Skip to content

Skip to table of contents

San i mu du te yu e si enke sama á lobi i?

San i mu du te yu e si enke sama á lobi i?

SAMA á de di abi yeepi fanowdu enke wan beibi. Di u meke wi á be abi nawan booko-ede, bika u mma anga u dda be e solugu u. Ma di u bigin waka, neen u bigin si sama di bigi moo u. Wi á be sabi den sama ya, neen meke u be e feele den, moomoo te u dda efuso u mma á be de koosube. Ma te u be holi u mma efuso u dda ana, u be e fii bun. Wi á be e feele moo.

Di u be nyoni, na a lobi di u mma anga u dda be lobi u, anga a taanga-sikin di den be e gi u, be e meke u fii bun. U be e fusutan taki u mma anga u dda lobi u, neen meke a libi be e switi gi u. Te den be e gafa u, u be fii bun.

Di u kon moo bigi, den mati fu u seefi meke u fii taki sama lobi u. Wi e fii bun te wi anga den de. Wi á be e feele fu go a sikoo tu, bika u be sabi taki den mati fu wi o yeepi u.

Ma a ná ala pikin abi a bun libi ya. Son pikin ná abi mati ipi. Taawan mma anga dda nai booko den ede anga den. Melissa * taki: „Te mi e si taa pikin anga den mma anga den dda a fowtow, da mi e winsi taki a so mi osufamii be de tu.” Kande a so yu e fii tu.

WANTU SANI DI E MEKE SAMA SI ENKE TAAWAN Á LOBI DEN

Kande di i be moo yonkuu i be e si enke yu á sabi du sani. Kande sama á be e soi i taki den lobi i. Boiti dati, den á be e gi i deki-ati. Kande yu e membee fa i mma anga i dda kwali omen leisi te enke den paati. Kande yu e pakisei seefi taki a yu meke den paati. A kan taki moo ogii pasa anga i. Kande i mma efuso i dda tyai uman fasi a yu.

Fa den pikin di e si enke sama á lobi en e tyai denseefi? Son wan e somoko takuu tabaka. Taawan e diingi sopi. Taawan e paa anga sama di e du ogii, fu di den sama ya nai booko den ede anga a fasi fa den e tyai denseefi. Son wan fu den e de anga boi efuso meisyo yonkuuyonkuu, fu di den e suku sama di lobi den. Ma a nai teke langa fosi den paati. Son leisi a sani ya e gi den moo booko-ede.

Winsi son yonkuuwan nai du den sani ya, toku  son wan e fii enke den ná abi fa. Ana taki: „Mma be lobi taigi mi taki mi soso. Mi yee a sani ya te, neen miseefi bigin si enke mi soso tuu. Noiti mma gafa mi. A á soi mi taki a lobi mi tu.

Boiti a fasi fa u kiya, taa sani sa meke u si enke sama á lobi u. Kande i toow booko, kande i kon gaandi efuso yu e si enke i takuu. Den sani ya sa meke i nai piisii. Den sa meke wi anga u mati poli tu. Ma san u mu du te wi e fii so?

GADU E BOOKO EN EDE ANGA U

A bun fu u sabi taki wi o fende yeepi. Wan sama de di sa yeepi u. A wani yeepi u tu. A sama ya a Gadu.

Gadu be meke a polofeiti Yesaya sikiifi taki: „Ná luku enke yu e feele bika a mi a yu Gadu. Mi o gi i taanga. Mi o yeepi i. Anga mi leti ana mi o holi i. A ana di e du sani a wan Ieti fasi” (Yesaya 41:10, 13). Wi e fii bun di u sabi taki Gadu wani yeepi u. A á de fu u booko wi ede!

Beibel e taki fu sama di be abi polobelema, ma di leli fa den mu holi Gadu ana. Hana, a mma fu Samuweli, be e fii enke a ná abi fa, bika a á be poi meke pikin. Sama be e soso en. A sani ya meke Hana be booko-saka te, a á be e nyan, soso kee a be e kee (1 Samuweli 1:6, 8). Ma di a taigi Gadu fa ai fii, a á be e kusumi so moo.​—1 Samuweli 1:18.

Son leisi David be e booko-saka tu. A omen yali langa kownu Saul be e meke moiti fu kii en. Son leisi David be e fii enke a á poi moo, bika sama misi fu kii en wantu leisi (Psalm 55:3-5; 69:1). Tokuso David sikiifi taki: „Mi o didon siibi, mi ná o booko mi ede, bika a yu wawan sa yeepi mi Yehofa.”​—Psalm 4:8.

Hana anga David fika den booko ede fu den gi Yehofa. Den si taki Yehofa á fika den, a yeepi den (Psalm 55:22). Useefi sa du enke Hana anga David. Fa u sa du a sani ya?

