Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  februari 2017

Sama e tii a foluku fu Gadu aini a ten ya?

Sama e tii a foluku fu Gadu aini a ten ya?

„Membee den baala di e teke fesi.”HEBREWSAMA 13:7.

SINGI: 125, 43

1, 2. San den apostel be e akisi denseefi di Yesesi go a hemel?

DEN apostel fu Yesesi be de na a oleifimongo di den si fa Masaa Yesesi e go a hemel. Baka wan pisiten den si fa a woluku tapu en (Toli 1:9, 10). A wan sani fu tu yali langa Yesesi leli den. A gi den taanga-sikin. A be e tii den tu. Ma san den be o du di Yesesi gwe?

2 Fosi Yesesi go a hemel, a be taigi den bakaman fi en taki: „Wi o de mi Kotoigi a Yelusalem, a hii Yudeya anga Samaliya, anga den moo faawe peesi a goontapu” (Toli 1:8). Fa den be o man du a wooko ya? Yesesi be paamisi den taki a santa yeye fu Gadu be o yeepi den (Toli 1:5). Ma sama be o soi den san den mu du? Sama be o seeka a peleikiwooko a hii goontapu? Den apostel be sabi taki Yehofa be poti wantu man fu tii den Islayelisama aini den ten di pasa. Kande den be e akisi denseefi efu Yehofa be o poti wan taa fesiman gi den.

3. (a) Sowtu pelensipali sani den apostel be mu du baka di Yesesi go a hemel? (b) Sowtu akisi wi o luku aini a artikel ya?

 3 Di Yesesi go a hemel, neen den apostel fi en ondoosuku a Wowtu fu Gadu. Den begi tu, neen den poti Matiyasi a Yudasi Esikaliyotu peesi, enke wan fu den 12 apostel (Toli 1:15-26). Saide a sani ya be pelensipali gi den apostel anga Yehofa? Den disipel be fusutan taki a 12 apostel mu de. * (Luku a maiki a ondoo.) Yesesi be teke den enke apostel, neen a leli den wan pelensipali wooko. San na a wooko ya? Fa Yehofa anga Yesesi be yeepi den fu teke seeka gi a wooko ya? Fa Yehofa anga Yesesi sete sani aseefi fasi aini a ten ya? San a wani taki fu „membee den baala di e teke fesi”, moomoo „a koni saafu di u sa fitoow”?Hebrewsama 13:7; Mateyesi 24:45.

YESESI E TII DEN BAALA DI E TII A WOOKO A HII GOONTAPU

4. Sowtu wooko den apostel anga den taa owluman a Yelusalem be e du?

4 Den apostel be bigin tii a Kelesten kemeente aini a yali 33 na a Pinksterfesa. Beibel e soi taki ’Peitilisi anga den elufu apostel’ opo taampu, neen den paati a bun nyunsu gi wan gaan kulu sama (Toli 2:14, 15). A omen fu den sama de toon Kelesten. Baka dati den nyun Kelesten ya tan „poti pakisei a den sani di den apostel be e leli den” (Toli 2:42). A den apostel be e seeka a moni toli fu a kemeente (Toli 4:34, 35). Den be e leli a foluku fu Gadu. Den be e begi gi den tu. Den be taigi den taki: ’Wi o poti ala u pakisei na a begi di u mu begi anga a paati di u mu paati a wowtu fu Gadu’ (Toli 6:4). Den be e sende Kelesten di abi ondoofeni go peleiki a taa peesi tu (Toli 8:14, 15). Bakaten, taa owluman di be salufu, be e yeepi den apostel fu tii a wooko a hii goontapu. A den be e taigi ala den kemeente fa den be mu du sani.Toli 15:2.

Den Kelesten aini a ten fu den apostel be sabi taki Yehofa be e meke Yesesi tii den baala di be e teke fesi a ten de

5, 6. (a) Fa santa yeye be e yeepi den baala di be e tii a wooko? (Luku a fowtow na a bigin.) (b) Fa den engel be e yeepi den baala di e tii a wooko? (c) Fa a Wowtu fu Gadu be e yeepi den baala di e tii a wooko?

