Skip to content

Skip to table of contents

 SUTUDI-ARTIKEL 13

Soi taki yu e fii gi den sama di yu e miti aini a peleikiwooko

Soi taki yu e fii gi den sama di yu e miti aini a peleikiwooko

„Tyali be kisi en [gi den sama] . . . Neen a bigin leli den omen sani.”​—Malik. 6:34.

SINGI 70 Suku den sama di wani

SAN WI O LELI *

1. San a wan fu den fasi fu Yesesi di u lobi?

WAN fu den fasi fu Yesesi di u lobi, na a fusutan di a man fusutan fa wi enke sondu libisama e fii te sani e miti u. Di Yesesi be de a goontapu a be e „poolo anga den sama di e poolo”, ma a be e „kee anga den sama di e kee” tu (Rom. 12:15). Wan leisi di den disipel fi en be daai kon anga piisii baka di a be sende den go peleiki, Yesesi seefi „be e piisii gaan piisii” (Luk. 10:17-21). Ma di Yesesi si fa den sama di be lobi Lasalesi be e kee di Lasalesi be dede, neen Yesesi „geme. A sani be moo en te”.​—Yoh. 11:33.

2. San be yeepi Yesesi fu soi taki ai fii gi taawan?

2 Yesesi á be abi sondu, ma toku a be abi boo anga sondu libisama. A be e fii gi den tu. San be yeepi en fu abi den bun manii ya? A moo pelensipali sani di be yeepi Yesesi fu abi den fasi ya, na a lobi di a be lobi libisama. Enke fa u si aini a artikel a fesi, ’Yesesi be lobi libisama tuutuu’ (Odo 8:31). A di a be lobi sama meke a be e meke moiti fu sabi fa den e denki anga fa den e fii. Apostel Yohanisi be taki fu Yesesi taki: „A be sabi san den sama e pakisei” (Yoh. 2:25). Yesesi be e fii gi taawan tuutuu. Den sama di a be e leli be man si kiin taki a lobi den, neen meke den be e aliki en. Efu wi e soi den sama aini a peleikiwooko taki wi e booko wi ede anga den, wi o man yeepi den.​—2 Tim. 4:5.

3-4. (a) Fa wi o si a peleikiwooko efu u lobi sama? (b) San wi o luku aini a artikel ya?

3 Apostel Pawlesi be sabi taki a peleikiwooko a wan sani di a be mu du. Useefi mu du a wooko ya tu (1 Kor. 9:16).  Ma efu u lobi den sama di wi e peleiki gi, u ná o si a wooko ya enke wan sani di u mu du namo, ma wi o meke moiti fu yeepi den sama fu di wi e fii gi den. U sabi taki „te wan sama e gi taawan sani, ai de koloku moo te taawan e gi en sani” (Toli 20:35). Efu wi e peleiki fu di u lobi taawan, a peleikiwooko o switi gi u.

4 Aini a artikel ya wi o leli fa u sa soi taki wi e fii gi den sama di wi e miti aini a peleikiwooko. Wi o luku fosi san u sa leli fu a fasi fa Yesesi be e soi taki ai fii gi den sama di a be e miti. Baka dati wi o luku fo fasi fa u sa waka a Yesesi baka.​—1 Peit. 2:21.

YESESI BE E SOI TAKI AI FII GI DEN SAMA DI A BE E MITI AINI A PELEIKIWOOKO

A di Yesesi be e fii gi taawan meke a toosutu den anga a bun nyunsu di a be e paati (Luku paragraaf 5-6)

5-6. (a) Anga sama Yesesi be e booko en ede? (b) Enke fa Yesaya 61:1, 2 be taki a fesi, da saide tyali be e kisi Yesesi gi den sama di a be e peleiki gi?

5 Wan leisi Yesesi anga den disipel fi en be wooko hii dei. Den be weli. ’Den á be abi ten fu nyan seefi.’ Neen meke Yesesi tyai den disipel fi en „go a wan koo peesi fu boo pikinso”. Ma di den doo ape neen den si omen sama doo ape fika den. San Yesesi du di a si den sama? „Tyali * kisi en, bika den be de enke sikapu di ná abi sikapuman. Neen a bigin leli den omen sani.”​—Malik. 6:30-34.