DII SANI DI O YEEPI U FU FII MOO BUN

1. Fitoow Yehofa, si en enke i Dda.

Yesesi taki u mu meke moiti fu sabi en Dda, „a wan kodo tuutuu Gadu” (Yohanisi 17:3). A  apostel Pawlesi taki: „A á de faawe fu nawan fu u” (Toli 17:27). Yakowbesi sikiifi taki: „Kon koosube a Gadu, da enseefi o kon koosube a yu.”​—Yakowbesi 4:8.

Wan sani di o yeepi u fu wi á booko wi ede tumisi, a te u sabi taki wi abi wan Dda a hemel di e booko en ede anga u. A o teke ten fosi u fitoow en, ma a omen sama kon si taki te den e fitoow en, den nai booko den ede so moo. Caroline taki: „Di mi bigin si Yehofa enke Nda, mi fii moo bun. Bika mi be man taigi en ala san de a mi ati!”

Rachel taki: „A Yehofa yeepi mi fu holidoo di mma anga nda gwe fika mi. Mi be e taki anga en, mi be e begi en fu a yeepi mi anga den nowtu fu mi. A yeepi mi tu.” *

2. Suku sama di lobi i enke i famii.

Yesesi leli den bakaman fi en taki den mu si denseefi enke baala. A taigi den taki: „Ala wi a baala” (Mateyesi 23:8). A wani den tuutuu bakaman fi en lobi denseefi. A wani den libi anga denseefi enke famii.​—Mateyesi 12:48-50;Yohanisi 13:35.

Den baala anga sisa aini den kemeente fu Yehofa Kotoigi e meke moiti fu libi bun anga denseefi, fu gi denseefi taanga-sikin. Den e libi enke famii (Hebrewsama 10:24, 25). A omen sama e fende taanga-sikin te den go a komakandaa. Den taki den komakandaa de enke deesi gi den booko-ede fu den.

Eva taki: „Mi be abi wan bun mati na a kemeente di mi be e go. A be e fusutan fa mi be e fii. A be e aliki mi, a be e leisi gi mi, a be e begi anga mi. A be e yeepi mi fu taki san de a mi ati. Ai bigi gi mi taki a libi so anga mi. A meke mi si taki sama de di lobi mi.” Rachel taki: „Mi fende wan mma anga wan dda na a kemeente di mi e go, den lobi mi. A sani de e meke mi fii moo bun.”

3. Soi taawan taki i lobi den, libi bun anga den.

Te yu e soi taawan taki i lobi den, te yu e libi bun anga den, da yu o fende bun mati. Yesesi be  taki: „Wan sama e moo piisii te ai gi taawan sani moo te sama e gi en sani” (Toli 20:35). Yu o si taki o moo yu e soi taawan taki i lobi den, o moo taawan o lobi i. Yesesi be taigi den bakaman fi en taki: „I mu gwenti gi sama sani, da sama o gi i sani tu.”​—Lukasi 6:38.

Te taa sama e soi u taki den lobi u, anga te wi e soi taawan taki u lobi den, da wi e fii bun. Beibel taki „lobi e tan fu teego” (1 Korentesama 13:8). María taki: „Mi sabi taki a si di mi e si enke mi á bun, a ná wan bun fii. A sani di e yeepi mi fu mi á si miseefi so, na a yeepi di mi e yeepi taawan. Ná pikin piisii mi e piisii te mi e yeepi taawan.”

ALA SAMA O PIISII

Den sani di sikiifi a tapu ya e ’yeepi’, ma den ná o puu ala den booko-ede fu u. Caroline taki: „Te anga now mi e fii booko-saka. Ma mi nai booko mi ede tumisi, bika mi sabi taki Gadu e booko en ede anga mi. Boiti dati, mi abi mati di lobi mi.” Rachel taki: „Te a langa mi e fii booko-saka. Ma mi abi sama di de enke baala anga sisa gi mi. A den mi e go te mi wani sabi san mi mu du. Den e gi mi taanga-sikin. Ma a sama di e moo yeepi mi, a Nda di e tan a hemel, mi sa taki anga en ala yuu. Ai yeepi mi tuutuu.”

Beibel e soi taki wan nyun goontapu e kon, pe ala sama o piisii

Ma wan sani de di o puu booko-ede fu teego. Beibel e soi taki wan nyun goontapu e kon, pe ala sama o piisii. A Wowtu fu Gadu paamisi taki: „Ala den o sidon a den doloifi bon, anga den figa bon ondoo. Nawan sama o meke den feele” (Mika 4:4). A ten de u ná o abi fu feele moo. Boiti dati nawan sama o du ogii anga wi. Winsi sowtu ogii be miti i, i „ná o membee den fositen sani moo” (Yesaya 65:17, 25). Gadu anga en manpikin Yesesi Kelestesi o meke sani waka a wan leti fasi. A ten de nawan sama o de anga booko-ede.​—Yesaya 32:17.

^ paragraaf 5 Den kengi ala den nen aini a artikel ya.

^ paragraaf 21 Yehofa Kotoigi e yeepi den sama di wani kon koosube a Gadu fu fusutan a Beibel moo bun. I ná abi fu pai.