Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2017

„I lobi mi moo den sani ya?”

„I lobi mi moo den sani ya?”

„Simon, manpikin fu Yohanisi, i lobi mi moo den sani ya?”YOHANISI 21:15.

SINGI: 128, 45

1, 2. San Peitilisi leli baka di a meke moiti fu kisi fisi wan hii neti?

SEIBIN fu den disipel fu Yesesi be go kisi fisi a hii neti na a Se fu Galileya, ma den á fende nawan sani. A mamanten neen Yesesi di be weki kon a libi baka, taanpu e luku den na a lanpeesi. A taigi den taki: „’Towe a seepi go na a leti-ana fu a boto, da wi o kisi wantu fisi.’ Di den towe a seepi, den á be poi hali en kon aini a boto, bika den fisi be ipi.”Yohanisi 21:1-6.

2 Yesesi be gi den disipel fi en beele anga fisi fu den nyan. Baka dati a daai luku Peitilisi neen a akisi en taki: „Simon, manpikin fu Yohanisi, i lobi mi moo den sani ya?” Yesesi be sabi taki Peitilisi be lobi en fisi wooko. Kande Yesesi be e akisi Peitilisi efu a be lobi en anga den sani di a be e leli, moo a fisi wooko. Peitilisi piki Yesesi taki: „Masaa, i sabi taki mi lobi i” (Yohanisi 21:15). Peitilisi soi anga den sani di a be e du  taki a be lobi Yesesi. Fanafu a dei de, a wooko taanga aini a peleikiwooko. Boiti dati a be de wan fu den sama fu a Kelesten kemeente di biibi be taanga.

3. Anga san Kelesten mu luku bun?

3 San u sa leli fu a sani di Yesesi akisi Peitilisi? U mu luku bun fu a lobi di u lobi Kelestesi á kon koo. Yesesi be sabi taki a libi be o taanga aini a goontapu ya. A be sabi taki tesi efuso polobelema be o miti u. Di Yesesi gi a ageisitoli fu a man di be e paandi alisi, a taki son sama be o aliki a Kownukondee bosikopu anga piisii, ma bakaten den booko-ede fu a libi anga gudu be o meke den á lobi a Kownukondee bosikopu moo (Mateyesi 13:19-22; Malikisi 4:19). Efu wi á luku bun, da den booko ede fu a libi sa tapu u fu dini Yehofa enke fa a wani. Neen meke Yesesi be taigi den disipel fi en taki: „U mu luku bun taki den sani enke nyan pasa maiki, diingi pasa maiki anga den booko-ede fu a libi á meke u ati kon ibi.”Lukasi 21:34.

4. Fa wi o du sabi efu u lobi Yesesi anga u hii ati? (Luku a fowtow na a bigin.)

4 Leti enke Peitilisi useefi sa soi taki u lobi Yesesi te wi e poti a peleikiwooko a fesi aini u libi. San o yeepi u fu du a sani ya ala yuu? U mu akisi useefi taki: ’San mi moo lobi? Na a dini di mi e dini Yehofa efuso a taa sani?’ Fu man sabi den piki fu den akisi ya, wi o taki fu dii sani di sa meke wi á lobi Yesesi moo enke fa u be lobi en. Den sani ya na wooko, piisii anga gudu.

NÁ POTI WOOKO A FESI

5. Sowtu faantiwowtu osufamii edeman abi?

5 A ná lobi namo Peitilisi be lobi a fisi wooko, ma na a wooko ya a be e du fu solugu en osufamii. Aini a ten ya, Yehofa gi manengee a faantiwowtu fu solugu den osufamii (1 Timotiyesi 5:8). Den mu wooko taanga fu man du a sani ya. Ma aini den lasiti dei ya, wooko e gi sama booko-ede.

