Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  november 2016

Yehofa puu wi aini falisi biibi

Yehofa puu wi aini falisi biibi

„Mi foluku, u komoto de.”OPENBARING 18:4.

SINGI: 101, 93

1. Fa u du sabi taki a foluku fu Gadu be o komoto a katibo? Sowtu akisi wi o luku?

AINI a artikel a fesi, u be si taki den tuu Kelesten be de a katibo, bika a Gaan Babilon be e tapu den fu fusutan den tuu leli fu Beibel. Ma den á be o tan a katibo fu teego. U sabi a sani ya, bika Gadu be taigi en foluku taki den mu „komoto” aini den falisi biibi di de a hii goontapu. (Leisi Openbaring 18:4.) A sani ya e soi taki tuu Kelesten be o fii. Wi e angii fu sabi on ten den fii! Ma fosi u luku a pisi toli de, wi o taki fu den akisi ya: Fa den Beibel Ondoosukuman soi taki fosi 1914 seefi, den á be wani mumui anga a Gaan Babilon? Sowtu moiti den baala anga sisa be e meke fu peleiki na a ten fu a Fosi Goontapu Feti? A sitaafu Gadu be e sitaafu a foluku fi en di den be de a katibo a ten de, fu leli den wan sani?

„BABILON KAI”

2. San den Beibel Ondoosukuman be e du fosi a Fosi Goontapu Feti?

2 Omen yali fosi a Fosi Goontapu Feti (1914-1918), Charles Taze Russell anga wantu taa sama di be e ondoosuku Beibel, kon fusutan taki den Kelesten keliki á be e leli sama san  sikiifi aini Beibel. Neen meke den á be wani mumui anga den falisi biibi ya. Aini a yali 1879, den be sikiifi aini A Wakititolen (Zion’s Watch Tower) taki ala den Kelesten keliki di e holibaka gi den tiiman fu kondee, a wan pisi fu a Gaan Babilon. Beibel e kai a Gaan Babilon wan motyo uman.Leisi Openbaring 17:1, 2.

3. San den Beibel Ondoosukuman du fu soi taki den á be de aini falisi keliki moo? (Luku a fowtow na a bigin.)

3 Den sama di be wani dini Gadu anga den hii ati, be sabi taki Gadu ná o belesi den, efu den e holibaka gi falisi biibi. Neen meke a omen fu den sende biifi gi den keliki, fu piki den taki den ná o go na a keliki de moo. Son wan fu den leisi a biifi gi a keliki. Ma a ná ala peesi den be poi du a sani ya, neen meke son wan fu den sende a biifi gi ala den sama fu a keliki. Den Beibel Ondoosukuman soi kiin taki den á be e holibaka gi falisi biibi! A sani ya be sa tyai dede gi den. Ma aini a yali 1870, lanti á be e holibaka gi den keliki moo enke fosi. A omen kondee a sani ya be e pasa. Sama be sa taki fu Beibel sondee taawan du ogii anga den. Den á be e feele moo fu soi den keliki fesiman fa den e denki fu son toli fu Beibel.

4. Fa den Beibel Ondoosukuman be e si a Gaan Babilon na a ten fu a Fosi Goontapu Feti?

4 Den Beibel Ondoosukuman be fusutan taki a ná den famii, mati anga den sama fu a keliki pe den be e go namo be mu sabi taki den nai holibaka gi falisi biibi moo. Den be wani a hii goontapu sabi taki a Gaan Babilon a wan motyo uman, bika a be e wooko makandaa anga den tiiman. Neen meke den Beibel Ondoosukuman paati 10 miliyun talakitaati na a pisiten fu december 1917 te anga bigin fu 1918. Wan artikel di den e kai „Babilon kai” be de aini a talakitaati ya. A talakitaati ya be e soi kiin sowtu ogii den Kelesten keliki be e du. A sani ya be meke den keliki fesiman ati boon! Ma den Beibel Ondoosukuman á be e feele. Den go doo anga a peleiki di den be e peleiki, bika den be wani „aliki Gadu moo libisama” (Toli 5:29). San a sani ya e soi u? Ai soi taki den Beibel Ondoosukuman á be toon saafu fu a Gaan Babilon na a ten fu a Fosi Goontapu Feti, ma a komoto den be e komoto aini falisi biibi. Den be e yeepi taa sama fu du aseefi sani tu.

DEN PELEIKI FAYAFAYA NA A TEN FU A FOSI GOONTAPU FETI

5. Saide u sa taki den baala anga sisa be e peleiki fayafaya na a ten fu a Fosi Goontapu Feti?

5 Fosi, u be e denki taki Gadu á be e holibaka gi en foluku na a ten fu a Fosi Goontapu Feti, fu di den á be e peleiki fayafaya. U be e si enke a fu a sani ya ede Gadu be meke a Gaan Babilon poti den a katibo fu wan pisiten. Ma baala anga sisa di be e dini Yehofa na a pisiten fu 1914 te anga 1918, taki a foluku fu Gadu be e du ala san den poi fu peleiki a pisiten de. Den sani di miti den Beibel Ondoosukuman a ten de, yeepi u fu fusutan son sani di sikiifi aini Beibel moo bun.

