Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  februari 2016

Soi taki a Yehofa yu e holibaka gi

Soi taki a Yehofa yu e holibaka gi

„Yehofa mu si taki mi anga i meke wan sweli. A mu si taki a sweli de go doo den bakapikin fu mi anga den bakapikin fi i.”1 SAMUWELI 20:42.

SINGI: 125, 62

1, 2. Saide a fasi fa Yonatan libi anga David e soi u fa u mu holibaka gi taawan?

YONATAN be musu foondoo di a si a deki-ati di David be abi. David be kii wan gaan gadyaa man den e kai Goliyat, neen a tyai „a ede fu a Filisteyaman” ya go gi Kownu Saul, Yonatan dda (1 Samuweli 17:57). Yonatan be si kelle taki Gadu de anga David. Fanafu a dei de, Yonatan anga David toon gaan mati. Den be meke wan kuudei taki den o holibaka gi denseefi (1 Samuweli 18:1-3). Fanafu a ten de Yonatan be e holibaka gi David.

2 Yonatan be e holibaka gi David winsi fa a be sabi taki a David Yehofa be o poti enke kownu. Yonatan be e kusumi di Saul be wani kii David. A á be wani sani pasa anga en mati. Fu di Yonatan be sabi taki David be de aini a sabana di de a Koresa, meke a be go ape fu gi en  taanga-sikin fu a fitoow Yehofa. Yonatan taigi en taki: „Ná feele, bika mi dda Saul ná o fende i. A yu o toon kownu fu Islayeli. Mi o holibaka gi i.”1 Samuweli 23:16, 17.

3. San be de a moo pelensipali sani di meke Yonatan be e holibaka gi David? Fa u du sabi? (Luku a fowtow na a bigin.)

3 U lobi te wan sama e holibaka gi wan taawan. Ma i si enke na a lobi di Yonatan be lobi David wawan be meke a be e holibaka gi en? Nono. A di a be wani du san Yehofa taki meke a be e holibaka gi David. A á be e dyalusu taki David be o toon kownu. Neen be e gi David taanga-sikin fu fitoow Yehofa. Ala den tu be e du sani enke fa Yehofa wani. Den be e holibaka gi denseefi tu. Boiti dati, den be holi denseefi na a mofu di den be meke. Yonatan be taigi David taki: „Yehofa mu si taki mi anga i meke wan sweli. A mu si taki a sweli de go doo den bakapikin fu mi anga den bakapikin fi i.”1 Samuweli 20:42.

4. (a) San o meke u de koloku? (b) San wi o luku aini a artikel ya?

4 Useefi mu holibaka gi u famii, u mati, anga den baala anga sisa aini a kemeente (1 Tesalonikasama 2:10, 11). Ma a moo pelensipali sani, a taki u mu du sani enke fa Yehofa taki. Neen gi u libi! (Openbaring 4:11) Wi o de koloku efu wi e du sani enke fa a wani. U sabi tu taki winsi polobelema efuso tesi e miti u, tokuso a san Yehofa taki u mu du. Aini a artikel ya, wi o luku fo fasi fa u sa du sani enke fa Yehofa wani: (1) Te a taanga gi u fu lesipeki wan sama di abi faantiwowtu, (2) te u mu luku sama se wi e teke, (3) te wan baala di abi faantiwowtu nai fusutan u efuso du wan sani di hati u, anga (4) te a taanga gi u fu du san u paamisi.

TE A TAANGA GI U FU LESIPEKI WAN SAMA DI ABI FAANTIWOWTU

5. Saide a á be makiliki gi den Islayelisama fu dini Yehofa di Saul be e tii?

5 Kownu Saul be e taangayesi Yehofa. Neen meke a á be makiliki gi Yonatan anga den Islayelisama. Boiti dati, Yehofa a á be e holibaka gi Saul moo (1 Samuweli 15:17-23). Ma a be fika en omen yali ete fu a tii enke kownu. A be taanga gi a foluku fu dini Yehofa a ten de, bika a kownu di be e sidon na a „kownusutuu fu Yehofa” á be e tyai enseefi bun.1 Koloniki 29:23.