6. Saide wooko sa gi sama booko-ede?

6 Wooko e pina aini a ten ya. Neen meke a omen sama e feti fu fende wan wooko. Son sama taki den e wooko moo langa, ma den nai pai den sai fu a wooko di den e du. Son wookope e wani du omen sani, ma den nai wani ipi wookoman. Neen meke den sama di e wooko gi den e fooseli. Taawan e siki seefi. Son wan fu den e feele taki den o lasi den wooko efu den á du ala san den basi taigi den.

Kelesten e si a dini di den e dini Yehofa enke a moo pelensipali sani

7, 8. (a) San na a moo pelensipali sani gi u? (b) San wan baala fu Tailand kon si fu a wooko di a be e du?

 7 Enke Kelesten a dini di wi e dini Yehofa pelensipali gi u moo den sama di wi e wooko gi (Lukasi 10:27). A wooko di wi e wooko e yeepi u fu bai den sani di wi abi fanowdu anga fu holibaka gi a peleikiwooko. Ma efu wi á luku bun, den sani di u mu du a wookope sa tapu u fu dini Yehofa anga u hii ati. Na a sani ya be miti wan baala fu Tailand. A baala ya taki: „A wooko di mi be e du, a fu meke booko computer. Mi be lobi a wooko ya, ma mi be e wooko langa tumisi. Beina mi á be e abi ten gi den sani di mi be mu du enke Kelesten. Mi be kon si taki efu mi be wani poti a Kownukondee a fesi, mi be o abi fu suku wan taa wooko.” San a baala ya du?

8 A baala taki: „Baka di mi seeka sani wan yali, neen mi bigin seli ice cream a sitaati. Biginbigin mi be abi moni polobelema, boiti dati mi be booko-saka. Te mi anga den sama di mi anga den be e wooko fosi be miti, da den be e akisi mi efu mi si enke a seli di mi e seli ice cream bun moo a meke di mi be e meke computer aini koo kambaa. Mi begi Yehofa fu a yeepi mi fu mi á gi abaa, bika a di mi be wani abi moo ten fu wooko gi en meke mi be e du den sani ya. A á teke langa neen sani bigin go moo bun. Mi be kon sabi sowtu ice cream den sama be moo lobi. Boiti dati mi be moo sabi meke ice cream. Mi be e kaba seli den ice cream fu mi aini wan dei. Nownow mi e meke moni moo di mi be e meke computer. Mi e moo piisii, bika mi ná abi den booko-ede di mi be abi na a taa wooko. San moo pelensipali, mi e fii enke mi kon moo koosube a Yehofa.”Leisi Mateyesi 5:3, 6.

Mi lobi a wooko di mi e du moo a dini di mi e dini Yehofa?

9. San o yeepi u fu wooko á toon a moo pelensipali sani gi u?

9 Ai bigi gi Yehofa te wi e wooko taanga. Wooko e tyai wini gi sama (Odo 12:14). Ma noiti u mu meke a wooko di wi e du pelensipali moo a dini di u mu dini Yehofa. Yesesi taki: „Tan poti a Kownukondee fu Gadu anga en leti-du a fesi, da wi o fende ala den taa sani tu” (Mateyesi 6:33). Ma fa wi o du sabi efu na a wooko fu u wi e poti a fesi? U sa akisi useefi taki: ’Mi e go anga piisii a wooko, da te mi mu du wan sani di abi fu du anga a biibi fu mi da mi e fuka efuso e kuutu? Efu u pakisei den akisi ya, wi o sabi san u moo lobi.

10. San Yesesi leli u?

10 Yesesi soi u san u mu poti a fesi aini u libi. Wan leisi a go luku Maliya  anga en sisa Maata. Fa i si Yesesi doo, a so Maata bigin seeka nyanyan gi en, ma Maliya be go sidon aliki den sani di Yesesi be e taki. Maata kuutu taki Maliya á be e yeepi en. Yesesi taigi Maata taki: „Maliya teke a bun se. Mi ná o puu en neen ana” (Lukasi 10:38-42). Yesesi leli u wan pelensipali sani anga a toli ya. A leli u taki wi á mu meke den sani di wi abi fanowdu tapu u fu dini Yehofa. Ma u mu soi taki u lobi en, da u „teke a bun se”. A sani ya wani taki na a de di wi anga Yehofa de mati, mu de a moo pelensipali sani gi u.

