Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  november 2016

 A TOLI DI SIKIIFI A FESISE | SAMA E TAN A HEMEL?

Wantu fisyun di e soi sama e tan a hemel

Wantu fisyun di e soi sama e tan a hemel

Beibel e taki fu wantu man di be si fisyun di e soi fa hemel tan. Te u leisi den toli ya, da wi e fusutan pikinso fa hemel tan. Winsi fa a ná ala den sani di den si aini den fisyun de so tuutuu, tokuso den toli ya o yeepi i fu fusutan, sama e tan a hemel. Boiti dati, yu o si sowtu wini yu o fende fu den toli ya.

YEHOFA A MOO HEIWAN FU HII GOONTAPU

„Baka dati santa yeye kon a mi, neen mi si wan kownusutuu di be de neen peesi a hemel. Wan sama be sidon na a kownusutuu. A sama di be sidon neen, be gei wan yaspis-siton anga wan moin lebi siton. Wan mutyama be lontu a kownusutuu. A mutyama be e gei smaragd-siton.”Openbaring 4:2, 3.

„Wan kiin faya be lontu en. A faya ya be gei wan mutyama di sama e si a den woluku te wan gaan alen kai. A be gei a gendee fasi fu Yehofa.”Eseikiyeli 1:27, 28.

Den fisyun di apostel Yohanisi anga Eseikiyeli be si, e soi fa a Moo Heiwan, Yehofa Gadu gendee. Den sani di den si, a sani di u sabi. Den si moin siton, mutyama, anga wan gendee kownusutuu. Den sani ya e soi taki a peesi pe Yehofa de, moin fu toko, ai gi sama piisii. Ala sani e go bun anda.

Den sani di den man ya si e kai anga san a psalm sikiifiman be sikiifi: „Bika Yehofa bigi, ala sama mu gafa en. En na a Gadu di sama mu lesipeki moo den taa gadu. Bika ala den gadu fu den foluku, ná abi wini. Ma a Yehofa meke hemel. Neen na a Gadu di sama e moo gafa. Ná pikin gendee a gendee. Kaakiti anga piisii de na a santa peesi fi en.”Psalm 96:4-6.

Anga ala fa Yehofa na a Moo Heiwan, tokuso a wani u taki anga en. A paamisi u taki a o aliki u te u begi en (Psalm 65:2). Gadu lobi u, ai booko en ede anga u tuutuu. Neen meke a apostel Yohanisi be sikiifi taki: „Gadu a lobi.”1 Yohanis 4:8.

YESESI DE A GADU LETI-ANA

Sitefanesi be abi santa yeye, neen a luku go a hemel, neen a si fa Gadu gendee. A be si fa Yesesi taampu a Gadu leti-ana tu. Neen a taki: ’Luku, mi e si fa hemel opo. Mi e si fa a Manpikin fu libisama taampu a Gadu leti-ana.’”Toli 7:55, 56.

Fosi Sitefanesi si a fisyun, den fesiman fu den Dyu be meke den kii Yesesi. Anga den man ya Sitefanesi be e taki. A fisyun di Sitefanesi si be e soi kiin taki Yesesi be de a libi. A be e soi tu taki di a weki baka, neen Gadu hei en. Apostel Pawlesi be taki a toli ya di a sikiifi taki: „[Yehofa] weki [Yesesi] puu a dede, neen a meke a sidon neen leti-ana a hemel. A hei Kelestesi moo ala den tiimakiti, den makiti, den kaakiti anga ala den bigiman fu kondee. Gadu gi en wan nen di hei moo ala taa nen, den du fu a ten ya, anga den du fu a ten di e kon.”Efeisesama 1:20, 21.

Boiti taki Beibel e taki fu a makiti fu Yesesi, ai soi u tu taki leti enke Yehofa, Yesesi e booko en  ede anga libisama. Di a be de a goontapu, a deesi siki sama. A be weki dedesama tu. A dede di a dede gi libisama, e soi u taki a lobi Gadu anga libisama (Efeisesama 2:4, 5). Yesesi taampu a Gadu leti-ana. Dyonson a o koboloiki a kaakiti fi en fu tyai wini gi ala den sama di e libi enke fa Gadu wani.

DEN ENGEL E WOOKO GI GADU

„Mi [polofeiti Daniyeli] be e luku, te enke den sete kownusutuu. Neen a Gaandiwan fu senten [Yehofa] go sidon. . . . Wan dunsu toon wan dunsu engel be e dini en, anga tin dunsu toon tin dunsu engel be taampu neen fesi.”Daniyeli 7:9, 10.

A ná wan kodo engel Daniyeli si aini a fisyun. Daniyeli be musu foondoo di a si a fisyun ya! Engel a yeye di koni. A ná pikin taanga den taanga. Den e kai son wan fu den Seraf-engel, taawan den e kai Kerub-engel. Beibel e taki moo enke 250 leisi fu engel.

Engel a ná libisama di be e tan a goontapu fosi. Di Gadu meke den, a baka omen ten fosi a meke libisama. Di Gadu be e meke goontapu, den engel be e si. Ala den be e piisii. Den be e gafa Gadu.Yopu 38:4-7.

