Skip to content

Skip to table of contents

 SUTUDI-ARTIKEL 12

U mu soi taki wi e fii gi taawan

U mu soi taki wi e fii gi taawan

„Ala u mu . . . soi taki wi e fii gi taawan.”​—1 PEIT. 3:8.

SINGI 90 Gi taawan taanga-sikin

SAN WI O LELI *

1. Enke fa 1 Peitilisi 3:8 e soi, da fa wi e fii te taawan e soi taki den e booko den ede anga u?

WI E fii bun te u de anga sama di e soi taki den e booko den ede anga u. Den e puubei fu fusutan fa wi e fii anga fa wi e denki. Son leisi den e yeepi wi a sani winsi u ná akisi den. U lobi sama di e soi taki den e „fii” gi u.​—Leisi 1 Peitilisi 3:8.

2. San a wantu sani di sa meke a taanga gi u fu soi taki wi e fii gi taawan?

2 Ala tuu Kelesten wani soi taki den e booko den ede anga taawan. Ma a sani ya á makiliki. Saide? A fu di wi abi sondu (Rom. 3:23). Neen meke a moiti u mu e meke fu wi á denki useefi namo. A fasi fa u kiya anga son sani di miti wi aini a libi sa meke a taanga gi u fu soi taki wi e booko wi ede anga taawan tu. Wan taa sani, na a fasi fa den sama di wi anga den e paa e tyai denseefi. Aini a ten ya, gaanse sama „lobi denseefi pasa peesi”, neen meke den nai booko den ede anga taawan (2 Tim. 3:1, 2). San o yeepi u fu soi taki wi e fii gi taawan winsi fa ai taanga son yuu?

3. (a) San o yeepi u fu soi taki wi e fii gi taawan? (b) San wi o leli aini a artikel ya?

3 Efu u waka a Yehofa anga Yesesi baka, a sani de o yeepi u fu moo booko wi ede anga taawan. Yehofa na a moo bun sama di sa soi u fa u sa soi taki wi e booko wi ede anga taawan, bika en a lobi (1 Yoh. 4:8). Yesesi abi denseefi manii fi en Dda (Yoh. 14:9). Di Yesesi be de a goontapu, a soi fa wan sama sa soi taki ai fii gi taawan. Aini a artikel ya wi o luku fa Yehofa anga Yesesi soi taki den e booko den ede anga taawan. Wi o luku tu fa u sa waka a den baka.

 YEHOFA SOI TAKI AI FII GI TAAWAN

4. Fa Yesaya 63:7-9 e soi taki Yehofa e booko en ede anga den sama di e dini en?

4 Beibel e leli u taki Yehofa e booko en ede anga den sama di e dini en. Pakisei fa Yehofa be e fii te a be e si fa den Islayelisama be e pina. Beibel taki: „Te sani be e moo den, da a be e du en ogii.” (Leisi Yesaya 63:7-9.) Polofeiti Sakaliya sikiifi taki te sama e du ogii anga den sama di e dini Yehofa, da a leti enke anga Yehofa seefi den e du ogii. Yehofa be taigi den sama di e dini en taki: „A sama di o holi u, e holi mi ain gaasi” (Sak. 2:8). A sani ya e soi taki Yehofa e booko en ede tuutuu anga den sama di e dini en!

Yehofa soi taki a be e fii gi den Islayelisama di a puu den a Egepte (Luku paragraaf 5)