6 Saide tyali be kisi Yesesi gi den sama ya? A be e si taki den de enke „sikapu di ná abi sikapuman”. Kande Yesesi be e si taki son wan fu den a pootiman di be e wooko taanga fu solugu den osufamii. Kande taawan be de anga buduufu na ati fu di wan sama di den lobi dede. Den sani ya a sani di be miti Yesesi tu, neen meke a be man fusutan fa den sama ya be e fii. A be wani toosutu den anga a bun nyunsu di a be e paati.​—Leisi Yesaya 61:1, 2.

7. Fa u sa waka a Yesesi baka?

 7 San a toli ya e leli u? Leti enke Yesesi, den sama di wi e peleiki gi aini a ten ya, de enke „sikapu di ná abi sikapuman”. Den lai booko ede anga polobelema. Ma a bun nyunsu fu a Kownukondee di wi e paati sa yeepi den (Openb. 14:6). Neen meke leti enke Yesesi ’tyali mu e kisi u gi den mofinasama anga den pootiman’ (Ps. 72:13). A di u lobi sama meke wi e meke moiti fu yeepi den.

SOI TAKI WI E FII GI TAAWAN

U mu luku fa u sa yeepi iniiwan sama (Luku paragraaf 8-9)

8. San a wan fasi fa u sa soi taki wi e fii gi den sama aini a peleikiwooko? Gi wan ageisitoli.

8 San o yeepi u fu soi taki wi e fii gi den sama di wi e miti aini a peleikiwooko? U mu meke moiti fu fusutan fa den e fii da u luku a useefi. Fa i be o wani taawan libi anga yu efu den sani de be miti i? A so iseefi mu libi anga den sama di yu e miti aini a peleikiwooko * (Mat. 7:12). Wi o luku fo fasi fa u sa du a sani ya. A fosiwan: U mu poti pakisei a san ibiiwan sama abi fanowdu. Leti enke fa wan bun dataa e poti akisi fu luku san na a moo bun fasi fu yeepi wan sama di kon neen anga wan siki, a so u mu si den sama di wi e peleiki gi tu. Te wi e taki anga wan sama, u mu poti akisi gi en da wi aliki te ai taigi u san a den polobelema fi en. Wan dataa á mu gaw tumisi fu sikiifi deesi gi wan sama sondee fu a kaba fusutan san e du a sama. Winsi ai si enke a sabi a siki di a sama abi, toku fosi a gi en deesi, ai wakiti pikinso fu luku efu na a siki di a denki, a sama abi tuutuu. Te u de aini a peleikiwooko a so u mu e luku bun tu fu u nai taki aseefi sani naamo. Ma u mu meke moiti fu sabi san e gi den sama booko-ede efuso fa den e denki fu wan toli.

9. San wi á mu denki te u miti wan sama aini a peleikiwooko?

9 Te u de aini a peleikiwooko, wi á mu si enke u sabi san wan sama e biibi efuso san e miti en (Odo 18:13). Ma poti akisi gi en fu sabi fa ai denki (Odo 20:5). Efi i si enke a sama ná o fii wan fasi, i sa akisi en sowtu wooko ai du, fa ai go anga en osufamii efuso sowtu kondee sama neen. I sa akisi en fa ai pakisei fu son sani tu. Efu wi e poti bun akisi gi den sama, a denseefi o taigi u san den e biibi. A sani ya o yeepi u fu sabi on se u mu go anga a taki. Wi o man yeepi a sama anga san a abi fanowdu, leti enke Yesesi.​—Luku 1 Korentesama 9:19-23 tu.

Meke moiti fu fusutan san e miti den sama di wi e peleiki gi anga fa den e fii (Luku paragraaf 10-11)

10-11. Enke fa 2 Korentesama 4:7, 8 e soi, da san a du fu tu sani di o yeepi u fu soi taki wi e fii gi taawan? Gi wan ondoofenitoli.

 10 Du fu tu: Puubei fu fusutan san e miti den sama di wi e peleiki gi, anga fa den e fii. Useefi a sondu libisama. Son wan fu den sani di e miti den a sani di e miti u tu (1 Kor. 10:13). U sabi taki a ten di wi e libi ya taanga. A di Yehofa e yeepi u meke u man holidoo. (Leisi 2 Korentesama 4:7, 8.) Pakisei fa ai taanga gi den sama di nai dini Yehofa. Neen meke tyali e kisi u gi den enke fa tyali be e kisi Yesesi gi den. A di wi e fii gi den meke wi e meke moiti fu yeepi den. Wi e paati „a bun nyunsu fu wan moo bun sani”.​—Yes. 52:7.