6, 7. (a) San be e miti den Beibel Ondoosukuman aini a ten fu a Fosi Goontapu Feti? (b) San e soi taki den Beibel Ondoosukuman be de fayafaya?

6 U kon si taki den Beibel Ondoosukuman be e peleiki fayafaya a ten fu a Fosi Goontapu Feti. Ma a omen sani be e meke a taanga gi den fu peleiki. Meke u luku tu fu den sani de. Wan fu den sani, a taki den Beibel Ondoosukuman á be sabi fa den mu leli sama anga a Beibel  wawan. A buku den be gwenti paati, da te a sama be leisi a buku, a be e kon sabi a waaleiti. Neen meke di lanti á be wani den paati a buku di den e kai The Finished Mystery aini 1918, a be taanga gi omen baala anga sisa fu peleiki. A taa sani di be meke a taanga gi den fu peleiki, na a Spaanse griep (Sipanyoo feba) di be de a pisiten de. A takuu siki ya be e kisi sama makiliki, neen meke den á be poi go peleiki na ala peesi. Ma tokuso, den Beibel Ondoosukuman be e meke moiti fu du a peleikiwooko.

Den Beibel Ondoosukuman ya be e wooko fayafaya! (Luku paragraaf 6, 7)

7 Aini a yali 1914, wan pikin kulu Beibel Ondoosukuman be meke a felon di den e kai „Photo Drama of Creation” (A fowtow dalaama di e soi fa Gadu meke sani). A felon ya a be gaan sani a ten de, bika a ten de felon á be de di e soi fa sama e waka efuso e taki. Felon á be de ete pe i be e yee san den sama e taki tu. A dalaama ya, be e soi fa sani waka fanafu a ten fu Adan te enke a kaba fu a dunsu yali di Yesesi o tii Goontapu. A moo enke 9 miliyun sama si a felon ya. Den sama di luku a felon ya aini 1914, ipi moo ala den Yehofa Kotoigi di de a goontapu nownow. Aini a yali 1916, a moo enke 809.000 sama be e go a komakandaa na Ameekankondee. Ma aini a yali 1918 a 950.000 sama be e go a den komakandaa. Den sani ya e soi taki den Beibel Ondoosukuman be e peleiki fayafaya.

8. Fa den baala di be e teke fesi, gi den Beibel Ondoosukuman taanga-sikin na a ten fu a Fosi Goontapu Feti?

8 Den baala di be e teke fesi be e du san den poi fu meke buku na a ten fu a Fosi Goontapu Feti. Den be e gi den Beibel Ondoosukuman taanga-sikin tu. A den sani ya yeepi den fu go doo anga a peleikiwooko. Richard H. Barber a wan fu den baala di be e peleiki fayafaya a ten de. A taki: „Winsi fa sani á be makiliki,  tokuso u be poi sende wantu kelen-owluman go luku den kemeente. Boiti dati, u be e paati A Wakititolen na ala se. U be poi sende en go a Kanada tu, winsi fa lanti be tapu a wooko anda. Mi be abi a gaandi fu sende wantu pikinwan fu a buku di den e kai The Finished Mystery gi wantu mati fu mi, fu di lanti be teke den buku fu den. Baala Rutherford be akisi u fu u seeka wan konkelesi a wantu foto fu Ameekankondee. A be sende baala kon tu fu gi den baala anga sisa taanga-sikin.”

DEN BE MU DU SON SANI TAA FASI

9. (a) Saide a foluku fu Gadu be mu kengi a fasi fa den be e si son sani na a pisiten fu 1914 te anga 1919? (b) San wi á mu pakisei, winsi fa den á be e kaba fusutan son sani?

9 Den Beibel Ondoosukuman be mu kengi a fasi fa den be e si son sani. Den á be kaba fusutan san a wani taki fu aliki den tiiman (Romesama 13:1). Neen meke gaanse fu den be e holibaka gi a feti. Di a peleisidenti fu Ameekankondee be gi sama taanga-sikin fu begi na a 30 mei 1918 fu sani go bun, neen A Wakititolen be gi den Beibel Ondoosukuman taanga-sikin fu begi tu. Son baala anga sisa be e gi moni fu holibaka gi a feti. Son wan toon suudati, neen den go aini a feti. Ma winsi fa den á be e fusutan son sani a ten de, wi á mu denki taki a fu a sani ya ede Gadu be meke den toon saafu fu a Gaan Babilon. Bika a ten fu a Fosi Goontapu Feti, den be fika gaanse fu den gwenti fu den falisi biibi kaba.Leisi Lukasi 12:47, 48.

10. Fa den Beibel Ondoosukuman soi taki den be e lesipeki a libi?

10 Winsi fa den Beibel Ondoosukuman á be e kaba fusutan taki den á mu holibaka gi feti, tokuso den be sabi taki a á bun fu kii sama. Neen meke den baala di toon suudati na a ten fu a Fosi Goontapu Feti á kii nawan sama, winsi fa den be e tyai goni. Na a sani de meke den be e sende son baala go na a pisi pe a feti be moo simpan fu den be sa dede.

