Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2016

 A TOLI DI SIKIIFI A FESISE | TE WAN SAMA DI I LOBI DEDE

San i mu du te i de anga buduufu na ati?

San i mu du te i de anga buduufu na ati?

A omen sowtu sani sama e taigi den sama di e tyali. Ma a ná ala den sani ya e yeepi. Son sama e taki, wi á mu kee efuso soi fa wi e fii te wi e tyali. Taawan taki u mu e kee efuso du sani fu soi taawan taki wi e tyali. Ma Beibel e leli u wan moo bun sani. Aini a ten ya ondoosukuman si taki a sani di Beibel taki e yeepi tuutuu.

Aini son kondee sama e si enke a á fiti te wan manengee e kee. Ma sen mu kisi u fu kee, winsi u de a sama ini? Ondoosukuman di e ondoosuku a fusutan fu libisama taki wan fu den sani di sama e du te den e tyali, a kee den e kee. Son leisi kee e gi i kaakiti fu holidoo winsi yu e kusumi te wan sama fi i dede. Ma son leisi te wan sama  nai kee, da a sani de sa tyai moo ogii gi en. Beibel nai holibaka gi den sama di e taki a á fiti te wan manengee e kee. Pakisei Yesesi. Anga ala fa a be sabi taki a be o weki Lasalesi baka, tokuso a kee di en mati Lasalesi dede!Yohanisi 11:33-35.

Son leisi wan sama ati e boon te wan sama fi en dede wanboowanboo. A omen sani sa meke a sama ati e boon. Son leisi a te wan sama di taawan e lesipeki e taki sani sondee fu denki. Mike di e tan aini Zuid Afiikan taki „A 14 yali namo mi be abi di mi dda dede. Ma na a beli fi en, wan fesiman fu wan fu den Anitii keliki taki Gadu abi bun sama fanowdu, neen ede meke ai teke den fuuku fuuku. * A sani de be gi mi boon ati, bika u be abi u dda taanga fanowdu. Anga ala fa a 63 yali pasa kaba, tokuso a sani ya e hati mi ete.”

Fa fu kosensi fonfon? Son leisi te wan sama fi i dede, da yu e sidon denki omen sani. Kande yu e pakisei taki: ’A á be o dede efi i be du wan sani.’ Kande a lasiti leisi di yu anga a sama be miti, yu anga en be kwali. Den sowtu sani ya e meke i kosensi moo fon i.

Efu yu e kusumi efuso yu ati e boon, da a de fanowdu fu taigi wan sama fa yu e fii. Go taki anga wan mati fi i di i sabi taki o aliki i. Wan mati di o taigi i taki na ala sama e fii so te wan sama fi en dede. Beibel taki: „Wan tuutuu mati o lobi i ala yuu. A de enke wan baala di meke fu yeepi i te i fuka.”Odo 17:17.

A moo bun mati di wan sama sa abi te ai tyali, a Yehofa, a Gadu di meke u. Taigi en ala san de a yu ati, bika „neen e solugu yu” (1 Peitilisi 5:7). Boiti dati, a paamisi den sama di e taigi en fa den e fii taki a o gi den „a freide fu Gadu di libisama á poi fusutan” (Filipisama 4:6, 7). Gi Gadu a okasi fu yeepi i anga a Wowtu fi en. Sikiifi den tekisi di e meke i fii bun. (Luku a  faki aini a artikel ya.) Puubei fu holi wantu fu den a ede. Te yu e sidon denki den sowtu tekisi ya, da den o toosutu i te yu á poi siibi a neti.Yesaya 57:15.

Bakabaka ya, wan man fu 40 yali di den e kai Jack, uman dede fu di a be abi kanker. Jack taki son leisi ai kusumi fu di ai fii enke neen wawan de. Ma te ai begi ai fende yeepi. A taki: „Te mi e begi Yehofa, noiti mi e fii enke a mi wawan de. Son leisi te mi dyombo a siibi mi nai poi siibi moo. Ma baka te mi leisi tekisi di e toosutu mi, da mi e sidon pakisei den sani di mi leisi. Bakadati mi e taigi Gadu fa mi e fii. Te mi du den sani de, da mi e fii bun, mi nai kusumi moo. Mi ati e sidon. A sani ya e yeepi mi fu siibi.”

Wan uman di den e kai Vanessa, mma dede fu di a be siki. A uman ya seefi si taki begi e yeepi. A taki: „Te sani e moo mi, da mi kai Gadu nen anga wataa ain. Yehofa e aliki den begi fu mi. Ala yuu ai gi mi a kaakiti di mi abi fanowdu.”

Son dataa di e yeepi sama di e kusumi, e gi den sama taanga-sikin fu go yeepi taawan di de a nowtu. Te den e yeepi taawan da a sani de e meke den fii moo bun. Den ná o kusumi so moo (Toli 20:35). A omen Kelesten di e kusumi si taki te den e yeepi taawan da den e fende toosutu.2 Korentesama 1:3, 4.

^ paragraaf 5 Beibel nai leli sama a sani ya. Beibel e kai dii sani di e meke wi e dede.Peleikiman 9:11; Yohanisi 8:44; Romesama 5:12.