5. Fa Yehofa be e yeepi en foluku te sama be e pina den?

5 Te a foluku fu Yehofa be e pina, a ná fii a be e fii gi den namo, ma a be e yeepi den tu. Di den Islayelisama be de a Egepte enke saafu, a be e hati Yehofa di a si fa den be e pina, neen meke a be wani yeepi den. A taigi Mosesi taki: „Mi si fa a foluku fu mi e pina a Egepte. Mi yee fa den e bali e suku yeepi . . . Mi sabi fa den e pina. Mi o saka go fii den puu a den Egeptesama ana” (Ek. 3:7, 8). A di Yehofa be e fii gi a foluku fi en meke a puu den a katibo a Egepte. Omen ondoo yali baka dati, di den Islayelisama be de aini a Paamisi Kondee, taa kondee be e kon feti anga den. San Yehofa du? Beibel taki: „Tyali be e kisi Yehofa te a be si fa den e geme fu di den taa foluku be e pina den.” A fii di Yehofa be e fii gi a foluku fi en be meke a du wan sani fu yeepi den. A poti kuutubakaa fu puu den a den feyanti fu den ana.​—Kuut. 2:16, 18.

6. Fa Yehofa soi taki a be e holi den fii fu Yona a pakisei winsi fa a á be e denki bun?

6 Yehofa e holi den fii fu den sama di e dini en a pakisei, winsi son leisi den nai denki enke fa ai denki. Luku a toli fu Yona. Gadu be sende a polofeiti ya fu go wasikoi den sama fu a foto Ninifei. Di den sama ya daai den libi, Gadu á kii den moo. Ma Yona á be lobi a sani ya  seefiseefi. En „ati boon te ná sani”, fu di Ninifei á poli enke fa a be taigi den sama. Ma Yehofa ati á boon a Yona. A yeepi en fu kengi a fasi fa ai denki (Yona 3:10–4:11). Bakaten Yona kon fusutan san Yehofa be wani leli en. Neen meke Yehofa be man koboloiki en fu sikiifi den sani ya aini Beibel fu leli u wan sani.​—Rom. 15:4. *

7. San wi e leli fu a fasi fa Yehofa be e libi anga den sama di be e dini en a fositen?

7 A fasi fa Yehofa be e libi anga den sama di be e dini en aini a ten di pasa, e soi taki ai booko en ede anga a foluku fi en. A sabi san e miti u. Yehofa sabi ’san de a wi ati’ (2 Kolon. 6:30). A sabi san wi e denki, fa wi e fii, san u poi du anga san wi á poi du. ’A ná o meke tesi di wi á poi tyai miti u’ (1 Kor. 10:13). A sani di Yehofa paamisi u ya e gi u taanga-sikin tuutuu.

YESESI SOI TAKI AI FII GI TAAWAN

8-10. San be yeepi Yesesi fu sabi fa sama e fii te son sani e miti den?

8 Di Yesesi be de a goontapu a be e fii gi taawan tuutuu. Meke u luku dii sani di meke a be e booko en ede anga taawan. A fosiwan: Yesesi anga en Dda abi denseefi manii, neen meke a lobi sama leti enke en Dda. Te a be luku den sani di a be yeepi en Dda meke a be e piisii. Ma a „libisama” be e moo meke a piisii (Odo 8:31). A di Yesesi lobi sama meke a be e booko en ede anga den.

9 Du fu du tu: Leti enke Yehofa, Yesesi be poi si san de a wan sama ati. A be sabi saide sama be e du son sani anga fa den be e denki (Mat. 9:4; Yoh. 13:10, 11). Te Yesesi be si taki sama booko-saka, a be e toosutu den, fu di a be e fii gi den.​—Yes. 61:1, 2; Luk. 4:17-21.

10 Du fu dii: Son sani di e miti sama, be miti Yesesi tu. Yesesi mma anga en kweki dda Yowsefu be pooti. Yowsefu be e wooko taanga, a leli Yesesi fa fu wooko taanga tu (Mat. 13:55; Malik. 6:3). A gei enke Yowsefu dede fosi Yesesi bigin anga a peleikiwooko fi en a goontapu ya. A sani ya be musu hati en, bika a be lobi Yowsefu. Neen meke a sabi fa sama e fii te wan sama di den lobi dede. Yesesi be sabi san a wani taki tu fu de aini wan osufamii anga sama di ná abi aseefi biibi (Yoh. 7:5). Ala den sani ya be yeepi Yesesi fu fusutan fa sama e fii te son sani e miti den.