5 Den Kelesten aini a ten fu den apostel be sabi taki Yehofa be poti Yesesi fu tii den baala di be e teke fesi a ten de. Fa den be du sabi a sani ya? A fosi sani, a santa yeye be e yeepi den baala di e tii a wooko (Yohanisi 16:13). Na ala den salufu Kelesten be abi a santa yeye, ma a den apostel anga den owluman a Yelusalem wawan a santa yeye be e yeepi fu tii a wooko. Aini a yali 49, santa yeye be yeepi den baala di be e tii  a wooko fu sabi efu a be de fanowdu fu Kelesten besnei. Di den kemeente wooko anga san den baala ya be taki, den fende wini. „A sani ya be e taanga a biibi fu den kemeente tuutuu. Dei fu dei den kemeente be e moo bigi” (Toli 16:4, 5). Te u luku a biifi di ben baala ya be sikiifi gi den kemeente, da wi e si taki na a santa yeye fu Gadu be e tii den. Wi e si tu taki den biibi be taanga. Boiti dati den be lobi den baala anga sisa.Toli.15:11, 25-29; Galasiyasama 5:22, 23.

6 Du fu tu sani, a den engel di be e yeepi den baala di be e tii a wooko. Wan engel be sende Koneiliyesi fu go suku apostel Peitilisi. Di Peitilisi peleiki gi Koneiliyesi anga en osufamii, neen Gadu gi den santa yeye, winsi fa den á be besnei. A so Koneiliyesi be de a fosi sama di toon wan Kelesten sondee fu a besnei. Di den apostel anga den taa baala yee a sani ya, neen den fusutan taki a Gadu wani sani waka so. Neen meke den bali wadaa gi den taa kondee sama aini a Kelesten kemeente. A á be de fanowdu fu den sama ya besnei moo (Toli 11:13-18). A sani ya e soi taki den engel be e yeepi den baala di be e tii a wooko (Toli 5:19, 20). Du fu dii sani, na a Wowtu fu Gadu di be e yeepi den baala ya. Den man ya be e wooko anga a Wowtu fu Gadu fu sabi san den mu leli den baala anga sisa anga fa den be mu tii den kemeente.Toli 1:20-22; 15:15-20.

7. Fa u du sabi taki a Yesesi be e tii den fosi Kelesten?

7 Winsi fa son baala be e tii a wooko a ten de, tokuso den kemeente be sabi taki a Yesesi Kelestesi a den fesiman. Fa u du sabi a sani ya? Apostel Pawlesi be taki, a Kelestesi poti son wan fu den „enke apostel”. A be taki tu taki a Kelestesi na ’a ede’ efuso a fesiman fu a kemeente (Efeisesama 4:11, 15). Boiti dati, den á teke wan fu den nen fu den apostel e tyai, ma „Gadu meke sama kai den disipel, Kelesten” (Toli 11:26). Pawlesi be sabi taki a de taanga fanowdu fu du den sani di den apostel anga den taa baala di be e tii a wooko be e leli den. Ma tokuso a be taki: „Mi wani u sabi taki a Kelestesi na a ede fu ala manengee.” A sani ya e teli gi ala den baala di e tii a wooko tu. Baka dati Pawlesi taki: „A ede fu Kelestesi a Gadu” (1 Korentesama 11:2, 3) Den sani ya e soi kiin taki Yehofa be poti en Manpikin Yesesi Kelestesi fu tii a kemeente.

„A WOOKO YA A NÁ FU LIBISAMA”

8, 9. Sowtu faantiwowtu Baala Russell be abi?

