Skip to content

Skip to table of contents

 SUTUDI-ARTIKEL 11

U mu aliki Yehofa

U mu aliki Yehofa

„Disi a mi Manpikin . . . U mu aliki en.”​—MAT. 17:5.

SINGI 89 Aliki a Gadu fu u

SAN WI O LELI *

1-2. (a) Fa Yehofa be e taki anga sama? (b) San wi o luku aini a artikel ya?

YEHOFA lobi taki anga wi. Aini a ten di pasa Yehofa be e koboloiki polofeiti, engel, anga en Manpikin Yesesi Kelestesi fu taki anga wi (Am. 3:7; Gal. 3:19; Openb. 1:1). Aini a ten ya, Yehofa e taki anga wi anga a Beibel. A gi wi a Beibel fu di a wani u sabi fa ai denki. A wani u sabi fa u mu libi tu.

2 Di Yesesi be de a goontapu Yehofa taki dii leisi komoto a hemel. Meke u luku san Yehofa be taki ala den dii leisi ya. Wi o luku tu san u sa leli fu den sani di a taki, anga sowtu wini u sa fende fu den.

„YU A MI MANPIKIN, MI LOBI I”

3. Te i leisi Malikisi 1:9-11, da san Yehofa taki di Yesesi dopu? Sowtu pelensipali sani den wowtu ya e leli u?

3 Malikisi 1:9-11 e taki fu a fosi leisi di Yehofa taki komoto a hemel. (Leisi en.) A taki: „Yu a mi Manpikin, mi lobi i. Yu e meke mi piisii.” Yesesi be musu piisii di a yee en Dda taigi en taki a lobi en. A be musu piisii tu di a yee en Dda taki ai meke a piisii. Den sani di Yehofa taki e leli u dii pelensipali sani fu Yesesi. A fosiwan: Yesesi a Gadu Manpikin. Du fu tu: Yehofa lobi en Manpikin. Anga du fu dii: Yesesi e meke Yehofa piisii. Meke u luku den dii sani ya.

4. Fa Yesesi toon Gadu Manpikin di a dopu?

4 „Yu a mi Manpikin.” Yehofa be wani soi anga a sani ya taki Yesesi be toon en Manpikin a wan taa fasi. Di  Yesesi be de a hemel en a be Gadu Manpikin kaba. Ma di a dopu Gadu salufu en anga santa yeye. A be abi a howpu fu go tii enke Kownu anga Edeman fu den pilisite fu Gadu Kownukondee a hemel (Luk. 1:31-33; Heb. 1:8, 9; 2:17). Neen meke di Yesesi dopu, Yehofa be poi taki „yu a mi Manpikin”.​—Luk. 3:22.

Wi e fii bun te sama e gi u taanga-sikin anga te den e gafa u (Luku paragraaf 5) *

5. Fa u sa waka a Yehofa baka te u luku fa a be soi taki a lobi en Manpikin anga a fasi fa a gafa en?

5 „Mi lobi i.” A fasi fa Yehofa be soi taki a lobi en Manpikin anga a fasi fa a gafa en, e leli u taki u mu e suku okasi fu gi taawan taanga-sikin (Yoh. 5:20). Wi e fii bun te wan sama di u lobi e soi taki a lobi u, anga te ai gafa u fu den bun sani di wi e du. A so u baala anga sisa aini a kemeente anga den sama aini wi osufamii e fii bun tu, te wi e soi taki u lobi den anga te wi e gafa den. Te wi e gafa taawan wi e yeepi den fu den biibi kon moo taanga. Wi e yeepi den fu dini Yehofa anga den hii ati tu. Mma anga dda mu e gafa den pikin fu den. Te mma anga dda e gafa den pikin anga te den e soi taki den lobi den, da a sani ya e yeepi den pikin fu go a fesi.

