Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2017

Yeepi taa kondee sama fu „dini Yehofa anga piisii”

Yeepi taa kondee sama fu „dini Yehofa anga piisii”

„Yehofa e kibii den taa kondee sama di e tan anga a foluku fi en.”PSALM 146:9.

SINGI: 84, 73

1, 2. (a) San e miti son baala anga sisa? (b) San u mu akisi useefi?

WAN BAALA den e kai Lije taki: „Di den sama bigin kii denseefi aini Bulundi, a osufamii fu u be de a wan konkelesi. U be e si fa den sama e lon, fa den e sutu goni. Mi, mi mma, nda anga den 10 baala anga sisa fu mi be abi fu lowe. A wantu sani namo u be tyai di u lowe. Son wan fu u doo a wan fu den loweman kampu fu Malawi bakaten. U waka moo enke 1600 kilomeiti. Den taawan naki paati.”

2 Aini a ten ya a moo enke 65 miliyun sama lowe komoto a den kondee. Noiti ete so ipi sama be lowe komoto a den kondee. Son sama lowe komoto a den kondee fu di feti e feti. Taawan lowe fu di sama be e du ogii anga den. * (Luku a maiki a ondoo.) Dunsudunsu fu den sama ya, a Yehofa Kotoigi. Son wan fu den lasi den famii anga ala den gudu di den be abi. Ma boiti den sani ya, taa tesi e miti den sama ya. San e miti den? Fa u sa yeepi u baala anga u sisa fu dini Yehofa  anga piisii te den sowtu tesi ya miti den? (Psalm 100:2) San na a moo bun fasi di u sa peleiki gi den loweman di á sabi Yehofa?

A LIBI FU WAN SAMA DI LOWE KOMOTO NEEN KONDEE

3. Saide Yesesi mma anga en dda lowe go a Egepte anga en? Saide son wan fu den disipel fu Yesesi be lowe komoto a pe den be e tan?

3 Baka di wan engel taigi Yowsefu taki Herodes wani kii Yesesi, neen en anga Maliya lowe go a Egepte anga Yesesi. Den tan a Egepte te enke Herodes dede (Mateyesi 2:13, 14, 19-21). Di sama be wani du ogii anga den bakaman fu Yesesi bakaten, den „lowe go na ala se fu Yudeya anga Samaliya” (Toli 8:1). Yesesi be sabi taki a omen fu den bakaman fi en be o toon loweman. A be taki: „Te sama e du ogii anga u a wan foto, da u mu lowe go a wan taa foto” (Mateyesi 10:23). A ná abi toobi saide wan sama e lowe, noiti a makiliki fu lowe komoto a yu kondee efuso yu osu.

4, 5. Sowtu tesi e miti den sama (a) te den e lowe komoto a den osu? (b) te den de aini den loweman kampu?

4 A omen sani e miti den sama di lowe komoto a den osu anga den sama di e tan aini loweman kampu. Wan fu den pikin baala fu Lije di den e kai Gad taki: „A omen wiki u waka. U pasa omen ondoo dedesama. A pisiten de a 12 yali mi be abi. Mi futu be soopu te ná pikin sani, neen mi taigi den sama fu mi taki den sa fika mi, da den waka go doo. Ma nda á be wani fika mi gi den ogii-ati kiiman, neen meke a yeepi mi. Te u be opo a mamanten, a moiti u be e meke fu tan a libi. U be e begi da u poti ala sani aini Yehofa ana. Son leisi a manyan u be e booko a sikin pasi nyan.”Filipisama 4:12, 13.

