Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2017

Mma anga dda di komoto a wan „taa kondee”, yeepi i pikin fu dini Yehofa

Mma anga dda di komoto a wan „taa kondee”, yeepi i pikin fu dini Yehofa

„Sani á de di e gi mi piisii enke te mi e yee taki den pikin fu mi e du san den leli.”3 YOHANISI 4.

SINGI: 88, 41

1, 2. (a) San e miti den pikin fu den sama di go tan a wan taa kondee? (b) Sowtu akisi wi o luku aini a artikel ya?

JOSHUA taki: „Fosi, mi mma anga nda be e tan aini wan taa kondee. Di mi ain pii, na a tongo fu den mi be e taki a osu anga komakandaa. Ma di mi bigin go a sikoo, mi be kon moo lobi a tongo di den be e taki aini a kondee. Baka wantu yali, na a tongo fu a kondee wawan mi be e taki. Mi á be e fusutan den sani di den be e taki a komakandaa moo. Boiti dati, mi be e si enke mi anga den ná abi den seefi gwenti.” A ná Joshua wawan a sani ya miti.

2 Nownow a moo enke 240 miliyun sama nai tan aini a kondee di den meke. Fa wan mma efuso wan dda di e tan aini wan taa kondee sa yeepi en pikin fu lobi Yehofa? Fa den sa yeepi den fu „du san den leli” (3 Yohanisi 4). Fa taawan sa yeepi den?

 MMA ANGA DDA, I PIKIN MU MAN WAKA AI BAKA

3, 4. (a) Fa mma anga dda sa meke den pikin waka a den baka? (b) San mma anga dda mu holi a pakisei?

3 Mma anga dda efu u wani u pikin dini Yehofa fu den libi fu teego, u mu poti pakisei na a fasi fa wi e tyai useefi. Te i pikin si fa yu e ’poti a Kownukondee a fesi’ den o leli taki den mu biibi taki Yehofa o solugu den (Mateyesi 6:33, 34). Na a dini di yu e dini Yehofa mu de a moo pelensipali sani gi i, a ná goontapu gudu i mu poti a fesi. Ná libi bigi, boiti dati meke moiti fi i ná abi paiman. Kibii „gudu a hemel”, dati wani taki i mu meke moiti fu Yehofa piisii anga i. A ná libisama mu fende i bun. Moni á mu de a moo pelensipali sani gi i tu.Leisi Malikisi 10:21, 22; Yohanisi 12:43.

4 Noiti i mu abi sani fu du te da i ná abi ten gi i pikin. Meke den sabi taki yu e piisii te i si taki den e poti Yehofa a fesi. Ná gi den taanga-sikin fu suku balinen anga moni gi yu efuso gi denseefi. Yu á mu meke pikin anga a pakisei taki a den mu meke yu abi wan bun libi. Holi a pakisei taki „a ná den pikin mu poti wan sani a wanse gi den mma anga dda, ma a den mma anga dda mu poti wan sani a wanse gi den pikin fu den”.2 Korentesama 12:14.

SAN MMA ANGA DDA MU DU TE DEN PIKIN NAI FUSUTAN A TONGO DI DEN E TAKI?

5. Saide mma anga dda mu e taki fu den leli fu Yehofa anga den pikin ala yuu?

5 Aini a ten ya sama fu „ala sowtu nasi di e taki ala sowtu tongo” e dini Yehofa enke fa Beibel be taki a fesi (Sakaliya 8:23). Ma efi i pikin nai kaba fusutan a tongo di yu e taki anga den, a o taanga gi i fu leli den a waaleiti. Den pikin fi i a den moo pelensipali Beibelsutudi fi i. A den, a den fosi sama di i mu yeepi fu „sabi” Yehofa fu den sa fende teego libi (Yohanisi 17:3). Efi i wani i pikin fusutan den leli fu Yehofa, i mu e taki fu den leli ya anga den ala yuu.Leisi Deitolonomi 6:6, 7.

Den pikin fi i a den moo pelensipali Beibelsutudi fi i

6. Sowtu wini den pikin o fende te den sabi a tongo di den mma anga dda e taki? (Luku a fowtow na a bigin.)

6 A pikin fi i o leli a tongo di den e taki aini a kondee a sikoo efuso te ai taki anga taawan. Ma a te wi e taki anga den ala yuu fosi den o man leli a tongo di yu e taki. Te den pikin fi i e taki a tongo di yu e taki, a o moo makiliki gi den fu taigi i fa den e fii. Boiti dati, te i pikin man taki moo enke wan tongo, a ná o taanga gi den fu fusutan fa taawan e denki. Den o moo sabi sani. Den o abi a okasi fu du moo aini a peleikiwooko tu. Carolina anga en mma anga en dda foloisi go tan a wan taa kondee. A taki: „A switi fu de aini wan kemeente pe den e taki wan taa tongo. Mi e piisii taki mi man yeepi a pe moo peleiki man de fanowdu.”