6. Saide u sa fitoow Yesesi Kelestesi?

6 „Yu e meke mi piisii.” Den wowtu ya e soi taki Yehofa be e fitoow Yesesi. Yehofa be sabi taki Yesesi be o du san a wani anga en hii ati. Fu di Yehofa be e fitoow en Manpikin, meke useefi sa fitoow Yesesi taki a o meke den sani di Gadu paamisi u kon tuu (2 Kor. 1:20). Te u luku a fasi fa Yesesi tyai enseefi di a be de a goontapu, da a sani ya e yeepi u fu moo meke moiti fu waka neen  baka. Leti enke fa Yehofa be e fitoow Yesesi, a so ai fitoow den sama di e dini en taki den o tan meke moiti fu waka a Yesesi baka.​—1 Peit. 2:21.

„U MU ALIKI EN”

7. Enke fa Mateyesi 17:1-5 e soi, da on ten Yehofa taki komoto a hemel? San a taki a leisi ya?

7 Leisi Mateyesi 17:1-5. Du fu tu leisi di Yehofa taki komoto a hemel a di Yesesi be ’kengi leti a den apostel fi en fesi’. Yesesi be kai Peitilisi, Yakowbesi anga Yohanisi fu go anga en a wan hei mongo. Di den de ape, neen wan foondoo sani pasa. Den si wan fisyun. Yesesi fesi be e beenki enke a san, ala en koosi be e beenki tu. Den si Mosesi anga Eliya e taki anga Yesesi fu a dede di a be o dede anga a weki di a be o weki baka. Den dii apostel „be e siibi”, ma di den weki neen den si a fisyun (Luk. 9:29-32). Baka dati wan woluku tapu den neen den yee Gadu siten aini a woluku. Leti enke fa Yehofa be du kaba di Yesesi be dopu, a soi baka taki a lobi Yesesi di a taki: „Disi a mi Manpikin, mi lobi en, ai meke mi piisii.” Ma a leisi ya a taki tu: „U mu aliki en.”

8. Sowtu wini Yesesi anga den disipel fi en be fende fu a fisyun di den be si?

8 A fisyun ya be e soi a gaandi anga a makiti di Gadu be o gi Yesesi enke Kownu fi en Kownukondee. A sani ya be musu gi Yesesi taanga-sikin fu pasa den tesi di be o miti en. A fisyun ya be taanga a biibi fu den disipel tu fu pasa den tesi di be o miti den. A be gi den taanga-sikin fu du a taanga wooko di den be o du bakaten. Wan sani fu 30 yali baka di a sani ya pasa, Peitilisi be man membee ete fa „den sani di den polofeiti be taki” be taanga en biibi.​—2 Peit. 1:16-18.

9. San Yesesi be leli den bakaman fi en di a be de a goontapu?

9 „U mu aliki en.” Yehofa taigi u kiin taki a wani wi aliki en Manpikin. San Yesesi be e leli sama di a be de a goontapu? Yesesi be leli den omen pelensipali sani. A be leli den bakaman fi en fa den mu du a peleikiwooko. A omen leisi a taigi den taki den mu de na ain (Mat. 24:42; 28:19, 20). A be taigi den taki den mu du ala san den man fu pasa a sumaa doo. A taigi den tu taki den á mu gi abaa (Luk. 13:24). Yesesi soi den bakaman fi en taki den mu lobi denseefi, den mu e libi na a wan, den mu e holi den weiti fi en tu (Yoh. 15:10, 12, 13). Leti enke fa den sani di Yesesi be leli den bakaman fi en be e tyai wini gi den, a so den sa tyai wini gi wi aini a ten ya.

10-11. Fa u sa soi taki wi e aliki Yesesi?

10 Yesesi be taki: „Ala sama di e aliki a tuu, e aliki san mi taki” (Yoh. 18:37). Wi e soi taki wi e aliki Yesesi te wi e „gi taawan paadon anga u hii ati te den du wan hati sani anga u” (Kol. 3:13; Luk. 17:3, 4). Wi e soi tu taki wi e aliki Yesesi te wi e „paati a wowtu fayafaya te sani e go bun, anga te sani nai go bun”.​—2 Tim. 4:2.

