Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  mei 2016

A Beibel e kengi i libi ete?

A Beibel e kengi i libi ete?

„U mu kengi a fasi fa wi e denki, da u libi seefi o kengi.”ROMESAMA 12:2.

SINGI: 61, 52

1-3. (a) San a wantu sani di taanga fu kengi baka te u dopu? (b) San wi e akisi useefi te a taanga gi u fu kengi son manii? (Luku a fowtow na a bigin.)

A OMEN yali Kevin be e dobel. A be e somoko takuu tabaka, a be e diingi pasa maiki tu. [1] (Luku a pisi ete wan pelensipali sani.) Di a leli sabi Yehofa, a be wani toon en mati. Ma a be mu kengi a fasi fa a be e libi. A be poi kengi, fu di Yehofa anga a Beibel yeepi en.Hebrewsama 4:12.

2 Baka di Kevin dopu, a be mu meke moiti fu kengi a fasi fa a be e de, fu be toon wan moo bun Kelesten (Efeisesama 4:31, 32). En ati be e boon gaw. A be foondoo di a si fa a be taanga gi en fu holi enseefi. A taki a moiti di a be e meke fi en ati á boon gaw be taanga, moo a moiti di a be mu meke fu tapu anga den taa sani di a be e du fosi a dopu! Ma a be poi kengi fu di a be e begi Yehofa fu yeepi en. A be e ondoosuku Beibel tu.

 3 Fosi u dopu, ala u be mu kengi a fasi fa u be e libi, fu u be sa libi enke fa Beibel e soi u. Ma te anga now wi e si taki u mu kengi wantu pikin sani ete fu u sa de enke Gadu anga Yesesi (Efeisesama 5:1, 2; 1 Peitilisi 2:21). Kande wi e si taki u lobi kuutu efuso kande u si taki u lobi taki sama sani. Efuso kande wi e feele fu du san bun, fu di wi e booko wi ede anga san sama o taki efuso denki. Kande wi e meke moiti omen yali kaba fu kengi u manii, ma tokuso wi e meke denseefi fowtu ala yuu. Kande wi e akisi useefi taki: ’Saide a taanga gi mi fu kengi den manii ya? San mi mu du fu toon wan moo bun sama enke fa Beibel taki?’

I POI MEKE YEHOFA PIISII

4. Saide a ná ala yuu a makiliki fu meke Yehofa piisii?

4 U lobi Yehofa, neen meke anga u hii ati u wani du sani fu meke a piisii. Ma a ná ala yuu a makiliki, bika wi a sondu sama. A apostel Pawlesi be taki: „Mi wani du bun, ma mi ná abi a kaakiti fu du en.” Son leisi a so wi e fii.Romesama 7:18; Yakowbesi 3:2.

5. San u be mu du fosi u dopu? Ma san e taanga gi u anga ala fa u dopu?

5 Fosi u toon Kotoigi u be mu tapu anga omen sani di Yehofa e buuse (1 Korentesama 6:9, 10). Ma winsi fa u tapu anga den sani de, wi a sondu sama ete (Kolosesama 3:9, 10). Neen meke wi e meke fowtu ete, winsi omen yali u dopu. Son leisi wi e fii fu du sani di á bun. Son leisi ai taanga gi u fu fika son manii di á bun. Kande a omen yali wi e meke moiti fu fika a manii de.

6, 7. (a) Saide meke wi anga Yehofa sa toon mati, winsi fa wi a sondu sama? (b) Saide wi á mu daaidaai fu akisi Yehofa fu a gi u paadon?

6 Winsi fa wi a sondu sama, tokuso u poi toon Gadu mati. U sa dini en enke fa a wani tu. Ná feegete saide i toon Yehofa mati. Neen be si wan bun sani aini yu ati. Neen be wani i kon sabi en (Yohanisi 6:44). A be sabi taki yu a wan sondu sama di e meke fowtu. Ma tokuso Yehofa be wani i toon en mati.

7 Yehofa lobi u te, neen a du wan gaan bun gi u. A sende en Manpikin kon a goontapu fu pai fu u sondu (Yohanisi 3:16). Neen meke te u meke wan fowtu, u sa akisi Yehofa fu a gi u paadon. Fu di Yesesi dede gi u, meke u sabi taki Yehofa o gi u paadon, da wi anga en ná o poli (Romesama 7:24, 25; 1 Yohanisi 2:1, 2). Holi a pakisei taki Yesesi dede gi den sama di e soi taki den ogii di den du e hati den. Neen meke efu u si taki u du wan gaan sondu, u mu begi Yehofa fu a gi u paadon. Efu wi á be o begi en fu gi u paadon, da a leti enke wi á wani wasi wi ana te a tyobo. Ai bigi gi u taki Yehofa gi wi a okasi fu wi anga en toon mati winsi fa wi a sondu sama!Leisi 1 Timotiyesi 1:15.