7. San i sa du efu a tongo di yu e taki a wan polobelema aini yu osufamii?

 7 Te son pikin kon gwenti a kondee di den foloisi go anga te den sabi taki a tongo di den e taki aini a kondee, da son wan nai wani taki den mamabee tongo moo. Taawan nai poi taki a tongo de moo. Mma anga dda efu na a sani ya e miti i pikin, i si enke i man meke moiti fu leli a tongo di den e taki aini a kondee? A o moo makiliki gi i fu kiya i pikin enke Kelesten te yu e fusutan san den e taki, san den e aliki efuso san den e luku. A o moo makiliki gi i tu fu fusutan san den e leli a sikoo. A o moo makiliki gi i fu taki anga den sama di e leli den a sikoo tu. Ai teke ten fu leli wan nyun tongo. Yu abi fu meke moiti, boiti dati i mu abi sakafasi. Ma yu o fende wini. Meke u taki a pikin fi i dofu, yu á be o meke moiti fu leli dofusama-tongo fu man taki anga en noh? Na aseefi sani i mu du te i pikin e taki wan taa tongo, ná so noh? *—Luku a maiki a ondoo.

8. Fa i sa yeepi i pikin winsi i nai taki a tongo fu a kondee bun?

8 Son leisi mma anga dda di go tan a wan taa kondee nai poi taki a tongo fu a kondee gaata enke den pikin fu den. A sani ya e meke a taanga gi den pikin fu fusutan den „santa buku fu Gadu” (2 Timotiyesi 3:15). Winsi ai taanga gi i fu taki a tongo di i pikin e taki, tokuso i poi yeepi den fu sabi Yehofa. Wan owluman di den e kai Shan taki: „A mi mma wawan kiya u. Ma a á be e kaba fusutan a tongo di u be e taki. Mi anga mi sisa á be e taki a tongo fi en bun tu. Ma te u be e si fa a be e sutudeli, fa a be e begi anga a moiti di a be e du fu holi a Osufamii Anbegi ala wiki, u be e fusutan taki a be de taanga fanowdu fu sabi Yehofa.”

9. Fa mma anga dda sa yeepi den pikin efu a de fanowdu fu leli den aini tu tongo?

9 Son leisi a de fanowdu fu mma anga dda gi den pikin den leli fu Yehofa aini tu tongo. Saide? A fu di den e taki wan tongo a osu anga wan a sikoo. Neen meke son mma anga dda e leli den pikin anga buku, CD, efuso felon aini tu sowtu tongo. A sani ya e soi taki mma anga dda di go tan aini wan taa kondee, mu moo meke moiti fu yeepi den pikin fu den fu toon Yehofa mati.

SOWTU KEMEENTE I MU GO?

10. (a) Sama mu luku sowtu kemeente a osufamii o go? (b) San osufamii edeman mu du fosi en anga en osufamii go a wan kemeente?

10 Efu wan osufamii di foloisi go tan a wan „taa kondee” nai tan koosube fu wan kemeente di e taki a tongo fu den, da a moo bun fu den go a wan kemeente di e taki a tongo di den e taki aini a kondee (Psalm 146:9). Ma efu wan kemeente de koosube di e taki  den mamabee tongo, da a edeman fu a osufamii mu luku sowtu tongo moo bun gi a osufamii. Fosi a du a sani ya a mu denki bun, a mu begi Yehofa tu. A mu taki anga en uman anga den pikin tu (1 Korentesama 11:3). San a mu holi a pakisei? Sowtu Beibel tekisi o yeepi en fu du sani anga koni?

A edeman fu a osufamii mu luku sowtu tongo moo bun gi a osufamii

11, 12. (a) Fa a tongo di den e taki na a kemeente sa yeepi pikin fu fende wini fu a komakandaa? (b) Saide son pikin nai wani leli a tongo di den mma anga dda e taki?