11 Yesesi be taki: „Den sikapu fu mi e aliki mi” (Yoh. 10:27). Den bakaman fu Yesesi nai yee san a taki namo, ma den e du san a taki tu. Den nai meke den „booko-ede fu a libi” puu den pakisei a den sani di Yesesi leli den (Luk. 21:34). Winsi tesi e miti den, den e si a du di  den mu du san Yesesi taki enke a moo pelensipali sani. A omen tesi e miti den baala anga sisa fu u. Lanti e sooto son wan fu den, taawan e pina fu di sani nai go bun aini a kondee. Boiti dati son wan fu den e tan a peesi pe gaan ogii enke seke doti anga gaan winta e pasa. Ma winsi san e miti den, den nai gwe fika Yehofa. Yesesi be taki: „A te wan sama sabi den weiti fu mi, te ai du san a weiti taki, da a lobi mi. Nda o lobi a sama di lobi mi.”​—Yoh. 14:21.

A peleikiwooko e yeepi u fu du san Yesesi taki (Luku paragraaf 12) *

12. San a wan taa fasi fa u sa soi taki wi e aliki Yesesi?

12 Wan taa fasi fa u sa soi taki wi e aliki Yesesi, a te wi e wooko makandaa anga den baala di e teke fesi (Heb. 13:7, 17). Aini den yali di pasa a omen sani kengi aini a olikanisâsi. Wantu fu den sani di kengi, na a fasi fa wi e peleiki, a fasi fa den mindiiwiki komakandaa sete, a koboloiki di wi e koboloiki telefon anga taa sani fu gi leli, anga a fasi fa wi e koboloiki a moni di sama e gi fu meke efuso seeka Kownukondee zaal. Den kengi ya e tyai wini gi u. Den e soi taki a olikanisâsi fu Yehofa lobi u. Efu wi e meke moiti fu wooko anga den sani di den baala e leli u, Yehofa o belesi u.

13. Sowtu wini wi o fende te wi e aliki Yesesi?

13 Wi e fende wini te wi e wooko anga den sani di Yesesi leli u. Yesesi be taigi den bakaman fi en taki den sani di ai leli den be o gi den kaakiti. A taigi den taki: „Yu o fende kaakiti baka. Bika mi tyatyali safu. Mi lai feke” (Mat. 11:28-30). A Wowtu fu Gadu e gi u taanga-sikin, ai yeepi u fu du sani anga koni. Wantu buku fu Beibel di e gi u taanga-sikin, a Mateyesi, Malikisi, Lukasi, anga Yohanisi di e taki fu a libi fu Yesesi anga a peleikiwooko fi en (Ps. 19:7; 23:3). Yesesi be taki: „A den sama di e yee a wowtu fu Gadu, da den du san a wowtu e taki o de koloku!”​—Luk. 11:28.

’MI O GI MI NEN GAANDI’

14-15. (a) Enke fa Yohanisi 12:27, 28 e soi, da san a du fu dii leisi di Yehofa taki komoto a hemel? (b) Saide u sa taki den sani di Yehofa taki be yeepi Yesesi fu holidoo?

14 Leisi Yohanisi 12:27, 28. A Beibel buku Yohanisi e taki fu du fu dii leisi di Yehofa taki komoto a hemel. Wantu dei fosi Yesesi dede, a be de a Yelusalem fu  holi a Paskafesa. A be taki: „A hebi gi mi tuutuu.” Neen a begi taki: „Nda, gi a nen fi i gaandi.” Di a begi neen a yee en Dda taki komoto a hemel taki: „Mi be gi mi nen gaandi kaba. Ma mi o gi en gaandi baka.”

15 Yesesi be e booko en ede fu di a be abi fu soi taki a ná o gwe fika Yehofa. A be sabi taki den be o pina en a wan ogii-ati fasi fosi den be kii en (Mat. 26:38). Ma a moo pelensipali sani gi Yesesi, na a gi di a be wani gi a nen fi en Dda gaandi. Den be lei gi Yesesi taki a kosi Gadu, neen meke a be e si enke a dede di a be o dede be o gi Gadu poli nen. A be musu fii bun di en Dda taki anga en! A be sa biibi taki winsi san pasa, en Dda be o gi a nen fi en gaandi. Den sani di en Dda taigi en be gi en taanga-sikin fu holidoo. A ten de, kande a Yesesi wawan be fusutan san Yehofa be taki, ma tokuso Yehofa meke den sikiifi den sani di a taki aini a Beibel gi ala u.​—Yoh. 12:29, 30.

