Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2017

A lobi fi i á mu koo

A lobi fi i á mu koo

„Sama o kon moo ogii, neen meke gaanse sama ná o lobi taawan moo.”MATEYESI 24:12.

SINGI: 60, 135

1, 2. (a) Sama Yesesi be abi a pakisei di a taki a sani di sikiifi a Mateyesi 24:12? (b) Fa a buku Toli fu den Apostel e soi taki a lobi di gaanse Kelesten be abi gi Yehofa á be koo? (Luku a fowtow na a bigin.)

DI YESESI be de a goontapu a be taki san be o pasa aini den „lasiti dei fu goontapu”. A be taki: „Gaanse sama ná o lobi taawan moo” (Mateyesi 24:3, 12). Na a fosi peesi, a den Dyu fu a ten fu den apostel Yesesi be e taki. Den be e kai denseefi Gadu foluku, ma den be meke a lobi di den abi gi Gadu koo.

2 Ma gaanse fu de Kelesten aini a ten de á be de so. Den Kelesten ya be e „paati a bun nyunsu fu Kelestesi” fayafaya. Den be lobi Gadu, den baala anga sisa anga taa sama di á be sabi a waaleiti. Den be e meke moiti fu a lobi di den be abi gi Gadu á koo (Toli 2:44-47; 5:42). Ma a wan tyali sani taki wantu Kelesten be meke a lobi di den abi gi Gadu koo. Fa u du sabi a sani ya?

3. San a den sani di kande be meke a lobi fu son Kelesten kon koo?

3 Yesesi be taigi den Kelesten di be e tan a Efeise taki:  „I ná abi a lobi di i be abi biginbigin moo” (Openbaring 2:4). Kande den baala anga sisa fu Efeise be waka a den sama di be e tan aini a foto ya baka. Den sama ya á be e booko den ede anga taawan (Efeisesama 2:2, 3). Efeise a be wan gudu foto. Den sama di be e tan aini a foto ya, be e si goontapu gudu enke a moo pelensipali sani. Den be e libi wan hululibi tu, bika den á be e lesipeki den weiti fu Gadu. Den be e booko den ede anga piisii moo a lobi di den be mu lobi Gadu anga taa sama.

4. (a) Saide u sa taki a lobi fu a goontapu ya kon koo?(b) Kai dii fasi fa u mu taanga a lobi fu u?

4 A sani di Yesesi be taki fu den Kelesten fu a ten fu den apostel e pasa aini a ten ya tu. A lobi di sama abi gi Gadu aini a ten ya e koo dei fu dei. A omen miliyun sama e si enke a libisama olikanisâsi o losi den polobelema fu a goontapu ya. Den nai biibi taki a Gadu o du a sani ya. A lobi fu den sama di nai dini Yehofa e koo namo. A lobi fu a foluku fu Yehofa sa koo tu, leti enke a kemeente a Efeise. Neen meke wi o luku dii fasi fa u sa taanga a lobi fu u. Wi o luku: (1) a lobi di u lobi Yehofa, (2) a lobi di u lobi den leli fu Beibel, anga (3) a lobi di u lobi u baala anga sisa.

A LOBI DI U LOBI YEHOFA

5. Saide u mu lobi Gadu?

5 Sama u mu moo lobi? Yesesi taki: „’I mu lobi i Gadu Yehofa anga i hii ati, i hii libi anga ala i fusutan.’ A disi na a fosi anga a moo gaan weiti” (Mateyesi 22:37, 38). A lobi di u lobi Yehofa e yeepi u fu holi den weiti fi en, fu holidoo anga fu buuse den sani di ai buuse. (Leisi Psalm 97:10.) Ma Saatan anga en goontapu e meke moiti fu meke a lobi di wi abi gi Gadu koo.

6. San e pasa te wan sama á lobi Gadu moo?

6 A goontapu ya á sabi san a lobi. Pe fu den lobi Gadu a ’denseefi den lobi’ (2 Timotiyesi 3:2). Den e poti pakisei a den sani „di a ain wani, anga a poolo di wan sama e poolo anga den gudu fi en” (1 Yohanisi 2:16). Apostel Pawlesi be taki san sa pasa efu wi e poti pakisei a useefi namo. A be taki: „Te wan sama e poti pakisei a den sani di a sikin wani, da a o tyai dede gi en.” Saide? Fu di den sama di e du a sani ya, e toon Gadu feyanti (Romesama 8:6, 7). Sama di e poti ala den pakisei a moni, anga sama di e poti ala den pakisei a hululibi e kon si bakaten taki den á fende nawan wini fu den sani ya.1 Korentesama 6:18; 1 Timotiyesi 6:9, 10.

7. San sa meke a lobi di wan Kelesten abi gi Gadu kon koo?

7 A omen fu den sama di nai biibi taki Gadu de efuso di e biibi taki u na mongii paansu, e leli taawan taki Gadu á de. Den e meke sama denki taki a don sama efuso sama di á go a hei sikoo wawan e biibi taki Gadu de. Nownow sama e lesipeki koniman di e ondoosuku sani moo Gadu (Romesama 1:25). A sani ya sa miti  Kelesten tu. A sa meke u nai biibi Yehofa anga u hii ati moo. A sa meke a lobi di u lobi en kon koo tu.Hebrewsama 3:12.

