Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  maart 2016

San i mu du fu yeepi den baala anga sisa fu libi na a wan?

San i mu du fu yeepi den baala anga sisa fu libi na a wan?

„Neen e fiti ala den pisi fu a sikin kon a wan. Ala den pisi e wooko enke wan.”EFEISESAMA 4:16.

SINGI: 53, 107

1. San a foluku fu Gadu be e du fanafu a bigin?

FANAFU di Gadu bigin meke sani, neen en anga Yesesi e libi na a wan. A Yesesi na a fosi sani di Yehofa meke. Yesesi be e wooko anga Yehofa „enke wan sama di koni fu du en wooko” (Odo 8:30). Den sama di e dini Yehofa e wooko makandaa tu. A Nowa anga en osufamii be meke a ark. Bakaten, den Islayelisama be wooko makandaa di den be e meke a tabernakel. Te den be e booko en fu tyai go a taa peesi den be e wooko makandaa tu. Te den be de aini a tempel, den be e meke moin poku fu singi gafa Yehofa. A foluku fu Yehofa be man du den sani ya fu di den be e wooko makandaa.Genesesi 6:14-16, 22; Numeri 4:4-32; 1 Koloniki 25:1-8.

2. (a) Fa den fosi Kelesten be e libi anga denseefi? (b) Sowtu akisi wi o luku aini a artikel ya?

2 Den fosi Kelesten be e wooko makandaa tu. A apostel Pawlesi be taki den Kelesten be e libi na a wan, winsi fa den á be e du a seefi wooko. Boiti dati son wan be sabi du son  sani di taawan á be man du. Ala den be e waka a Yesesi baka, a fesiman fu den. Pawlesi be taki den de enke wan sikin. Wan sikin abi omen pisi, ma toku ala den pisi fu a sikin e wooko enke wan. (Leisi 1 Korentesama 12:4-6, 12.) Ma fa u sa wooko makandaa te u de aini a peleikiwooko, a kemeente anga osufamii?

WOOKO MAKANDAA AINI A PELEIKIWOOKO

3. San a apostel Yohanisi be deen?

3 Aini a ten fu den apostel, Yohanisi be deen fa seibin engel e boo tutu. Di du fu feifi engel boo, neen Yohanisi si „wan sitali kai komoto a hemel kon a goontapu”. A sitali opo wan gaan dipi peti anga wan sooto, neen baaka somoko komoto aini a peti. Baka dati neen omen makonkon fee komoto aini a somoko. Den á du sani anga den bon efuso den taa sani di e goo a goontapu, ma den du sani anga „den sama di ná abi a maiki fu Gadu a den fesi-ede” (Openbaring 9:1-4). Yohanisi sabi taki makonkon e nyan sani poli. A so den be du a Egepte aini a ten fu Mosesi (Ekisodesi 10:12-15). Den makonkon di Yohanisi be si, a den salufu Kelesten di e paati a bosikopu di den falisi keliki á lobi. A omen sama di e angii fu libi fu teego a goontapu, e wooko anga den salufu Kelesten fu paati a bosikopu ya. Den e du a wooko ya makandii. A wooko ya yeepi omen sama fu komoto aini falisi keliki. A yeepi den tu fu Saatan á tii den moo.

4. Sowtu wooko den sama di e dini Gadu mu du? San o yeepi den fu du a sani ya?

4 U mu paati a „bun nyunsu” a hii goontapu fosi a kaba doo. Ná pikin wooko! (Mateyesi 24:14; 28:19, 20) U mu kai ala den sama di e angii fu diingi „a wataa di e gi libi”, dati wani taki u mu yeepi den sama di wani fusutan den tuu leli fu Beibel (Openbaring 22:17). Ma wi o poi du a sani ya te wi e wooko anga taawan aini a kemeente.Efeisesama 4:16.

5, 6. Fa a peleikiwooko e meke u libi na a wan?

5 Efu u wani omen sama yee a bosikopu ya, da u mu du a wooko bun. Den baala e soi u a den komakandaa fa u mu du a wooko. Baka a peleikiwooko komakandaa, da wi e go paati a bun nyunsu fu a Kownukondee gi den sama. A omen miliyun buku anga taa sani di e taki fu Beibel wi e gi sama a hii goontapu. Son leisi a olikanisâsi e gi u taa sani fu paati aini a peleikiwooko. Te yu e du a wooko ya, a yu anga omen miliyun Kotoigi a hii goontapu e paati aseefi bosikopu! Boiti dati, yu e wooko anga den engel, di e yeepi a foluku fu Gadu paati a bun nyunsu.Openbaring 14:6.