6. Fa u du sabi taki Yonatan be e du sani enke fa Yehofa wani?

6 Yonatan be e du san Yehofa wani winsi san be e pasa. Pakisei den sani di Yonatan du baka di en dda bigin taangayesi Yehofa (1 Samuweli 13:13, 14). Wan leisi den Filisteyasama ben kon anga 30.000 fetiwagi fu feti anga den Islayelisama. Ma Saul be abi 600 suudati namo. Boiti dati, neen anga Yonatan wawan too be abi feti sani. Ma Yonatan á be e feele. A á be feegete di a polofeiti Samuweli be taki: „Yehofa ná o gwe fika a foluku fi en, bika ai holi a gaan nen fi en a pakisei” (1 Samuweli 12:22). Yonatan taigi wan fu den suudati taki: „Sani á de di poi tapu Yehofa fu fii a foluku fi en, winsi anga  tyaipi efuso wantu sama namo.” Di Yonatan anga a suudati ya go feti anga den Filisteyasama, den kii 20 suudati. Yonatan be e fitoow Yehofa, neen meke Yehofa be yeepi en. Yehofa be meke a doti seke na a pisi pe den Filisteyasama be de. Di a doti seke neen den buuya. Den be bigin feti anga denseefi. A so den Islayelisama wini a feti.1 Samuweli 13:5, 15, 22; 14:1, 2, 6, 14, 15, 20.

7. Fa Yonatan be e libi anga en dda?

7 Winsi fa Saul be e taangayesi Yehofa, tokuso Yonatan be e aliki en te a be de fanowdu. Te en dda be e go feti anga den feyanti fu a foluku fu Yehofa, da a be e holibaka gi en.1 Samuweli 31:1, 2.

8, 9. Fa wi e soi taki wi e du sani enke fa Yehofa wani te wi e lesipeki den sama di a gi faantiwowtu?

8 Leti enke Yonatan, wi e aliki Yehofa te wi e du san lanti taki. Boiti efu den wani u du wan sani di á bun. A Yehofa gi „lanti” a okasi fu tii. Neen meke a wani u saka useefi a den ondoo. (Leisi Romesama 13:1, 2.) Winsi den e bidiigi sama efuso nai tyai denseefi bun, tokuso u mu lesipeki den. Na a ala den sama di Yehofa gi faantiwowtu u mu lesipeki. 1 Korentesama 11:3; Hebrewsama 13:17.

Wan fasi fa u sa soi taki wi e holibaka gi Yehofa, a te wi e lesipeki u man efuso wi uman winsi den nai dini Yehofa (Luku paragraaf 9)

9 Olga, wan sisa di e tan aini Zuid-Ameekan, be du sani enke fa Yehofa wani, bika a be e lesipeki en man winsi fa a á be e libi bun anga en. [1] (Luku a pisi ete wan pelensipali sani.) Son leisi en man be e puu taki anga en. Fu di Olga a wan Kotoigi meke en man be e taigi en hati sani. A be taigi en tu taki a o teke den pikin, da a gwe fika en. Ma Olga á pai „ogii fu ogii”. A be e du ala san a man fu libi bun anga en. A be e boli gi en, a be e wasi en koosi. Boiti dati a be e yeepi wantu famii fu a man (Romesama 12:17). Te Olga be poi, a be e go anga en man, te a be e go luku den famii efuso den mati fi en. Di en pai dede, a seeka ala den sani di en man be abi fanowdu fu go na a beli. Di den go na a beli, a á go aini a keliki, ma a taampu a doose wakiti en man. Baka wantu yali, a man fu Olga be e libi moo bun anga en. A man be si taki a be abi pasensi anga en. A be si taki ai lesipeki en. Nownow na a man e gi en taanga-sikin fu go a komakandaa. Boiti dati, neen e tyai Olga go. Son leisi enseefi e go a komakandaa.1 Peitilisi 3:11.

TE U MU LUKU SAMA SE WI E TEKE

10. San yeepi Yonatan fu sabi sama a mu holibaka gi?

10 Di Saul taki a o kii David, a be taanga gi Yonatan fu luku sama se a o teke. Yonatan be wani holibaka gi en dda. Ma a be wani holibaka gi David tu. Fu di a be sabi taki Yehofa be de anga David, meke a holibaka gi en. A be sabi taki Yehofa á be e holibaka gi en dda moo. A taigi David fu a go kibii, neen a taigi Saul saide a á mu kii David.Leisi 1 Samuweli 19:1-6.

11, 12. Saide a lobi di u lobi Gadu o yeepi u fu du san a wani?

11 Alice, wan sisa di e tan aini Australiyakondee be mu luku sama se a o teke. Di den Kotoigi be e kon leli en, a be e taigi den famii fi en san a be e leli. A be taigi den tu fu saide a ná o fii bedaki moo. Tokuso den ati bigin boon neen. Den be e si enke Alice á be e booko en ede anga den moo. En mma be taigi en taki noiti moo a wani si en. Alice taki: „Ná pikin fii mi fii a sani ya, bika mi lobi mi famii. Ma, mi be abi fu soi taki a Yehofa anga en Manpikin mi moo lobi. Na a sani de meke mi dopu a wan fu den gaan komakandaa.”Mateyesi 10:37.