8 Aini 1870, Charles Taze Russell anga wantu mati fi en bigin meke moiti fu dini Gadu enke fa Beibel e soi. Den be e yeepi sama fu ala nasi fu du aseefi sani ya tu. Neen meke den sete Zion’s Watch Tower Tract Society aini 1884. A Baala Russell a be peleisidenti fu a olikanisâsi ya. * (Luku a maiki a ondoo.) A be e ondoosuku Beibel bun. A á be e feele fu soi sama taki den keliki be e leli den falisi sani. Den be e leli sama taki Gadu a wan sama di paati a dii, taki libisama  abi wan yeye di nai dede, ma nawan fu den sani ya be sikiifi aini Beibel. Baala Russel be fusutan taki den á be o si Yesesi te a be o daai kon baka. A be fusutan tu taki „a ten fu den taa kondee sama” be o kaba aini 1914 (Lukasi 21:24). A be e koboloiki en ten, en moni anga en kaakiti fu paati den tuu leli ya gi sama. A sani ya e soi taki Yehofa anga Yesesi be poti Baala Russel fu tii a wooko a goontapu a pisiten de.

9 Baala Russell á be wani sama tyai en a tapu. Aini 1896, a sikiifi taki en anga den taa baala di be e teke fesi á wani sama gafa den. Den á be wani sama kai den Pastoo efuso Paati efuso wan taa fasi. Den á be wani sama tyai den nen tu. Bakaten a taki: „A wooko ya a ná fu libisama.”

„A koni saafu di u sa fitoow” a wan pikin kulu salufu baala di e teke fesi

10. (a) On ten Yesesi poti „a koni saafu di u sa fitoow” fu teke fesi? (b) Saide u sa taki den baala di e tii a wooko anga a Watch Tower Society a ná aseefi?

10 Baala Russell dede aini 1916. Dii yali baka dati, aini 1919, Yesesi poti „a koni saafu di u sa fitoow” fu tii a wooko a hii goontapu. Saide? A poti den fu gi den bakaman fi en „nyanyan na a ten di den abi en fanowdu” (Mateyesi 24:45). A ten de a wan pikin kulu salufu baala di be de na a edekantoo a Brooklyn, New York, be e leli den bakaman fu Yesesi. Baka a yali 1940 den bigin kai a pikin kulu ya, den baala di e tii a wooko a hii goontapu. A ten de, a denseefi baala di be e tii a wooko a hii goontapu, be e teke fesi na a Watch Tower Bible and Tract Society. Ma aini 1971, den be tyai kon a kiin taki a Watch Tower Bible and Tract Society anga den baala di e tii a wooko a hii goontapu a ná aseefi. A lantipampila wawan a Watch Tower Society e seeka gi a olikanisâsi. Fanafu a ten de, wan salufu baala be sa toon wan fu den baala di e tii a wooko, winsi a á be e teke fesi na a Watch Tower Society. Aini a ten ya a omen baala di á salufu abi a gaandi fu teke fesi na a Watch Tower Society anga taa kantoo fu a olikanisâsi. A sani ya e yeepi den baala di e tii a wooko fu poti ala den pakisei na a leli di den mu leli a foluku fu Gadu, anga a tii di den mu tii a wooko (Yohanisi 10:16; Toli 6:4). A Waktitoren fu 15 yuli 2013 be taki „a koni saafu di u sa fitoow” a wan pikin kulu salufu baala e tii a wooko a hii goontapu.

Den baala di be e tii a wooko na a ten fu 1950

11. Fa den baala di e teke fesi e tii a wooko a hii goontapu?

11 Den baala di e tii a wooko e kon makandaa ala wiki fu taki fiti. A sani ya e yeepi den fu fusutan denseefi. Ai yeepi den fu go na a wan se tu (Odo 20:18). Nawan fu den taa baala ya pelensipali moo wan taawan, neen meke ala yali a wan taa baala e teke fesi a den komakandaa ya (1 Peitilisi 5:1). A so a de tu anga den sigisi komte fu den  baala di e tii a wooko. Den salufu baala ya nai fii enke a den na a fesiman fu den baala di e wooko aini den komte ya. Den anga den taa sikapu e fende aseefi leli. Ala den e wooko anga san a koni saafu e soi den.