11 Meke u luku a toli fu wan baala di den e kai Sergey. Fosi a be kon a waaleiti sen be e kisi en fu taki anga sama. Di a bigin sutudeli Beibel a taki: „Den sani di mi leli yeepi mi fu fusutan taki enke Kelesten efi i wani peleiki gi wan sama i mu taki anga en. Mi be denki taki noiti mi be o man du a sani ya.” Ma te a be e luku den sama di á be sabi Yehofa, a be e pakisei fa a libi be musu taanga gi den. A taki tu: „A den sani di mi be e leli fu Yehofa be e meke mi e piisii. Mi be sabi taki taa sama be mu kon sabi den leli fu Beibel tu.” Moo Sergey be e kon lobi taa sama, moo a be e kisi kankan fu peleiki gi den. Sergey taki: „Dei fu dei a be e moo makiliki gi mi fu peleiki. Den sani di mi be e leli sama be e taanga mi biibi tu.” *

Son sama abi moo ten fanowdu fu kengi (Luku paragraaf 12-13)

12-13. Saide u mu abi boo anga den sama di wi e peleiki gi? Gi wan ageisitoli.

12 Du fu dii: U mu abi boo anga den sama di wi e peleiki gi. U mu holi a pakisei taki son sama a fositoon den yee son sani di wi e leli den. Boiti dati, gaanse sama a omen yali kaba den e biibi den sani di den e leli a keliki anga den sani di  den gaansama fu den leli den. Kande den e si enke den nyun sani di den e leli o poli den anga den famii fu den. Fa u sa yeepi den sama ya?

13 Meke u taki wan gaandi booki e suku fu booko kai. San u be o du anga a booki ya? Gaanse leisi wi e bigin meke wan nyun wan. Ma efu a á kaba meke ete, na a gaandiwan wi o koboloiki. A te u kaba meke a nyun booki fosi wi o booko a gaandiwan puu. A letiso a de anga den sama di wi e peleiki gi. Wi á poi taigi den sama taki den mu fika den sani di den be e biibi den hii libi wanboowanboo. U mu yeepi den fu fusutan san Beibel e leli tuutuu. U mu meke moiti fu doo den ati tu. Te den kon lobi den sani di den e leli, a o moo makiliki gi den fu fika den sani di den be e biibi. Neen meke u mu abi boo te wi e yeepi den.​—Rom. 12:2.

14-15. Fa u sa yeepi wan sama di á sabi taki wi o libi fu teego aini wan paladeisi a goontapu?

14 Te wi abi boo anga den sama di wi e peleiki gi, wi o fusutan taki a ná ala yuu sama o biibi den sani di u leli den fosi leisi te u miti den. Ma efu wi e booko wi ede anga den, wi o meke moiti fu yeepi den fu fusutan den leli fu Beibel. Meke u taki i miti wan sama di e biibi taki te u dede howpu á de moo efuso wan sama di e biibi taki ala sama di libi bun o go a hemel. Fa i be o yeepi sowan sama fu fusutan taki Gadu paamisi u taki wi o libi fu teego aini wan paladeisi a goontapu?

15 Meke u luku fa wan baala e yeepi sama fu fusutan a sani ya. Ai leisi Genesesi 1:28, baka dati ai akisi a sama pe, anga fa Gadu be wani sama libi. Gaanse sama e taki: „A goontapu ya, a libi be mu switi gi den tu.” Baka dati a baala e leisi Yesaya 55:11, da ai akisi den efu na aseefi sani ya Gadu wani gi libisama ete. Gaanse leisi a sama e taki „eeye”. Da a baala e leisi wan lasiti tekisi gi a sama. Dati a Psalm 37:10, 11, da a akisi a sama san Gadu paamisi libisama. A omen sama a baala ya be man yeepi anga den tekisi ya fu fusutan taki Gadu á kengi. Te anga now a wani libisama libi aini wan paladeisi a goontapu fu teego, leti enke fa a be wani na a bigin.

