Skip to content

Skip to table of contents

’Teke leli, da yu o koni’

’Teke leli, da yu o koni’

„Mi manpikin . . . u mu e teke leli, da wi o koni.”​—ODO 8:32, 33.

SINGI: 56, 89

1. San o yeepi u fu du sani anga koni? Sowtu wini wi o fende te wi e du sani anga koni?

A YEHOFA koni komoto. A á giili, neen meke a gi u koni tu. Yakowbesi 1:5 taki: „Efu iniiwan fu wi e mankei koni, da meke a tan begi Gadu. Bika Gadu e gi sama sani anga en hii ati. A nai suku fowtu a sama.” Wan sani di o yeepi u fu du sani anga koni, a te wi e wooko anga den sani di Gadu leli u. A sani ya e yeepi u fu wi á du sani di á bun. Ai yeepi u tu fu wi anga Yehofa á poli (Odo 2:10-12). Wi o abi a howpu fu libi fu teego tu te wi e wooko anga san Gadu leli u.​—Yudasi 21.

2. San o yeepi u fu lobi den leli fu Yehofa?

2 Wi a sondu sama, neen meke ai taanga gi u fu aliki te wan sama soi u wan sani di u be sa du taa fasi. Son leisi na a fasi fa u kiya meke ai taanga gi u fu si den wini di wi o fende fu a sani di a sama soi u. Ma te wi e si den wini di wi e fende te u wooko anga den sani di Gadu leli u, wi o si taki a di a lobi u meke ai poti wi a pasi. Odo 3:11, 12 taki: „Mi manpikin aliki te Yehofa e bali yu a sani.” Boiti dati a taki: „Na a sama di Yehofa lobi ai puu kaasi gi.” A di Yehofa wani sani go bun anga u meke ai leli u. (Leisi  Hebrewsama 12:5-11.) Gadu sabi u bun. Neen meke a san de fanowdu ai leli u. Wi e fende wini ala yuu te u wooko anga san a taki. Aini a artikel ya, wi o leli fo sani: (1) Fa Yehofa e leli u fu dwengi useefi, (2) a leli di mma anga dda mu leli den pikin, (3) den leli di wi e fende a komakandaa, anga (4) a sani di ogii moo te Yehofa kaasi wan sama.

SAIDE U MU E DWENGI USEEFI?

3. Fa wan pikin e leli fu dwengi enseefi? Gi wan ageisitoli.

3 Wan sama di man dwengi enseefi, nai du efuso denki sani di á fiti. U nai meke anga a fii fu dwengi useefi. A moiti u mu meke fu dwengi useefi. Te wan pikin e leli lei baisigii, en mma efuso en dda e holi a baisigii gi en fu a á kai. Ma bakaten, a pikin e kon sabi fa a mu lei fu a á kai te a mma efuso a dda losi a baisigii. Te a mma efuso a dda si taki a pikin sabi lei, den nai holi a baisigii gi en moo. A so a de tu te mma anga dda e ’kiya den pikin fu den anga den leli fu Yehofa’. Den e yeepi a pikin fu man dwengi enseefi anga fu du sani anga koni.​—Efeisesama 6:4.

4, 5. (a) Saide u mu man dwengi useefi efu u wani „kengi u manii”? (b) Saide wi á mu lasi-ati te u meke wan fowtu?

4 A sani ya e teli gi gaansama di leli sabi Yehofa tu. Winsi fa den poi dwengi denseefi, toku den ná abi ondoofeni a waaleiti ete. Ma te den e meke moiti fu ’kengi den manii’ anga te den e meke moiti fu waka a Kelestesi baka, da den e moo abi ondoofeni (Efeisesama 4:23, 24). A dwengi di den man dwengi denseefi e yeepi den fu ’koti pasi gi ogii anga den takuu fii di den sama fu a goontapu abi. Ai yeepi den tu fu wooko anga bunbun fusutan, fu libi anga wan kiin ati, anga fu dini Gadu anga den hii ati aini a ten ya’.​—Titesi 2:12.

