Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  maart 2017

 ONDOOFENITOLI

Mi fende wini di mi paa anga koni sama

Mi fende wini di mi paa anga koni sama

MI E membee ete omen yali pasa, fa koo be e kii mi wan mamanten a Brookings, wan peesi a Dakota aini Ameekankondee. Mi be e fusutan taki a koo ten fu a yali be koosube. Mi anga wantu sama be de a wan osu di be de a wan peesi pe den e kweki meti. A sani di be e waan a osu á be leti, neen meke koo be e kii u te ala u sikin be e dansi. U be taampu koosube fu wan gaan wataa baki. Ná pikin koo a wataa be koo. Mi o gi i wan toli, da yu o fusutan saide u be de ape.

DEN FAMII FU MI

Mi omu Alfred anga nda

Mi meke a 7 maart 1936. Mma anga nda meke fo pikin. A mi na a tapubee pikin fu den. U be e tan a wan peesi pe den be e kweki meti a wan peesi den e kai Dakota. U be lobi a wooko di u be e du ape, ma a ná dati a be a moo pelensipali sani gi u. Mma anga nda be dopu aini 1934. Den be paamisi Yehofa taki den o dini en den hii libi, neen meke na a dini fu Yehofa a be a moo pelensipali sani gi den. Nda Clarence, a be a kulu-dinali (nownow den e kai den baala ya, fesiman fu den owluman) aini a pikin kemeente di be de a Conde wan peesi a Dakota. Bakaten a mi omu Alfred be e du a wooko ya.

Ala yuu wi osufamii be e go a komakandaa anga a peleikiwooko fu soi sama den bun sani di Beibel taki o pasa aini a ten di e kon. A fasi fa mma anga nda be e dini Yehofa anga den sani di den leli u yeepi u fu lobi Yehofa. Mi anga mi sisa Dorothy  toon peleikiman di u be abi sigisi yali. Mi go na a Teyokalasiya Diniwooko-sikoo aini 1943. Na a ten ya a sikoo ya be bigin.

Enke wan pionili aini 1952

Den konkelesi anga den kelen-komakandaa be pelensipali gi u. Mi e membee a konkelesi fu 1949 ete di be holi a Sioux Falls, wan peesi a Dakota. Baala Grant Suiter be holi a lezing di den e kai „A lati moo enke san yu e denki!” A be soi aini a lezing ya taki ala Kelesten di dopu mu koboloiki den libi fu peleiki a bun nyunsu fu Gadu Kownukondee. Baka dati, neen mi paamisi Yehofa taki mi o dini en. Mi dopu na a kelen-komakandaa di be holi a Brookings na a 12 november 1949. Neen meke mi be de na a peesi di den e kweki meti, enke fa mi be taki na a bigin. U be de fo sama di be e wakiti fu dopu aini wan ayee wataa baki.

Baka di mi dopu mi be wani pionili. Mi bigin pionili a 1 yanuari 1952 di mi be abi 15 yali. Beibel taki: „A sama di e waka anga koniman o koni, ma sani ná o go bun anga a sama di e waka anga donman” (Odo 13:20). Mi be lobi go peleiki anga mi omu Julius di be abi 60 yali. Winsi fa a be gaandi moo mi, tokuso u be e piisii te u be e peleiki makandii. A omen sani a leli mi. Bakaten Dorothy bigin pionili tu.

KELEN-OWLUMAN YEEPI MI

Di mi be moo yonkuu mi mma anga nda be lobi kai kelen-owluman anga den uman kon tan a wi osu. Wan fu den kelen-owluman di yeepi mi a Jesse anga en uman Lynn cantwell. Den be e booko den ede anga mi, neen meke den be e gi mi taanga-sikin. Te den be de a wan kemeente di be koosube, den be e kai mi fu go anga den a peleikiwooko. A be e switi gi mi fu de makandaa anga den. Mi be wani wooko taanga gi Yehofa tu, neen meke mi be e pionili.