A FASI FA WI E SI PIISII

11. San Beibel e taki fu a teke di sama mu teke boo?

11 Wi enke libisama lai sani di u mu du, neen meke te a langa u mu e teke boo pikinso. Beibel taki: „A moo bun sani di wan libisama sa du, na nyan, diingi, da a piisii anga a taanga wooko di a du” (Peleikiman 2:24). Yesesi be sabi taki a be de fanowdu fu den disipel fi en boo pikinso. Wan leisi di den wooko taanga aini a peleikiwooko, Yesesi taigi den taki: „Meke u go a wan koo peesi fu boo pikinso.”Malikisi 6:31, 32.

12. Gi wan toli di e soi saide u mu luku bun anga den sani di sama e du fu piisii.

12 Te wi e meke piisii ai yeepi u fu boo pikinso. Ma u mu luku bun fu piisii á toon a moo pelensipali sani gi u. Aini a ten fu den apostel a omen sama be e taki „meke u nyan diingi, bika tamaa wi o dede” (1 Korentesama 15:32). A so den sama fu a ten ya e denki tu. Wan yonkuman fu Europa be bigin kon a komakandaa. Ma a á be e paa anga Yehofa Kotoigi moo fu di a be lobi piisii pasa peesi. Bakaten a be kon fusutan taki a den sani di a be e du fu piisii, meke omen sani miti en. A bigin sutudeli Beibel baka. Baka wan pisiten a toon wan peleikiman. Di a dopu a taki: „A sani di e hati mi, a di mi lasi omen ten aini a goontapu ya fosi mi kon fusutan taki a te wan sama e dini Yehofa fosi ai de koloku. Ma a ná te ai suku fu meke piisii aini a goontapu ya.”

13. (a) Gi wan ageisitoli di e soi saide a á bun fu piisii pasa maiki. (b) San o yeepi u fu u nai piisii pasa maiki?

13 Den sani di wi e du te wi e piisii mu yeepi u fu fii bun efuso fu kisi useefi. Ma omen ten u mu teke fu piisii? Fu man piki a akisi ya, pakisei a sani ya. A omen sama lobi kuku efuso sukuusii. Ma u sabi taki efu wi e nyan sukuu sani ipi tumisi, a sa meke u siki. Na aseefi sani sa miti u efu wi e teke omen ten fu piisii. A sa meke wi anga Yehofa poli. San o yeepi u fu sabi efu a ten di wi e teke fu piisii ipi tumisi? Wan sani di sa yeepi u, a fu sikiifi omen yuu aini wan wiki wi e du sani di abi fu du anga a dini di wi e dini Yehofa. Sani enke go a komakandaa, peleikiwooko anga sutudeli Beibel. Baka dati sikiifi omen yuu aini wan wiki yu e du sport, luku tv efuso pee game. San wi e si te u luku omen  yuu wi e piisii anga omen yuu wi e du den sani di u mu du enke Kelesten? A de fanowdu fu du sani taa fasi?Leisi Efeisesama 5:15, 16.

14. San o yeepi u fu piisii a wan fasi di fiti?

14 Yehofa gi wi a okasi fu du san u lobi te u wani piisii. Osufamii edeman sa luku fa den wani den osufamii piisii. Yehofa soi wi aini a Beibel fa ai pakisei fu a toli ya. A sani ya e yeepi u fu sabi san u mu du te u wani du wan sani di o meke u piisii. * (Luku a maiki a ondoo.) Te wi e piisii a wan fasi di fiti, da a de enke wan „kado” (Peleikiman 3:12, 13). A ná ala sama e du aseefi sani te den e piisii (Galasiyasama 6:4, 5). Ma winsi san wi e du fu piisii, u mu luku bun. Yesesi taki: „Pe i gudu de, na ape yu ati o de tu” (Mateyesi 6:21). U lobi u Kownu Yesesi, neen meke u wani denki, taki anga du sani a wan fasi di e soi taki na a Kownukondee fi en moo pelensipali gi u.Filipisama 1:9, 10.