5 Ala wi abi sondu (Peleikiman 7:20). Te u meke wan fowtu, da dati á wani taki wi á poi dwengi useefi seefiseefi. Bika Odo 24:16 taki: „Winsi wan sama di e libi a wan leti fasi kai seibin toon, a o opo taampu baka.” San o yeepi u fu „opo taampu baka”? A ná anga u kaakiti wi o opo, ma na a yeye fu Gadu o yeepi u. (Leisi Filipisama 4:13.) Wan fu den manii di a santa yeye e meke sama abi, a dwengi iseefi.

6. San o yeepi u fu sutudeli a Wowtu fu Gadu moo bun? (Luku a fowtow na a bigin.)

6 Den sani di o yeepi u fu man dwengi useefi, a begi, sutudeli Beibel anga te wi e teke ten pakisei san u leisi. Ma san i mu du efu yu á lobi sutudeli Beibel? Yu á mu gi abaa. Efi i gi Yehofa a okasi, a o yeepi i fu „angii” fu sutudeli a Wowtu fi en (1 Peitilisi 2:2). Begi en fu a yeepi i. Kande i sa bigin sutudeli wantu miniti. Baka wan pisiten a ná o taanga gi i so moo. Boiti dati yu lobi sutudeli. Yu o go e piisii te yu e pakisei den sani di Yehofa e leli i.​—1 Timotiyesi 4:15.

7. Fa a dwengi di u man dwengi useefi e yeepi u fu du moo gi Yehofa?

7 Wi o man du moo gi Yehofa te wi e dwengi useefi. Wan dda be e fii enke a  be e go a baka a waaleiti. Neen meke a be wani du a pioniliwooko. Fa a dwengi di a be man dwengi enseefi yeepi en? A be e leisi artikel aini den Wakititolen di e taki fu a pioniliwooko. A begi Yehofa tu. Den sani ya yeepi en fu kon moo koosube a Yehofa. Te a be poi, a be e du a yeepi-pioniliwooko. A á meke nawan sani tapu en fu du san a be wani du gi Yehofa. Te fu kaba, a toon wan kowownu-pionili.

KIYA I PIKIN ANGA DEN LELI FU YEHOFA

Te wan pikin meke a nai sabi san bun anga san á bun. A abi leli fanowdu (Luku paragraaf 8)

8-10. Gi wan toli di e soi fa mma anga dda sa yeepi den pikin fu den fu lobi Yehofa?

8 Yehofa gi mma anga dda a faantiwowtu fu ’kiya den pikin fu den anga den leli fi en’ (Efeisesama 6:4). Ma a á makiliki fu du a sani ya aini a goontapu di wi e libi nownow (2 Timotiyesi 3:1-5). Te wan pikin meke, a nai sabi san bun anga san á bun. Neen meke a  abi leli fanowdu (Romesama 2:14, 15). Wan sama di e ondoosuku Beibel taki a Giiki wowtu fu „kiya” wani taki „leli wan pikin” efuso yeepi wan pikin fu a toon wan gaansama di sabi san bun anga san á bun.

9 Te wan pikin e si taki a di en mma anga en dda lobi en meke den e kaasi en, ai fii bun. A sani ya e yeepi en fu sabi taki a ná ala sani bun fu du. Ai leli tu taki ala san a du, abi en bakapisi. Neen meke mma anga dda di e dini Yehofa mu biibi taki den o fende wini te den kiya den pikin anga den leli fu Yehofa. A ná ala sama e kiya pikin na aseefi fasi. Ma mma anga dda di e aliki Gadu, ná abi fu akisi denseefi fa den mu kiya den pikin. Den ná abi fu puubei ala den fasi fa sama e kiya pikin.

10 U sa leli wan sani fu Nowa. Di Yehofa sende en fu a meke a ark, a á be sabi fa a mu du a wooko ya. A be abi fu biibi Yehofa. Beibel taki Nowa du „leti” enke fa Yehofa taigi en (Genesesi 6:22). Sowtu wini a fende fu a sani ya? A ark meke en anga en osufamii tan a libi. Nowa a be wan bun dda tu. Saide? A be e biibi Gadu. Nowa leli den pikin fi en bun. Fosi a Fuudu, a soso ogii be e pasa a goontapu. Ma toku Nowa be e tyai enseefi bun. Neen meke den pikin fi en be sa waka neen baka.​—Genesesi 6:5.