11 Mma anga dda mu luku san den pikin abi fanowdu tuutuu. Den komakandaa di wi e holi ala wiki á sai fu yeepi den pikin fi i fu fusutan a waaleiti. Pakisei a sani ya: Te a komakandaa e holi aini a tongo di den pikin e moo fusutan, den pikin e fende wini te den de na a komakandaa. Kande den e leli moo san den mma anga dda e denki. Ma efu den pikin nai fusutan a tongo di den e taki a komakandaa bun, den ná o fende wini fu a komakandaa. (Leisi 1 Korentesama 14:9, 11.) A tongo di wan pikin diingi a bobi, ná abi fu de a tongo di e doo en ati. Kande a ná aini a tongo de ai denki tu. Kande a man gi piki, peleiki efuso holi lezing aini a tongo di en mma anga en dda e taki, ma dati á wani taki den sani di den e du doo den ati.

12 Boiti dati efi i wani doo wan pikin ati, yu á mu holi a tongo di yu anga en e taki wawan a pakisei. Na a sani ya be miti Joshua di u be taki fi en a fesi. En sisa Esther taki: „Yonkuuwan e si a tongo, a biibi anga den gwenti fu den mma anga dda, enke aseefi sani.” Neen meke efu den pikin e si enke den anga den mma anga den dda ná abi denseefi gwenti, den ná o wani taki a tongo fu den. Boiti dati den ná o lobi a biibi fu den tu. San mma anga dda sa du?

13, 14. (a) Saide wan baala anga en uman foloisi go a wan kemeente di e taki a tongo fu a kondee? (b) San yeepi den fu den biibi á swaki?

13 Kelesten mma anga dda e poti pakisei a san den pikin abi fanowdu, den nai luku san den lobi (1 Korentesama 10:24). Joshua anga Ester dda den e kai Samuel. A taki: „Mi anga mi uman meke moiti fu si sowtu tongo be o yeepi den pikin fu go a fesi. Wi á be wani du san bun gi wi, ma u be e meke moiti fu sabi fa u be sa yeepi den. Di mi anga mi uman si taki den pikin á be e fende wini fu a komakandaa di be e holi aini a tongo di u be e taki, neen u foloisi go a wan kemeente di e taki a tongo fu a kondee. Wi anga den e go a komakandaa ala wiki. Wi e paati a bun nyunsu. Wi e kai mati kon nyan a wi osu. Wi anga den e go koi tu. Den sani ya yeepi den pikin fu u fu sabi den baala anga sisa. Nownow den e si Yehofa enke den Dda anga den Mati. A sani ya pelensipali gi u moo a taki di den be o taki a tongo fu u.”

14 Samuel taki: „Fu di mi anga mi uman á be wani u biibi swaki, meke u be e go a komakandaa aini u mamabee tongo tu. A á be makiliki gi u fu du a sani ya, u be e weli. Ma wi e gi Yehofa daa taki a belesi a moiti di u meke. Ala den dii pikin fu u, e du a fuuten diniwooko.”

 SAN YONKUUWAN SA DU

15. San Kristina si taki a be man du moo bun di a go a wan kemeente di e taki a tongo fu a kondee?

15 Te den pikin kon bigi, da kande den o kon si taki a be o moo bun fu go a wan kemeente di e taki a tongo di den e fusutan moo bun. Mma anga dda á mu si enke a lobi den pikin á lobi den. Kristina taki: „Mi e taki a tongo di mi mma anga nda e taki pikinso. Ma mi á be e kaba fusutan den sani di den e taki a komakandaa. Di mi be abi 12 yali, neen mi go a wan konkelesi di be de aini a tongo di mi leli a sikoo. A dati na a fosi leisi di mi kon si taki den sani di mi be e leli, a tuu. Mi fende wini tu di mi bigin begi aini a tongo di mi leli a sikoo. Mi be man taki anga Yehofa anga mi hii ati” (Toli 2:11, 41). Di Kristina be abi 18 yali, a taki anga en mma anga en dda, neen a foloisi go a wan kemeente di e taki a tongo fu a kondee. A taki: „Fu di mi be e leli sabi Yehofa aini a tongo di mi leli a sikoo, meke mi be man du den sani di mi be e leli.” Bakaten Kristina toon wan pionili. Ai piisii tuutuu.

