Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  februari 2016

Tan dini Yehofa anga piisii

Tan dini Yehofa anga piisii

SOWTU dei be de a moo piisii dei aini i libi? A di i be toow efuso di i meke i fosi pikin? Na a dei di i dopu? Kande a dei di i dopu be de a moo pelensipali dei aini i libi. A dei de, den baala anga sisa be piisii di i soi Yehofa taki i lobi en anga i hii ati, i hii libi, i hii fusutan anga ala i kaakiti!Malikisi 12:30.

Fanafu di i dopu, i fii fa a dini di yu e dini Yehofa e gi i piisii. Ma a omen peleikiman nai piisii moo enke fa den be e piisii biginbigin. Saide den nai piisii so moo? Saide meke u sa tan dini Yehofa anga piisii?

SAIDE MEKE SON PELEIKIMAN NAI PIISII MOO?

A Kownukondee bosikopu e meke u piisii. Saide? Bika Yehofa paamisi u taki a Kownukondee o poli a ogii goontapu ya. Na a Kownukondee o meke a nyun goontapu fu Gadu kon. A sikiifi aini Sefanya 1:14 taki: „A gaan dei fu Yehofa de koosube. A de a pasi e kon. Ai kon gawgaw!” Ma efu wi e si enke u mu wakiti langa tumisi, da u ná o piisii enke fa u be e piisii na a bigin. A sani ya sa meke wi á wooko taanga gi Yehofa moo.Odo 13:12.

A de di wi e de makandaa anga u baala anga sisa e gi u taanga-sikin fu tan dini Yehofa anga piisii. Kande a den bun manii di u si a den sama di e dini Yehofa, meke u toon wan Kotoigi. Na a sani ya yeepi u fu bigin dini Yehofa anga piisii (1 Peitilisi 2:12). Ma san e pasa son leisi te den pii ain gi wan baala efuso wan sisa fu di a taangayesi Yehofa? Son baala anga sisa sa fii booko-saka. A sani ya meke den nai piisii moo enke fa den be e piisii biginbigin.

Efu wi e feti a gudu baka, u na o piisii moo tu. Saide? A goontapu fu Saatan e gi sama taanga-sikin fu bai sani di den ná abi fanowdu tuutuu. Neen meke u mu holi a sani di Yesesi be taki a pakisei. A be taki: „Nawan sama poi dini tu Masaa. Bika a o buuse wan fu den, da a lobi a taawan, efuso a o holibaka gi wan fu den, da a wisiwasi a taawan. Yu á poi dini Gadu anga gudu na aseefi yuu” (Mateyesi 6:24). U ná o poi dini Yehofa anga piisii, efu wi e meke moiti fu fende omen gudu aini a goontapu ya.

DINI YEHOFA ANGA PIISII

Wan sama di lobi Yehofa nai si a dini di ai dini en enke wan taanga sani (1 Yohanisi 5:3). Yesesi be taki: „Ala den sama di e wooko taanga anga den sama di e tyotyo, u kon a mi, da mi o gi u kaakiti baka. U teke a tyatyali fu mi, da u du enke mi, bika mi abi safu-ati, mi abi sakafasi, da wi o fende kaakiti baka. Bika mi tyatyali safu. Mi lai feke” (Mateyesi 11:28-30). A de di u de wan  Kotoigi e meke u fii bun. Ai meke u piisii. A omen sani de di e meke u piisii te wi e dini Yehofa. Meke u luku dii fu den sani ya.Habakuk 3:18.

Wi e dini a sama di gi u libi, a koloku Gadu (Toli 17:28; 1 Timotiyesi 1:11). U sabi taki a Yehofa gi u libi. Neen meke u wani du ala san u man fu dini en anga piisii, winsi u dopu omen yali kaba.

Héctor e piisii, fu di ai holi a pakisei sowtu wini a o fende te a Kownukondee o tii. Ai meke moiti tu fu du san a poi aini a peleikiwooko

Héctor a wan baala di wooko 40 yali enke kelen-owluman. Winsi fa a „kon gaandi”, ai piisii ete fu dini Yehofa (Psalm 92:12-14). A á poi du ala den sani moo di a be e du, bika en uman kon siki. Ma tokuso ai piisii ete fu dini Yehofa. A taki: „Tyali e kisi mi fa mi uman gusontu e go a baka. A á makiliki fu solugu en tu. Ma tokuso mi nai meke den sani de tapu mi fu dini a tuu Gadu anga piisii. A Yehofa meke mi de a libi. A á meke libisama fu soso. Den sani ya meke mi lobi en anga mi hii ati. Mi wani dini en anga mi hii ati tu. Mi e meke moiti fu du ala san mi man aini a peleikiwooko. Mi e meke moiti tu fu pakisei sowtu wini mi o fende te a Kownukondee o tii. A den sani ya e meke mi e piisii.”

