Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  maart 2016

Yonkuuwan fa u sa teke seeka fu dopu?

Yonkuuwan fa u sa teke seeka fu dopu?

„Mi Gadu, mi e piisii fu du san i wani.”PSALM 40:8.

SINGI: 51, 58

1, 2. (a) Saide dopu pelensipali? (b) San wan sama mu sabi fosi a dopu? Saide a mu sabi a sani ya?

YU A wan yonkuuwan di wani dopu? Dati na a moo bun sani di i sa du. Enke fa u be si aini a taa artikel, dopu a wan gaan sani. Te i dopu yu e soi taa sama taki i paamisi Yehofa taki yu o libi enke fa a wani. Dati wani taki ai hii libi yu o dini en. Ai soi tu taki a moo pelensipali sani gi i, na a dini di yu e dini Yehofa. Dopu a nawan lawlaw sani, neen meke fosi wan sama dopu, a mu fusutan a waaleiti bun. Boiti dati, neen seefi mu wani dopu, a mu fusutan san a wani taki tu fu paamisi Yehofa taki a o libi enke fa a wani.

2 Kande yu e si enke yu á kaba fu dopu. Efuso kande yu e si enke i kaba, ma i mma anga i dda e si enke yu á kaba ete. Den e si enke i mu wakiti te i bigi moo. San i mu du? Yu á mu lasi ati. Koboloiki a ten di yu abi nownow fu teke seeka fu dopu. Meke moiti fu go a fesi anga den dii sani ya: (1) I biibi, (2) a fasi fa yu e tyai iseefi, anga (3) teke san Yehofa du gi i fu bigi.

 I BIIBI

3, 4. San yonkuuwan sa leli fu Timotiyesi?

3 Fa i be o piki den akisi ya? Saide mi e biibi taki wan Gadu de? Fa mi du sabi taki Beibel a Gadu Wowtu? Saide mi e holi den weiti fu Gadu? Den akisi ya o yeepi i fu du san a apostel Pawlesi be taki. A taki u mu meke moiti fu „sabi san na a pasi fu Gadu di bun, di e meke a piisii, di ná abi nawan fowtu” (Romesama 12:2). Saide u mu du a sani ya?

4 A toli fu Timotiyesi o yeepi i. A be sabi a Wowtu fu Gadu. En mma anga en gaanmma be e leli en den sani di sikiifi aini. Tokuso Pawlesi taigi en taki: „I mu e du den sani di i leli, den sani di yu e biibi, bika sama be yeepi i fu si taki den sani ya tuu” (2 Timotiyesi 3:14, 15). Timotiyesi be e biibi den sani di a be e leli. A ná di en mma anga en gaanmma be e dwengi en meke a be e biibi, ma enseefi be e ondoosuku efu den sani di a be e leli be tuu. A be e sidon pakisei den sani di a be e leli tu.Leisi Romesama 12:1.

5, 6. Saide a bun fu leli fa i mu koboloiki i „fusutan” te i yonkuu?

5 Ma yu noh? Kande i sabi a waaleiti wan pisi ten kaba. Efu a so, da i mu akisi iseefi saide yu e biibi den sani di yu e leli. A sani de o taanga i biibi. A o yeepi i fu yu á du sani fu di taa yonkuuwan e dwengi i, efuso fu di omen sama fu a goontapu e du en. Boiti dati a o yeepi i fi i denki fosi i du sani.

6 Efi i sabi fa i mu koboloiki i „fusutan” te i yonkuu, yu o sabi san i mu piki te wan taa yonkuuwan akisi i taki: ’Fa i du sabi taki wan Gadu de? Efu Gadu lobi u, da saide a fika ogii fu e pasa? Efu a Gadu meke ala sani da, sama meke Gadu?’ Efi i gwenti sutudeli a Beibel, da i ná o buuya te den akisi i den sani ya, ma den akisi ya o gi i taanga-sikin fu ondoosuku Beibel moo bun.

7-9. Fa den sani a Internet na a pisi „Wat leert de Bijbel echt?” o meke i biibi kon moo taanga?

 7 Efu yu abi a gwenti fu sutudeli Beibel, yu o sabi san i mu piki te sama akisi wan sani. Boiti dati i ná o buuya gawgaw. Ma i biibi o kon moo taanga (Toli 17:11). A olikanisâsi meke omen buku di e soi kiin taki a Gadu meke ala sani. A omen sama fende wini di den leisi kapitel 5 fu a buku Kon krosibei na Yehovah. A omen yonkuuwan fende wini tu fu a pisi a internet di den e kai „Wat leert de Bijbel echt? (werkbladen)”. I sa fende en a jw.org/nl na a pisi WAT DE BIJBEL LEERT. Ala den sani di yu o fende na a pisi ya o yeepi i fu taanga i biibi.