5 Gaanse fu den famii fu Lije tan omen yali aini den loweman kampu fu Verenigde Naties (a olikanisasi di e yeepi loweman a hii goontapu). Ma a omen tesi be e miti den. Lije di e du kelen-owluman wooko nownow taki: „Gaanse sama ná abi wooko, hii dei den e taki sama sani, den e diingi sopi, den e dobel, den e fufuu. Boiti dati den e libi wan hululibi.” Fu di den Kotoigi á be wani du den sani ya, meke den be de fayafaya aini a kemeente (Hebrewsama 6:11, 12; 10:24, 25). Den á be wani den biibi swaki, neen meke den be e koboloiki den ten bun. A omen fu den bigin pionili. Den be e membee denseefi naamo taki leti enke fa den Islayelisama be komoto aini a sabana, a so wan dei o doo di den o komoto aini a loweman kampu. A sani ya yeepi den fu den á lasi den piisii.2 Korentesama 4:18.

SOI DEN BAALA ANGA SISA DI LOWE KOMOTO A DEN KONDEE TAKI I LOBI DEN

6, 7. (a) San a lobi di u lobi Gadu e gi u taanga-sikin fu du te u baala anga sisa de a nowtu? (b) Fa wantu Kotoigi yeepi den baala anga sisa?

6 Fu di u lobi Gadu, meke u mu soi den baala anga sisa fu u taki u lobi den, moomoo te sani miti den. (Leisi 1 Yohanisi 3:17, 18.) Di wan gaan angiiten be de aini Yudeya na a ten fu den fosi Kelesten, a kemeente be sete sani fu yeepi den baala anga sisa (Toli 11:28, 29). Apostel Pawlesi anga Peitilisi be gi Kelesten taanga-sikin fu soi switifasi gi makandaa tu  (Romesama 12:13; 1 Peitilisi 4:9). Efu Beibel e gi u taanga-sikin fu soi switifasi gi baala anga sisa di kon luku wi a osu efuso di kon na a kemeente, da u musu soi switifasi gi den baala anga sisa di lowe komoto a den kondee fu di tesi miti den fu den biibi ede! * (Luku a maiki a ondoo.)Leisi Odo 3:27.

7 Bakabaka ya, dunsudunsu Yehofa Kotoigi fu Ukraini be abi fu lowe komoto a den osu fu di sama be e feti a wan pisi fu a kondee. Den be e du ala sowtu ogii anga sama na a pisi de tu. A tyali taki son wan fu den Kotoigi dede. Ma den baala anga sisa fu Ukraini anga Rosiyakondee teke gaanse fu den Kotoigi di be lowe poti a osu. Den baala anga sisa fu Ukraini anga Rosiyakondee á be e mumui anga a feti, bika den nai „mumui anga a goontapu”. Ala den be e paati „a bun nyunsu fu a wowtu fu Gadu” fayafaya.Yohanisi 15:19; Toli 8:4.

YEEPI DEN LOWEMAN FU DEN BIIBI TAANGA

8, 9. (a) San e miti den sama di lowe komoto a den kondee go a wan taa kondee? (b) Saide u mu abi pasensi te wi e yeepi den?

8 Son sama di lowe komoto a den osu, abi fu tan a wan peesi di den á gwenti. Taawan abi fu go tan a wan hii taa kondee. Son leisi lanti e gi den sama ya nyanyan, koosi anga wan peesi fu tan. Ma toku son sani de enke wan tesi gi den. Son leisi den e gi den nyanyan di den á gwenti. Den sama di be e tan aini waan kondee, á sabi sowtu koosi den mu wei a den koo kondee. Son wan á sabi fa den mu wooko anga den sani di e wooko anga sitolomu.

9 Aini son kondee, lanti seeka sani fu yeepi den sama di lowe komoto a den kondee fu gwenti a nyun kondee pe den go tan. Ma baka wantu mun lanti e si enke den poi solugu denseefi kaba. Ma a sani ya á makiliki. Pakisei ala den sani di den mu leli aini wan satu pisiten. Den mu leli wan taa tongo, nyun gwenti anga nyun weiti. Den mu pai gi son sani enke wataa anga faya. Den mu pai lantimoni. Den mu sete sani gi den pikin fu den go a sikoo. Boiti dati den gaansama mu sabi san den mu holi a pakisei te den e kiya den pikin. I si enke yu o poi yeepi den baala anga sisa ya? Yu o yeepi den anga pasensi?Filipisama 2:3, 4.

