Skip to content

Skip to table of contents

I sabi Yehofa enke fa Nowa, Daniyeli anga Yopu be sabi en?

I sabi Yehofa enke fa Nowa, Daniyeli anga Yopu be sabi en?

„Den sama di e du ogii á poi sabi san a leti-du, ma den sama di e suku Yehofa poi fusutan ala sani.”​—ODO 28:5.

SINGI: 126, 150

1-3. (a) San o yeepi u fu aliki Yehofa aini den lasiti dei ya? (b) San wi o luku aini a artikel ya?

NOWNOW wi e libi aini den lasiti dei fu a goontapu ya. Wi e si fa sama e kon moo ogii dei fu dei. Den e „goo enke gaasi” (Psalm 92:7). U nai foondoo taki omen sama á wani libi enke fa Gadu wani. Pawlesi be taigi den Kelesten taki: „U mu de enke pikinnengee di nai du ogii. A fasi fa wi e denki mu soi taki wi a gaansama” (1 Korentesama 14:20). Fa u sa du a sani ya?

2 U sa fende a piki aini a tekisi fu a artikel ya. A taki: „Den sama di e suku Yehofa poi fusutan ala  sani” (Odo 28:5). A sani ya wani taki den sabi san den mu du fu meke Yehofa piisii. Odo 2:7, 9 e soi taki Yehofa e gi den sama di e du bun sani koni. Ai meke den ’sabi san a leti-du anga fa fu koti kuutu a wan leti fasi. Ai yeepi den fu du sani anga wan kiin ati. Ai yeepi den fu du bun tu’.

3 Yehofa be gi Nowa, Daniyeli anga Yopu a koni ya (Eseikiyeli 14:14). A so a de tu anga a foluku fu Gadu. Yu abi a koni fu Gadu di o yeepi i fu sabi san i mu du fu meke a piisii? Wan sani di o yeepi i, a te i sabi Yehofa bun. A artikel ya o soi u (1) fa Nowa, Daniyeli, anga Yopu du sabi Gadu, (2) fa a sabi di den be sabi Yehofa yeepi den, anga (3) san o yeepi u fu u biibi taanga enke den man ya.

NOWA LIBI ENKE FA GADU WANI WINSI FA OGII BE LAI A GOONPTAPU

4. Fa Nowa du sabi Yehofa? Fa a sani ya yeepi en?

Te Nowa be luku den sani di Gadu meke, a be e si taki Gadu de tuutuu

4 Fa Nowa du sabi Yehofa? Fanafu di Adan anga Efa meke pikin, dii sani be e yeepi sama fu sabi Yehofa. Den be e luku den sani di Gadu meke. Den sama di be e libi a den fesi be e leli den sani fu Yehofa. Boiti dati den be e leli sabi Yehofa te den be si fa ai belesi den te den be du san a taki (Yesaya 48:18). Te Nowa be e luku den sani di Gadu meke, a be e si taki Gadu de tuutuu. A be e si den manii fu Yehofa tu. Nowa be fusutan taki a Yehofa na a tuu Gadu. A abi makiti (Romesama 1:20). Nowa á be e biibi namo taki Gadu de, ma en biibi be taanga.

5. Fa Nowa du sabi san Gadu abi a pakisei gi libisama?

5 Beibel taki ’a te wan sama yee wan sani fosi ai biibi’. A sani ya e soi taki a den sani di wan sama yee, e yeepi en fu biibi (Romesama 10:17). Kande a den famii fu Nowa yeepi en fu sabi Yehofa. Wan fu den sama ya, neen dda Lamek. Lamek biibi be taanga. Lamek be meke fosi Adan dede. (Luku a fowtow na a bigin.) Kande en gaandda Metusala anga en afo Yered yeepi en fu sabi Yehofa tu. Yered dede 366 yali baka di Nowa meke * (Luku a maiki a ondoo.) (Lukasi 3:36, 37). Kande a den man ya anga den uman fu den be leli Nowa taki a Yehofa meke libisama.  Kande den leli en taki Gadu wani den meke pikin fuu goontapu, da den dini en. Nowa yee tu taki Adan anga Efa á be aliki Yehofa, neen meke sani á waka bun gi den. Nowa seefi be e si den ogii di be e pasa a goontapu (Genesesi 1:28; 3:16-19, 24). Nowa be lobi den sani di a leli, neen meke a bigin dini Yehofa.​—Genesesi 6:9.

6, 7. Fa howpu taanga Nowa biibi?

