„Ala bun sani anga ala sani di ná abi fowtu e komoto. . . na a Dda.”YAKOWBESI 1:17.

SINGI: 148, 109

1. Sowtu wini wi e fende fu di Yesesi dede gi u?

A DEDE fu Yesesi opo a pasi gi u fu fende omen belesi. A o meke ala den bakapikin fu Adan di e du sani a wan leti fasi toon Gadu pikin. A dede fu Yesesi opo a pasi gi u fu libi fu teego tu. Ma sani de ete di e meke engel anga libisama fende wini fu a dede di Yesesi dede gi u.Hebrewsama 1:8, 9.

2. (a) Sowtu pelensipali sani Yesesi be taki aini a begi fi en? (Luku a fowtow na a bigin.) (b) San wi o luku aini a artikel ya?

2 Wan sani fu tu yali fosi Yesesi dede, a be taigi den disipel fi en fu begi taki: „U Dda di de a hemel, i nen mu santa. A Kownukondee fi i mu kon. Meke sani waka a goontapu enke fa i wani, enke fa sani e waka a hemel” (Mateyesi 6:9, 10). Meke u luku fa a dede fu Yesesi o santa a nen fu Yehofa, fa a o meke a Kownukondee kon, anga fa a o meke sani waka a goontapu enke fa Yehofa wani.

 „I NEN MU SANTA”

3. San a nen fu Yehofa wani taki? Fa Saatan poli a nen fu Yehofa?

3 A fosi sani di Yesesi taki aini a begi fi en na a santa di a nen fu Yehofa mu santa. A nen fu Yehofa e soi taki sani á de a goontapu efuso hemel, di abi makiti enke en. Ai du sani a wan leti fasi. Yesesi kai Yehofa „santa Dda” tu (Yohanisi 17:11). Yehofa santa, neen meke ala san ai du santa. Den weiti fi en santa tu. Tokuso Saatan be wani soi taki Gadu ná abi a leti fu poti weiti gi libisama, neen meke a lei gi Yehofa aini Eden. A so a poli Yehofa nen.Genesesi 3:1-5.

4. Fa Yesesi santa a nen fu Yehofa?

4 Yesesi lobi Yehofa nen, neen meke a du ala san a poi fu santa a nen fi en (Yohanisi 17:25, 26). Fa a du a sani ya? A fasi fa Yesesi be e libi, anga den sani di a be e leli sama be e yeepi den fu si taki a di Yehofa lobi u meke a poti weiti gi u. A be e soi sama kiin taki den o fende wini efu den wooko anga den weiti fu Yehofa. (Leisi Psalm 40:8-10.) Winsi fa Saatan meke Yesesi pina te enke a dede, tokuso Yesesi du sani enke fa Yehofa wani. A soi taki wan sama di ná abi sondu poi du sani enke fa Yehofa wani winsi san e pasa.

5. Fa u sa santa Yehofa nen?

5 Fa u sa soi taki u lobi a nen fu Yehofa? Den sani di wi e du o soi efu u lobi a nen fu Yehofa tuutuu. (Leisi 1 Peitilisi 1:15, 16.) Dati wani taki a Yehofa wawan wi o dini, wi o aliki en anga u hii ati tu. Winsi sama e du ogii anga u, wi o du ala san u poi fu du san Yehofa wani. Wi e gi Yehofa gaandi te wi e holi den weiti fi en (Mateyesi 5:14-16). Boiti dati wi e soi taki den weiti fi en bun. Wi e soi tu taki Saatan a wan leiman. Wi a sondu libisama, neen meke wi o go e meke fowtu. Ma te u meke wan fowtu, da wi o soi taki ai hati u, wi o meke moiti fu wi á du sani di e gi Yehofa poli nen.Psalm 79:9.

6. Saide Yehofa e si wi enke sama di e libi a wan leti fasi, winsi fa wi a sondu libisama?

6 Winsi wi abi a gaandi fu go a hemel efuso fu tan a goontapu ya, Yehofa e gi u paadon fu den sondu fu u efu wi e biibi taki a dede fu Yesesi e tyai wini gi u. Yehofa e teke den sama di paamisi en taki den o libi enke fa a wani, aini en osufamii. Ai si den salufu Kelesten enke en manpikin, ai si den „taa sikapu” enke en mati (Yohanisi 10:16; Romesama 5:1, 2; Yakowbesi 2:21-25). Dati e soi taki a dede di Yesesi dede gi u, e gi wi a okasi aini a ten ya fu toon Yehofa mati. Ai gi wi a okasi tu fu santa a nen fi en.