8 Fu di i gwenti sutudeli Beibel, meke yu o man piki son akisi di sikiifi na a pisi de. Ma yu e biibi den sani di i leli? Den sani di sikiifi na a website, o yeepi i fu sidon denki wantu tekisi. Boiti dati den o gi i taanga-sikin fu sikiifi saide meke yu e biibi den sani di sikiifi aini Beibel. A sani de o yeepi i fu man taigi taawan san yu e biibi. Efi i poi go a internet na a pisi „Wat leert de bijbel echt?”, da yu o fende sani di i sa koboloiki te yu e sutudeli a Beibel. Den sani ya o taanga i biibi.

9 I mu sabi saide yu e biibi den sani di i leli. Disi a wan fu den sani di i mu du fosi i dopu. Wan yonkuu sisa taki: „Fosi mi dopu, mi be teke ten sutudeli Beibel. A sani de yeepi mi fu si taki a disi na a tuu biibi. Dei fu dei mi biibi e moo taanga.”

A FASI FA YU E TYAI ISEEFI

10. Saide wan Kelesten di dopu mu du den sani di ai biibi?

10 Beibel taki: „Efu wan sama e taki anga mofu taki ai biibi, ma a nai du sani fu soi taki ai biibi. Da a biibi fi en dede” (Yakowbesi 2:17). A den sani di yu e du, e soi efi i biibi taanga. ’A fasi fa yu e tyai iseefi anga den sani di yu e du, o soi taki yu a wan santa sama di e dini Gadu anga i hii ati.’Leisi 2 Peitilisi 3:11.

11. Fa wi e soi taki u santa?

11 Fa wan sama e soi taki a santa? Te wan sama santa ai tyai enseefi a wan fasi di fiti. Pakisei fa sani be waka den sigisi mun di pasa. Di i be fii fu du wan sani di á bun, i be sidon denki fa Yehofa wani i tyai iseefi? (Hebrewsama 5:14) I sabi ete fa i be mu meke moiti fu du san Yehofa wani di taa yonkuuwan be wani i du wan sani di á bun? Taawan sa waka ai baka te den luku a fasi fa yu e tyai iseefi a sikoo? Yu e du san Yehofa wani efuso yu e du san den taa pikin e du fu di yu á wani den soso i? (1 Peitilisi 4:3, 4) Ala sama e meke fowtu. Son leisi ai taanga gi den sama di dini Yehofa omen yali kaba fu peleiki, fu di sen e kisi den. Ma wan sama di paamisi Yehofa taki a o libi enke fa a wani, nai sen taki en a wan Yehofa Kotoigi. A fasi fa ai tyai enseefi e soi taki a santa.

12. San e soi taki yu e dini Gadu anga i hii ati? Fa u mu si den sani ya?

12 San e soi taki yu e dini Gadu anga i hii ati? Wantu fu den sani ya, na a komakandaa di wi e go, anga a peleikiwooko. Ma a sa de taa sani tu, sani enke begi anga a sutudeli di wi e sutudeli. Sama nai si te wi e du den sani ya. Den sama di paamisi Yehofa taki den o libi enke fa a wani nai si den sani ya enke dwengi. Leti enke Kownu David den e taki: „Mi  Gadu, mi e piisii fu du san i wani, a weiti fi i de aini mi ati.”Psalm 40:8.

13, 14. San o yeepi i fu go a fesi? Sowtu wini yonkuuwan fende di den du a sani ya?

13 Efi i wani sabi san i mu du fu go a fesi, a be o bun fu pakisei den akisi ya: „Te yu e begi yu e taki san de a yu ati? A fasi fa yu e begi e soi taki i lobi Yehofa tuutuu? Sowtu toli yu e sutudeli? Yu e go a peleikiwooko winsi i mma anga i dda nai go?” Poti den sani di i wani du moo bun a pampila, sani enke begi, sutudeli anga peleiki.

14 A omen yonkuuwan di be wani dopu fende wini di den sikiifi san den be wani du moo bun. Wan yonkuu sisa den e kai Tilda taki: „Mi be lobi sikiifi den sani di mi be wani du. Na a sani de yeepi mi fu du den sani di mi be wani du. Baka wan yali mi be kaba fu dopu.” Wan yonkuu baala den e kai Patrick be fende wini di a be du a sani ya tu. A taki: „Mi be sabi san mi wani du. Ma di mi sikiifi den, mi moo fende taanga-sikin fu den.”