11. Saide mma anga dda mu meke moiti fu leli den pikin?

11 Efu yu a wan mma efuso dda, san o yeepi i fu kiya i pikin ’enke fa Gadu wani’? I mu aliki Yehofa. Meke a yeepi i te yu e kiya i pikin. Wooko anga a Wowtu fi en anga den buku fu a olikanisâsi. Bakaten, den pikin fu yu o gi i daa fu di i du den sani ya. Wan baala sikiifi taki: „Ai bigi gi mi te mi pakisei a fasi fa mma anga nda kiya mi. Den du ala san den be poi fu doo mi ati te den be e leli mi.” A taki neen mma anga en dda yeepi en fu toon Yehofa mati. Son leisi winsi fa mma anga dda meke moiti anga den pikin, son wan e gwe fika Yehofa. Ma toku a sani ya a mu meke den kosensi fon den, bika den du san den poi fu yeepi a pikin. Kande wan dei, a o kon dini Yehofa baka.

12, 13. (a) Fa mma anga dda sa soi taki den e aliki Gadu te wan pikin fu den komoto a waaleiti? (b) Fa wan osufamii fende wini di a mma anga a dda aliki Yehofa?

12 A sani di e meke a taanga gi mma anga dda fu aliki Yehofa, a te wan pikin fu den komoto a waaleiti. Wan umanpikin fu wan sisa nai tan anga en moo fu di a nai dini Yehofa moo. A sisa ya taki: „Mi be e suku ala sowtu pikinpikin sani aini den buku fu u di be o gi mi a okasi fu de makandii anga mi umanpikin anga a galanpikin fu mi.” Ma en man yeepi en fu si taki a ná den be abi a faantiwowtu fu luku a umanpikin fu den moo. Boiti dati a soi en taki den mu aliki Yehofa.

13 Baka wantu yali, a umanpikin kon dini Yehofa baka. En mma taki: „Nownow a beina ala dei ai telefon efuso sms mi. Ai lesipeki u, bika a si taki u du sani enke fa Yehofa wani. Wi anga en a gaan mati.” Efi i pikin komoto a waaleiti, yu o „fitoow Yehofa anga i  hii ati”? Yu o soi en taki i nai „fitoow iseefi”? (Odo 3:5, 6) Ná feegete, a di Yehofa lobi u meke ai sitaafu u son leisi. Holi a pakisei tu taki a sani ya e soi taki a koni. A meke en Manpikin dede gi ala sama. A meke a dede gi a pikin fi i tu. Gadu wani ala sama fende teego libi. (Leisi 2 Peitilisi 3:9.) Mma anga dda, u mu biibi taki den sani di Yehofa e leli u bun. U mu aliki en winsi fa a taanga son leisi. Du sani enke fa Yehofa leli u. Ná du san i fii.

DEN SANI DI WI E LELI AINI A KEMEENTE

14. Fa wi e fende wini fu den sani di a „futuboi” fu Yehofa e leli u?

14 Yehofa paamisi taki a o leli a Kelesten kemeente. A taki a o kibii en. A omen fasi ai du den sani ya. A poti en Manpikin fu solugu a kemeente. Yesesi poti wan „futuboi” di u sa fitoow fu gi u leli di e yeepi u fu wi á gwe fika Yehofa (Lukasi 12:42). A „futuboi” ya e leli u sani di e tyai wini gi u. Son leisi ai puu kaasi gi u tu. I yee wan lezing efuso leisi wan Wakititolen kaba di yeepi i fu kengi a fasi fa i be e denki efuso a fasi fa i be e tyai iseefi? I sa piisii taki i bigin du sani taa fasi. Dati e soi taki i gi Yehofa a okasi fu leli yu.​—Odo 2:1-5.

15, 16. (a) Fa u sa fende wini fu a wooko di den owluman e du? (b) Fa u sa meke den owluman du den wooko anga piisii?

15 Kelestesi poti owluman aini a kemeente fu yeepi u tu. Beibel taki den man ya „sabi du son sani” (Efeisesama 4:8, 11-13). Fa u sa fende wini fu a wooko di den owluman e du? U sa waka na a biibi fu den anga den bun sani di den e du baka. U mu teke den sani di den soi wi aini Beibel tu. (Leisi Hebrewsama 13:7, 17.) Den owluman lobi u. Den wani u de koosube fu Yehofa. Te den si wi e go a baka, kande wi e misi komakandaa, den e meke moiti fu yeepi u. Te u taki anga den, den e aliki u. Den e soi u san Beibel taki tu. Yu e si a yeepi di den e yeepi yu enke wan fasi fa Yehofa e soi taki a lobi i?