8. Saide meke wi á mu si den manii fu u di á bun lawlaw sani?

8 Te u si taki u mu kengi son manii fu u, wi á mu si a sani de enke wan lawlaw sani. Yehofa taigi u kiin fa a wani den mati fi en tyai denseefi (Psalm 15:1-5). Neen meke efu u wani toon Yehofa mati, u mu e meke moiti fu de enke Yehofa anga en Manpikin. U mu feti anga den fii di á bun, da kande wi o poi tapu  anga son wan fu den. Winsi on langa u dopu kaba, u mu e meke moiti naamo fu toon wan moo bun sama.2 Korentesama 13:11.

9. Fa u du sabi taki u man kengi u manii naamo?

9 A apostel Pawlesi be taigi den Kelesten taki: „U mu kengi. Wi á mu de enke fa u be de fosi moo. Wi á mu du den sani di u be e du fosi moo tu. Bika a fasi fa u be de fosi á be bun, u be e meke u fii koli u. U mu e meke moiti fu denki taa fasi. U mu kengi u manii, fu u sa de enke fa Gadu wani, dati wani taki bun ati sama di ala yuu e du san Gadu taki” (Efeisesama 4:22-24). A sani ya e soi taki u mu e meke moiti naamo fu denki taa fasi, da wi o man kengi u manii. Neen meke winsi on langa wi e dini Yehofa kaba, u ná o kaba leli sani fu den manii fi en. Beibel e yeepi u tu fu kengi a fasi fa wi e denki, fu u sa de enke Yehofa.

SAIDE A Á MAKILIKI FU KENGI SON MANII?

10. San u mu du efu u wani Beibel yeepi u fu kengi? San u sa akisi useefi?

10 Ala u wani wooko anga san Beibel e leli u. Ma u mu e meke moiti naamo efu u wani kengi. Saide u mu meke a moiti de? Kande wan sama sa taki: ’Efu Yehofa puu den sondu fii fu mi, da a moo makiliki gi mi fu abi denseefi manii fi en.’

11-13. Saide Yehofa wani u fika den manii fu u di á bun?

11 Te u luku ala den sani di Yehofa meke a hemel anga goontapu, da wi e si kiin taki Yehofa abi a kaakiti fu du  san a wani. Te i luku a san di a meke, da yu e si a kaakiti di Yehofa abi. A san abi omen kaakiti. A pikinso fu a faya fi en namo de fanowdu fu meke libisama, den meti anga den bon tan a libi (Psalm 74:16; Yesaya 40:26). Yehofa e gi den sama di e dini en a goontapu ya kaakiti tu te den abi en fanowdu (Yesaya 40:29). Den sani ya e soi taki a á taanga gi Yehofa fu puu den manii fu u di á bun. A sa yeepi u fu wi á pakisei sani di á fiti tu. Ma saide a nai du a sani ya?

12 Yehofa nai dwengi u fu u dini en. Ma a gi u a okasi fu useefi luku efu u wani libi enke fa a wani. Te wi e meke moiti fu libi enke fa a wani, da wi e soi en taki u lobi. Boiti dati, wi e soi taki u wani du sani fu meke a piisii. Saatan taki Yehofa ná abi a leti fu tii hemel anga goontapu. Ma te wi e aliki Yehofa, wi e soi taki u wani Yehofa tii wi. Ai bigi gi Yehofa tu te ai si den moiti di wi e meke fu aliki en (Yopu 2:3-5; Odo 27:11). Te wi e meke moiti fu feti anga fii di á bun winsi fa a muliki, wi e soi Yehofa taki u wani dini en anga u hii ati. Wi e soi tu taki u wani a tii wi.

13 Yehofa taki u mu meke moiti fu abi denseefi manii fi en (Kolosesama 3:12; leisi 2 Peitilisi 1:5-7). A wani wi e dwengi useefi fu wi á pakisei sani di á fiti (Romesama 8:5; 12:9). Te wi e meke moiti fu kengi u manii, da wi o piisii te u si taki sani e go enke fa u wani.