A dede di Yehofa meke Yesesi dede gi u, meke u man libi wan libi di e gi u piisii. „Gadu be lobi goontapu te, neen ede meke a sende a wan kodo Manpikin fi en kon, fu meke den sama di e biibi aini en, á mu dede, ma den mu fende a libi fu teego” (Yohanisi 3:16). Yehofa e gi u paadon fu u sondu te wi e biibi taki a dede fu Yesesi o tyai wini gi u. U sa fende teego libi tu. A sani ya mu e bigi gi u! Efu wi e teke en fu bigi taki Yesesi dede gi u, wi o wani dini Yehofa anga piisii.

Jesús nai suku gudu moo enke fosi. A omen yali kaba ai dini Yehofa anga piisii

Wan baala di den e kai Jesús be e tan a Meksikow. A taki: „A hii dei mi be e wooko. Son leisi mi be e wooko sondee fu boo, winsi mi basi á be e musu mi. Mi be e du en fu di mi be wani meke moo moni. Bakaten mi be leli sabi Yehofa. Mi be kon sabi taki a meke en Manpikin kon dede gi u, anga ala fa a lobi en. Mi be wani dini Gadu anga mi hii ati. Neen meke mi dopu. Di mi wooko 28 yali gi a bodeleifi, neen mi fika a wooko de fu du a fuuten diniwooko.” A so a bigin dini Yehofa anga piisii.

Wi e libi wan kiin libi. A sani ya e gi u piisii. Fa i be e libi fosi i leli sabi Yehofa? Pawlesi be membee den Kelesten aini Rome taki fosi den a be „saafu fu sondu”, ma bakaten den „toon saafu fu leti-du”. Den be e libi wan kiin libi, neen meke den be o libi fu teego (Romesama 6:17-22).  Useefi e libi enke fa Yehofa wani. Neen meke den ogii di e miti den sama di e du ogii efuso e libi wan hululibi nai miti u. Ná pikin piisii a sani ya e meke u piisii!

„Den yali di mi dini Yehofa a den moo piisii yali aini mi libi.”—Jaime

Jaime a wan man di á be e biibi taki Gadu de. A be lobi feti. A be e bokusu. Ma di a bigin go a den komakandaa fu Yehofa Kotoigi, a be lobi fa den Kotoigi de. A be si taki den lobi denseefi. A be wani tapu anga a libi di a be e libi fosi, neen meke a akisi Yehofa fu yeepi en, fu biibi taki Gadu de tuu. Jaime taki: „Pikinpikin mi kon si taki wan Gadu de di abi tyali-ati. A de enke wan Dda di lobi u. A di mi meke moiti fu libi enke fa Gadu wani, meke mi de a libi ete. Efu mi á be kengi mi libi, kande den be o kii mi, enke fa den kii son wan fu den mati fu mi di be e bokusu. Den yali di mi dini Yehofa a den moo piisii yali aini mi libi.”

NÁ GI ABAA!

San u mu du te wi e wakiti a kaba fu a goontapu ya? Wi á mu feegete taki a fasi fa wi e libi, bun gi Gadu. Wi o fende teego libi tu. „Neen meke wi á mu weli fu du bun, bika te a yuu doo, wi o si den wini, efu wi á gi abaa” (Galasiyasama 6:8, 9). Meke Yehofa yeepi i fu holidoo. Meke a yeepi i fu abi den manii di o yeepi i fu pasa „a gaan banawtu” libilibi. Boiti dati, meke a yeepi i fu tan dini en anga piisii, winsi tesi e miti i.Openbaring 7:9, 13, 14; Yakowbesi 1:2-4.

Wi e biibi taki Yehofa o pai u te u holidoo, bika a sabi a wooko di wi e du gi en. A sabi fa u lobi en, anga den sani di wi e du fu soi taki u lobi a nen fi en. Efu u tan dini en anga piisii, wi o de enke a psalm sikiifiman David. David be taki: „Ala yuu mi e pakisei Yehofa. Mi ná o bangula, bika a de a mi leti-ana. Neen meke mi e piisii tuutuu. Eeye, mi e piisii gaan piisii. Sani o waka bun anga mi tu.”Psalm 16:8, 9.