A taa kelen-owluman di be kon a wi kemeente, a Bud Miller. Di en anga en uman Joan kon luku a kemeente fu u, mi be abi 18 yali. A ten de a kantoo di be e poti sama  enke suudati be sende kai mi. Den sama di be e wooko na a kantoo ya be wani mi du wantu wooko di be o soi taki mi e holibaka gi politiki. Ma mi be wani paati a bun nyunsu fu Gadu Kownukondee (Yohanisi 15:19). Neen meke mi taigi den taki mi a wan sama di e paati a bun nyunsu fu Gadu.

Mi be poolo di Baala Miller taigi mi taki a o kon anga mi na a kantoo di e poti sama enke suudati. Sen a be e kisi en. A á be e feele sama. Boiti dati a be sabi a Beibel bun. Mi fende taanga-sikin di a kon anga mi. Na a kaba fu a deeten fu 1954 di a baala tyai mi go na a kantoo, neen den taigi mi taki den o gi mi a okasi fu toon wan sama di e paati a bun nyunsu. A so mi be abi ten fu wooko gi Yehofa.

Mi be bigin wooko a Betel, mi de a wan wagi

A á langa baka dati, neen den kai mi fu go wooko na a Betel fu Staten Island wan peesi a New York. A ten de den be e kai en Watchtower Farm. Mi wooko ape dii yali. A omen sani mi leli fu den baala anga sisa di mi anga den be e wooko.

BETEL WOOKO

Mi anga Baala Franz de na a laadiyow sitasiyon WBBR

A olikanisâsi be abi wan laadiyow sitasiyon a Staten Island tu. Den be e kai en WBBR. Den wooko anga en fanafu 1924 te go miti 1957. A 15 te anga 20 sama fu Betel namo be e wooko de. Gaanse fu u a be yonkuu sama di á be abi ondoofeni. Ma wan gaandi salufu baala den e kai Eldon Woodworth be e wooko anga u. A be de enke u dda. A omen sani a leli u. Son leisi te wi á be e fusutan useefi, da a baala ya be lobi taigi u taki: „Yehofa e du omen foondoo sani, winsi den sama di ai koboloiki a sondu sama.”

Harry Peterson be e peleiki fayafaya

Baala Frederick W. Franz be e yeepi u tu. A be koni. A be sabi Beibel bun. Boiti dati a be lobi ala u. A Harry Peterson be e boli gi u. A be moo makiliki gi u fu kai en so, a peesi fu kai en neen tuutuu nen Papargyropoulos. Enseefi a be wan salufu baala. A be lobi a peleikiwooko. Baala Peterson be e du en wooko a Betel bun, ma a á be e meke sipowtu anga a peleikiwooko.  A omen ondoo buku a be e paati ala mun. A be sabi a Beibel bun tu. A omen sani di u be e akisi en a be e piki.

KONI SISA LELI MI OMEN SANI

Ala yali u be e poti guluntu anga sii aini wan sani fu 45.000 putisi bataa, da u be e sende den gi a Betel famii. A mi anga wan koni sisa den e kai Etta Huth be e wooko. Neen be e soi u fa u mu seeka den guluntu anga den sii. Wantu sisa di be e tan koosube be e kon yeepi u anga a wooko tu. Etta be e soi den san den mu du. A be sabi a wooko bun. A be e lesipeki den baala di be e teke fesi. U be sa waka neen baka.

Mi anga Angela anga Etta Huth

Angela Romano a wan fu den sisa di be e kon yeepi u anga a wooko. A sisa Etta yeepi en fu kon a waaleiti. Mi anga Angie toow aini april 1958. Wi e dini Yehofa 58 yali kaba. Angie be lobi Yehofa anga en hii ati, na a sani de be meke a toowlibi fu u waka bun. A koni, neen meke winsi sowtu polobelema mi be abi mi be sa fitoow en.

A ZENDELING WOOKO ANGA A KELEN WOOKO

Di den baala seli a laadiyow sitasiyon WBBR di be de a Staten Island aini 1957, mi be wooko wan pisiten na a beikantoo fu Brooklyn. Ma di mi anga Angie toow, neen mi komoto a Betel. U pionili a Staten Island dii yali. Wan pisiten mi be e wooko gi den sama di be bai a laadiyow sitasiyon. Den be e kai a sitasiyon fu den WPOW.

