Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2016

San i mu holi a pakisei te i wani du wan sani?

San i mu holi a pakisei te i wani du wan sani?

„Meke moiti fu fusutan san Yehofa wani.”EFEISESAMA 5:17.

SINGI: 69, 57

1. San a wantu weiti di de aini Beibel? Sowtu wini wi o fende te wi e holi den?

YEHOFA poti den weiti fi en aini a Beibel gi u. Den e soi u fa a wani u tyai useefi. Wantu fu den weiti ya e soi u taki wi á mu dini taa gadu, wi á mu fufuu, duungu, efuso didon anga wan sama di wi anga en á toow (1 Korentesama 6:9, 10). A manpikin fu Yehofa di den e kai Yesesi, gi den bakaman fu en weiti tu. A taki: ’U mu meke sama fu ala kondee toon mi bakaman. U mu dopu den aini a nen fu a Tata, a Manpikin, anga a santa yeye. Leli den fa den mu du ala den sani fiya di mi taigi u. Mi o de anga u te enke a kaba fu a goontapu doo’ (Mateyesi 28:19, 20). Den sani di Yehofa anga Yesesi taigi u e tyai wini gi u. Den weiti fu Yehofa e leli u fa u mu solugu useefi anga fa u mu solugu u famii. Den e yeepi u fu son siki á kisi u. Den e yeepi u fu de koloku tu. Ma a moo pelensipali sani a taki te wi o holi den weiti fu Yehofa, wi o meke a piisii. Wan fu den sani di a taki u mu du na a peleikiwooko. Efu wi e aliki en a o belesi u.

2, 3. (a) Saide a Beibel ná abi weiti fu son sani? (b) Sowtu akisi wi o luku aini a artikel ya?

 2 Ma Beibel ná abi weiti fu ala sani. Weiti á de aini Beibel di e soi u finifini sowtu koosi u mu wei. A sani ya e soi taki Yehofa koni. Winsi sama nai wei koosi na aseefi fasi, winsi fa den koosi di de a modo e kengi, tokuso den sani di Beibel taki bun gi a ten ya ete. Boiti dati Beibel nai taigi u finifini sowtu wooko u mu du efuso san u mu du te wi e meke piisii. A nai taigi u tu san u mu du te u siki. Yehofa gi ala Kelesten anga osufamii edeman a faantiwowtu fu denseefi luku san den o du.

3 Ma a sani de wani taki Yehofa nai booko en ede anga den sani di wi e du, moomoo efu den sani de sa kengi u libi? A soso te u nai pasa den weiti fi en, da ai piisii anga iniiwan sani di wi e du? Fa mi o du sabi efu a o piisii anga a den sani di mi wani du?

DEN SANI DI WI E DU SA TYAI BUN EFUSO OGII GI TAAWAN

4, 5. Sowtu bakapisi den sani di wi e du sa tyai gi wi anga taawan?

4 Son sama fende taki den sa du san den wani. Ma u wani du sani di o meke Yehofa piisii. Neen meke fosi u du wan sani, u mu luku san Beibel e taki fu a sani de, da u du san a taki. Beibel e taigi u fa Gadu e si buulu. A á wani u koboloiki en. Efu u du san a taki wi o meke a piisii (Genesesi 9:4; Toli 15:28, 29). Te wi e begi Yehofa fu a yeepi u, da wi o man du san a lobi.

5 Den sani di wi e du sa tyai bun efuso ogii gi u. Te u du wan bun sani, da wi e kon moo koosube a Yehofa. Ma te u du wan sani di á bun, da wi anga en e poli. Taa sama e fii den sani di wi e du tu. Wi á wani du sani di o meke taawan aini a kemeente fii wan fasi efuso di sa meke den komoto a waaleiti. Wi á wani du sani di o meke den baala anga sisa á libi na a wan aini a kemeente moo tu. Neen meke fosi u du wan sani, u mu wegi en luku bun fosi.Leisi Romesama 14:19; Galasiyasama 6:7.

6. San u mu du te Beibel nai taki finifini fu a sani di u wani du?

6 Fa u mu tyai useefi te Beibel nai taki finifini fu a sani di u wani du? Pe fu u du san u lobi, u mu denki bun san o meke Yehofa piisii. Efu u du san a lobi, a o yeepi u fu sani waka bun.Leisi Psalm 37:5.

SAN YEHOFA WANI MI DU?

7. Te Beibel ná abi weiti fu a sani di u wani du, san o yeepi u fu sabi fa Yehofa wani u tyai useefi?

7 Ma fa wi o sabi san Yehofa lobi? Efeisesama 5:17 e taki: „Meke moiti fu fusutan san Yehofa wani.” Te Beibel ná abi weiti gi wan sani di u wani du, u mu meke moiti fu fusutan san Yehofa wani. San o yeepi u fu du a sani ya? U mu begi Yehofa da u meke a santa yeye fi en tii wi.