10. Fa u sa yeepi den baala anga sisa di lowe komoto a den kondee fu taanga den biibi? (Luku a fowtow na a bigin.)

10 Son leisi lanti e meke a taanga gi den baala anga sisa di lowe komoto a den kondee, fu go a komakandaa aini a nyun kondee pe den de. Son leisi lanti e taigi den taki efu den go a komakandaa den ná o yeepi den moo. Son leisi den e taigi den taki den ná o meke den tan aini a kondee efu den á wani teke wan wooko di o tapu den fu go a komakandaa. Fu di son Kotoigi be e si enke den ná abi taa fasi, meke den teke den sowtu wooko ya. Neen meke a de taanga fanowdu fu wi anga den baala anga sisa di lowe komoto a den kondee miti gawgaw. Den mu si taki wi e booko wi ede anga den. Di den o si fa wi e yeepi den, a sani de o taanga den biibi.Odo 12:25; 17:17.

 YEEPI DEN ANGA SAN DEN ABI FANOWDU

11. (a) San a den fosi sani di den Kelesten di lowe komoto a den kondee abi fanowdu? (b) Fa den Kelesten di lowe komoto a den kondee sa soi taki den sabi kiyoo?

11 Na a fosi peesi kande u mu gi den baala anga sisa fu u nyanyan, koosi anga taa sani di den abi fanowdu. * (Luku a maiki a ondoo.) Winsi a wan das u gi wan baala seefi, a o teke en fu bigi. Den Kotoigi di lowe komoto a den kondee á mu dwengi den baala anga sisa fu du sani gi den, ma den mu teke ala san den e du gi den fu bigi. A sani ya o meke den baala anga sisa yeepi den anga piisii. Boiti dati den Kotoigi di lowe komoto a den kondee mu meke moiti fu solugu denseefi. A sani ya o meke den anga den baala anga sisa á poli. A o yeepi den tu fu den á si denseefi enke wisiwasiman (2 Tesalonikasama 3:7-10). Ma winsi den du den sani ya, toku u mu yeepi den.

Fa u sa yeepi den baala anga sisa fu u di lowe komoto a den kondee? (Luku paragraaf 11-13)

12, 13. (a) Fa u sa yeepi den baala anga sisa di lowe komoto a den kondee? (b) Gi wan ondoofenitoli.

12 A ná te u gudu fosi wi o man yeepi den baala anga sisa di lowe komoto a den kondee. A sani di den moo abi fanowdu, a lobi anga u ten. Kande u sa soi den pe den mu teke lanti wagi, pe den sa bai gusontu nyanyan di á dii tumisi. U sa soi den tu pe den sa bai sani enke nainmasini  efuso masini fu koti gaasi fu den sa du wan wooko di o yeepi den fu solugu denseefi. Ma a moo pelensipali sani a fu yeepi den fu den gwenti a nyun kemeente. Efi i man, i sa go teke den fu go a komakandaa. I sa soi den san den mu holi a pakisei te den e paati a bun nyunsu na a kondee de tu. Boiti dati i sa wooko anga den aini a peleikiwooko.

13 Di fo yonkuuwan be lowe komoto a den kondee go a wan kemeente, den owluman yeepi den anga omen sani. Den leli den lei wagi, den leli den sikiifi biifi, anga fa den mu suku wooko. Boiti dati den soi den fa den mu koboloiki den ten fu poti a Kownukondee a fesi (Galasiyasama 6:10). Baka wan pisiten ala den bigin pionili. A yeepi di den owluman yeepi den, anga a moiti di denseefi meke fu du moo gi Yehofa, yeepi den fu den á go aini a goontapu fu Saatan. Ma den go a fesi a waaleiti.