6 Te wan sama abi howpu, en biibi e moo taanga. Pakisei fa Nowa biibi be moo taanga di a yee taki en nen be e gi sama howpu. En nen be wani taki „boo” efuso „toosutu” (Genesesi 5:29). A Yehofa be meke Lamek taki a sani ya. A taki: „A wan ya o meke u fende toosutu, bika wi e wooko taanga. Wi e pina, bika Yehofa fuuku a doti.” Nowa be e biibi taki Yehofa be o meke sani kon bun baka. Leti enke Abel anga Heinok, a so Nowa seefi be e biibi taki „a pikin” be o masi a sineki ede.​—Genesesi 3:15.

7 Nowa á be e kaba fusutan a paamisi fu Yehofa di sikiifi a Genesesi 3:15. Ma a be e fusutan taki a polofeititoli ya be e gi sama howpu taki sani be o go bun aini a ten di e kon. Na aseefi bosikopu ya Heinok be e paati tu. A be taki Yehofa o kii den ogii sama (Yudasi 14, 15). A bosikopu di Heinok be e paati be musu taanga a biibi anga a howpu fu Nowa. A sani di Heinok taki o pasa ete wan leisi na Alimakedon.

A biibi fu wi anga a koni fu Gadu, e yeepi u fu Saatan á fende u koli

8. Fa a sabi di Nowa be sabi Gadu yeepi en?

8 Fa a sabi di Nowa be sabi Gadu yeepi en? Na a sabi di Nowa be sabi Yehofa be yeepi en fu abi biibi anga koni. A sani ya yeepi en fu a á du sani di Yehofa á lobi. Fa a yeepi en? Nowa be wani toon Gadu mati, neen meke a á be e mosoo anga sama di á be lobi Yehofa. A á be e mosoo anga sama di á be e biibi Yehofa tu. Nowa á be meke den ogii yeye di be kon a goontapu koli en. Kande sama be e wani dini den ogii yeye ya te den be si fa den taanga (Genesesi 6:1-4, 9). Nowa be sabi taki Yehofa be wani libisama meke pikin fu goontapu (Genesesi 1:27, 28). Neen meke di den ogii yeye kon meke pikin anga uman a goontapu, Nowa be sabi taki a ogii den du. Den pikin di den be meke be bigi moo den taa pikin. Den be taanga moo den tu. A be de  gagagaa fu si taki a ná wan bun sani den be du. Bakaten Yehofa taigi Nowa taki a be o meke wan fuudu kii ala den ogii sama. Nowa be e biibi Yehofa, neen a meke a ark. A so en anga en osufamii be tan a libi.​—Hebrewsama 11:7.

9, 10. San o yeepi u fu u biibi taanga enke Nowa?

9 Fa u sa soi taki u biibi taanga enke Nowa? U mu sutudeli Gadu Wowtu bun. U mu lobi den sani di wi e leli. Boiti dati u mu wooko anga den, da u kengi a fasi fa wi e libi (1 Peitilisi 1:13-15). Te u du den sani ya, da a biibi fu u anga a koni di Gadu o gi u, o yeepi u fu Saatan á fende u koli (2 Korentesama 2:11). Gaanse sama aini a goontapu ya lobi ogii. Den lobi hululibi tu. A san a sondu sikin wani den e du (1 Yohanisi 2:15, 16). Den nai biibi taki a dei fu Yehofa koosube. Efu u biibi á taanga, useefi o bigin denki so tu. Wi á mu feegete taki di Yesesi be taki fu a ten fu u anga a ten fu Nowa, a á be taki fu den ogii di sama e du anga a hululibi fu den. Ma a be taki, pe fu den sama dini Gadu, den be o poti pakisei a den sani di den e du ala dei.​—Leisi Mateyesi 24:36-39.

10 Akisi iseefi taki: ’A fasi fa mi e libi e soi taki mi sabi Gadu? A biibi fu mi e yeepi mi fu du sani enke fa Yehofa wani? Ai yeepi mi fu leli taawan fu du sani enke fa Yehofa wani?’ Den akisi ya o yeepi i fu sabi efu yu e dini Yehofa enke Nowa.

DI DANIYELI BE DE A BABILON, A BE SOI TAKI A KONI

11. (a) San u sa taki fu Daniyeli mma anga en dda te u luku fa Daniyeli be lobi Yehofa? (b) On du fu den manii fu Daniyeli i be sa wani abi?