8. Fa Yesesi soi taki a be sabi san Yehofa wani?

8 Na ala yuu Yesesi be e meke moiti fu fusutan san Yehofa wani. Beibel e soi taki den tu leisi di Yesesi gi omen sama nyanyan a wan wonduu fasi, a begi en Dda fosi (Mateyesi 14:17-20; 15:34-37). Ma di Yesesi be de aini a sabana, di Saatan taigi en fu a meke siton  toon beele a á du a sani de winsi fa angii be e kii en. (Leisi Mateyesi 4:2-4.) A be sabi en Dda bun. A be sabi taki Yehofa á be o wani a koboloiki a santa yeye fu du sani gi enseefi. A be sabi taki en Dda be o yeepi en. A be o gi en den sani di a abi fanowdu tu.

9, 10. San o yeepi u fu sabi efu a sani di u wani du e kai anga Yehofa? Gi wan ageisitoli.

9 Leti enke Yesesi useefi sa sabi san u mu du, efu wi e meke Yehofa tii u. A Beibel taki: „Fitoow Yehofa anga i hii ati. Ná fitoow iseefi. Winsi sowtu pasi yu e waka, i mu poti pakisei neen, da a o seeka a pasi fi i” (Odo 3:5-7). Te wi e sutudeli a Beibel anga te wi e sabi fa Yehofa e denki, da wi o fusutan fa a wani u tyai iseefi, winsi Beibel nai taki finifini fu wan sani. O moo u sabi fa Yehofa e denki, o moo a o makiliki gi u fu du san a lobi. Wi o abi wan ati di safu.Eseikiyeli 11:19.

10 Kon u taki wan uman go bai sani a wenkii, neen a si wan moin susu. Ma a si tu taki a ná pikin dii a susu dii. Winsi en man á de ape, toku a sabi taki a á be o wani a bai a dii susu de. Fa a du sabi? Fu di en anga en man toow omen yali kaba. A sabi fa en man wani den wooko anga a moni di den abi. A so a de tu. Te u sabi fa Yehofa e denki anga te u sabi den sani di a du aini den ten di pasa. Wi o man sabi efu a sani di u wani du, e kai anga en.

 SAN O YEEPI I FU SABI FA YEHOFA E DENKI?

11. San u mu akisi useefi te wi e sutudeli efuso leisi Beibel? (Luku a faki: „ Te yu e leisi a Beibel i mu e akisi iseefi taki.”)

11 San o yeepi i fu sabi fa Yehofa e denki? A moo bun sani di o yeepi u, a te wi e leisi anga te wi e sutudeli a Beibel. Te wi e du a sani ya, u mu akisi useefi taki: ’San a sani ya e leli mi fu Yehofa? Saide a du a sani ya?’ Boiti dati, leti enke David, u mu e begi Yehofa fu a yeepi u fu sabi en moo bun. David be sikiifi taki: „Yehofa, soi mi den pasi fi i baa. Leli mi fa mi mu waka a den pasi fi i. Meke mi waka na a bun pasi fi i, da i leli mi. Bika a yu na a Gadu di e yeepi mi. Hii dei mi e fitoow i” (Psalm 25:4, 5). Te u leisi wan sani aini Beibel, da u mu akisi useefi taki: ’Fa mi sa wooko anga a sani ya? Mi sa koboloiki en aini mi osufamii, wooko, sikoo efuso a peleikiwooko?’ Te wi e sidon pakisei on ten u sa koboloiki den sani di u leli, da a o moo makiliki gi u fu si fa Yehofa wani u wooko anga den.

12. Fa den buku fu a olikanisâsi anga komakandaa e yeepi u fu sabi fa Yehofa e denki fu son sani?

12 Wan taa sani di o yeepi u fu sabi fa Yehofa e denki, a te wi e poti pakisei a den sani di a olikanisâsi fi en e leli u. Fosi u du wan sani u sa luku san a Saanantongo Watchtower Library anga a buku di den e kai Ondrosuku Bijbel moro fini—Gi Yehovah Kotoigi fu sabi fa Yehofa e denki fu a toli de. Boiti dati, te wi e poti pakisei a den piki di baala anga sisa e gi anga te wi e poti pakisei a den sani di wi e leli a den komakandaa wi o man du sani di e meke Yehofa piisii. Den sani ya o yeepi u fu sabi fa Yehofa e pakisei fu a sani di u wani du. A sani de o yeepi u fu du san Yehofa lobi. A o belesi u tu.

PAKISEI BUN FA YEHOFA E DENKI FOSI I DU WAN SANI

13. Saide wi o du sani di e tyai wini gi u te u sabi fa Yehofa e denki?

13 Meke u go luku fa u sa du sani di o tyai wini gi u, te wi e sidon pakisei fa Yehofa e denki. Kande i be sa wani pionili. Kande i bigin du sani taa fasi kaba fi i sa fende moo ten fu go aini a peleikiwooko. Ma yu á kaba sabi efu yu o de koloku anga moo weiniki moni, efuso taa sani di yu o fika fu a pioniliwooko ede. A tuu taki Beibel á taki a namonamo u mu pionili te wi e dini Yehofa. U sa dini en anga u hii ati tu te u de peleikiman. Ma toku Yesesi taki Yehofa e belesi den sama di e du sani fu a Kownukondee ede. (Leisi Lukasi 18:29, 30.) A Beibel e soi tu taki, Yehofa e piisii te wi e du ala san u poi fu dini en. A wani u piisii tu fu den sani di wi e du gi en (Psalm 119:108; 2 Korentesama 9:7). Te wi e begi fu den toli ya anga te wi sidon pakisei den, da a sani de o yeepi u fu du sani di o tyai wini gi u. Yehofa o belesi u tu.