14. (a) Anga san den Kotoigi di lowe komoto a den kondee mu luku bun? (b) Gi wan ondoofenitoli.

14 Leti enke ala Kelesten, den Kotoigi di lowe komoto a den kondee mu meke moiti fu gudu á meke den anga Yehofa poli. * (Luku a maiki a ondoo.) Lije di u be taki fi en na a bigin fu a artikel taki, en anga den baala anga sisa fi en e membee ete fa den dda be soi den taki biibi de taanga fanowdu. Den taki: „A teke den sani di wi á be abi fanowdu tuutuu, neen a towe ala. Baka dati a opo a leigi tasi a tapu, a lafu mukii neen a taki: ’U si, a disi namo wi abi fanowdu!’”Leisi 1 Timotiyesi 6:8.

YEEPI DEN ANGA DEN MOO PELENSIPALI SANI DI DEN ABI FANOWDU

15, 16. (a) Fa u sa taanga a biibi fu u baala anga sisa? (b) Fa u sa yeepi den fu den fii bun?

15 A ná nyanyan anga koosi wawan den baala anga sisa di lowe komoto a den kondee abi fanowdu. Den abi toosutu anga taanga-sikin fanowdu tu (Mateyesi 4:4). Owluman sa suku buku fu a olikanisâsi gi den aini den mamabee tongo. Boiti dati den sa yeepi den fu den miti den baala anga sisa di e taki a tongo fu den. A omen fu den e angii fu den famii, a peesi pe den komoto, anga a kemeente fu den. A fasi fa den baala anga sisa e libi anga den, mu yeepi den fu si taki Yehofa lobi den. Efu u nai libi bun anga den, den o go suku yeepi a den famii anga taa sama di nai dini Yehofa (1 Korentesama 15:33). Te wi e meke den fii taki a kemeente lobi den, da wi e soi taki wi e holibaka gi Yehofa fu kibii den „taa kondee sama”.Psalm 146:9.

16 Yesesi anga en famii á be poi go a den osu, bika den sama di be wani du ogii anga den be e tii a kondee ete. A so a de anga son sama di lowe komoto a den kondee. Kande son wan fu den á poi efuso á wani go a den kondee moo. Lije taki, a omen sama á wani tyai den pikin go a den kondee moo fu di den si fa den kii efuso fa den suwa anga den famii fu den. Efu u wani yeepi u baala, ’u mu soi den taki wi e fii gi den. U mu lobi den. U mu de kabakaba fu soi tyali-ati gi den. U mu abi  sakafasi tu’ (1 Peitilisi 3:8). Fu di sama be e du ogii anga son wan fu den baala anga sisa ya meke den nai wani mosoo anga sama. Sen e kisi den fu taigi taawan san miti den, moomoo te den pikin fu den de koosube. I mu akisi iseefi taki: „Efu a mi den sani ya be miti, fa mi be o wani taa sama libi anga mi?”Mateyesi 7:12.

TE WI E PELEIKI GI LOWEMAN

17. Fa a peleikiwooko di wi e du e toosutu sama di lowe komoto a den kondee?

17 A omen sama lowe komoto a kondee pe lanti tapu a wooko fu u. Ma fu di den Kotoigi e paati a bun nyunsu fayafaya, meke dunsudunsu fu den sama ya e yee a bosikopu fu a „Kownukondee” fu a fosi leisi (Mateyesi 13:19, 23). A omen fu den sama di be e fii booko-saka fende taanga-sikin di den go a den komakandaa. Di den go ape, den fusutan wanten taki: „Gadu de anga u tuu.”Mateyesi 11:28-30; 1 Korentesama 14:25.

18, 19. Fa u sa konikoni te wi e peleiki gi sama di lowe komoto a den kondee?