Tyali kisi Yesesi gi wan dofuman, neen meke a puu en a den sama ini, fosi a deesi en (Luku paragraaf 11)

11. Sowtu toli e soi taki Yesesi be e fii gi taawan tuutuu? (Luku a fowtow a fesise fu a Wakititolen.)

11 Den wonduu di Yesesi be e du, be e soi taki a be e fii gi taawan tuutuu. A á be e du wonduu namo fu di a be mu du wonduu, ma a di ’tyali be e kisi en’ gi den sama di be e pina meke a be e yeepi den (Mat. 20:29-34; Malik. 1:40-42). A di Yesesi be e booko en ede anga wan dofuman meke a puu en aini den somen sama fosi a deesi en. Tyali be kisi en tu gi wan uman di man be dede kaba, neen meke a be weki a wan kodo manpikin fi en di be dede (Malik. 7:32-35; Luk. 7:12-15). A di Yesesi be e fii gi den sama ya meke a yeepi den.

12. Fa Yohanisi 11:32-35 e soi taki Yesesi be e booko en ede anga Maata anga Maliya?

12 Yesesi be e booko en ede anga Maata anga Maliya. Di a si fa a dede fu den  baala Lasalesi be e hati den, neen „Yesesi bigin kee”. (Leisi Yohanisi 11:32-35.) A ná fu di Yesesi á be o si Lasalesi moo meke a be kee, bika a be sabi taki a be o weki en baka. Ma a kee fu di a be sabi fa Maata anga Maliya be e fii di den baala Lasalesi dede.

13. Saide ai gi u taanga-sikin fu sabi taki Yesesi e fii gi sama?

13 A sabi di u sabi taki Yesesi e fii gi sama e gi u taanga-sikin. Winsi fa wi á poi de pilisisi enke Yesesi, toku u lobi en fu di ai fii gi taawan (1 Peit. 1:8). Neen meke wi e piisii fu sabi taki ai tii enke Kownu a hemel nownow. Dyonson a o puu pina. Yesesi na a moo bun sama di sa puu ala den polobelema di Saatan tyai kon gi libisama, bika a sabi fa wi e fii. A be miti somen fu den sani di e miti u nownow di a be de a goontapu. Eeye, ná pikin bigi ai bigi gi u taki a Kownu fu u „poi fusutan den swakifasi fu u”.​—Heb. 2:17, 18; 4:15, 16.

WAKA A YEHOFA ANGA YESESI BAKA

14. Enke fa Efeisesama 5:1, 2 e soi, da san u mu meke moiti fu du?

14 Te u luku a fasi fa Yehofa anga Yesesi soi taki den e fii gi sama, da ai gi u taanga-sikin fu meke moo moiti fu soi taki wi e fii gi taawan. (Leisi Efeisesama 5:1, 2.) Winsi fa wi á poi si sama ati enke Yehofa anga Yesesi, tokuso u sa meke moiti fu fusutan fa taawan e fii anga san a den nowtu fu den (2 Kor. 11:29). Den sama fu a goontapu ya nai booko den ede anga taawan, ma wi e du ala san u man fu soi taki ’wi e booko wi ede anga taawan’.​—Filip. 2:4.

(Luku paragraaf 15-19) *

15. Sama mu moo soi taki den e fii gi taawan aini a kemeente?

15 Owluman mu e moo soi taki den e fii gi taawan. Den sabi taki Yehofa o akisi den faantiwowtu fu a fasi fa den e luku den sikapu (Heb. 13:17). Efu owluman wani yeepi den baala anga sisa, den mu meke moiti fu fusutan fa den e fii. Fa owluman sa soi taki den e fii gi den baala anga sisa?