14. San o yeepi u fu sabi fa Yehofa e si son koosi?

14 Meke u taki i lobi wan koosi. Ma i sabi taki wantu baala anga sisa fu a kemeente e si enke a koosi á fiti wan Kelesten. Ma Beibel nai taki sani fu a koosi de. Fa yu o sabi fa Yehofa e denki fu sowan koosi? Beibel taki: „Umansama mu e wei koosi a wan lesipeki fasi anga  wan fasi di e soi taki den de anga kiinkiin fusutan. Ma den mu moin denseefi anga den bun sani di den e du, enke fa a fiti umansama di taki den e dini Gadu” (1 Timotiyesi 2:9, 10). A sani di sikiifi na a tekisi ya a gi manengee anga umansama. Te wi abi sakafasi, wi o pakisei fa taawan e denki fu den koosi di wi e wei. Fu di u lobi u baala anga sisa meke wi á wani du wan sani di sa puu den a waaleiti (1 Korentesama 10:23, 24; Filipisama 3:17). Efu wi e poti pakisei a san sikiifi aini a Beibel, anga a fasi fa Yehofa e denki, wi o go e du sani di a lobi.

15, 16. (a) Fa Yehofa e si den sama di e pakisei fu didon anga wan sama di á de den toow paa? (b) San o yeepi u fu du sani di Yehofa lobi te wi e meke piisii? (c) San u mu du efu u wani du wan sani di o kengi u libi?

15 A Beibel e soi taki ai hati Yehofa tuutuu te sama e pakisei sani di á fiti anga te den e du sani di á fiti. (Leisi Genesesi 6:5, 6.) U sabi taki Yehofa á wani u pakisei sani di á bun. A á lobi te wi e pakisei fu didon anga wan sama di á de u toow paa. Te wi e pakisei den sani ya, efu wi á luku bun, wi o go du den tu. Neen meke Yehofa wani u pakisei sani di fiti. A apostel Yakowbesi be sikiifi taki: „A koni di e komoto a tapu soifili, a lobi freide, a nái de namonamo fu du san a wani, a de kabakaba fu aliki, a de kabakaba fu soi tyali-ati anga fu du bun, a á lobi a wan sama moo a taawan, a nái bidiigi tu” (Yakowbesi 3:17). A sani de soi taki Beibel e leli taki u mu koti pasi gi iniiwan sani di sa meke u angii fu du sani di á bun. Boiti dati, te u fusutan bun san Yehofa lobi anga san ai buuse, a o moo makiliki gi u fu sabi sowtu felon u mu luku, sowtu buku u mu leisi anga sowtu game u mu pee. A ná o de fanowdu fu u akisi taawan efu Yehofa lobi den sani de.

16 Son leisi a omen fasi de fu du wan sani, sondee fu pasa den weiti fu Yehofa. Ma te u mu du wan pelensipali sani di sa kengi u libi, a be o bun fu akisi wan owluman efuso wan taa Kelesten fu den poti wi a pasi (Titesi 2:3-5; Yakowbesi 5:13-15). Ma wi á mu akisi den fu den taigi u finifini san u mu du. U mu sidon denki san Beibel e taki, bakadati da u du san u si o piisii Yehofa (Hebrewsama 5:14). Pawlesi be taki: „Ala sama mu tyai en faantiwowtu.”Galasiyasama 6:5.

17. Sowtu wini wi o fende te wi e poti pakisei a fasi fa Yehofa e denki fosi u du wan sani?

17 Te wi e du sani di Yehofa lobi, wi anga en o toon moo bun mati. Boiti dati, a o belesi u (Yakowbesi 4:8). U biibi o kon moo taanga tu. Neen meke u mu e sidon pakisei den sani di wi e leisi aini a Beibel, da wi o sabi fa Yehofa e denki. Ala yuu wi o leli sani fu Yehofa di wi á be sabi ete (Yopu 26:14). Efu u meke moiti fu sabi en moo bun, wi o moo koni. Boiti dati, wi o du sani di a lobi anga sani di e tyai wini gi u (Odo 2:1-5). Libisama e kengi, ma Yehofa nai kengi. A Psalm sikiifi taki: „Ala yuu Yehofa e du san a taki. Ala yuu ai du san a abi a pakisei” (Psalm 33:11). A sani ya e soi taki efu u sabi Yehofa bun, wi o man du sani di e meke a fii bun.