Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2017

Wi e piisii fu di u nai libi bigi

Wi e piisii fu di u nai libi bigi

DANIEL ANGA MIRIAM toow aini september 2000. Den be abi wan bun libi a Barcelona, wan foto a Sipanyookondee. Daniel taki: „U be abi bun wooko, neen meke u be man nyan a den dii nyanyan osu, u be man go koi a pe u wani, u be man bai dii koosi tu. Boiti dati, u be lobi go a peleikiwooko ala yuu.” Ma bakaten wan sani pasa.

Daniel yee wan lezing na a konkelesi fu 2006. A baala di be holi a lezing be akisi taki: „Wi e du ala san u poi fu yeepi den sama di den e tyai go kii? Wi e du ala san u poi fu yeepi den fende a pasi di e tyai sama go a teego libi?” (Odo 24:11) A lezing be e soi taki wi abi a faantiwowtu fu paati a bosikopu fu Beibel gi den sama, bika a sani ya wani taki libi efuso dede gi den (Toli 20:26, 27). Daniel taki: „Mi be e fii enke anga mi Yehofa e taki.” A lezing be e soi tu taki wi o moo piisii efu wi e du ala san u man gi Yehofa. Daniel be sabi taki a sani ya tuu, bika a be e si fa Miriam be e piisii di a bigin pionili.

Di Daniel yee a lezing, a be kon si taki a doo yuu fu a kengi a fasi fa a be e libi. A bigin wooko wantu yuu namo. Baka dati a bigin pionili. Boiti dati a be e pakisei fa en anga Miriam o piisii efu den go yeepi a wan peesi pe Kownukondee peleikiman de fanowdu.

DEN TESI DI MITI DEN, ANGA A BUN NYUNSU DI DEN YEE

Daniel anga Miriam fika den wooko aini mei 2007, neen den go a Panama, wan peesi pe den be go koi kaba. Den be e peleiki a den tabiki fu a Carabise Se di de a Bocas del Toro Archipelago. Gaanse fu den sama di e tan ape a Ngabe (Ingii). Daniel anga Miriam be denki taki den be o poi solugu denseefi aitin mun langa a Panama anga a kibii moni fu den.

Den be e go a den tabiki anga boto. Te den be doo anga baisigii den be e peleiki. Den e membee a fosi leisi ete di den be lei 30 kilomeiti anga baisigii subi den mongo aini a hati san. Ná pikin weli Daniel be weli, beina a faaw. Ma a osufamii di den be miti be abi bun manii, moomoo di Daniel anga Miriam leli taki wantu sani aini a tongo fu den. A á teke langa fosi den bigin sutudeli Beibel anga 23 sama.

San pasa di a moni fu den kaba? Daniel taki: „Wataa be e lon a wi ain te u be e pakisei taki u mu go a Sipanyookondee baka. Tyali be e kisi u fu gwe fika den Beibelsutudi fu u.” Ma baka wan mun neen den yee wan piisii nyunsu. Miriam taki: „Den be kai u fu go du a spesuutu pioniliwooko. Ná pikin poolo u poolo di u fende a okasi fu tan du a peleikiwooko a Panama!”

A SANI DI MEKE U MOO PIISII

Fu di a olikanisâsi kengi wantu sani aini 2015, meke den akisi Daniel anga Miriam fu du a kowownu pioniliwooko. San den du? Den biibi a sani di Yehofa paamisi a Psalm 37:5. A pe sikiifi: „Meke Yehofa soi i fa i mu libi. Biibi en, da a o yeepi i.” Den fende wooko di be e yeepi den fu solugu denseefi. Nownow den de enke kowownu pionili a wan kemeente a Veraguas, wan foto fu Panama.

Daniel taki: „Di u be e komoto a Sipanyookondee wi á be sabi efu u be o poi libi sondee den sani di u be gwenti. Ma nownow u nai mankei nawan sani.” San e meke den piisii? Den taki: „A yeepi di wi e yeepi sama di abi sakafasi fu sabi Yehofa e meke u piisii tuutuu!”