8. (a) San sa meke a foluku fu Yehofa fi i booko-saka? (b) Fa Psalm 136 e gi u taanga-sikin?

8 Aini Saatan goontapu wi e libi, neen meke a omen sani sa meke u fii booko-saka (1 Yohanisi 5:19). Ma efu u booko-saka te da u lasi-ati, u biibi o swaki. U ná o lobi Gadu anga u hii ati moo. Kande omen sani e miti u fu di u gaandi. Kande wi abi moni polobelema efuso u siki. A kan tu taki wi e fii booko-saka fu di wi á poi du son sani di u wani du. Te sani á waka enke fa u be wani, wi e fii booko-saka tu. Winsi sowtu wan fu den polobelema ya miti i, noiti i mu si enke Yehofa fika i. Pakisei san sikiifi a Psalm 136:23. A taki: „Di sama soso u, a pakisei u. A bun-ati fi en a fu teego.” U sa biibi taki Yehofa e „aliki” u te wi e begi en fu a yeepi u.Psalm 116:1; 136:24-26.

9. San be e yeepi Pawlesi fi en biibi á swaki?

9 Apostel Pawlesi be e teke ten pakisei fa Yehofa yeepi en. Na a sani ya yeepi en fi en biibi á swaki. A sikiifi taki: „A Yehofa a mi yeepiman. Mi ná o feele. San libisama o poi du anga mi?” (Hebrewsama 13:6) Na a fitoow di Pawlesi be e fitoow Yehofa yeepi en fu holidoo di tesi be e miti en. A be e biibi taki Yehofa be o yeepi en winsi sani á be e go bun. Di a be de a sitaafu-osu seefi a be e gi den baala anga sisa taanga-sikin anga den biifi di a be e sikiifi gi den kemeente (Efeisesama 4:1; Filipisama 1:7; Fileimon 1). Winsi san be e miti Pawlesi, a be lobi Yehofa anga en hii ati. A be e biibi ’a Gadu di e toosutu sama te den de aini banowtu’ (2 Korentesama 1:3, 4). Fa u sa waka a Pawlesi baka?

Soi taki i lobi Yehofa (Luku paragraaf 10)

10. San o meke a lobi di wi abi gi Yehofa kon moo taanga?

 10 Pawlesi taki san a wan fu den sani di o yeepi u fu taanga u biibi. A taki: „Ná weli fu begi.” Bakaten a sikiifi taki: „Begi naamo” (1 Tesalonikasama 5:17; Romesama 12:12). Saide begi e yeepi u fu wi anga Yehofa toon bun mati? Te wi e begi, a taki wi e taki anga Yehofa. A sani ya e yeepi u fu u moo lobi en (Psalm 86:3). Te wi e taigi u Dda di de a hemel san de a wi ati, wi e kon moo koosube neen (Psalm 65:2). Te u si fa Yehofa e gi u san u begi en, da a sani de e meke u moo lobi en. Wi e biibi taki „Yehofa de koosube a den sama di e kai en” (Psalm 145:18). A biibi di wi e biibi taki Yehofa lobi u, o yeepi u fu losi den polobelema di wi abi nownow anga den wan di wi o abi aini a ten di e kon.

A LOBI DI U LOBI DEN LELI FU BEIBEL

11, 12. San o yeepi u fu moo lobi den sani di sikiifi aini Beibel?

11 Wi enke Kelesten lobi sani di tuu. A Wowtu fu Gadu e taki sani di tuu. Yesesi be taigi en Dda taki: „Na a wowtu fi i na a tuu” (Yohanisi 17:17). Efu wi á sabi san sikiifi aini a Beibel u ná o poi lobi en (Kolosesama 1:10). Ma moo de fanowdu. A sama di sikiifi Psalm 119 e yeepi u fu sabi san u mu du ete. (Leisi Psalm 119:97-100.) U mu e teke ten pakisei den sani di u leisi aini Beibel. Wi o moo lobi den leli fu Beibel te wi e teke ten pakisei den wini di wi e fende te u wooko anga den.

12 A psalm sikiifiman be taki: „Den sani di yu e taki e switi gi mi tongo, den switi moo oniki aini mi mofu!” (Psalm 119:103) Den buku di a olikanisâsi fu Gadu e meke, de enke switi nyanyan. Te wi e nyan wan sani di u lobi, wi e teke u ten, u nai feti nyan en fu a kaba gawgaw. A so u mu teke u ten sutudeli tu. Da den sani di wi e leli o „switi” gi u. A o moo makiliki gi u fu holi den sani di u leli a ede. Wi o man leli taawan den sani ya tu.Peleikiman 12:10.

