa mati.Leisi 2 Peitilisi 1:5-7; Yudasi 20, 21.

14, 15. San wi e si, te u maiki lobi anga biibi?

14 Den sama di sikiifi Beibel taki fu biibi moo den taa fasi di wan Kelesten mu abi. Ma a sani ya wani taki, a biibi na a moo pelensipali sani gi wan Kelesten?

15 Pawlesi be maiki biibi anga lobi. A sikiifi taki: „Winsi mi biibi taanga te mi e puu gaan mongo poti a wan taa peesi, neen mi á lobi taawan, da a fu soso. Mi ná abi nawan wini” (1 Korentesama 13:2). Yesesi taki „a moo gaan weiti” na a lobi di u mu lobi Gadu (Mateyesi 22:35-40). Lobi e yeepi u fu abi omen taa moin fasi di Gadu lobi. Beibel taki lobi e „biibi ala sani”. A sani ya e soi taki lobi e yeepi u fu biibi ala den sani di Gadu sikiifi aini Beibel.1 Korentesama 13:4, 7.

16, 17. San Beibel e taki fu biibi anga lobi? Sowtu wan fu den moo pelensipali? Saide a moo pelensipali?

 16 Biibi anga lobi a tu pelensipali sani. Son leisi te den man di sikiifi Beibel be e taki fu biibi, den be e taki fu lobi tu. Pawlesi be taigi den baala anga sisa taki: „Meke a biibi anga a lobi di wi abi, de enke wan sani di u wei fu kibii u boo fu ati” (1 Tesalonikasama 5:8). Peitilisi be taki fu Yesesi taki: „Noiti wi á si en, ma tokuso u lobi en. Anga ala fa u nai si en nownow, tokuso wi e biibi en” (1 Peitilisi 1:8). Yakowbesi be akisi den salufu baala anga sisa fi en taki: „Gadu be teke den sama di goontapu e si fu pootiman, neen a meke den toon gudu sama fu di den e biibi. A meke den fende a Kownukondee di a paamisi den sama di lobi en, na so noh?” (Yakowbesi 2:5). Yohanisi sikiifi taki: „Gadu taigi u taki u mu biibi aini a nen fi en Manpikin Yesesi Kelestesi. A taki u mu lobi useefi.”1 Yohanisi 3:23.

17 Pawlesi be sikiifi taki: „Ma a den dii sani ya o tan: biibi, howpu, anga lobi. Ma a moo gaanwan fu ala den, a lobi” (1 Korentesama 13:13). Aini a ten di e kon, a ná o de fanowdu fu biibi den sani di Yehofa paamisi u fu a nyun goontapu moo, bika ala den sani de o pasa. Wi o fende a switi libi di Gadu paamisi u. Ma a fu teego u mu soi taki u lobi Gadu anga a foluku fi en.

YEHOFA BELESI A BIIBI FU U

18, 19. Sowtu wini a foluku fu Gadu e fende fu di den e biibi en? Sama u mu gafa gi a sani ya?

18 Aini a ten ya, a foluku fu Yehofa e biibi a Kownukondee fi en. Den e holibaka gi en. Den lobi denseefi tu. Den e meke a santa yeye fu Gadu tii den, neen meke den poi du den sani ya (Galasiyasama 5:22, 23). Sowtu wini den e fende fu a biibi di den e biibi Gadu? Nownow, a moo enke aitin miliyun baala anga sisa a hii goontapu e libi na a wan aini den kemeente. A sani ya e soi taki, biibi anga lobi pelensipali.

19 A di Gadu e yeepi u meke u poi libi na a wan. Neen u mu gafa gi a sani ya (Yesaya 55:13). Ai bigi gi u taki a ’fii wi fu di wi e biibi’ (Efeisesama 2:8). Yehofa o yeepi moo sama fu biibi en, te enke a hii goontapu lai anga leti-ati sama di ná abi sondu. Den sama ya o gafa Yehofa anga piisii fu teego!