Wan fu den wooko di den engel e du gi Gadu, na a paati di den e paati a bun nyunsu fu Gadu Kownukondee. A dati na a moo pelensipali wooko di e du a goontapu (Mateyesi 24:14). Apostel Yohanisi be si aini wan fisyun fa den engel e holi baka gi a wooko ya. A be sikiifi taki: „Neen mi si wan taa engel e fee a tapu. A be e paati teego bun nyunsu gi den sama di e tan a goontapu. Sama fu ala nasi, lo anga tongo” (Openbaring 14:6). Anga ala fa engel nai taki anga sama aini a ten ya, tokuso den e tii den sama di e paati a bun nyunsu gi den bun-ati sama.

SAATAN E KOLI MILIYUNMILIYUN SAMA

„Neen wan feti bigin a hemel. Mikayeli anga den engel fi en be e feti anga a gaan kaiman. A gaan kaiman anga den engel fi en be e feti anga den tu. Ma a gaan kaiman á wini a feti. Peesi á be de gi en a hemel moo tu. Neen meke den fiingi a gaan kaiman go a  goontapu. Neen na a fosi sineki, di den e kai Didibii anga Saatan. Ai koli sama a hii goontapu. Den fiingi en go a goontapu. Den fiingi den engel fi en go a goontapu tu.”Openbaring 12:7-9.

A ná ala yuu sani be e go bun a hemel. Di Gadu be meke libisama na a bigin, neen wan engel be wani sama dini en namonamo. Na a sani de meke a bigin sitee anga Yehofa. A so a toon Saatan. A wowtu Saatan wani taki „wan sama e sitee anga wan taawan”. Taa engel holibaka gi Saatan, neen den toon ogii yeye. Ná pikin ogii den yeye ya ogii. Den nai du san Yehofa taki. Den e meke gaanse sama taangayesi Yehofa tu.

Saatan anga den ogii yeye fi en á bun, den abi ogii-ati. Den e buuse libisama. Boiti dati, den e meke omen sama e pina a goontapu. Pakisei a toli fu Yopu. Saatan kii den meti fu Yopu. A kii den futuboi fi en. Boiti dati, a kii ala den tin pikin fu Yopu. A meke „wan gaan winta” booko a osu towe a den tapu. Baka dati a meke „gaan soo„ kisi Yopu „fi en bee futu te neen mindii ede.”Yopu 1:7-19; 2:7.

Dyonson Saatan ná o de moo. Fanafu di den fiingi en kon a goontapu, „a sabi taki a ná abi langa moo” (Openbaring 12:12). Saatan o kaba a soso. A sani de a wan bun nyunsu tuutuu!

DEN SAMA DI GO TAN A HEMEL

„Anga i [Yesesi] buulu i bai sama fu ala lo, tongo, nasi anga kondee gi Gadu. A yu meke den toon wan kownukondee. I meke den toon pilisite gi u Gadu tu. Den o tii goontapu enke kownu.”Openbaring 5:9, 10.

Leti enke fa Yesesi be go a hemel di a kon a libi baka, a leti so son sama e go a hemel te den weki baka tu. Yesesi be taigi den apostel fi en taki: „Mi o go seeka wan peesi gi u, da mi o kon baka fu tyai u go a mi osu, da wi o de a pe mi de.”Yohanisi 14:2, 3.

A ná fu soso sama e go a hemel. Den anga Yesesi o de aini a Kownukondee di o tii a hii goontapu ya. A den o meke sani waka bun gi den sama di o tan a goontapu. Na a Kownukondee ya Yesesi be taigi den bakaman fi en fu begi gi. Den be mu begi taki: „U Dda di de a hemel, i nen mu santa. A Kownukondee fi i mu kon. Meke sani waka enke fa i wani a goontapu, enke fa sani e waka a hemel.”Mateyesi 6:9, 10.

SAN DEN SAMA DI GO A HEMEL O DU?

„Neen mi [a apostel Yohanisi] yee wan taanga siten bali komoto na a kownusutuu taki: ’Luku, a tenti fu Gadu kon de a pe libisama de . . . A o dee den wataa ain fu den. Da dede, tyali, kee anga pen ná o de moo. Bika den fositen sani pasa gwe kaba.’”Openbaring 21:3, 4.

A fisyun ya e soi go na a ten te Gadu Kownukondee, o puu Saatan a pasi. A Kownukondee o meke a goontapu ya toon wan paladeisi. A Yesesi anga den sama di go tan a hemel, o tii a Kownukondee ya. Ala den sani di be e pina libisama ná o de moo. Dede seefi ná o de moo.

Fa fu den miliyunmiliyun sama di dede, di ná o go tan a hemel? Bakaten, den o kon a libi baka. Den o abi a okasi fu libi fu teego na a Paladeisi di o de a goontapu ya.Lukasi 23:43.

Ala den fisyun ya e soi taki Yehofa Gadu, en manpikin Yesesi Kelestesi, den engel di e dini Yehofa, anga den sama di o go tan a hemel, e booko den ede anga libisama. Den wani sani waka bun anga u. Efi i wani sabi finifini san den o du gi libisama, da wi e gi i taanga-sikin fu taki anga den Yehofa Kotoigi. I sa go na a website fu u tu www.jw.org/srn, da i download a buku San Bijbel e leri wi trutru?