Fanafu di a koni saafu bigin tii a wooko aini 1919, den e gi a foluku fu Gadu den leli di den abi fanowdu (Luku paragraaf 10, 11)

„SAMA NA A KONI SAAFU DI U SA FITOOW?”

12. Sowtu akisi wi o luku?

12 Den baala di e tii a wooko a sondu sama enke wi. Den e meke fowtu son leisi te den e tyai Beibel toli kon a kiin, efuso te den e tii a olikanisâsi. Neen meke, a Ondrosuku Bijbel-buku abi wan pisi di den e kai „San wi e bribi”. A pisi ya e taki fu Beibel toli di u fusutan moo bun fanafu a yali 1870. Yesesi á be taki a koni saafu á be o meke fowtu. Da fa wi o man piki a akisi fu Yesesi di a be akisi taki: „Sama na a koni saafu di u sa fitoow?” (Mateyesi 24:45) Sowtu sani e soi kiin taki a den baala di e tii a wooko na a koni saafu? Meke u luku den dii  sani di be yeepi den baala di be e tii a wooko aini a ten fu den apostel.

13. Fa santa yeye yeepi den baala di e tii a wooko?

13 Santa yeye e yeepi den baala di e tii a wooko. Santa yeye yeepi den baala di e tii a wooko fu fusutan Beibel leli di wi á be e fusutan fosi. Te u luku den toli di kon a kiin aini a buku di u taki fi en aini a paragraaf a fesi, da wi e si taki libisama seefi á be o poi fusutan efuso tyai „den dipi toli fu Gadu” kon a kiin. (Leisi 1 Korentesama 2:10.) Den baala di e tii a wooko abi aseefi denki fu apostel Pawlesi, di be sikiifi taki: „A ná libisama koni e meke u taki den sani ya, ma na a yeye e yeepi u” (1 Korentesama 2:13). A omen ondoo yali sama be e leli falisi sani. Den á be sabi pe den mu go fu fende a tuu leli. Da fa a waka den baala kon fusutan Beibel moo kiin fanafu 1919? A fu di Gadu gi den a santa yeye.

14. Fa den engel e yeepi den baala di e tii a wooko anga a foluku fu Gadu, enke fa a sikiifi a Openbaring 14:6, 7?

14 Den engel e yeepi den baala di e tii a wooko. Den baala di e tii a wooko abi a faantiwowtu fu tii moo enke aitin miliyun peleikiman a hii goontapu. Saide a peleikiwooko e go a fesi so? Wan sani di e meke ai go a fesi, a di den engel e yeepi u. (Leisi Openbaring 14:6, 7.) A omen leisi engel yeepi peleikiman fu miti wan sama di be begi Gadu fu yeepi en. * (Luku a maiki a ondoo.) Winsi fa sama e meke moiti fu tapu a wooko ya, tokuso ai go a fesi. A di den engel e yeepi u meke a wooko e go a fesi so.

15. San e soi taki den fesiman fu den keliki anga den baala di e tii a wooko nai du sani na aseefi fasi?

15 A Wowtu fu Gadu e yeepi den baala di e tii a wooko. (Leisi Yohanisi 17:17.) Luku san be pasa aini 1973. A Ingiisitongo Wakititolen fu 1 yuni be akisi taki efu wan sama di e somoko tabaka fiti fu dopu. Di den baala luku san Beibel e taki, den sikiifi aini a Wakititolen ya taki wan sama di e somoko á fiti fu dopu. Den kai wantu tekisi fu soi saide den piki so. Den soi tu saide den sa puu wan sama na a kemeente efu a á wani tapu anga a somoko di ai somoko (1 Korentesama 5:7; 2 Korentesama 7:1). Den sikiifi taki a ná libisama poti a weiti ya, ma „a Gadu. Ai soi u aini en Wowtu fa ai denki”. Nawan taa keliki olikanisâsi e fitoow Beibel so enke wi, moomoo te son weiti o taanga gi son wan fu den sama fu a keliki. Sama di ondoosuku den keliki aini Ameekankondee sikiifi aini wan buku taki: „A omen leisi den keliki fesiman kengi den leli fu den, fu den kai anga a fasi fa den sama fu a keliki efuso a kondee e denki.” Den baala di e tii a wooko nai wooko anga san sama lobi. Ma den e meke a Wowtu fu Gadu tii den. A sani ya e soi taki a Yehofa na a sama di e tii en foluku aini a ten ya.