18 U mu „konikoni” te wi e peleiki gi sama di lowe komoto a den kondee (Mateyesi 10:16; Odo 22:3). Aliki den anga pasensi te den e taki anga i, ma ná gi politiki toli anga den. Efu wi á wani sani miti u te wi e peleiki gi den, da u mu wooko anga den sani di a beikantoo soi u. U mu wooko anga san lanti soi u tu. A omen kondee den sama ya komoto. Den abi den biibi anga den gwenti, neen meke u mu meke moiti fu lesipeki a fasi fa den e denki anga a fasi fa den e fii. Son wan fu den á lobi te umanpikin e wei son koosi. Neen meke te wi e peleiki gi den, u mu wei koosi a wan fasi di ná o meke den á wani aliki u.

19 U wani yeepi sama di de a nowtu, winsi den nai dini Yehofa. Te wi e du a sani ya, da wi e waka na a Samaliyaman di Yesesi be taki fi en aini ageisitoli baka (Lukasi 10:33-37). Ma a moo bun fasi fa u sa yeepi den, a te wi e paati a bun nyunsu gi den. Wan owluman di yeepi omen sama di lowe komoto a den kondee taki, u mu taigi den wantenwanten taki wi a Yehofa Kotoigi. U mu taigi den taki a moo pelensipali sani di u wani du, a fu yeepi den fu sabi san Beibel e taki fu a ten di e kon. U mu soi den taki a ná nyanyan efuso moni u tyai gi den.

DEN WINI DI WI E FENDE

20, 21. (a) Sowtu wini wi e fende te wi e soi den baala anga sisa di lowe komoto a den kondee taki u lobi den? (b) San wi o leli aini a taa artikel?

20 Sani e waka bun te wi e soi taki u lobi den „taa kondee sama”. Wan sisa taki en famii be abi fu lowe komoto a Eritreya di sama be e du ogii anga taawan aini a kondee. Fo fu den pikin fi en be abi fu waka aitin dei aini wan sabana. Den waka te den doo a kondee Sudan. A sisa taki: „Den baala anga sisa libi anga den pikin fu mi enke a den famii. Den gi den nyanyan, koosi anga moni fu pai wagi. Sama be o meke wan sama di a á sabi kon aini en osu, soso fu di en anga a sama e dini aseefi Gadu? A Yehofa Kotoigi wawan e du a sani ya.”Leisi Yohanisi 13:35.

21 Ma fa fu den pikin di e lowe anga den gaansama fu den? Aini a taa artikel wi luku fa u sa yeepi den osufamii ya fu dini Yehofa anga piisii.

^ paragraaf 2 Aini a artikel ya „loweman” a den sama di lowe komoto a den kondee pe feti e feti, pe seke doti efuso wan taa gaan ogii pasa. Son sama e lowe tu fu di taawan e du ogii anga den a den kondee. Den sama di lowe abi fu go tan a wan taa kondee efuso wan taa pisi fu a kondee fu den.

^ paragraaf 6 Luku a artikel „Ná feegete fu kai sama kon a yu osu” aini A Wakititolen fu oktober 2016, bladzijde 3-8.

^ paragraaf 11 Te den baala anga sisa di lowe komoto a den kondee doo aini wan kondee, da den owluman mu du san sikiifi aini a buku Wi orga fu du a wani fu Yehovah, kapitel 8, paragraaf 30. Efu den owluman wani sabi den baala anga sisa ya moo bun, da den sa go a jw.org da den akisi a beikantoo fu a kondee pe den de, fu sende wan biifi go na a kemeente pe den baala anga sisa ya komoto. A ten di den owluman e wakiti fu a beikantoo piki den, den sa akisi den baala anga sisa ya a wan switifasi sowtu kemeente den be de, anga sowtu faantiwowtu den be abi aini a kemeente. A so den owluman o man sabi fa a biibi fu den baala anga sisa ya de.

^ paragraaf 14 Luku den artikel „Nowan sma kan dini tu masra” anga „Abi deki-ati—Yehovah na yu yepiman!” aini A Waktitoren fu 15 april 2014, blz. 17-26.