„A KOWNUKONDEE FI I MU KON”

7. Sowtu wini wi o fende fu a dede fu Yesesi?

7 Yesesi taki wan taa sani aini a begi fi en. A taki: „A Kownukondee fi i mu kon.” San a dede di Yesesi dede gi u abi fu du anga a kon di a Kownukondee fu Gadu mu kon? Yesesi anga den 144.000 sama di Gadu teke a goontapu ya, o tii a Kownukondee fu Gadu. Na a dede fu Yesesi meke den sama ya fende a okasi fu go tii a hemel te den  weki baka (Openbaring 5:9, 10; 14:1). Den o de enke kownu anga pilisite, da den o tii goontapu makandaa anga Yesesi wan dunsu yali langa. Aini a dunsu yali de, Yehofa o meke goontapu toon wan paladeisi. A o puu sondu gi libisama tu. A so den engel di e dini Yehofa a hemel anga den sama di e dini en a goontapu ya, o toon wan famii (Openbaring 5:13; 20:6). Yesesi o kii Saatan. Boiti dati, a o puu ala den polobelema di Saatan tyai kon a goontapu.Genesesi 3:15.

8. (a) Fa Yesesi yeepi den disipel fi en fu fusutan taki a Kownukondee de taanga fanowdu? (b) Fa wi e holibaka gi a Kownukondee aini a ten ya?

8 Yesesi soi den bakaman fi en taki a Kownukondee fu Gadu de taanga fanowdu. Fa a du a sani ya? Fa i si Yesesi dopu, a so a bigin paati „a bun nyunsu fu a Kownukondee fu Gadu” na ala peesi pe a be e go (Lukasi 4:43). A be taigi den disipel fi en taki den mu de en kotoigi na ala den „uku fu goontapu” (Toli 1:6-8). A bosikopu fu a Kownukondee di wi e paati aini a ten ya, e yeepi sama fu sabi taki Yesesi dede gi u. Ai yeepi den fu toon wan pisi fu a Kownukondee fu Gadu tu. Wi e soi taki wi e holibaka gi a Kownukondee fu di wi e yeepi den salufu Kelesten paati a bun nyunsu a hii goontapu.Mateyesi 24:14; 25:40.

„MEKE SANI WAKA ENKE FA I WANI”

9. Fa u du sabi taki Yehofa o du san a abi a pakisei gi libisama?

9 San Yesesi be wani soi di a taki: „Meke sani waka enke fa i wani”? Te Yehofa taki wan sani o pasa, ai pasa tuu (Yesaya 55:11). Winsi san Saatan du, a ná o poi tapu Yehofa fu du san a wani. Saide Yehofa meke goontapu? A be wani Adan anga Efa meke pikin fuu goontapu. Den pikin ya á be o abi sondu (Genesesi 1:28). Efu Adan anga Efa á be meke pikin fosi den dede, da a sani di Gadu be abi a pakisei á be o pasa. Goontapu á be o fuu anga den pikin fu den. Neen meke Yehofa gi den a okasi fu meke pikin. A di Yesesi dede gi u, meke ala den sama di e biibi abi a okasi fu fii fu sondu, den abi a okasi fu libi fu teego tu. Yehofa lobi libisama. A wani u fende a bun libi di a be abi a pakisei di a meke libisama.

10. Sowtu wini den sama di dede o fende fu di Yesesi dede gi u?

10 Fa fu den somen sama di dede sondee den sabi Yehofa? Yehofa wani sama libi fu teego. Neen meke a o weki den dedesama baka, da den o fende a okasi fu leli sabi Yehofa fu den sa libi fu teego (Toli 24:15). A Yehofa e gi sama libi. Te Yehofa o weki den dedesama baka, a o toon den Dda (Psalm 36:9). Yesesi kai Yehofa aini a begi fi en „u Dda di de a hemel” (Mateyesi 6:9). Yehofa gi Yesesi a wooko fu weki den dedesama. Yesesi taki: „A mi na a opobaka anga a libi.”Yohanisi 6:40, 44; 11:25.

11. San Gadu abi a pakisei gi a „gaan kulu”?

11 Yesesi be taki: „Den sama di e du san Gadu wani a mi baala, mi sisa anga mi mma” (Malikisi 3:35). Yehofa wani ala nasi sama dini en. Beibel e kai den  sama ya „a gaan kulu” di sama á poi teli. Den e biibi taki a dede fu Yesesi o tyai wini gi den. Den e aliki Gadu tu. Den e bali taki: „Wi e gi u Gadu di sidon na a kownusutuu anga a Pikin Sikapu daa, bika den fii wi.”Openbaring 7:9, 10.