6 Wi e piisii te wi e leisi aini a jaarboek fa a peleikiwooko e go a fesi a hii goontapu! Pakisei tu fa wi anga den taa Kotoigi e wooko makandaa, te wi e kai sama fu kon a den konkelesi. A denseefi sani wi e leli a den komakandaa ya. Den lezing, den dalaama anga den demo e gi u taanga-sikin fu dini Yehofa anga u hii ati. Wi e si taki wi anga u baala anga sisa e libi na a wan tu te wi e go ala yali na a Membeefesa (1 Korentesama 11:23-26). Wi e kon makandii na aseefi dei, 14 Nisan baka te a san dongo fu soi taki a sani di Yehofa du, e bigi gi u. Wi e du en tu fu di wi e aliki Yesesi. Den wiki fosi a Membeefesa, wi e wooko makandii fu kai sama na ala se fu kon na a Membeefesa anga u.

7. San wi e man du te wi e wooko makandaa?

 7 Wan kodo makonkon á poi poli omen sani. A leti so wan sama namo á poi peleiki gi ala sama. Ma fu di wi e wooko makandaa anga taawan, meke u poi yeepi miliyunmiliyun sama fu sabi Yehofa. Son wan fu den e bigin dini Yehofa, den e gafa en tu.

WOOKO MAKANDAA AINI A KEMEENTE

8, 9. (a) Sowtu ageisitoli Pawlesi koboloiki fu yeepi Kelesten fu libi na a wan? (b) Fa u sa wooko makandaa aini a kemeente?

8 Aini a biifi di Pawlesi sikiifi gi den Efeisesama, a soi den fa a kemeente sete. A taki ala sama aini a kemeente mu go a fesi. (Leisi Efeisesama 4:15, 16.) Pawlesi be taki a kemeente de enke wan libisama sikin. Ala Kelesten aini a kemeente mu du en wooko fu sani waka bun. Den mu waka a Yesesi baka, a fesiman fu a kemeente. Pawlesi taki ala den sukuufu fu a sikin de fanowdu. San u mu du winsi u yonkuu, gaandi, siki efuso gusontu?

9 Yesesi poti owluman aini a kemeente fu teke fesi. A wani u lesipeki den. U mu wooko anga den sani di den e taigi u tu (Hebrewsama 13:7, 17). Ma a ná ala yuu a sani ya makiliki. Ma u sa akisi Yehofa fu a yeepi u. A santa yeye o yeepi u fu wooko anga den sani di den owluman e taigi u. Pakisei den wini di a kemeente o fende te wi e lesipeki den owluman, anga te wi e wooko anga den sani di den e taigi u. Ala sama aini a kemeente o libi na a wan. Wi o moo lobi useefi tu.

10. Fa den dinali e yeepi a kemeente fu libi na a wan?

10 Den dinali e yeepi a kemeente fu libi na a wan tu. Den e holibaka gi den owluman, neen meke a wooko di den e du e bigi gi u. Den e luku efu a kemeente abi buku sai fu paati aini a peleikiwooko. Den e bali wadaa gi den sama di e kon a den komakandaa. Boiti dati, den e wooko taanga fu seeka a Kownukondee zaal te wan sani booko efuso te a mu kiin. Efu wi e wooko anga den baala ya, sani o go bun aini a kemeente.—Luku Toli 6:3-6 tu.

11. Fa yonkuuwan sa yeepi a kemeente fu libi na a wan?

11 A omen yali kaba son owluman wooko taanga aini a kemeente. Ma fu di den kon gaandi meke den á poi wooko taanga moo enke fosi. Den yonkuu baala sa yeepi den. Efu den owluman leli den fa den mu tyai faantiwowtu den o man du moo aini a kemeente. Te den dinali e wooko taanga, den sa toon owluman bakaten (1 Timotiyesi 3:1, 10). Son yonkuu baala go a fesi, nownow den toon kelen-owluman. Den e yeepi baala anga sisa aini omen kemeente. Ai bigi gi u te yonkuuwan wani yeepi den baala anga sisa anga den hii ati.Leisi Psalm 110:3; Peleikiman 12:1.

WOOKO MAKANDAA AINI A OSUFAMII

12, 13. San o yeepi osufamii fu wooko makandaa?

12 Fa u sa yeepi useefi aini a osufamii fu libi na a wan? Wan sani di o yeepi u, a te wi e holi a Osufamii Anbegi ala wiki. Te mma, dda anga pikin e teke ten fu leli sabi Yehofa, den e moo lobi denseefi. Boiti dati den sa luku san den o taki aini a peleikiwooko. A so ala den o sabi san den mu taki te den de aini a peleikiwooko. Te den e yee fa den taa sama fu a osufamii e taki fu a waaleiti, anga te den e si  fa den e meke moiti fu libi enke fa Yehofa wani, da a sani de o yeepi den fu libi na a wan.