11 Fa Daniyeli du sabi Yehofa? A Daniyeli mma anga en dda yeepi en fu lobi Yehofa anga a Wowtu fi en. Daniyeli soi anga a fasi fa a be e libi taki a be lobi a Wowtu fu Gadu. Winsi fa a be kon gaandi, toku a be e ondoosuku a Wowtu fu Gadu (Daniyeli 9:1, 2). Daniyeli be sabi Yehofa bun. Te u luku fa Daniyeli be begi Yehofa anga en hii ati a Daniyeli 9:3-19, wi e si taki a be sabi san Yehofa be du gi den Islayelisama. Leisi a tekisi ya, da i akisi iseefi taki: ’San mi sa leli fu Daniyeli te mi luku a begi ya?’

12-14. (a) Fa Daniyeli soi taki a abi a koni fu Gadu? (b) Fa Yehofa belesi Daniyeli di a soi taki a abi deki-ati anga di a á gwe fika en?

12 Fa a sabi di Daniyeli be sabi Gadu yeepi en? Di den Dyu be de a Babilon, a be taanga gi den fu dini Yehofa. Yehofa be taigi den taki: „Wi á mu ligei aini a foto di mi o meke u go enke katiboman” (Yelemiya 29:7). A be taigi den tu taki neen wawan den mu dini  (Ekisodesi 34:14). San be yeepi Daniyeli fu holi den tu weiti ya? A koni fu Gadu yeepi Daniyeli fu si taki a Yehofa a be mu aliki, a ná libisama. Omen ondoo yali baka dati, Yesesi be leli sama aseefi sani.​—Lukasi 20:25.

13 Pakisei san Daniyeli du di den be poti wan weiti taki na a kownu wawan sama mu begi 30 dei langa. Den á be mu begi nawan taa sama efuso gadu. (Leisi Daniyeli 6:7-10.) Daniyeli be sa taki: ’A á langa, a 30 dei namo.’ Ma Daniyeli á meke libisama tapu en fu dini Gadu. Daniyeli be sa kibii begi, ma a be sabi taki sama be e si fa a be e begi ala dei. Fu di a á be wani sama denki a nai dini Yehofa moo, meke a begi enke fa a be gwenti, winsi fa a sani ya be sa tyai dede gi en.

 14 Yehofa belesi Daniyeli fu di a be abi deki-ati anga di a á gwe fika en. A du wan wonduu fu kibii Daniyeli fu lew á kii en. A sani ya meke hii Mediya anga Persiya kon sabi sama a Yehofa.​—Daniyeli 6:25-27.

15. San o yeepi u fu u biibi taanga enke Daniyeli?

15 San o yeepi u fu u biibi taanga enke Daniyeli? A ná te wi e leisi Beibel namo, da u biibi o taanga. U mu fusutan san wi e leisi tu (Mateyesi 13:23). U wani denki enke fa Yehofa e denki, neen meke u mu e teke ten pakisei den sani di wi e leisi. U mu e begi ala yuu tu, moomoo te sani e moo wi. U mu biibi taki Yehofa o gi u koni anga kaakiti.​—Yakowbesi 1:5.

YOPU BE E DU SAN YEHOFA LOBI TE SANI BE E GO BUN ANGA TE SANI Á BE E GO BUN

16, 17. Fa Yopu be du sabi Yehofa?

16 Fa Yopu be du sabi Yehofa? Yopu a ná be Islayelisama. Ma Abalaham, Isaki anga Yakopu a be en faawe famii. Yehofa be meke den sabi en. A be meke den sabi san a abi a pakisei fu du. Wi á sabi sama leli Yopu den sani ya, ma u sabi taki a be sabi den tu (Yopu 23:12). A be taigi Yehofa taki: „Mi be e yee fi i, ma now miseefi si i” (Yopu 42:5). Yehofa seefi be taki, den sani di Yopu taki, a tuu.​—Yopu 42:7, 8.

U biibi e moo taanga te u luku den sani di Gadu meke anga te u sabi den manii fi en (Luku paragraaf 17)

17 Te Yopu be e luku den sani di Yehofa meke, a be e si den manii fi en (Yopu 12:7-9, 13). Elihu anga Yehofa be taki fu den sani di de a goontapu fu soi Yopu taki Gadu bigi moo libisama (Yopu 37:14; 38:1-4). Den sani di Yehofa be taki doo Yopu ati, neen meke a taki anga sakafasi taki: „Mi kon si taki sani á de di yu á poi du. Sama á de di poi tapu i fu du san i wani.” A be taki tu taki: „Mi sidon a doti aini asisi fu soi i taki a sani di mi du e hati mi.”​—Yopu 42:2, 6.