13. San yeepi Yelemiya fu lobi a Wowtu fu Gadu? San pasa di a kon lobi a Wowtu fu Gadu?

13 Polofeiti Yelemiya be lobi a Wowtu fu Gadu. A be taki: „Di mi fende den wowtu fi i, mi nyan den. Neen mi bigin piisii aini mi ati. Mi e piisii tuutuu fu tyai i nen, Yehofa, a Gadu di e tii den engel” (Yelemiya 15:16). Yelemiya be e teke ten pakisei Gadu Wowtu. A be lobi en tu. A be e bigi gi en taki a be abi a gaandi fu tyai Yehofa nen anga fu paati a bosikopu fi en. Efu u lobi den tuu leli fu Beibel, a o bigi gi u taki wi a wan Kotoigi fu Yehofa. A o bigi u tu taki wi abi a gaandi fu paati a Kownukondee bosikopu aini den lasiti dei ya.

Soi taki i lobi den leli fu Beibel (Luku paragraaf 14)

14. San a wan taa sani di u sa du fu kon moo lobi den sani di sikiifi aini a Beibel?

14 San a wan taa sani di o yeepi u fu moo lobi den leli fu Beibel? U mu e go a komakandaa ala yuu, bika na ape Yehofa e leli u. A Wakititolen-sutudi di wi e koboloiki ala wiki fu sutudeli Beibel  a wan fu den sani di e yeepi u fu leli omen sani. Efu u wani fende wini fu a komakandaa ya, u mu seeka a fesi. U sa leisi ala den Beibeltekisi di sikiifi aini a artikel. Nownow u sa download A Wakititolen poti a u telefon efuso u tablet, bika a de aini omen tongo a jw.org anga a JW Library app. Den sani ya e yeepi u fu fende den tekisi makiliki. Winsi sowtu wan fu den buku ya wi e koboloiki, u mu holi a pakisei taki a te wi e leisi den tekisi di sikiifi aini a artikel, anga te wi e pakisei fa u sa wooko anga den, fosi wi o lobi den leli fu Beibel.Leisi Psalm 1:2.

A LOBI DI U LOBI U BAALA ANGA SISA

15, 16. (a) Sowtu weiti Yesesi gi wi te u luku san sikiifi a Yohanisi 13:34, 35? (b) Saide a lobi di u lobi u baala anga sisa e soi taki u lobi Gadu anga den leli fu Beibel?

15 A lasiti neti di Yesesi be de anga den apostel a taigi den taki: „Mi e gi u wan nyun weiti. U mu lobi useefi. Leti enke fa mi lobi u, a so u mu lobi useefi. A so ala sama o sabi taki wi a mi bakaman, te u lobi useefi.”Yohanisi 13:34, 35.

16 A lobi di u lobi u baala anga sisa e soi taki u lobi Yehofa. Efu wi á lobi Gadu, u ná o poi lobi u baala anga sisa. Efu wi á lobi u baala anga sisa, u ná o poi lobi Gadu. Apostel Yohanisi be taki: „Wan sama di á lobi en baala di ai si, á poi lobi Gadu di a nai si” (1 Yohanisi 4:20). A lobi di u lobi Yehofa anga u baala anga sisa e soi taki u lobi den leli fu Beibel. Saide? Na a lobi di u lobi den leli fu Beibel meke u lobi Gadu anga u baala anga sisa. Bika a dati Beibel e gi u taanga-sikin fu du.1 Peitilisi 1:22; 1 Yohanisi 4:21.

Soi taki i lobi i baala anga sisa (Luku paragraaf 17)

17. San a wantu fasi fa u sa soi taki u lobi taawan?

 17 Leisi 1 Tesalonikasama 4:9, 10. San a wantu fasi fa u sa soi taki u lobi den baala anga sisa fu a kemeente? Kande ai taanga gi den gaandi baala anga sisa fu kon a komakandaa. Kande wan uman di man dede kaba abi sama fanowdu fu seeka wan sani neen osu (Yakowbesi 1:27). Baala anga sisa di e fii booko-saka, di lasi-ati efuso di abi wan taa polobelema abi sama fanowdu di e booko den ede anga den. Den abi sama fanowdu fu gi den taanga-sikin tu (Odo 12:25; Kolosesama 4:11). Den sani di wi e taki anga den sani di wi e du e soi taki u lobi „den sama di wi anga den de na aseefi biibi”.Galasiyasama 6:10.

18. San o yeepi u te wi anga wan baala efuso wan sisa nai fusutan useefi?

18 Beibel taki „aini den lasiti dei” fu a ogii goontapu ya, omen sama be o giili. Den á be o booko den ede anga taawan (2 Timotiyesi 3:1, 2). Neen meke enke Kelesten u mu meke moiti ala yuu fu moo lobi Yehofa, en Wowtu anga u baala anga sisa. Fu di wi a sondu sama meke son leisi wi anga u baala efuso sisa ná o fusutan useefi. Ma fu di u lobi den, meke u ná o daaidaai fu taki switi anga den fu losi a polobelema (Efeisesama 4:32; Kolosesama 3:14). Noiti u mu meke a lobi di wi abi kon koo. Ma u mu meke moiti fu lobi Yehofa, en Wowtu anga u baala anga sisa anga u hii ati.