MEKE A WOWTU FU GADU YEEPI I FU KENGI NAAMO

14, 15. San u mu du efu u wani abi den manii di Yehofa lobi? (Luku a faki „ Beibel anga begi kengi den libi.”)

14 San u mu du fu abi den manii di Yehofa lobi? Ná sabi wawan u mu sabi sowtu manii u mu kengi, ma u mu meke Gadu tii wi. Romesama 12: 2 taki: „Ná libi enke den sama fu a goontapu moo. Ma u mu kengi a fasi fa wi e denki, da u libi seefi o kengi. Da wi o sabi san na a pasi fu Gadu di bun, di e meke a piisii, di ná abi nawan fowtu.” Efu u wani sabi san Yehofa wani, da u mu wooko anga den sani di a gi u. U mu leisi Beibel ala dei. Boiti dati, u mu e sidon denki den sani di u leisi, da u begi Yehofa fu a gi wi en santa yeye (Lukasi 11:13; Galasiyasama 5:22, 23). Den sani ya o yeepi u fu sabi san Yehofa lobi. Den o yeepi u tu fu denki enke en.  Te wi e du den sani ya, da den sani di wi e denki, den sani di wi e taki, anga den sani di wi e du o meke Yehofa piisii. Ma winsi fa wi o du ala den sani ya, wi o abi fu feti anga den sondu fii fu wi ete.Odo 4:23.

Suku tekisi aini Beibel efuso artikel aini den buku fu u di o yeepi i fu feti anga den sondu fii di yu abi. Te a langa i mu e leisi den (Luku paragraaf 15)

15 Boiti taki u mu leisi Beibel ala dei, u mu e leisi den buku tu di e yeepi u fusutan a Beibel. Wantu fu den buku ya na A Wakititolen anga a Ontwaakt! A omen artikel de aini den buku ya di e soi u san o yeepi u fu abi denseefi manii di Yehofa abi, efuso san o yeepi u fu feti anga den sondu fii fu u. U sa fende artikel aini tu di e taki fu wan polobelema di wi abi. U sa kibii den tekisi anga den artikel ya a wan peesi, da wi e leisi den te a langa.

16. Saide wi á mu fii booko-saka te u nai go a fesi enke fa u wani?

16 Ai teke ten fu abi den manii fu Yehofa. Neen meke i mu abi pasensi efi i si enke i nai go a fesi enke fa i be wani. Biginbigin kande yu o abi fu dwengi iseefi fu du san Beibel e taki. Ma o moo yu e denki efuso e du sani enke fa Yehofa wani, o moo a o makiliki gi i fu denki enke fa Yehofa e denki. A o makiliki gi i tu fu du sani enke fa a wani.Psalm 37:31; Odo 23:12; Galasiyasama 5:16, 17.

PAKISEI DEN MOIN SANI DI GADU PAAMISI U

17. Fa sani o waka gi u aini a ten di e kon efu wi á gwe fika Yehofa?

17 Wi e angii fu a ten te u ná o abi sondu moo. A ten de wi o man dini Gadu fu teego. U ná o fii fu du sani di á bun moo. A o moo makiliki gi u tu fu de enke Yehofa. Ma u poi dini Yehofa nownow, fu di a meke Yesesi dede gi u. Winsi fa wi a sondu sama, tokuso u sa meke Yehofa piisii te wi e meke moiti fu kengi, anga te wi e du san ai leli u aini Beibel.

18, 19. Fa u du sabi taki Beibel poi yeepi u fu kengi?

18 Kevin be e du ala san a poi fu holi enseefi te en ati boon. A be e sidon denki den sani di a be e leisi aini Beibel. A be e meke moiti tu fu kengi a fasi fa a be e libi. Boiti dati, a be e aliki te baala anga sisa be e taki anga en fu yeepi en. Winsi fa a teke wantu yali fu kengi, tokuso a be toon wan dinali bakaten. A 20 yali kaba a de enke owluman aini a kemeente. Ma a sabi taki a mu e feti anga den sondu fii fi en ete.

19 Leti enke Kevin, u poi kengi tu. Efu wi e meke moiti fu kengi, wi anga Yehofa o toon bun mati (Psalm 25:14). Te wi e du ala san u man fu meke a piisii, a o yeepi u. U sa abi a biibi taki a Beibel poi yeepi u fu kengi tuutuu.Psalm 34:8.

^ [1] (paragraaf 1) Den kengi a nen.