 “MEMBEE DEN BAALA DI E TEKE FESI”

16. San a wan fu den sani di u sa du fu membee den baala di e tii a wooko?

16 Leisi Hebrewsama 13:7. Beibel taki u mu e „membee den baala di e teke fesi”. Wan fasi fa u sa du a sani ya, a te wi e begi gi den baala di e tii a wooko (Efeisesama 6:18). Den abi omen faantiwowtu. Den mu leli a foluku fu Gadu, den mu tii a peleikiwooko a hii goontapu. Boiti dati, den mu wooko konikoni anga a moni di sama e gi fu holibaka gi a wooko di wi e du. Neen meke a de taanga fanowdu fu begi gi den baala ya, bika den abi en fanowdu.

17, 18. (a) Fa wi e soi taki wi e membee den baala di e tii a wooko? (b) Fa wi e holibaka gi Yesesi anga den baala di e tii a wooko te wi e peleiki?

17 Wan taa fasi fa u sa membee den baala di e tii a wooko, a te wi e du sani enke fa den e soi u. Den e soi u san u mu du aini den buku fu u, a den komakandaa, den kelen-komakandaa anga den konkelesi. Den e poti baala enke kelen-owluman tu, da den kelen-owluman e poti baala enke owluman. Te den kelen-owluman anga den owluman e du san den baala di e tii a wooko soi den, da a so den e membee den baala di e tii a wooko. Te ala wi e aliki den baala di e teke fesi aini a ten ya, da wi e soi taki wi e lesipeki Yesesi, u fesiman.Hebrewsama 13:17.

18 Ete wan fasi fa u sa membee den baala di e tii a wooko, a te wi e du ala san u poi aini a peleikiwooko. Hebrewsama 13:7 e gi Kelesten taanga-sikin fu waka na a biibi fu den baala di e teke fesi baka. Den baala di e tii a wooko soi taki den biibi taanga, bika den e du ala san den poi fu paati a bun nyunsu. Wi e holibaka gi den anga a pelensipali wooko ya? Efu wi e holibaka gi den, wi o piisii te Yesesi o taigi u taki: „Efu u du en gi wan fu den moo pina baala fu mi, da a mi u du en gi tu.”Mateyesi 25:34-40.

19. Saide i de kabakaba fu waka a wi fesiman Yesesi baka?

19 Di Yesesi daai go a hemel baka, a á be feegete den bakaman fi en (Mateyesi 28:20). A sabi taki na a santa yeye, den engel anga a Wowtu fu Gadu be yeepi en fu teke fesi di a be de a goontapu. A denseefi sani ya a gi a koni saafu. Den baala di e tii a wooko e „waka na a Pikin Sikapu baka na ala pe ai go” (Openbaring 14:4) Neen meke wi e waka a wi fesiman Yesesi baka te wi e du san den baala di e tii a wooko e soi u. Dyonson a o meke u fende a teego libi (Openbaring 7:14-17) Nawan libisama tiiman poi gi wi a sani ya.

^ paragraaf 3 A gei enke Yehofa be wani 12 apostel fu de enke den ’12 fondamenti siton’ fu a nyun Yelusalem (Openbaring 21:14). Neen meke te wan fu den apostel be holidoo te enke a dede, a á be de fanowdu moo fu suku wan taa sama poti neen peesi.

^ paragraaf 8 Fanafu 1955, den e kai en the Watch Tower Bible and Tract Society of Pennsylvania.

^ paragraaf 14 Luku a buku „Preiki finifini” fu Gado Kownukondre, bladzijde 65, 66.