16. Saide Nadia piisii taki a á komoto na a kemeente di be e taki en mamabee tongo?

16 Yonkuuwan, efi i si enke yu o moo go a fesi efi i de aini wan kemeente di e taki a tongo fu a kondee, da i mu akisi iseefi saide yu e denki so. Efi i foloisi go na a kemeente de, i si enke a o yeepi i fi i anga Yehofa toon moo bun mati? (Yakowbesi 4:8) A di yu á wani i mma anga i dda si san yu e du efuso a di yu á wani meke moiti, meke i wani go a wan taa kemeente? Nadia di e wooko a Betel nownow taki: „Di mi anga den baala anga sisa fu mi be pasa den tin yali so, u be wani foloisi go a wan kemeente di e taki a tongo di den e taki aini a kondee.” Ma en mma anga en dda be fusutan taki a sani ya be sa meke den pikin biibi swaki. Nadia taki: „Nownow ai bigi gi u taki u mma anga u dda leli u a tongo fu den. Wi e piisii tu taki den meke u tan aini a kemeente di e taki u mamabee tongo. Den sani de tyai wini gi u. Den gi wi a okasi fu yeepi taawan fu sabi Yehofa.”

FA TAAWAN SA YEEPI?

17. (a) Sama Yehofa gi a faantiwowtu fu kiya pikin? (b) San mma anga dda sa du fu yeepi den pikin fu fusutan den leli fu Yehofa?

17 A mma anga dda Yehofa gi a faantiwowtu fu leli den pikin a waaleiti. A ná gaanmma anga gaandda efuso taa sama a gi a faantiwowtu ya. (Leisi Odo 1:8; 31:10, 27, 28.) Ma toku mma anga dda di nai taki a tongo di den e taki aini a kondee, abi taawan fanowdu fu yeepi den. Efu mma anga dda suku sama fu yeepi den, da dati á wani taki a tyai den á wani tyai a faantiwowtu fu den. A sani de, a wan fu den sani di den sa du fu kiya den pikin fu den anga den leli fu Yehofa (Efeisesama 6:4). Den sa akisi den owluman fa den mu holi a Osufamii Anbegi. Den sa akisi den tu fu den yeepi den suku bun mati gi den pikin fu den.

Mma, dda anga den pikin fu den e fende wini te den e du sani makandaa anga a kemeente (Luku paragraaf 18, 19)

18, 19. (a) Fa taa Kelesten sa yeepi yonkuuwan? (b) San mma anga dda mu e du ala yuu?

18 Son leisi mma anga dda sa kai taa osufamii kon na a osufamii Anbegi. A sani ya o yeepi den pikin. Yonkuuwan e leli fu taa  Kelesten tu te den e peleiki anga den efuso te den e du taa sani makandaa (Odo 27:17). Shan di u be taki fi en kaba taki: „Mi á feegete den baala di be e yeepi mi. Te den be e yeepi mi anga den lezing di mi be abi, a omen sani den be e leli mi. Ala yuu a be e switi gi mi te u be de makandaa aini wan kulu.”

19 Efu wan mma efu wan dda akisi wan Kotoigi fu yeepi en anga wan pikin, da a Kotoigi de mu gi a pikin taanga-sikin fu lesipeki en mma anga en dda. A mu e taki fu den bun sani di a mma anga a dda e du, a á mu si enke neen abi a faantiwowtu di a mma anga a dda abi. Den mu luku bun tu fu den á du sani di baala anga sisa efuso taa sama e si enke sani di á fiti (1 Peitilisi 2:12). Winsi fa mma anga dda sa akisi taawan fu yeepi den pikin, tokuso denseefi mu e leli den pikin. Boiti dati ala yuu den mu e luku efu den sama di e yeepi den pikin fu den, e gi den pikin a yeepi di den abi fanowdu.

20. Fa mma anga dda sa yeepi den pikin fu dini Yehofa?

20 Mma anga dda, u mu e begi Yehofa fu a yeepi u, da u meke moiti fu yeepi u pikin. (Leisi 2 Koloniki 15:7.) Poti san yu pikin abi fanowdu a fesi, ná san i moo lobi. Du san i poi fu meke a Wowtu fu Gadu doo i pikin ati. Noiti yu á mu denki taki i pikin ná o dini Yehofa. Te i pikin e du san a leli aini a Wowtu fu Gadu anga te ai waka a yu baka, da yu o sabi fa a apostel Yohanisi be e fii di a be taki: „Sani á de di e gi mi piisii enke te mi e yee taki den pikin fu mi e du san den leli.”3 Yohanisi 4.

^ paragraaf 7 Efi i wani sabi fa i sa leli wan nyun tongo, i sa leisi a Ontwaakt! fu maart 2007, blz. 10-12.