Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2016

 A TOLI DI SIKIIFI A FESISE | TE WAN SAMA DI I LOBI DEDE

Den sama di dede o weki baka!

Den sama di dede o weki baka!

Kande i sabi ete taki u be taki fu wan uman den e kai Gail aini den fosi artikel. A be e si enke neen hii libi langa a be o kusumi di en man dede. Ma ai wakiti a ten te a o si Robert baka aini a nyun goontapu di Gadu paamisi u. A taki: „A tekisi di mi lobi, a Openbaring 21:3, 4.” A sikiifi ape taki: „Gadu o tan a den mindii. Den o de a foluku fi en, da a o de a Gadu fu den. A o dee den wataa ain fu den. Da dede, tyali, kee anga pen ná o de moo. Bika den fositen sani pasa gwe kaba.”

Gail taki: „A paamisi ya e gi mi taanga-sikin. Mi e pakisei den sama di lasi wan sama di den lobi, ma di ná abi a howpu fu si den sama ya baka.” Gail e du san ai biibi, fu di ai koboloiki gaanse fi en ten fu peleiki gi sama, fu den sa sabi taki Gadu paamisi taki dede ná o de moo.

Kande yu o taki: ’Mi nai biibi a sani ya.’ Ma luku san wan man di den e kai Yopu be taki. A be siki gaan siki (Yopu 2:7). Winsi fa a be e kai dede, tokuso a be e biibi taki Gadu abi a kaakiti fu weki en baka. A be taki: „Efi i be sa kibii mi aini geebi baa . . . Yu o kai mi, da mi o piki i. Yu o angii fu si mi, bika a yu ana meke mi” (Yopu 14:13, 15). Yopu be e biibi taki a Gadu fi en be o angii fu si en baka. A be e biibi taki a be o weki en baka.

Na a sani de Gadu o du dyonson. A o weki Yopu anga omen taa sama te a o meke a goontapu ya toon wan paladeisi (Lukasi 23:42, 43). A sikiifi aini Toli 24:15 taki ’Gadu o weki den dede sama baka’. Yesesi be taki: „Wi á mu foondoo di mi o taigi u a sani ya, wan ten o kon di ala den sama di de aini den geebi o yee en siten, da den o kon a doo” (Yohanisi 5:28, 29). Yopu o si fa a paamisi ya o kon tuu. En sikin o „moin moo di a be yonkuu”. A o „taanga baka enke di a be yonkuu” (Yopu 33:24, 25). Na aseefi sani o pasa anga ala den sama di e teke en fu bigi taki Gadu sete sani fu weki dedesama baka.

Efu wan sama di i lobi dede, da kande yu o tyali ete winsi fa i leisi den sani di u taki ya. Ma te i sidon pakisei den sani di Gadu paamisi u aini Beibel, yu o fende taanga-sikin fu holidoo.1 Tesalonikasama 4:13.

I wani sabi moo fu a toli ya? Kande yu e akisi iseefi taki: „Saide Gadu nai puu ogii anga pina?” Go a jw.org, da yu o fende taanga-sikin te i si fa Beibel e piki den sowtu akisi ya.