Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2017

 ONDOOFENITOLI

Mi dofu, ma a sani ya á tapu mi fu leli taawan

Mi dofu, ma a sani ya á tapu mi fu leli taawan

Mi dopu aini 1941, di mi be abi 12 yali. Ma a 1946 fosi mi fusutan a waaleiti. Saide mi taki a sani ya? Meke mi gi yu a toli.

A PISITEN fu 1910, mi mma anga nda komoto a Tbilisi, Georgia, neen den go tan a Kanada. Den be e tan a wan pikin osu a wan peesi pe den e paandi anga kweki meti. A peesi ya be de koosube fu Pelly, Saskatchewan aini Kanada. Mi meke aini 1928. Mi mma anga nda meke sigisi pikin. A mi na a tapubee. Nda dede sigisi mun fosi mi mma meke mi. Mma dede di mi be de beibi. A á langa baka dati neen a moo gaan sisa fu mi di den be e kai Lucy dede di a be abi 17 yali. A mi omu Nick kiya mi anga den taa baala anga sisa fu mi.

Di mi be nyoni, neen wan leisi den sama fu mi si mi e hali wan fu den asi fu u neen tee. Den be e bali mi fu di den be si enke a asi be o sikopu mi. Mi be gi baka go a den, boiti dati mi á be e yee taki den be e bali mi. Ma koloku a asi á du sani anga mi. Na a dei de fosi den famii fu mi kon si taki mi dofu.

Wan mati fu a famii taigi den taawan taki a be o moo bun fu mi go a dofusama sikoo. Neen meke mi omu Nick poti mi a wan dofusama sikoo di be de a Saskatoon, Saskatchewan. Mi be e feele bika a sikoo ya á be de koosube fu pe wi e tan. Boiti dati a feifi yali namo mi be abi a ten de. A fakansi wawan mi be e go a osu go luku mi famii. Bakaten mi be kon sabi taki  anga ana. A be switi gi mi fu pee anga den taa pikin.

MI KON SABI A WAALEITI

Di mi gaan sisa Marion toow anga Bill Danylchuck aini 1939, neen den meke mi anga mi sisa Frances go tan anga den. A Marion anga Bill Danylchuck fosi bigin sutudeli Beibel anga den Yehofa Kotoigi. Te mi be kon a osu gaan fakansi, den be e du san den poi fu leli mi den sani di den kon sabi fu Beibel. Den á be sabi taki anga ana, neen meke a be taanga gi u fu fusutan useefi. Ma den be e si taki mi be lobi den sani di mi be e leli fu Yehofa. Mi be fusutan taki den be e meke moiti fu du den sani di den be e leli aini a Beibel, neen meke mi be e go anga den te den be e go peleiki. Baka wan pisiten mi be wani dopu. Bill dopu mi aini wan bidon na 5 september 1941. A peti wataa u be lai aini a bidon, ná pikin koo a be koo.

Mi anga wantu dofusama a wan konkelesi a Cleveland, Ohio aini 1946

Di mi kon a osu na a gaan fakansi fu 1946, u go a wan konkelesi di be holi a Cleveland, Ohio di de na a Ameekankondee. A fosi dei, den sisa fu mi be e sikiifi sani gi mi fu yeepi mi fu sabi san den be e taki na a konkelesi. Ma du fu tu dei, mi be piisii di mi yee taki den baala be poti wan sisa di be sabi taki dofusama tongo fu yeepi den dofusama fu fusutan a konkelesi. A so mi be man fusutan a konkelesi moo bun. A sani ya be switi gi mi tuutuu.

MI LELI TAAWAN A WAALEITI

A pisiten di du fu Tu Goontapu Feti be kaba, a omen sama be wani soi taki den be e holibaka gi den kondee. Ma baka a konkelesi di mi go a sikoo baka, mi be poti a mi ede taki mi ná o du sani di Yehofa á lobi. Neen meke mi á be e singi gi a faaka fu a kondee moo. Mi á be e fii den fesa di den be e fii tu. Te den taa pikin be e go a keliki, mi á be e go anga den moo. Den sama fu a sikoo á be e piisii di mi bigin tyai miseefi taa fasi. Neen meke den be e du omen sani fu meke mi feele. Den be e taigi mi sani di á tuu, fu mi be sa kengi pakisei. Den sikoo pikin be e si san den sama fu a sikoo be e du anga mi, na a sani de gi mi a okasi fu peleiki gi den. Son wan fu den sikoo pikin kon a waaleiti. Wantu fu den di teke a waaleiti a Larry Androsoff, Norman Dittrick, anga Emil Schneider. Te anga now den e dini Yehofa.

Te mi be go a wan taa foto, mi be e du san mi man fu peleiki gi taa dofusama. Di mi be de a Montreal mi go a wan peesi pe dofusama lobi go. Di mi go ape mi peleiki gi Eddie Tager, wan yonkuman di be de wan edeman fu wan kulu ogii boi. A dini Yehofa te enke a dede a yali di pasa. A be de na a dofusama kemeente a Laval aini Quebec. Mi be miti Juan Ardanez na ape tu. Leti enke den fositen Bereyasama a be e ondoosuku luku efu den sani di a be e leli be sikiifi aini a Beibel tuu (Toli 17:10, 11). A kon a waaleiti tu. A be de wan owluman a Ontario, wan peesi a Ottawa, te enke a dede.