11. San lanti du di den Beibel Ondoosukuman á be wani feti gi den kondee?

11 Didibii ati boon di a si taki den baala á be e gwe fika Yehofa. Neen meke a „meke weiti fu du ogii” (Psalm 94:20). Wan bigiman fu suudati fu Ameekankondee di den e kai James Franklin Bell, taigi Baala Rutherford anga Van Amburgh taki lanti be e meke moiti fu meke wan nyun weiti, di be o gi den pasi fu kii ala den sama di á be wani feti gi a kondee, moomoo den Beibel Ondooosukuman. Anga boon ati a taigi Baala Rutherford taki, efu a peleisidenti á be tapu den fu meke a weiti, den be o soi den. Baka dati a taki: „Ma wi á kaba anga u, wi o si!”

12, 13. (a) Saide den be sooto aitin baala? (b) Fa u du sabi taki den baala á taangayesi Yehofa winsi fa den sooto den?

12 Lanti be fende wan fasi fu sitaafu den Beibel Ondoosukuman. Den sooto Baala Rutherford, Van Amburgh anga ete sigisi baala di be e tii a wooko fu Yehofa Kotoigi a ten de. A kuutubakaa di kuutu a sani ya be taki, den baala ya be kofaliki moo wan kulu suudati fu Doisilikondee. A taki den baala meke lanti, den suudati anga ala den keliki ati boon, neen meke den mu gi den bunbun sitaafu. [1] (Luku a pisi: Ete wan pelensipali sani.) Neen meke den leisi omen yali sitaafu gi den aitin Beibel Ondoosukuman ya, neen den sende den go a wan sitaafu-osu  a Atlanta, wan foto a Georgia. Ma di a feti kaba, den losi den. Den á tyai a toli ya go a kuutu moo.

13 Di den be de aini sitaafu osu seefi, den aitin man ya á be e feele fu holi den weiti fu Yehofa. Fa u du sabi? Den sikiifi biifi gi a peleisidenti fu Ameekankondee. Den akisi a peleisidenti fu a losi den. Den sikiifi aini a biifi taki Beibel e leli u taki wi á mu kii sama. Efu wan sama di e dini Gadu taangayesi en, da Gadu o kii a sama de. Den soi a peleisidenti taki a fu a sani ya ede den ná o kii wan taa libisama. A sani ya e soi taki den baala ya be abi deki-ati! Den á gwe fika Yehofa.

A FOLUKU FU GADU FII!

14. San pasa na a pisiten fu 1914 te anga 1919, te u luku san Beibel taki?

14 Maleyaki 3:1-3 e soi fa sani waka anga den Beibel Ondoosukuman na a pisiten fu 1914 te anga 1919. (Leisi.) Yehofa Gadu, „a tuutuu Masaa” anga Yesesi Kelestesi „a basiya fu a kuudei” kon luku „den manpikin fu Leifi”, efuso den salufu Kelesten. Yehofa be yeepi den salufu Kelesten fu fusutan son sani moo bun. A kiin den, neen a gi den wan taa wooko. Aini a yali 1919, Yesesi poti a „koni saafu di u sa fitoow”, fu tii a foluku fu Gadu (Mateyesi 24:45). A so a foluku fu Gadu á be de enke saafu fu a Gaan Babilon moo. Fanafu a ten de, den be kon sabi moo bun fa Yehofa wani den tyai denseefi. Den moo lobi Yehofa tu. A foluku fu Gadu e piisii fu si fa ai belesi den! [2]—Luku a pisi: Ete wan pelensipali sani.

15. Fa u sa soi taki ai bigi gi u taki u fii fu a Gaan Babilon?

15 Ai bigi gi u taki wi á de a katibo na a Gaan Babilon moo. Saatan á be poi poli a tuu biibi. Ma wi á mu feegete saide Yehofa fii wi. A wani ala sama fii (2 Korentesama 6:1). Ma falisi biibi e koli omen sama di e suku Gadu ete. Den abi u fanowdu. Meke u du san u poi fu waka a den salufu baala baka, da u yeepi taawan fu denseefi sa fii tu.

^ [1] (Paragraaf 12) Luku a buku Faith on the March, di A. H. Macmillan sikiifi, Bladzijde 99.

^ [2] (paragraaf 14) Te u luku san be pasa di den Dyu be de a katibo a Babilon anga san miti den Kelesten di den be de a katibo na a Gaan Babilon, da wi e si taki wantu sani be de aseefi. Ma wi á poi taki a ten di den Dyu be de a katibo a Babilon, e soi go na a ten di den Kelesten be de a katibo. Neen meke wi á mu denki taki ala den sani di miti den Dyu, a wan polofeititoli di e soi san be o miti den Kelesten. Wantu sani be de taa fasi. Den Dyu be de a katibo 70 yali, ma den Kelesten be de moo langa a katibo.