Winsi a wan biifi i sende gi wan sama fu soi taki yu e fii gi en, a sa tyai wini gi en (Luku paragraaf 16-17)

16-17. Enke fa Odo 3:27 e soi, da san a wantu fasi fa u sa soi taki wi e fii gi taawan te u de aini a peleikiwooko?

16 Du fu fo: Soi taki yu e holi a sama a pakisei. Efi i go a wan yuu di muliki gi wan sama fu taki anga i, akisi en fu a wai ede gi i, da i taigi en taki yu o kon a wan yuu di moo bun gi en. Kande a sama abi yeepi fanowdu anga wan wooko. Kande a á man komoto a osu fu di a siki efuso gaandi. Efu a so, da i sa du san i man fu yeepi a sama.​—Leisi Odo 3:27.

 17 Wan sisa be fende wini fu wan bun di a du. Fu di a be e booko en ede anga wan osufamii di wan beibi fu den dede, meke a sikiifi wan biifi gi den. A sikiifi wantu Beibeltekisi aini a biifi tu. Fa a osufamii fende a sani di a sisa ya du? A mma taki: „Eside mi á be e fii bun seefiseefi. U fende taanga-sikin tuutuu fu a biifi di i sende gi u. Mi á sabi fa fu gi i daa fu a biifi fi i. A pasa 20 leisi di mi leisi en go kon. Mi be man fii taki yu e booko yu ede anga u tuutuu. Ná pikin yeepi a yeepi u. Mi e gi i daa anga mi hii ati.” A ondoofenitoli ya e soi taki efu wi e meke moiti fu sabi fa taawan e fii, neen u du wan sani fu yeepi den sani o waka bun.

DU SAN I POI, DA I FIKA GI YEHOFA

18. Enke fa 1 Korentesama 3:6, 7 e soi, da san wi á mu feegete te wi e du a peleikiwooko?

18 Te u du ala san u man fu yeepi wan sama, u mu piisii anga dati bika a moo gaan pisi fu a wooko a ná fu wi, a fu Yehofa. U sa yeepi sama fu kon sabi Yehofa, ma wi á poi meke den kon dini en. (Leisi 1 Korentesama 3:6, 7.) A Yehofa e hali sama kon neen (Yoh. 6:44). Na a fasi fa a sama ati de, o meke a kon dini Yehofa (Mat. 13:4-8). U mu holi a pakisei taki a omen sama á be e du san Yesesi be e leli den, winsi fa Yesesi a be a moo bun Leliman di be de a goontapu. Neen meke te sama nai aliki u te wi e meke moiti fu yeepi den, wi á mu lasi-ati.

19. San a den wini di wi o fende te wi e soi taki wi e fii gi taawan aini a peleikiwooko?

19 Wi o fende wini te wi e soi taki wi e booko wi ede anga den sama di wi e miti aini a peleikiwooko. Wi o moo lobi a peleikiwooko. Wi o moo de koloku tu fu a gi di wi e gi taawan sani. Boiti dati a o moo makiliki gi „den sama di ati bun fu fende a teego libi” fu aliki a bun nyunsu di wi e paati (Toli 13:48). „Neen meke solanga wi abi a okasi, u mu du bun gi ala sama” (Gal. 6:10). Te wi e du a sani ya, da sama o gafa u Dda di de a hemel.​—Mat. 5:16.

SINGI 64 A nyanyan lepi fu koti

^ paragraaf 5 Te wi e soi taki wi e fii gi taawan aini a peleikiwooko, wi o moo piisii. A wooko fu wi o moo go a fesi tu. Saide u sa taki a sani ya? Aini a artikel ya wi o luku san u sa leli fu Yesesi. Wi o luku fo sani tu di u sa du fu soi taki wi e fii gi den sama di wi e miti aini a peleikiwooko.

^ paragraaf 5 SAN DEN WOWTU YA WANI TAKI: Aini Beibel a wowtu tyali wani taki wi e fii gi wan sama di sani e miti. A sani ya e meke wi e du wan sani fu yeepi en.

^ paragraaf 8 Luku a artikel di den e kai „Du bun gi sma na ini a preikiwroko” di de aini a Saanantongo Wakititolen fu 15 mei 2014.

^ paragraaf 11 Luku a Saanantongo Wakititolen fu 1 augustus 2011, blz. 21-22.