13 San o yeepi man anga uman fu libi na a wan? (Mateyesi 19:6) Den o libi na a wan aini a osufamii efu den lobi Yehofa, anga te den e dini en. A toowlibi fu den o waka bun. Den mu soi taki den lobi denseefi tu leti enke Abalaham anga Sala, Isaki anga Lebeka, anga Elkana anga Hana (Genesesi 26:8; 1 Samuweli 1:5, 8; 1 Peitilisi 3:5, 6). Te man anga uman e du a sani ya, den o libi na a wan. Den o toon moo bun mati anga Yehofa tu.Leisi Peleikiman 4:12.

A Osufamii Anbegi e yeepi mma, dda anga pikin fu libi na a wan (Luku paragraaf 12, 15)

14. San i mu du fi i toowlibi waka bun te i toowpaa nai dini Yehofa?

14 Beibel e soi kiin taki wi á mu toow anga wan sama di nai dini Yehofa (2 Korentesama 6:14). Ma son baala anga sisa toowpaa nai dini Yehofa. Son wan fu den toow fosi den toon Kotoigi. Ma taawan a baka di den toow neen den toowpaa komoto a waaleiti. Den Kelesten di de aini den sowtu toowlibi ya, mu meke moiti fu meke a toowlibi fu den waka bun. Den sani di sikiifi aini Beibel o yeepi den fu libi bun anga den toowpaa. A sani ya á makiliki. Wan sisa den e kai Mary anga en man David be e dini Yehofa. Ma bakaten David á be e go a komakandaa moo. Ma Mary be e libi bun anga en, a be e tyai enseefi enke wan Kelesten. A be leli den sigisi pikin fu den sabi Yehofa. Mary be e go a den komakandaa anga den konkelesi tu. Di den pikin kon bigi, neen den foloisi. Mary be e dini Yehofa ete, winsi fa a be moo ibi gi en di den pikin foloisi. Ma baka wan pisi ten David bigin leisi den buku di Mary be e fika gi en. A á teke langa neen a bigin go a komakandaa baka. Wan galanpikin fi en di be abi sigisi yali be lobi holi peesi gi en. Te David á be kon, da a boi ya be e taigi en taki: „Opa, mi á si yu a komakandaa tide.” Baka 25 yali neen David bigin dini Yehofa baka. Nownow en anga en uman e poolo taki den e dini Yehofa makandii.

15. Fa den sama di toow wan pisi ten kaba sa yeepi den sama di á toow langa ete?

 15 Saatan e du ala san a man fu fanya osufamii aini a ten ya. Neen meke man anga uman di toow mu wooko makandii. Winsi o langa i toow, i mu sidon pakisei san i mu du fi i toowlibi waka moo bun. Efi i toow wan pisi ten kaba, i sa yeepi den moo yonkuu toowpaa. Kande i sa kai den te yu e holi a Osufamii Anbegi. A sani ya o yeepi den fu si taki winsi o langa wan sama toow, tokuso a mu soi en toowpaa taki a lobi en. A mu meke moiti fu libi bun anga en tu.Titesi 2:3-7.

„KON MEKE U GO NA A MONGO FU YEHOFA”

16, 17. Fa sani o waka gi a foluku fu Gadu aini a ten di e kon?

16 Te den Islayelisama be e go a Yelusalem ala yali fu fii den fesa fu Yehofa, den be e wooko makandaa. Den be e seeka ala den sani di den be abi fanowdu. Te den be de a pasi den be e yeepi denseefi. Te den be doo na a tempel, den be e dini Yehofa makandii (Lukasi 2:41-44). Aini a ten ya u mu du ala san u man fu libi na a wan anga u baala anga sisa. Boiti dati, u mu wooko makandaa. A sani ya o seeka u fu libi aini a nyun goontapu. I denki luku kaba fa i sa du den sani ya moo bun?

17 Den sama fu a goontapu ya nai libi na a wan. Den e feti fu omen lawlaw sani. Ma ai bigi gi u taki Yehofa e yeepi u fu libi na a wan. Ai yeepi u fu fusutan a Beibel tu. A foluku fi en a hii goontapu e dini en enke fa a wani. Den sama di e dini Yehofa e moo libi na a wan aini den lasiti dei ya. Ala wi e „go na a mongo fu Yehofa” enke fa Yesaya anga Mika be taki (Yesaya 2:2-4; leisi Mika 4:2-4). Ná pikin piisii wi o piisii te ala sama o libi na a wan aini a nyun goontapu. Den o dini Yehofa makandaa.