12 Efu wi á luku bun, da u sa bigin lobi sikoo, wan kondee, efuso den sama di e sport moo Yehofa. Wan baala di den e kai Henry be lobi pee schaak, wan sowtu sani enke dam. A be e pee a sani ya anga den pikin a sikoo. A be wani wini gi a sikoo fi en. Ma fu di a be e pee a sani ya ala sataa anga sonde, meke a á be e abi ten fu go a peleikiwooko anga komakandaa. Henry taki a pisi ten de a sikoo be pelensipali gi en moo Yehofa. Neen meke a á pee gi a sikoo moo.Mateyesi 6:33.

13. San o yeepi u te wi abi polobelema aini wi osufamii?

13 A á makiliki fu holibaka gi ala  den sama fu wi osufamii. Wan baala di den e kai Ken taki: „Fu di mi mma kon gaandi, meke mi e wani e go luku en. Son leisi mi e wani ai kon siibi anga u. Ma mi mma anga mi uman á be e kaba fusutan denseefi. Te mi wani du wan sani gi wan fu den, da a taawan ati e boon.” Di Ken sidon denki san Beibel e taki, neen a fusutan taki en uman mu kon na a fosi peesi te den sowtu sani ya e pasa. Neen meke a du san be bun gi en uman. Bakadati a taigi en uman saide a mu libi bun anga en mma. A taigi en mma tu saide a mu lesipeki en uman.Leisi Genesesi 2:24; 1 Korentesama 13:4, 5.

TE WAN BAALA NAI FUSUTAN U EFUSO TE A DU WAN HATI SANI ANGA U

14. Fa Saul libi takuu anga Yonatan?

14 Winsi wan fu den baala di e teke fesi du wan hati sani anga u, tokuso u mu du sani enke fa Yehofa wani. A Yehofa be poti Saul enke kownu, ma tokuso Saul á be e libi bun anga a boi fi en. Saul á be e fusutan saide Yonatan be lobi David. Saul ati be boon di Yonatan be wani yeepi David. Neen meke a gi Yonatan sen a sama ini. Tokuso Yonatan be e lesipeki en dda. Ma a be e du sani enke fa Yehofa wani tu. A be e holibaka gi David, bika a David Gadu be poti fu toon kownu.1 Samuweli 20:30-41.

15. San u mu du te wan baala du wan hati sani anga u?

 15 Aini a ten ya den owluman e meke moiti fu libi bun anga den baala anga sisa. Ma den e meke fowtu tu, bika den a sondu sama. Neen meke a ná ala yuu den e fusutan saide den baala anga sisa e du son sani (1 Samuweli 1:13-17). Efu wan leisi den á fusutan, yu á mu gwe fika Yehofa.

TE A TAANGA GI U FU DU SAN U PAAMISI

16. On ten u mu soi taki u nai denki useefi, ma wi e du sani enke fa Yehofa wani?

16 Saul á be wani David toon kownu, a Yonatan a be wani toon kownu (1 Samuweli 20:31). Ma Yonatan be lobi Yehofa. A á be e poti den weiti fi en a wan se. A á be e denki enseefi, neen meke a meke moiti fu toon David mati. Yonatan á kengi mofu di a paamisi David taki a o holibaka gi en. Den sama di lobi Yehofa e du san den „paamisi, winsi sani ná o waka bun gi” den (Psalm 15:4). Te u paamisi wan sama wan sani, u ná o kengi mofu, bika wi e du sani enke fa Yehofa wani. Te u piki taki wi o du wan wooko, wi o du san u paamisi, winsi sani á go enke fa u be wani. Te wi abi polobelema aini u toowlibi, wi o soi taki u lobi Yehofa te u nai fika u toowpaa.Leisi Maleyaki 2:13-16.

Fu di wi á wani taangayesi Yehofa, meke te u piki taki wi o du wan wooko, wi o du san u paamisi, winsi sani á go enke fa u be wani (Luku paragraaf 16)

17. Sowtu wini i fende fu a artikel ya?

17 U wani aliki Yehofa enke Yonatan, winsi a á makiliki. Neen meke u wani du san u man fu holibaka gi u baala anga sisa, winsi den du wan hati sani anga u. Yehofa o piisii. Wi o piisii tu (Odo 27:11). Ala yuu Yehofa o du sani di e meke u fende wini. A o solugu u tu. Aini a taa artikel wi o taki fu wantu sama fu a ten fu David di be e holibaka gi taawan. Wi o taki tu fu wantu sama di á be e holibaka gi taawan.

^ [1] (paragraaf 9) Son wan fu den nen aini a artikel ya kengi.