12. Fa a begi fu Yesesi e soi san Yehofa abi a pakisei gi libisama?

12 Te u luku a begi fu Yesesi, da wi e fusutan san Yehofa abi a pakisei gi libisama. Wan fu den sani na a du di u mu du ala san u poi fu santa a nen fu Yehofa (Yesaya 8:13). A dede di Yesesi dede gi u, meke wi abi a okasi fu kon fii. Ai santa a nen fu Yehofa tu. A nen fu Yesesi wani taki „a Yehofa e fii sama”. Du fu tu sani, a Kownukondee o yeepi den sama di e libi enke fa Gadu wani fu fende wini fu a dede fu Yesesi. Du fu dii, u sabi taki nawan sani poi tapu Yehofa fu du san a abi a pakisei.Psalm 135:6; Yesaya 46:9, 10.

SOI YEHOFA TAKI AI BIGI GI I TAKI YESESI DEDE GI U

13. Saide wi e dopu?

13 Wan fasi fa wi e soi taki a dede fu Yesesi e bigi gi u, a te u paamisi Yehofa taki wi o libi enke fa a wani, da u dopu. Te u du a sani ya, da wi e soi taki wi e biibi taki a dede fu Yesesi e tyai wini gi u. Wi e soi tu taki „wi a fu Yehofa” (Romesama 14:8). Te u dopu, wi e begi Yehofa fu a yeepi u fu abi „wan kiin kosensi” (1 Peitilisi 3:21). A dede di Yesesi dede gi u, e opo a pasi fu Yehofa gi u paadon fu den sondu di u du. Wi e biibi taki a o gi wi ala den sani di a paamisi u.Romesama 8:32.

Fa wi o soi taki wi e si a dede fu Yesesi enke wan gaan sani? (Luku paragraaf 13, 14)

14. Saide Yehofa taki u mu lobi taawan?

14 A lobi e meke Yehofa e du ala den sani di ai du. A wani ala den sama di e dini en waka neen baka (1 Yohanisi 4:8-11). Te u lobi taa sama wi e soi taki wi a pikin fu u „Dda di de a hemel” (Mateyesi 5:43-48). Den moo gaan weiti na, (1) i mu lobi Yehofa (2) i mu lobi taa sama (Mateyesi 22:37-40). Wan fasi fa wi e soi taki u lobi taa sama, a te wi e taigi den a bun nyunsu  fu Gadu Kownukondee. Efu u lobi taawan enke fa Yehofa taigi u, moomoo u baala anga sisa, da wi e soi taki u lobi Yehofa „anga u hii ati”.1 Yohanisi 4:12, 20.

A DEDE FU YESESI OPO A PASI GI YEHOFA FU A BELESI U

15. (a) Fa Yehofa e belesi wi aini a ten ya? (b) Fa a o belesi wi aini a ten di e kon?

15 A dede fu Yesesi o meke Yehofa puu sondu gi u. A o gi u paadon anga en hii ati. (Leisi Toli 3:19-21.) Enke fa u be si kaba, a dede fu Yesesi opo a pasi gi wantu sama fu toon Gadu manpikin. Yehofa o salufu den fu go a hemel (Romesama 8:15-17). Yehofa e kai den sama fu a „gaan kulu” di o tan a goontapu fu toon en mati. Te den ná o abi sondu moo, da wan lasiti tesi o miti den. Efu den holidoo den o toon Yehofa pikin tu (Romesama 8:20, 21; Openbaring 20:7-9). Yehofa o lobi den pikin fi en fu teego. Wi o fende wini fu teego fu a dede di Yesesi dede gi u (Hebrewsama 9:12). Nawan sama á poi puu a dii kado di Yehofa gi u, a wi ana.

16. Fa a dede di Yesesi gi u, o fii wi?

16 Efu u soi taki den sondu di u du e hati u, Saatan ná o poi tapu u fu toon Yehofa pikin. A ’wan leisi namo’ Yesesi dede. A ná abi fu dede gi u ete wan leisi (Hebrewsama 9:24-26). Adan suku dede gi u, ma Yesesi dede gi u fu u sa fende teego libi. A dede di a dede gi u o fii wi fu a goontapu fu Saatan. U ná o feele taki wi o dede moo.Hebrewsama 2:14, 15.

17. Sowtu wini yu e fende fu di Gadu lobi u?

17 Den sani di Gadu paamisi o kon tuu namo. Leti enke fa den weiti di Yehofa poti gi a goontapu nai kengi, a so Yehofa nai kengi tu (Maleyaki 3:6). Yehofa á gi u libi da a kaba, ma a lobi u tu. „U kon sabi taki Gadu lobi u. Wi e biibi a sani de tu” (1 Yohanisi 4:16). Ala yuu ai du san a paamisi. Dyonson goontapu o toon wan moin paladeisi. Ala den sama di o tan a goontapu o lobi taawan enke fa Yehofa lobi u. A ten de, ala den engel di e dini en a hemel, anga ala den sama di e dini en a goontapu o taki: „Meke sama gafa u Gadu, den mu hei en, den mu gi en daa anga gaandi fu teego, bika a koni, a abi makiti, a taanga. Amen.”Openbaring 7:12.