16 Holi a pakisei taki a ná ala yuu a makiliki gi den owluman fu soi u wan sani. Fa i denki polofeiti Natan be fii di a be mu go taki anga Kownu David di a be wani kibii a sondu fi en? (2 Samuweli 12:1-14) Wan leisi Peitilisi, wan fu den 12 apostel be paati bee anga den Kelesten di á be de Dyu. Di a du a sani ya, neen Pawlesi soi en taki a á be tyai enseefi bun. Fa Pawlesi be e fii di a be mu taki anga Peitilisi? A deki-ati Pawlesi be mu abi fu du a sani ya (Galasiyasama 2:11-14). Ma fa i sa meke en moo makiliki gi den owluman fu taki anga i? I mu abi sakafasi. Soi taki ai bigi gi i taki den taki anga i. Sama á mu e feele fu taki anga i. I mu si a yeepi di den wani yeepi i enke wan fasi fa Yehofa e soi taki a lobi i. Yu o fende wini. Boiti dati den owluman o du den wooko anga piisii.

17. Fa den owluman yeepi wan sisa?

17 Wan sisa taki den sani di miti en den ten di pasa, meke a be taanga gi en fu lobi Yehofa. A sani ya be meke a  lasi-ati. A taki: „Mi be sabi taki mi be mu taki anga den owluman. Di mi taki anga den, den á kuutu mi. Den gi mi taanga-sikin. Winsi fa den lai sani fu du baka komakandaa, tokuso den o taki anga mi namo, winsi a wan fu den. Den sani di miti mi den ten di pasa be e meke mi e fii enke Gadu á lobi mi. Ma Yehofa soi mi taki a lobi mi anga a fasi fa a kemeente anga den owluman be e libi anga mi. Mi e begi en fu a yeepi mi fu mi á gwe fika en noiti.”

SAN HATI MOO TE YEHOFA PUU KAASI GI WAN SAMA?

18, 19. Sowtu toli fu Beibel e soi taki taangayesi hati moo te Yehofa puu kaasi gi u?

18 Son leisi a hati te Yehofa puu kaasi gi i. Ma a sani di moo hati, a te i ná aliki te a puu kaasi gi i (Hebrewsama 12:11). Na a sani ya be miti Kain anga Kownu Sedekiya. Di Gadu si taki Kain be o kii en baala fu di a be buuse en, a taigi Kain taki: „Saide meke yu ati boon so? Saide yu e masi i fesi so? Yu á si enke mi o piisii anga i baka efi i tyai iseefi bun noh? Ma efu yu á daai du bun, sondu de leti a yu doomofu e lulu i. Yu o meke a wini i?” (Genesesi 4:6, 7) Kain ná aliki Yehofa. A kii en baala. A sani di a du fooseli en fu te en boo koti (Genesesi 4:11, 12). Efu a be aliki Yehofa a sani ya á be o miti en.

19 Kownu Sedekiya be feele sani. Boiti dati a omen ogii a be e du di a be e tii. A libi be taanga gi den Islayelisama a ten di Sedekiya be e tii. Polofeiti Yelemiya taigi Sedekiya omen leisi taki a mu daai wan ana. Ma a kownu ná aliki Yehofa. Sani á waka bun gi Sedekiya (Yelemiya 52:8-11). Yehofa á wani a miti wi enke Kownu Sedekiya.​—Leisi Yesaya 48:17, 18.

20. San o miti den sama di aliki Gadu anga den sama di ná aliki en?

20 Aini a ten ya, a omen sama nai holi den weiti fu Gadu. Den e si den enke soso sani. Ma dyonson gaan sani o miti den sama di nai libi enke fa Gadu wani (Odo 1:24-31). Neen meke u mu du san sikiifi a Odo 4:13. A taki: „U mu e teke leli, da wi o koni. Ná poti den sani di mi e taigi wi a wanse, bika a den o meke u tan a libi.”