MEKE MOITI FU YU Á LOBI GUDU

15, 16. (a) Fa gudu sa de enke wan tesi gi u? (b) San Yesesi taki fu gudu?

15 A omen sama e fende taki den mu abi den moo nyun koosi, telefon,  computer anga taa nyun sani. A sani ya e soi taki a goontapu gudu na a moo pelensipali sani gi den. Ma san na a moo pelensipali gi yu enke Kelesten? I mu akisi iseefi taki: ’Mi e teke ten pakisei sowtu nyun koosi, susu efuso sowtu nyun wagi de, moo a ten di mi e teke fu seeka gi komakandaa? Mi lai sani fu du te da mi ná abi ten fu begi efuso leisi Beibel?’ Efu wi á luku bun wi o lobi gudu moo Kelestesi. U mu pakisei san Yesesi be taki. A be taki: „Luku bun taki u ná abi takuudu” (Lukasi 12:15). Saide a taki a sani ya?

Efu u lobi gudu u ná o poi du ala san u man gi Yehofa

16 Yesesi taki „nawan sama poi dini tu Masaa”. A taki: „Yu á poi dini Gadu anga gudu na aseefi yuu.” Efu wi e poti pakisei a goontapu gudu, u ná poi du ala san u man gi Yehofa. Yesesi taki ’wi o buuse wan fu den, da u lobi a taawan, efuso wi o holibaka gi wan fu den, da u wisiwasi a taawan’ (Mateyesi 6:24). Wi a sondu sama, neen meke ala yuu wi abi fu meke moiti fu wi á du den sani di „a sikin wani”. Gudu a wan fu den sani ya.Efeisesama 2:3.

17. (a) Saide a taanga gi son sama fu den á si gudu enke a moo pelensipali sani? (b) San o yeepi u fu wi á lobi gudu?

17 Den sama di e denki enke fa libisama e denki e poti ala den pakisei a goontapu gudu. (Leisi 1 Korentesama 2:14.) Fu di den nai si sani kiin, meke den á sabi san bun anga san á bun (Hebrewsama 5:11-14). Dei fu dei den e kon moo lobi gudu anga den sani fu a goontapu. Winsi omen gudu den abi, noiti ai sai den (Peleikiman 5:10). A sani di o yeepi u fu wi á denki enke den sama ya, a te wi o leisi a Wowtu fu Gadu ala yuu. (1 Peitilisi 2:2). Yesesi be e teke ten pakisei den sani di sikiifi aini a Wowtu fu Gadu. Na a sani de yeepi en fu Saatan á koli en (Mateyesi 4:8-10). Efu wi á wani lobi gudu, da na aseefi sani u mu du. U mu wooko anga den sani di Yehofa e leli u tu. A sani ya o soi taki u lobi Yesesi moo goontapu gudu.

San na a moo pelensipali sani gi mi? (Luku paragraaf 18)

18. San i de kabakaba fu du?

18 Di Yesesi akisi Peitilisi efu a ’lobi en moo den sani ya’, a be wani soi en taki a dini di a be e dini Yehofa be mu de a moo pelensipali sani gi en. A nen fu Peitilisi wani taki „Wan siton”. A be de gingin aini a waaleiti enke wan siton (Toli 4:5-20). Useefi wani lobi Kelestesi anga u hii ati. Neen meke u mu luku bun fu wooko, piisii anga goontapu gudu á toon a moo pelensipali sani gi u. Den sani di wi e du mu soi taki leti enke Peitilisi wi e taki: „Masaa, i sabi taki mi lobi i.”

^ paragraaf 14 Luku a artikel „Yu abi prisiri na wan fasi di fiti?” di de aini A Waktitoren fu 15 oktober 2011, bladzijde 9-12, paragraaf 6-15.