16. Fa owluman sa soi taki den e booko den ede anga den baala anga sisa aini a kemeente? Saide a sani ya pelensipali?

16 Wan owluman di e booko en ede anga den baala anga sisa abi ten gi den. Ai poti akisi gi den, da ai aliki bun te den e taki. Den sani ya de taanga fanowdu, moomoo te wan baala efuso sisa wani taki puu koko neen ati (Odo 20:5). Te wan owluman e meke ten gi den baala anga sisa, en anga den e toon moo bun mati, den o fitoow en tu. A sani ya o meke den moo lobi denseefi.​—Toli 20:37.

17. Sowtu manii omen baala anga sisa taki den lobi fu owluman? Gi wan ondoofenitoli.

17 A omen baala anga sisa taki den moo lobi owluman di e soi taki den e booko den ede anga den. Saide? Wan sisa den e kai Adelaide taki: „Ai moo makiliki fu taigi den fa yu e fii, bika i sabi taki den o fusutan i.” A taki tu: „Te yu e taki anga den yu e fii tuutuu taki den e booko den ede anga i.” Wan baala taki: „Di mi taigi wan owluman san e miti mi, mi si fa en ain be fuu anga wataa. Noiti mi o feegete a sani de.”​—Rom. 12:15.

18. San o yeepi u fu soi taki wi e booko wi ede anga taawan?

18 A ná owluman wawan mu soi taki  den e fii gi taawan. Ala u mu meke moiti fu abi a manii ya. San o yeepi u fu abi a manii ya? Puubei fu fusutan san e miti den baala anga sisa anga den sama aini yu osufamii. Poti pakisei a den yonkuuwan aini a kemeente, den gaandiwan, den wan di siki anga den wan di e tyali fu di wan sama fu den dede. Akisi den fa ai go anga den. Aliki te den e taigi i fa den e fii. Meke den fii taki yu e fusutan den anga taki yu e booko yu ede anga den. Du ala san i man fu yeepi den. Te wi e du den sani ya wi e soi taki u lobi u baala anga sisa tuutuu.​—1 Yoh. 3:18.

19. Saide u mu abi boo te u wani yeepi taawan?

19 U mu abi boo te u wani yeepi taawan. Saide? A ná ala sama ná aseefi. Te son sama abi booko-ede den e wani taki anga wan sama, ma son wan á lobi taki fu den polobelema fu den. Neen meke u mu soi den taki u wani yeepi den, ma u mu luku bun fu wi á akisi den sani di o meke den fii wan fasi (1 Tes. 4:11). Son leisi te wan sama taigi i fa ai fii, a ná ala yuu yu o man fusutan saide a sama e fii so, ma toku i mu holi a pakisei taki a so a sama e fii. Neen meke u mu gaw fu aliki, ma wi á mu gaw fu taki.​—Mat. 7:1; Yak. 1:19.

20. San wi o luku aini a taa artikel?

20 Boiti taki wi e soi den baala anga sisa aini a kemeente taki wi e fii gi den, u mu soi a fasi ya aini a peleikiwooko tu. Fa u sa soi taki wi e fii gi den sama di wi e miti aini a peleikiwooko? Wi o luku a toli ya aini a taa artikel.

SINGI 130 Gi taawan paadon

^ paragraaf 5 Yehofa anga Yesesi e fii gi taawan. A artikel ya o soi u fa u sa waka a den baka. Wi o luku tu saide u mu e fii gi taawan anga san u mu du fu soi taki wi e fii gi taawan.

^ paragraaf 6 Yehofa be soi taki ai fii gi taa sama di be e dini en tu, te den be lasi-ati efuso te den be e feele. Pakisei a toli fu Hana (1 Sam. 1:10-20), Eliya (1 Kow. 19:1-18), anga Ebed-Meilek (Yel. 38:7-13; 39:15-18).

^ paragraaf 64 SAN WI E SI A DEN FOWTOW: Wantu fasi fa u sa soi taki wi e fii gi taawan a den komakandaa. Wi e si wan (1) owluman e taki switi anga wan yonkuu peleikiman anga en mma, (2) wan dda anga en pikin e yeepi wan gaandi sisa fu go a wagi, anga (3) tu owluman e aliki wan sisa.