Yu o dini Yehofa winsi i mma anga i dda nai dini en moo? (Luku paragraaf 15)

15. Saide meke yu á mu dopu fu sama ede?

15 Wan fu den pelensipali sani di i mu akisi iseefi na: „Mi o dini Yehofa winsi mi mma anga nda efuso den mati fu mi nai dini en moo?” Te i paamisi Yehofa taki yu o libi enke fa a wani, neen i dopu, yu anga Yehofa e toon mati. Neen meke a ná fi i mma anga i dda ede meke yu e dini Yehofa. A ná fu den mati fi i ede yu e dini en tu. Te yu e meke moiti fu tyai iseefi enke wan santa sama di e dini Gadu anga en hii ati, yu e soi taki yu e biibi taki a disi na a tuu biibi. A sani de e soi tu taki i wani libi enke fa Yehofa wani. Den sani ya o seeka i fu dopu.

TEKE SAN YEHOFA E DU GI I FU BIGI

16, 17. (a) San mu gi wan sama taanga-sikin fu toon Kelesten? (b) Sowtu ageisitoli e soi taki u mu teke a dede di Yehofa meke Yesesi dede gi u fu bigi?

16 Wan leisi wan man di be sabi a Weiti fu Mosesi bun be akisi Yesesi taki: „Ondu fu den Weiti fu Gadu na a moo gaanwan?” Yesesi piki en taki: „I mu lobi i Gadu Yehofa anga i hii ati, i hii libi anga ala i fusutan” (Mateyesi 22:35-37). Yesesi taki na a lobi di wan sama lobi Yehofa mu meke a wani dopu. Na a sani de mu meke a wani toon wan Kelesten. Te wi e teke ten denki fu a dede di Yehofa meke Yesesi kon dede gi u, a sani de e meke u moo lobi en. Na a sani ya na a moo gaan sani di Yehofa du fu soi taki a lobi u. (Leisi 2 Korentesama 5:14, 15; 1 Yohanisi 4:9, 19.) Te yu e sidon pakisei a sani ya, a o gi i taanga-sikin fu du sani fu soi taki a sani di Yehofa du e bigi gi i.

17 A dede di Yehofa meke Yesesi dede gi u de enke te sama du i wan gaan bun. Kon u taki i be e dede a wataa neen wan sama puu i. San i be o du? I be o go a osu, dee i sikin, da i feegete a sani di a sama du gi i? Noiti! A be o bigi i taki a sama puu yu a wataa. A leti so a mu e bigi gi u taki Yehofa meke Yesesi dede gi u. Den fii wi fu sondu anga dede. Efu den á be du a sani ya gi u wi á be o abi a okasi fu libi fu teego aini wan paladeisi.

18, 19. (a) Saide meke yu á mu feele fu dini Yehofa? (b) Fa a dini di yu o dini Yehofa o meke i libi kon moo bun?

18 A sani di Yehofa du gi i, e bigi gi i? Efu ai bigi gi i, i sa paamisi Yehofa taki yu o libi enke fa a wani, da i dopu. Te i paamisi Yehofa taki yu o libi enke fa a wani, da a fu teego yu o dini. I mu feele  fu paamisi Yehofa a sani ya? Nono! Yehofa wani sani waka bun anga i. A o pai den sama di e libi enke fa a wani (Hebrewsama 11:6). Te i dopu, i libi o waka moo bun! Wan baala fu 24 yali di be dopu fosi a be abi 10 yali taki: „Kande mi be o fusutan son sani moo bun efu mi á be dopu yonkuuyonkuu. Ma a paamisi di mi be paamisi Yehofa taki mi o libi enke fa a wani, yeepi mi fu mi á feti a gudu baka.”

19 Yehofa wani sani go bun anga i. Ma Saatan nai booko en ede anga i. I ná o fende nawan wini efi i waka neen baka. I si enke a o poi gi i wan sani di enseefi ná abi? A á poi paamisi i nawan bun sani, bika sani ná o waka bun gi en aini a ten di e kon. A wan kodo sani di a sa gi i a dede, bika a o dede aini a ten di e kon.Openbaring 20:10.

20. Fa wan yonkuuwan sa teke seeka fu dopu? (Luku a faki „Fa i sa go a fesi.”)

20 A paamisi di yu o paamisi Yehofa taki yu o libi enke fa a wani na a moo bun sani di i be sa du aini i libi. I kaba fu du a sani ya? Efi i kaba, yu á mu feele fu paamisi Yehofa taki yu o libi enke fa a wani. Ma efi i si enke yu a kaba, da i mu du den sani di u taki aini a artikel ya fi i biibi sa kon moo taanga. Pawlesi be taigi den baala fu Filipi taki den mu e meke moiti fu go a fesi (Filipisama 3:16). Di yu o du den sani di sikiifi aini a artikel ya, te fi i denki iseefi o wani paamisi Yehofa taki yu o dini en. Boiti dati, yu o kaba fu dopu.