Mi be e peleiki a sitaati na a pisiten fu 1950

Mi foloisi go a Vancouver aini 1950. Winsi fa mi lobi peleiki gi dofusama, tokuso mi nai feegete wan uman den e kai Chris Spicer. A uman ya á be dofu. Ma toku mi be peleiki gi en a sitaati. A be poti en nen fu e fende den buku  fu u, boiti dati a be wani mi anga en man Gary miti. Mi go luku den a den osu. Mi be e sikiifi gi den san mi wani taki, da den be e sikiifi gi mi san den be wani taki. Baka dati mi anga den á miti moo. Baka wantu yali di mi go a wan konkelesi a Toronto, Ontario, mi foondoo di den kon gi mi odi. Na aseefi dei de Gary be o dopu. A sani de leli mi taki u mu peleiki gi ala sama bika wi á sabi efu den sama di wi o peleiki gi o teke a waaleiti.

Baka wan pisiten mi go tan a Saskatoon baka. Di mi be de ape, neen wan uman akisi mi efu mi sa sutudeli Beibel anga den toolengi umanpikin fi en, Jean anga Joan Rothenberger. Den be e go na aseefi dofusama sikoo di mi be go. A á langa di mi sutudeli anga den, neen den bigin taigi den taa sikoo pikin san den be e leli. Bakaten feifi fu den pikin de kon a waaleiti. Wan fu den a Eunice Colin. Na a lasiti yali di mi be de na a dofusama sikoo mi anga en miti. Di mi anga en miti a gi mi wan sukuusii, neen a akisi mi efu mi anga en sa de mati.

Mi anga Eunice aini 1960 anga 1989

Di Eunice mma kon fusutan taki a be e sutudeli Beibel, a taigi a edeman fu a sikoo, fu a du san den poi fu meke Eunice tapu anga a sutudeli di ai sutudeli. A edeman meke moiti fu tapu Eunice fu sutudeli Beibel. A teke ala den buku fi en, ma toku Eunice á gwe fika Yehofa. Di a be wani dopu, en mma anga en dda taigi en taki: „Efi i toon Yehofa Kotoigi, wi o poti yu a doo!” Di a be abi 17 yali a go tan anga wan Kotoigi osufamii. A sutudeli te enke a dopu. Bakaten neen mi anga en toow. Di u toow aini 1960 en mma anga en dda á kon na a toow fu u. Ma bakaten den be e lesipeki a biibi fu u anga a fasi fa u kiya den pikin fu u.

 YEHOFA YEEPI MI

Mi boi Nicholas anga en uman Deborah, na a Betel fu London

Fu di mi anga mi uman be dofu meke a be taanga gi u fu kiya den seibin boi fu u di á be dofu. Ma u leli den taki anga ana, a so u be man leli den a waaleiti. Den baala anga sisa be e yeepi u tu. Mi sabi ete taki wan baala anga en uman be sikiifi biifi gi u fu taigi u taki wan fu den boi fu u be kosi aini a Kownukondee Zaal. U be man yeepi a boi wanten. Fo fu den boi fu u a owluman, James, Jerry, Nicholas, anga Steven. Den anga den osufamii e dini Yehofa. Nicholas anga en uman Deborah e wooko na a beikantoo fu Ingiisikondee. Den e poti buku anga taa sani go aini dofusama tongo. Steven anga en uman Shannan e wooko na a beikantoo fu Ameekankondee. Denseefi e poti buku anga taa sani go aini dofusama tongo.

Mi boi James, Jerry, anga Steven anga den uman e holibaka gi a peleikiwooko a omen fasi aini dofusama tongo

A tyali taki mi uman Eunice dede wan mun fosi u tapu 40 yali fu di u toow. A be abi kanker. A sani di be e gi en taanga-sikin den pisiten di a siki, na a biibi di a be e biibi taki dedesama o  kon a libi baka. Mi e angii fu a dei di mi anga en o miti baka.

Faye anga James, Jerry anga Evelyn, Shannan anga Steven

Mi kai booko mi agana aini februari 2012. Mi be sabi taki mi be e o abi yeepi fanowdu. Neen meke mi go tan anga wan fu den boi fu mi anga en uman. Nownow u de aini a dofusama kemeente fu Calgary. Mi a wan owluman ete. Disi na a fosi leisi di mi de aini wan kemeente pe den e taki dofusama tongo. San yeepi mi fu mi biibi á swaki den yali di mi be de aini Ingiisitongo kemeente? A Yehofa yeepi mi. A du san a paamisi, di a taki a o solugu den boi di ná abi dda (Psalm 10:14). Mi e gi ala den sama di sikiifi sani gi mi, den di leli mi taki anga ana, anga den sama di be yeepi mi fu fusutan san den be e taki a komakandaa daa.

Mi go na a pionili sikoo aini dofusama tongo di mi be abi 79 yali

Fosi mi á be e fusutan son sani di den be e taki. Boiti dati mi be e si enke den á sabi fa fu yeepi dofusama. Den sani ya be e meke mi be e wani gi abaa. Ma mi be e pakisei san Peitilisi be taigi Yesesi: „Masaa sama wi o go? Yu abi wowtu di e meke sama libi fu teego” (Yohanisi 6:66-68). Leti enke den taa dofu baala anga sisa di dini Yehofa wan pisiten kaba, mi leli fu abi pasensi. Mi be leli tu fu fitoow Yehofa anga en olikanisâsi. Mi fende wini di mi leli den sani ya. Nownow a omen buku de aini dofusama tongo. Mi e piisii taki mi abi a okasi fu go a komakandaa anga konkelesi di e holi aini a dofusama tongo fu Ameekan. Ai switi gi mi tuutuu fu dini Yehofa, a Moo Gaan Gadu.