Yehofa o hei a nen fi en, a o kibii a foluku fi en tu (Luku paragraaf 16) *

16. Saide wi e booko wi ede te sama e gi Gadu poli nen?

16 Leti enke Yesesi kande useefi e booko wi ede taki sama e gi Yehofa poli nen. Kande sama e libi ogii anga wi enke fa den be e du anga Yesesi. Kande wi e booko wi ede anga den lei toli di sama e paati fu wi anga a poli di den toli  ya sa poli a nen fu Yehofa anga en olikanisâsi. Te den sani ya e pasa, den sani di Yehofa be taigi en Manpikin sa gi u taanga-sikin. U ná abi fu booko wi ede tumisi te sama e suku fu poli a nen fu Yehofa anga en olikanisâsi. U sa biibi taki a „freide fu Gadu di libisama á poi fusutan o kibii wi ati anga u fusutan anga yeepi fu Yesesi Kelestesi” (Filip. 4:6, 7). Yehofa o santa a nen fi en, winsi san o pasa. A o meke a Kownukondee fi en puu a ogii nen di Saatan anga den bakaman fi en e gi a foluku fi en.​—Ps. 94:22, 23; Yes. 65:17.

WI E FENDE WINI TE WI E ALIKI YEHOFA AINI A TEN YA

17. Enke fa Yesaya 30:21 e soi, da fa Yehofa e taki anga wi aini a ten ya?

17 Yehofa e taki anga wi aini a ten ya tu. (Leisi Yesaya 30:21.) Winsi fa wi á poi yee en siten komoto a hemel, tokuso a gi wi en Wowtu Beibel. Te wi e leisi Beibel wi e si fa Yehofa wani u tyai useefi. Boiti dati Yehofa e tii „a koni futuboi di u sa fitoow” anga en santa yeye fu a sa gi a foluku fi en nyanyan na a yuu di den abi en fanowdu (Luk. 12:42). Wi abi buku, felon, poku, anga taa sani di e yeepi u fu taanga u biibi.

18. Sowtu taanga-sikin yu e fende fu den sani di Yehofa be taigi en Manpikin?

18 Wi á mu feegete den sani di Yehofa be taigi Yesesi di a be de a goontapu! Den sani di a be taki sikiifi aini Beibel fu yeepi u fu biibi taki sani nai moo Yehofa. Sani á de di Saatan anga den bakaman fi en man du anga wi di Yehofa á poi seeka baka. Efu wi e du ala san u poi fu aliki Yehofa, wi o man pasa den tesi di e miti u nownow anga den wan di o miti wi aini a ten di e kon. Beibel taki: „U mu holidoo, da te u du san Gadu wani, wi o fende san a paamisi u.”​—Heb. 10:36.

SINGI 4 Yehofa, mi a yu sikapu

^ paragraaf 5 Di Yesesi be de a goontapu, a dii leisi Yehofa taki komoto a hemel. Wan fu den leisi di Yehofa taki komoto a hemel, a taigi den bakaman fu Kelestesi taki den mu aliki en Manpikin. Yehofa e koboloiki den leli fu Yesesi di sikiifi aini Beibel anga en olikanisâsi fu taki anga u. A artikel ya o soi u sowtu wini wi o fende te wi e aliki Yehofa anga Yesesi.

^ paragraaf 52 SAN WI E SI A DEN FOWTOW: Wan owluman e luku fa wan dinali e yeepi kiin a komakandaa peesi anga fa ai du en wooko na a buku kasi, neen a gafa en.

^ paragraaf 54 SAN WI E SI A DEN FOWTOW: Wan toowpaa aini Siyera Leyon e gi wan fisiman a pampila di wi e kai sama fu kon a komakandaa.

^ paragraaf 56 SAN WI E SI A DEN FOWTOW: Kotoigi aini wan kondee pe lanti tapu a wooko fu wi e holi komakandaa aini wan osu. Den á wei koosi di u gwenti wei go a komakandaa fu sama poti pakisei a den.