Mi anga Angie á be e libi bigi, neen meke u be man go yeepi a pe yeepi be de fanowdu. Den be sende u go enke spesuutu pionili aini 1961, a Nebraska wan peesi a Falls Foto. Ma di u doo ape a á teke langa, neen den sende u go a South Lansing, wan peesi a New York, fu go na a Kownukondee diniwooko-sikoo wan mun langa. U be lobi den sani di u be e leli, ma u be denki taki baka a sikoo u be o go a Nebraska baka. Neen meke u be foondoo di den sende u go a Kambodya enke zendeling. Kambodya a wan fu den moin kondee di de a Asiya. Di u go ape u si, u tesi, u yee omen sani di wi á be sabi. U be wani paati a bun nyunsu fu a Kownukondee na a kondee ya.

Mi anga Angela aini 1975, fosi den soi wi a tv

Ma sani be kengi aini a kondee, neen meke u be abi fu go a Vietnam. Baka tu yali, neen mi siki neen meke u be abi fu go na Ameekankondee baka. Mi be abi ten fanowdu fu betee. Di mi betee, neen u bigin pionili baka.

Aini maart 1965 u bigin anga a kelen wooko. Mi anga Angie du a wooko ya 33 yali langa. U be e yeepi a den konkelesi tu. Mi be lobi a wooko ya, bika senten di mi de mi lobi den konkelesi. A omen yali u du a kelen wooko. U be e go luku den kemeente di de a New York. Gaanse fu den konkelesi be e holi a Yankee Stadium.

 U GO A BETEL BAKA, U GO A WANTU SIKOO FU A OLIKANISÂSI

A omen wooko mi anga Angie be abi a gaandi fu du. Son wan fu den wooko ya á be makiliki. Aini 1995, mi be abi a gaandi fu leli sama na a Dinali Sikoo. Baka dii yali, neen den kai u fu go a Betel. Mi piisii fu de a Betel baka, baka 40 yali. A Betel mi bigin anga a fuuten diniwooko. Wan hii pisiten mi be e wooko na a dienstafdeling. Boiti dati mi be e gi leli a omen sikoo. Aini 2007, den baala di e tii a wooko seeka wan kantoo di be e luku ala den sikoo di be e holi a Betel. Mi be e teke fesi wantu yali na a kantoo ya.

A omen sani kengi a den sikoo di den e holi a Betel. A Owluman-sikoo bigin aini 2008. Tu yali baka dati, a moo enke 12.000 owluman go na a sikoo ya na a beikantoo fu Patterson anga a beikantoo fu Brooklyn. A omen taa peesi den e holi a sikoo ya nownow. Aini 2010, den be kengi a nen fu a Dinali Sikoo toon Beibel Sikoo gi baala di á toow. Baka dati den seeka wan nyun sikoo, a Sikoo gi Kelesten Toowpaa.

Aini september 2014 den mokisa den tu sikoo ya, neen den kai en Kownukondee Peleikiman Sikoo. Toow sama anga sama di á toow sa go na a sikoo ya. A omen sama piisii di den yee taki a sikoo ya o holi aini den kondee. Ai bigi gi mi fu si taki son sama kengi sani aini den libi fu be man go na a sikoo ya.

Te mi e pakisei a libi fu mi, fosi mi dopu aini a koo wataa baki te anga now, da mi e gi Yehofa daa fu den koni sama di mi miti. Den yeepi mi fu sabi Yehofa anga fu dini en. Son wan fu den be yonkuu moo mi, taawan be moo gaandi. Somen fu den be de fu taa nasi. Ma mi si a den sani di den be e du taki den be lobi Yehofa tuutuu. Ai bigi gi mi fu abi koni mati aini a foluku fu Yehofa di sa leli mi sani.

Mi e piisii fu miti den baala anga sisa fu hii goontapu di e kon a den sikoo