18, 19. Fa Yopu soi taki a be sabi Yehofa tuutuu?

18 Fa a sabi di Yopu be sabi Yehofa yeepi en? Yopu be e fusutan fa Yehofa wani a tyai enseefi. Na a sabi di a be sabi Yehofa yeepi en fu libi enke fa Yehofa wani. Yopu be fusutan taki efu a be taki a lobi Gadu, a be mu lobi taa sama tu (Yopu 6:14). Yopu á be e si enke a be bun moo taawan, ma a be e libi anga den enke en famii, winsi den be gudu efuso pooti. Yopu be taki: „A ná a sama di meke mi aini mi mma bee meke den tu noh?” (Yopu 31:13-22) Yopu be gudu. A be abi makiti tu, ma toku a á be e fii enseefi. Yopu á be de enke den guduman fu a ten ya.

19 Yopu á be meke nawan sama efuso goontapu gudu toon a moo pelensipali sani gi en. A be sabi  taki efu a sani de be o pasa, a á be o poti pakisei na „a tuu Gadu di de a hemel” moo. (Leisi Yopu 31:24-28.) Yopu be e si a toow fu wan man anga uman enke wan santa sani tu. A be sweli taki noiti a o luku wan taa uman a wan fasi di á fiti (Yopu 31:1). Holi a pakisei taki a ten fu Yopu, Yehofa be e fika mannengee fu abi moo enke wan uman. Efu Yopu be wani, a be sa libi anga tu uman. Ma a be sabi taki a wan man anga wan uman namo Yehofa be meke na a bigin. Kande a so Yopu be e libi tu * (Luku a maiki a ondoo.) (Genesesi 2:18, 24). Di Yesesi kon a goontapu baka 1600 yali, na a seefi sani ya a leli sama. A leli den taki tu sama di á toow á mu siibi anga denseefi. A wan uman namo wan man mu abi.​—Mateyesi 5:28; 19:4, 5.

20. Fa a sabi di wi o sabi Yehofa o yeepi u fu abi bun mati? Fa a o yeepi u fu piisii a wan bun fasi?

20 Fa u sa soi taki u biibi taanga enke fa Yopu biibi be taanga? U mu meke moiti fu sabi Yehofa, da u libi enke fa a wani. Beibel taki Yehofa e „buuse ala den sama di lobi ogii”. A taki wi á mu mosoo anga sama di lobi lei. (Leisi Psalm 11:5; 26:4.) Akisi iseefi a sani ya: ’Fa den tu tekisi ya e soi mi fa Yehofa e pakisei? San a den moo pelensipali sani aini mi libi? San mi e luku a internet? Sama a den mati fu mi? San mi e du fu piisii? Den akisi ya o yeepi i fu luku efi i sabi Yehofa tuutuu. Wi á wani den sama fu a goontapu ya koli u. Neen meke u wani ’koboloiki u fusutan bun’. A sani ya o yeepi u fu sabi san bun anga san á bun.​—Hebrewsama 5:14; Efeisesama 5:15.

21. San o yeepi u fu sabi san u mu du fu meke Yehofa piisii?

21 A di Nowa, Daniyeli anga Yopu be e meke moiti fu sabi Yehofa, meke a yeepi den fu ’sabi’ san den mu du fu meke a piisii. Den soi anga a libi fu den taki te wan sama e du sani enke fa Yehofa wani, ai fende wini (Psalm 1:1-3). Neen meke u mu akisi useefi a sani ya: ’Mi sabi Yehofa bun enke Nowa, Daniyeli anga Yopu?’ U poi sabi Yehofa moo den man ya, bika wi abi moo sani di e yeepi u fu sabi en (Odo 4:18). Neen meke u mu sutudeli Beibel bun. Teke ten pakisei den sani di i leli. Akisi Yehofa en santa yeye. Da a goontapu fu Saatan na o fende i koli. Te i du sani anga koni, yu anga i Dda di de a hemel o toon bun mati.​—Odo 2:4-7.

^ paragraaf 5 Nowa afo Heinok be e „waka anga a tuu Gadu tu”. Ma a dede 69 yali fosi Nowa meke.​—Genesesi 5:23, 24.

^ paragraaf 19 Nowa seefi a wan uman namo a be abi, winsi fa den sama fu a ten fi en be e libi anga omen uman, di Adan anga Efa sondu.​—Genesesi 4:19.